Read Aramaic Peshita Deuteronomy 25 Bible Online

Deuteronomy 25 - Aramaic Peshita bible

Deuteronomy 25

¹ܘܐܸܢ ܢܸܗܘܸܐ ܕܝܼܢܵܐ ܒܹܝܬ̣ ܓܲܒ̣ܪܵܐ ܠܚܲܒ̣ܪܹܗ ܢܸܩܪܒ̣ܘܼܢ ܠܘܵܬ̣ ܕܲܝܵܢܹ̈ܐ ܘܲܢܕ݂ܘܼܢܘܼܢ ܐܸܢܘܿܢ: ܘܲܢܙܲܟ̇ܘܿܢ ܠܙܲܟܵܝܵܐ: ܘܲܢܚܲܝܒ̣ܘܼܢ ܠܚܲܝܵܒ̣ܵܐ.

²ܘܐܸܢ ܚܲܝܵܒ̣ ܡܲܪܕ̇ܘܼܬ̣ܵܐ ܚܲܝܵܒ̣ܵܐ: ܢܲܪܡܹܝܘܗܝ ܕܲܝܵܢܵܐ: ܘܲܢܢܲܓ̇ܕ݂ܝܼܘܗܝ ܩܕ݂ܵܡܵܘܗܝ ܐܲܝܟ݂ ܙܸܕܩܵܐ ܕܣܲܟ݂ܠܘܼܬܹܗ.

³ܒܡܸܢܝܵܢܵܐ ܐܲܪܒ̇ܥܝܼܢ ܢܢܲܓ̇ܕ݂ܘܼܢܹܗ: ܘܠܵܐ ܢܵܘܣܦܘܼܢ: ܕܠܵܐ ܟܲܕ݂ ܢܵܘܣܦܘܼܢ ܢܢܲܓ̇ܕ݂ܘܼܢܹܗ ܝܲܬ̇ܝܼܪ ܥܲܠ ܗܵܢܵܐ ܢܸܓ̣ܕܵܐ: ܢܸܬ̣ܩܠܸܐ ܐܲܚܘܼܟ݂ ܠܥܹܝܢܲܝܟ.

⁴ܠܵܐ ܬܸܒ̣ܠܘܼܡ ܬܵܘܪܵܐ ܒܲܕ݂ܪܵܟ݂ܬܵܐ.

⁵ܘܟܲܕ݂ ܢܸܬܒ̣ܘܼܢ ܐܲܚܹ̈ܐ ܐܲܟ݂ܚܕ݂ܵܐ: ܘܲܢܡܘܼܬ̣ ܚܲܕ݂ ܡܸܢܗܘܿܢ: ܘܠܲܝܬ̇ ܠܹܗ ܒܪܵܐ: ܠܵܐ ܬܸܗܘܸܐ ܐܲܢ̄ܬ̇ܬܹܗ ܕܡܝܼܬ̣ܵܐ ܠܓܲܒ̣ܪܵܐ ܢܘܼܟ݂ܪܵܝܵܐ: ܐܸܠܵܐ ܝܲܒ̣ܡܵܗ̇ ܢܸܣܒ̣ܝܼܗ̇: ܘܬܸܗܘܸܐ ܠܹܗ ܐܲܢ̄ܬ̇ܬ̣ܵܐ ܘܲܢܝܲܒ̇ܡܝܼܗ̇.

⁶ܘܒ̣ܘܼܟ݂ܪܵܐ ܕܝܵܠܕܵܐ: ܢܸܫܬܲܡܸܐ ܥܲܠ ܫܡܵܐ ܕܐܲܚܘܼܗܝ ܡܝܼܬ̣ܵܐ: ܕܠܵܐ ܢܸܬ̇ܛܥܸܐ ܫܡܹܗ ܡ̣ܢ ܝܼܣܪܵܝܹܠ.

⁷ܘܐܸܢ ܠܵܐ ܨܵܒܹܐ ܓܲܒ̣ܪܵܐ ܕܢܸܣܲܒ̣ ܐܲܢ̄ܬܲܬ̣ ܐܲܚܘܼܗܝ: ܬܸܣܲܩ ܐܲܢ̄ܬܲܬ̣ ܐܲܚܘܼܗܝ ܠܬܲܪܥܵܐ ܠܘܵܬ̣ ܣܵܒܹ̈ܐ: ܘܬܹܐܡܲܪ: ܠܵܐ ܨܵܒܹܐ ܝܲܒ̣ܡ̄ܝ ܕܲܢܩܝܼܡ ܠܐܲܚܘܼܗܝ ܫܡܵܐ ܒܝܼܣܪܵܝܹܠ: ܘܠܵܐ ܨܵܒܹܐ ܠܡܸܣܒܲܢܝ.

⁸ܢܸܩܪܘܿܢܹܗ ܣܵܒܹ̈ܐ ܕܲܩܪܝܼܬܹܗ ܘܲܢܡܲܠܠܘܼܢ ܥܲܡܹܗ: ܘܐܸܢ ܢܩܘܼܡ ܘܢܹܐܡܲܪ ܕܠܵܐ ܢܵܣܹܒ̣ ܐ̄ܢܵܐ ܠܵܗ̇.

⁹ܬܸܩܪܘܿܒ̣ ܝܼܒܲܡܬܹܗ ܠܘܵܬܹܗ ܩܕ݂ܵܡ ܣܵܒܹ̈ܐ: ܘܬܸܫܪܸܐ ܡܣܵܢܹܗ ܡ̣ܢ ܪܸܓ̣ܠܹܗ: ܘܬܸܪܘܿܩ ܒܐܲܦܵܘ̈ܗܝ: ܘܬܹܐܡܲܪ: ܗܵܟܲܢܵܐ ܢܸܬ̣ܥܒܸܕ݂ ܠܓܲܒ̣ܪܵܐ ܕܠܵܐ ܢܸܒ̣ܢܸܐ ܒܲܝܬܵܐ ܠܐܲܚܘܼܗܝ.

