Read Aramaic Peshita Deuteronomy 13 Bible Online

Deuteronomy 13 - Aramaic Peshita bible

Deuteronomy 13

¹ܘܟܲܕ݂ ܢܩܘܼܡ ܒܲܝܢܵܬ̣ܟ݂ܘܿܢ ܢܒ̣ܝܼܵܐ ܐܵܘ ܚܵܠܹܡ ܚܸܠܡܹ̈ܐ: ܘܢܸܬܸ̇ܠ ܠܵܟ݂ ܐܵܬ̤ܵܐ ܘܬܸܕ݂ܡܘܼܪܬܵܐ.

²ܘܬܸܗܘܸܐ ܐܵܬ̤ܵܐ ܘܬܸܕ݂ܡܘܼܪܬܵܐ ܕܐܵܡܲܪ ܠܵܟ݂: ܘܢܹܐܡܲܪ ܠܵܟ݂ ܕܬ̣ܵܐ ܢܹܐܙܲܠ ܒܵܬܲܪ ܐܲܠܵܗܹ̈ܐ ܐ̄ܚܪ̈ܵܢܹܐ: ܕܠܵܐ ܝܵܕܲܥ ܐܲܢ̄ܬ̇ ܠܗܘܿܢ: ܘܢܸܦܠܘܿܚ ܐܸܢܘܿܢ.

³ܠܵܐ ܬܸܫܡܲܥ ܠܦܸܬ̣ܓ̣̇ܵܡܵܘ̈ܗܝ ܕܲܢܒ̣ܝܼܵܐ ܗܵܘ̇: ܐܵܘ ܕܚܵܠܹܡ ܚܸܠܡܹ̈ܐ ܗܵܘ̇: ܡܸܛܠ ܕܲܡܢܲܣܵܝܘܼ ܡܢܲܣܸܐ ܠܟ݂ܘܿܢ ܡܵܪܝܵܐ ܐܲܠܵܗܟ݂ܘܿܢ: ܕܢܸܕܲܥ ܐܸܢ ܪܵܚܡܝܼܢ ܐ̄ܢܬ̇ܘܿܢ ܠܹܗ ܠܡܵܪܝܵܐ ܐܲܠܵܗܟ݂ܘܿܢ: ܡ̣ܢ ܟܠܹܗ ܠܸܒ̇ܟ݂ܘܿܢ: ܘܡ̣ܢ ܟܠܵܗ̇ ܢܲܦ̮ܫܟ݂ܘܿܢ.

⁴ܒܵܬܲܪ ܡܵܪܝܵܐ ܐܲܠܵܗܟ݂ܘܿܢ ܙܸܠܘ: ܘܠܹܗ ܕܚܲܠܘ: ܘܦܘܼܩܕܵܢܵܘ̈ܗܝ ܛܲܪܘ: ܘܠܹܗ ܫܡܲܥܘܼ: ܘܠܹܗ ܦܠܘܿܚܘ: ܘܠܹܗ ܐܸܬ̣ܢܲܩܲܦܘ.

⁵ܘܲܢܒ̣ܝܼܵܐ ܗܵܘ̇: ܐܵܘ ܚܵܠܹܡ ܚܸܠܡܹ̈ܐ ܗܵܘ̇: ܢܸܬ̣ܩܲܛܸܠ: ܥܲܠ ܕܡܲܠܸܠ ܥܵܘ̣ܠܵܐ ܩܕ݂ܵܡ ܡܵܪܝܵܐ ܐܲܠܵܗܟ݂ܘܿܢ: ܕܐܲܦܸܩܟ݂ܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܘܲܦܪܲܩܟ݂ܘܿܢ ܡ̣ܢ ܒܹܝܬ̣ ܥܲܒ̣ܕ̇ܘܼܬ̣ܵܐ: ܕܢܲܛܥܹܝܟ݂ ܡ̣ܢ ܐܘܼܪܚܵܐ ܕܦܲܩܕܵܟ݂ ܡܵܪܝܵܐ ܐܲܠܵܗܵܟ݂ ܠܡܹܐܙܲܠ ܒܵܗ̇: ܘܒܲܥܲܪ ܒܝܼܫܬܵܐ ܡ̣ܢ ܓܵܘܵܟ݂.

