Read Aramaic Peshita Deuteronomy 18 Bible Online

Deuteronomy 18 - Aramaic Peshita bible

Deuteronomy 18

¹ܠܵܐ ܬܸܗܘܸܐ ܠܟ݂ܵܗܢܵܐ ܘܲܠܠܹܘܵܝܵܐ ܦܵܠܓܘܼܬ̣ܵܐ ܘܝܵܪܬ̇ܘܼܬ̣ܵܐ ܒܲܝܢܵܬ̣ ܒ̈ܢܲܝ ܝܼܣܪܵܝܹܠ: ܐܸܠܵܐ ܩܘܼܪ̈ܒܵܢܵܘܗܝ ܕܡܵܪܝܵܐ ܘܝܵܪܬ̇ܘܼܬܹܗ ܢܹܐܟ݂ܠܘܼܢ.

²ܘܝܵܪܬ̇ܘܼܬ̣ܵܐ ܠܵܐ ܬܸܗܘܸܐ ܠܹܗ ܒܲܝܢܵܬ̣ ܐܲܚܵܘ̈ܗܝ: ܡܵܪܝܵܐ ܗ̄ܘ̣ ܓܹܝܪ ܝܵܪܬ̇ܘܼܬܹܗ ܐܲܝܟ݂ ܕܐܸܡܲܪ ܠܹܗ.

³ܘܗܵܢܵܐ ܢܸܗܘܸܐ ܙܸܕܩܹܗ ܕܟ݂ܵܗܢܵܐ ܡ̣ܢ ܥܲܡܵܐ ܡ̣ܢ ܢܵܟ݂ܣܲܝ̈ ܢܸܟ݂ܣܬ̣ܵܐ: ܐܸܢ ܬܵܘܪܵܐ ܗ̄ܘ̣ ܐܵܘ ܐܸܡܪܵܐ: ܢܸܬܸ̇ܠ ܠܟ݂ܵܗܢܵܐ ܕܪܵܥܵܐ: ܘܦܲܟܵܐ: ܘܥܲܢܵܘܝܼܬ̣ܵܐ.

⁴ܪܹܫ ܥܒ̣ܘܼܪܵܟ݂: ܘܚܲܡܪܵܟ݂: ܘܡܸܫܚܵܟ݂: ܘܪܹܫ ܓܸܙܹ̈ܐ ܕܥܵܢܵܟ݂ ܗܲܒ̣ ܠܹܗ.

⁵ܡܸܛܠ ܕܠܹܗ ܓܒ̣ܵܐ ܡܵܪܝܵܐ ܐܲܠܵܗܵܟ݂ ܡ̣ܢ ܟܠܗܘܿܢ ܫܲܒ̣̈ܛܲܝܟ: ܕܲܢܩܘܼܡ ܘܲܢܫܲܡܸܫ ܒܲܫܡܹܗ ܕܡܵܪܝܵܐ ܐܲܠܵܗܵܟ݂: ܗܘ̤ ܘܲܒ̣ܢܵܘ̈ܗܝ: ܟܠܗܘܿܢ ܝܵܘ̈ܡܵܬ̣ܵܐ.

⁶ܘܐܸܢ ܢܹܐܪܸܐ ܠܹܘܵܝܵܐ ܚܲܕ݂ ܡ̣ܢ ܐܲܚܲܝ̈ܟ ܡ̣ܢ ܟܠܹܗ ܝܼܣܪܵܝܹܠ: ܡ̣ܢ ܐܲܬܲܪ ܕܥܵܡܲܪ: ܢܹܐܬܸܐ ܒܟ݂ܠ ܪܸܓܲܬ̣ ܢܲܦ̮ܫܹܗ ܠܐܲܬ̣ܪܵܐ ܕܓ̣ܵܒܹܐ ܡܵܪܝܵܐ.

⁷ܘܲܢܫܲܡܸܫ ܒܲܫܡܹܗ ܕܡܵܪܝܵܐ ܐܲܠܵܗܹܗ: ܐܲܝܟ݂ ܟܠܗܘܿܢ ܐܲܚܵܘ̈ܗܝ ܠܹܘܵܝܹ̈ܐ ܕܩܵܝܡܝܼܢ ܬܲܡܵܢ ܩܕ݂ܵܡ ܡܵܪܝܵܐ.