¹⁰ܘܢܸܬ̣ܩܢܸܐ ܫܡܹܗ ܒܝܼܣܪܵܝܹܠ ܒܹܝܬ̣ ܫܵܪܹܐ ܡܣܵܢܹ̈ܐ.

¹¹ܘܟܲܕ݂ ܢܸܨܘܼܢ ܓܲܒ̣ܪܵܐ ܘܐܲܚܘܼܗܝ ܚܲܕ݂ ܥܲܡ ܚܲܕ݂: ܘܬܸܩܪܘܿܒ̣ ܐܲܢ̄ܬܲܬ̣ ܚܲܕ݂ ܡܸܢܗܘܿܢ ܠܲܡܦܲܨܵܝܘܼ ܒܲܥܠܵܗ̇ ܡ̣ܢ ܐܝܼܕܲܝ̈ ܡ̇ܢ ܕܡܸܬ̣ܟܲܬܲܫ ܥܲܡܹܗ: ܘܬ̣ܵܘܫܸܛ ܐܝܼܕ݂ܵܗ̇ ܘܬܹܐܚܘܿܕ݂ ܒܚܲܢܹܗ.

¹²ܦܣܘܿܩ ܐܝܼܕܪܵܗ̇: ܘܠܵܐ ܬܚܘܼܣ ܥܲܝܢܵܟ݂ ܥܠܹܝܗ̇.

¹³ܠܵܐ ܢܸܗܘܸܐ ܠܵܟ݂ ܒܡܲܪܣܘܼܦܵܟ݂ ܡܸܬ̣ܩܵܠܵܐ ܘܡܲܬ̣ܩܵܠܵܐ: ܪܲܒܵܐ ܘܲܙܥܘܿܪܬܵܐ.

¹⁴ܠܵܐ ܬܸܗܘܸܐ ܠܵܟ݂ ܒܒܲܝܬܵܟ݂ ܟܝܵܠܬܵܐ ܘܲܟ݂ܝܵܠܬܵܐ: ܪܲܒ̇ܬ̣ܵܐ ܘܲܙܥܘܿܪܬܵܐ.

¹⁵ܡܲܬ̣ܩܵܠܵܐ ܫܲܠܡܵܐ ܕܙܲܕ̇ܝܼܩܘܼܬ̣ܵܐ ܢܸܗܘܸܐ ܠܵܟ݂: ܘܲܟ݂ܝܵܠܬܵܐ ܬܪܝܼܨܬܵܐ ܕܙܲܕ̇ܝܼܩܘܼܬ̣ܵܐ ܬܸܗܘܸܐ ܠܵܟ݂: ܕܢܸܣܓ̇ܘܿܢ ܝܵܘ̈ܡܲܝܟ ܒܐܲܪܥܵܐ ܕܝܵܗܹ̇ܒ̣ ܠܵܟ݂ ܡܵܪܝܵܐ ܐܲܠܵܗܵܟ݂.

¹⁶ܡܸܛܠ ܕܲܛܡܲܐ ܗ̄ܘ̣ ܩܕ݂ܵܡ ܡܵܪܝܵܐ ܐܲܠܵܗܵܟ݂ ܟܠܡ̇ܢ ܕܥܵܒܹܕ݂ ܗܵܠܹܝܢ: ܘܟ݂ܠ ܡ̇ܢ ܕܥܵܒܹܕ݂ ܥܵܘܠܵܐ.

¹⁷ܐܸܬ̄ܕܲܟ݂ܪ ܟܠܡܸܕܸ̇ܡ ܕܲܥܒܲܕ ܠܵܟ݂ ܥܡܵܠܹܝܩ ܒܐܘܼܪܚܵܐ: ܟܲܕ݂ ܢܦܲܩܬ̇ܘܿܢ ܡ̣ܢ ܡܸܨܪܹܝܢ.

¹⁸ܕܐܲܪܥܟ݂ܘܿܢ ܒܚܲܪܒܵܐ: ܘܩܲܛܸܠ ܒܟ݂ܘܼܢ ܟܠ ܕܦܵܫ ܒܵܬ̣ܪܟ݂ܘܿܢ: ܘܐܲܢ̄ܬ̇ ܡܛܲܪܲܦ ܘܲܠܐܸܐ: ܘܠܵܐ ܕܚܸܠ ܡ̣ܢ ܩܕ݂ܵܡ ܡܵܪܝܵܐ ܐܲܠܵܗܵܟ݂.

¹⁹ܘܡܵܐ ܕܐܲܢܝܼܚ ܠܵܟ݂ ܡܵܪܝܵܐ ܐܲܠܵܗܵܟ݂ ܡ̣ܢ ܟܠܗܘܿܢ ܒܥܸܠܕ̇ܒ̣ܵܒܲܝ̈ܟ ܕܒܲܚܕ݂ܵܪ̈ܲܝܟ: ܒܐܲܪܥܵܐ ܕܝܵܗܹ̇ܒ̣ ܠܵܟ݂ ܡܵܪܝܵܐ ܝܘܼܪܬܵܢܵܐ: ܥܛܝܼ ܕܘܼܟ݂ܪܵܢܹܗ ܕܲܥܡܵܠܹܝܩ ܡ̣ܢ ܬܚܹܝܬ̣ ܫܡܲܝܵܐ: ܘܠܵܐ ܬܸܛܥܸܐ.