⁶ܘܐܸܢ ܢܓܲܪܓ̣ܵܟ݂ ܐܲܚܘܼܟ݂ ܒܲܪ ܐܸܡܵܟ݂: ܐܵܘ ܒܪܵܟ݂: ܐܵܘ ܒܲܪܬ̣ܵܟ݂: ܐܵܘ ܐܲܢ̄ܬܲܬ̣ ܩܝܵܡܵܟ݂: ܐܵܘ ܪܵܚܡܵܟ݂ ܕܐܲܝܟ݂ ܢܲܦ̮ܣܵܟ݂: ܒܣܸܬ̣ܪܵܐ: ܘܢܹܐܡܲܪ ܠܵܟ݂: ܬܵܐ ܢܹܐܙܲܠ ܢܸܦܠܘܿܚ ܠܐܲܠܵܗܹ̈ܐ ܐ̄ܚܪ̈ܵܢܹܐ ܕܠܵܐ ܝܼܕܲܥܬ̇ ܐܲܢ̄ܬ̇ ܘܐܲܒ̣ܵܗܲܝ̈ܟ.

⁷ܡ̣ܢ ܐܲܠܵܗܹ̈ܐ ܕܥܲܡܡܹ̈ܐ ܕܒܲܚܕ݂ܵܪ̈ܲܝܟ̇ܘܿܢ: ܕܩܲܪܝܼܒ̣ܝܼܢ ܠܟ݂ܘܿܢ ܐܵܘ ܕܪܲܚܝܼܩܝܼܢ ܡܸܢܟ݂ܘܿܢ ܡ̣ܢ ܣܵܘ̈ܦܹܝܗ̇ ܕܐܲܪܥܵܐ ܘܲܥܕܲܡܵܐ ܠܣܵܘ̈ܦܹܝܗ̇ ܕܐܲܪܥܵܐ.

⁸ܠܵܐ ܬܸܬ̇ܛܦܝܼܣ ܡܸܢܹܗ: ܘܠܵܐ ܬܸܫܡܥܝܼܘܗܝ: ܘܠܵܐ ܬܚܘܼܣ ܥܲܝܢܵܟ݂ ܥܠܵܘܗܝ: ܘܠܵܐ ܬܪܲܚܸܡ: ܘܠܵܐ ܬܟܲܣܸܐ ܥܠܵܘܗܝ.

⁹ܐܸܠܵܐ ܡܸܩܛܲܠ ܩܛܘܿܠܲܝܗܝ: ܐܝܼܕ݂ܵܟ݂ ܬܫܲܪܸܐ ܒܹܗ ܠܘܼܩܕܲܡ ܠܡܸܩܛܠܹܗ ܘܐܝܼܕ݂ܵܐ ܕܟ݂ܠܹܗ ܥܲܡܵܐ ܒܐܲܚܪܵܝܬܵܐ.

¹⁰ܘܪܘܼܓ̣ܡܘܼܗܝ ܒܟܹܐܦܹ̈ܐ ܘܲܢܡܘܼܬ̣: ܥܲܠ ܕܲܒ̣ܥܵܐ ܠܡܲܛܥܵܝܘܼܬ̣ܵܟ݂ ܡ̣ܢ ܡܵܪܝܵܐ ܐܲܠܵܗܵܟ݂: ܕܐܲܦܩܵܟ݂ ܡ̣ܢ ܐܲܪܥܵܐ ܕܡܸܨܪܹܝܢ: ܡ̣ܢ ܒܹܝܬ̣ ܥܲܒ̣ܕ̇ܘܼܬ̣ܵܐ.

¹¹ܘܟ݂ܠܗܘܿܢ ܕܒܹܝܬ̣ ܝܼܣܪܵܝܹܠ ܢܸܫܡܥܘܼܢ ܘܢܸܕ݂ܚܠܘܼܢ: ܘܠܵܐ ܢܵܘܣܦܘܼܢ ܠܡܸܥܒܲܕ݂ ܐܲܝܟ݂ ܦܸܬ̣ܓ̣ܵܡܵܐ ܗܵܢܵܐ ܒܝܼܫܵܐ ܒܲܝܢܵܬ̣ܟ݂ܘܿܢ.

¹²ܘܟܲܕ݂ ܬܸܫܡܲܥ ܒܲܚܕ݂ܵܐ ܡ̣ܢ ܩܘܼܪ̈ܝܵܟ݂ ܕܝܵܗܹ̇ܒ̣ ܠܵܟ݂ ܡܵܪܝܵܐ ܐܲܠܵܗܵܟ݂ ܠܡܸܬܲܒ̣ ܒܵܗ̇: ܘܢܹܐܡܪܘܼܢ ܠܵܟ݂.