⁸ܡܢܵܬ̣ܵܐ ܫܲܘܝܵܐܝܼܬ̣ ܢܹܐܟ݂ܠܘܼܢ ܣܛܲܪ ܡ̣ܢ ܙܸܒ̣ܢܵܐ ܕܐܲܒ̣ܵܗܹ̈ܐ.

⁹ܘܡܵܐ ܕܥܲܠܲܬ̣ ܠܐܲܪܥܵܐ ܕܝܵܗܹ̇ܒ̣ ܠܵܟ݂ ܡܵܪܝܵܐ ܐܲܠܵܗܵܟ݂: ܠܵܐ ܬܹܐܠܲܦ ܠܡܸܥܒܲܕ݂ ܐܲܝܟ݂ ܥܒ̣ܵܕܲܝ̈ܗܘܿܢ ܕܥܲܡܡܹ̈ܐ ܗܵܢܘܿܢ.

¹⁰ܢܸܫܬ̇ܟܲܚ ܒܵܟ݂ ܕܡܲܥܒܲܪ ܒܪܹܗ ܐܵܘ ܐܵܘ ܒܲܪܬܹܗ ܒܢܘܼܪܵܐ: ܩܵܨܹܡ ܩܸܨܡܵܐ: ܘܲܕ݂ܡܲܐܚܸܕ݂ ܥܲܝ̈ܢܹܐ: ܘܕܲܡܢܲܚܸܫ: ܘܲܕ݂ܚܲܪܵܫ.

¹¹ܘܕ݂ܵܐܫܹܦ ܒܐܸܫܦܵܐ: ܘܲܕ݂ܫܵܐܹܠ ܡ̣ܢ ܙܲܟ̇ܘܼܪܹ̈ܐ: ܘܡ̣ܢ ܝܲܕ̇ܘܼ̈ܥܹܐ: ܘܫܵܐܹܠ ܠܡܝܼ̈ܬܹܐ.

¹²ܡܸܛܠ ܕܲܛܡܲܐ ܗ̄ܘ̣ ܩܕ݂ܵܡ ܡܵܪܝܵܐ ܐܲܠܵܗܵܟ݂ ܟܠܡ̇ܢ ܕܥܵܒܹܕ݂ ܗܵܠܹܝܢ: ܘܡܸܛܠ ܛܲܢ̈ܦܘܵܬ̣ܵܐ ܗܵܠܹܝܢ ܡܵܘܒܸ̇ܕ݂ ܠܗܘܿܢ ܡܵܪܝܵܐ ܐܲܠܵܗܵܟ݂ ܡ̣ܢ ܩܕ݂ܵܡܲܝܟ.

¹³ܗ̤ܘܲܝܬ̇ ܬܲܡܝܼܡ ܩܕ݂ܵܡ ܡܵܪܝܵܐ ܐܲܠܵܗܵܟ݂.

¹⁴ܡܸܛܠ ܕܥܲܡܡܹ̈ܐ ܗܵܠܹܝܢ ܕܝܵܪܹܬ̣ ܐܲܢ̄ܬ̇ ܠܗܘܿܢ: ܠܙܲܟ̇ܘܼܪܹ̈ܐ ܘܲܠܩܵܨܘܿܡܹ̈ܐ ܫܵܡܥܝܼܢ: ܐܲܢ̄ܬ̇ ܕܹܝܢ ܠܵܐ ܗ̄ܘ̣ܵܐ ܗܵܟܲܢܵܐ ܝܵܗܹ̇ܒ̣ ܠܵܟ݂ ܡܵܪܝܵܐ ܐܲܠܵܗܵܟ݂.

¹⁵ܢܒ̣ܝܼܵܐ ܡ̣ܢ ܓܵܘܵܟ݂ ܘܡ̣ܢ ܐܲܚܲܝ̈ܟ ܐܲܟ݂ܘܿܬ̣ܝ ܢܩܝܼܡ ܠܵܟ݂ ܡܵܪܝܵܐ ܐܲܠܵܗܵܟ݂: ܠܹܗ ܗ̤ܘܲܝܬ̇ܘܿܢ ܫܵܡܥܝܼܢ.

¹⁶ܐܲܝܟ݂ ܕܲܫܐܸܠܬ̇ ܡ̣ܢ ܩܕ݂ܵܡ ܡܵܪܝܵܐ ܐܲܠܵܗܵܟ݂ ܒܚܘܿܪܝܼܒ̣ ܒܝܵܘܡܵܐ ܕܲܟ݂ܢܘܼܫܝܵܐ: ܘܐܸܡܲܪܬ̇. ܠܵܐ ܐܵܘܣܸܦ ܠܡܸܫܡܲܥ ܩܵܠܹܗ ܕܡܵܪܝܵܐ ܐܲܠܵܗܝ: ܘܗܵܕܹܐ ܢܘܼܪܵܐ ܪܲܒ̇ܬ̣ܵܐ ܬܘܼܒ̣ ܠܵܐ ܐܸܚܙܸܐ ܕܠܵܐ ܐܹܡܘܼܬ̣.

¹⁷ܘܐܸܡܲܪ ܠܝܼ ܡܵܪܝܵܐ: ܫܲܦܝܼܪ ܟܠܡܸܕܸ̇ܡ ܕܡܲܠܸܠܘ.

¹⁸ܢܒ̣ܝܼܵܐ ܐܲܩܝܼܡ ܠܗܘܿܢ ܡ̣ܢ ܓܵܘ ܐܲܚܲܝ̈ܗܘܿܢ ܐܲܟ݂ܘܵܬ̣ܵܟ݂ ܘܐܸܬܸ̇ܠ ܦܸܬ̣ܓ̣ܵܡܲܝ̈ ܒܦܘܼܡܹܗ: ܘܢܹܐܡܲܪ ܠܗܘܿܢ ܟܠܡܸܕܸ̇ܡ ܕܐܹܦܲܩܕ݂ܝܼܘܗܝ.

¹⁹ܘܓܲܒ̣ܪܵܐ ܕܠܵܐ ܢܸܫܡܲܥ ܠܦܸܬ̣ܓ̣ܵܡܲܝ̈ ܕܲܢܡܲܠܸܠ ܒܫܹܡܝ: ܐܸܢܵܐ ܐܸܬ̣ܒܲܥ ܡܸܢܹܗ.

²⁰ܒܪܲܡ ܕܹܝܢ ܢܒ̣ܝܼܵܐ ܕܢܲܡܪܲܚ ܠܲܡܡܲܠܵܠܘܼ ܡܸܠܬ̣ܵܐ ܒܫܹܡܝ: ܕܠܵܐ ܦܲܩܕ̇ܬܹܗ ܠܡܹܐܡܲܪ: ܘܕܲܢܡܲܠܸܠ ܒܫܸܡ ܐܲܠܵܗܹ̈ܐ ܐ̄ܚܪ̈ܵܢܹܐ: ܢܸܬ̣ܩܛܸܠ ܢܒ̣ܝܼܵܐ ܗܵܘ̇.

²¹ܘܐܸܢ ܬܹܐܡܲܪ ܒܠܸܒܵܟ݂ ܐܲܝܟܲܢܵܐ ܬܸܕ̇ܥܝܼܘܗܝ ܠܦܸܬ̣ܓ̣ܵܡܵܐ ܕܠܵܐ ܐܲܡܪܹܗ ܡܵܪܝܵܐ.

²²ܡܵܐ ܕܡܲܠܸܠ ܢܒ̣ܝܼܵܐ ܒܲܫܡܹܗ ܕܡܵܪܝܵܐ: ܘܠܵܐ ܗܘ̤ܵܐ ܦܸܬ̣ܓ̣ܵܡܵܐ ܗܵܘ̇: ܘܠܵܐ ܐܸܬ̣ܵܐ: ܗܘ̤ ܗܵܘ̇ ܦܸܬ̣ܓ̣ܵܡܵܐ ܠܵܐ ܡܲܠܸܠ ܡܵܪܝܵܐ: ܒܡܲܪܵܚܘܼܬ̣ܵܐ ܡܲܠܠܹܗ ܢܒ̣ܝܼܵܐ: ܠܵܐ ܬܸܕ݂ܚܠܘܼܢ ܡܸܢܹܗ.