¹³ܢܦܲܩܘ ܓܲܒ̣ܪܹ̈ܐ ܒ̈ܢܲܝ ܚܛܵܐ ܡ̣ܢ ܓܵܘܵܟ݂: ܘܐܲܛܥܝܼܘ ܠܐ̄ܢܵܫܵܐ ܕܲܩܪܝܼܬ̣ܗܘܿܢ: ܘܐܸܡܲܪܘ ܢܹܐܙܲܠ ܢܸܦܠܘܿܚ ܠܐܲܠܵܗܹ̈ܐ ܐ̄ܚܪ̈ܵܢܹܐ ܕܠܵܐ ܝܼܕܲܥܬ̇ܘܿܢ.

¹⁴ܬܒܲܥ ܘܲܒ̣ܨܝܼ ܘܫܲܐܸܠ ܫܲܦܝܼܪ: ܐܸܢ ܫܲܪܝܼܪܵܐܝܼܬ̣ ܐܝܼܬ̣ܵܘܗܝ ܦܸܬ̣ܓ̣ܵܡܵܐ: ܘܐܸܬ̣ܥܲܒ̣ܕܲܬ̤ ܛܲܢܦܘܼܬ̣ܵܐ ܗܵܕܹܐ ܒܓ̣ܵܘܵܟ݂.

¹⁵ܚܪܘܿܒ̣ ܠܥܵܡܘܿܪܹ̈ܝܗ̇ ܕܲܩܪܝܼܬ̣ܵܐ ܗܵܝ̇ ܒܦܘܼܡܵܐ ܕܚܲܪܒܵܐ: ܚܪܘܿܒܹܝܗ̇ ܘܲܠܟ݂ܠ ܕܐܝܼܬ̣ ܒܵܗ̇: ܘܠܲܒ̣ܥܝܼܪܵܗ̇ ܒܦܘܼܡܵܐ ܕܚܲܪܒܵܐ.

¹⁶ܘܟ݂ܠܵܗ̇ ܒܸܙܬ̣ܵܗ̇ ܟܲܢܸܫ ܠܓ̣ܵܘ ܫܸܛܚܵܗ̇: ܘܐܵܘܩܕ݂ܝܼܗ̇ ܠܲܩܪܝܼܬ̣ܵܐ ܒܢܘܼܪܵܐ ܘܲܠܟ݂ܠܹܗ ܒܸܙܬ̣ܵܗ̇ ܠܲܓ̣ܡܲܪ ܩܕ݂ܵܡ ܡܵܪܝܵܐ ܐܲܠܵܗܵܟ݂: ܘܬܸܗܘܸܐ ܬܸܠܵܐ ܠܥܵܠܲܡ: ܘܬ̣ܘܼܒ̣ ܠܵܐ ܬܸܬ̣ܒ̇ܢܸܐ.

¹⁷ܘܠܵܐ ܢܸܕ݂ܒܲܩ ܒܐܝܼܕ݂ܵܟ݂ ܡܸܕܸ̇ܡ ܡ̣ܢ ܚܸܪܡܵܐ: ܕܢܸܬ̣ܦܢܸܐ ܡܵܪܝܵܐ ܡ̣ܢ ܚܸܡܬ̣ܵܐ ܕܪܘܼܓ̣ܙܹܗ: ܘܢܸܬܸ̇ܠ ܠܵܟ݂ ܪ̈ܲܚܡܵܐ ܘܲܢܪܲܚܸܡ ܥܠܲܝܟ: ܘܢܸܪܡܚܵܟ݂ ܘܢܲܣܓܹܝܟ݂ ܐܲܝܟ݂ ܕܝܼܡܵܐ ܠܐܲܒ̣ܵܗܲܝ̈ܟ.

¹⁸ܐܸܢ ܬܸܫܡܲܥ ܒܩܵܠܹܗ ܕܡܵܪܝܵܐ ܐܲܠܵܗܵܟ݂: ܘܬܸܛܲܪ ܦܘܼܩܕܵܢܵܘ̈ܗܝ ܕܲܡܦܲܩܸܕ݂ ܐ̄ܢܵܐ ܠܵܟ݂ ܝܵܘܡܵܢܵܐ: ܘܬܸܥܒܸ̇ܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ ܐܲܠܵܗܵܟ݂.