Read Aramaic Peshita Deuteronomy 29 Bible Online

Deuteronomy 29 - Aramaic Peshita bible

Deuteronomy 29

¹ܗܵܠܹܝܢ ܦܸܬ̣ܓ̣ܵܡܹ̈ܐ ܕܲܩܝܵܡܵܐ ܕܦܲܩܸܕ݂ ܡܵܪܝܵܐ ܠܡܘܼܫܹܐ: ܠܲܡܩܵܡܘܼ ܥܲܡ ܒ̈ܢܲܝ ܝܼܣܪܵܝܹܠ ܒܐܲܪܥܵܐ ܕܡܘܼܐܵܒ̣: ܣܛܲܪ ܡ̣ܢ ܩܝܵܡܵܐ ܕܐܲܩܝܼܡ ܥܲܡܗܘܿܢ ܒܚܘܿܪܝܼܒ̣.

²ܘܲܩܪܵܐ ܡܘܼܫܹܐ ܠܟ݂ܠܹܗ ܝܼܣܪܵܝܹܠ: ܘܐܸܡܲܪ ܠܗܘܿܢ: ܐܲܢ̄ܬ̇ܘܿܢ ܚܙܲܝܬ̇ܘܿܢ ܟܠ ܡܸܕܸ̇ܡ ܕܲܥܒܲܕ݂ ܡܵܪܝܵܐ ܠܥܹܢܲܝܟ̇ܘܿܢ ܒܐܲܪܥܵܐ ܕܡܸܨܪܹܝܢ: ܠܦܸܪܥܘܿܢ ܘܲܠܟ݂ܠܗܘܿܢ ܥܲܒ̣ܕܵܘ̈ܗܝ: ܘܲܠܟ݂ܠܹܗ ܥܲܡܹܗ: ܘܲܠܟ݂ܠܵܗ̇ ܐܲܪܥܹܗ.

³ܢܸܣܝܘܿܢܹ̈ܐ ܪܵܘܪ̈ܒܹܐ ܕܲܚ̈ܙܲܝ ܥܲܝܢܲܝ̈ܟ̇ܘܿܢ: ܐܵܬ̣̈ܘܵܬ̣ܵܐ: ܘܬܸܕ݂ܡܪ̈ܵܬ̣ܵܐ ܪܵܘܪ̈ܒ̣ܵܬ̣ܵܐ ܗܵܠܹܝܢ ܕܲܚܙܲܝܬ̇ܘܿܢ.

⁴ܘܠܵܐ ܝܲܗ̄ܒ̣ ܠܟ݂ܘܿܢ ܡܵܪܝܵܐ ܠܸܒܵܐ ܠܡܸܕܲܥ: ܘܥܲܝ̈ܢܹܐ ܠܡܸܚܙܵܐ: ܘܐܸܕ݂ܢܹ̈ܐ ܠܡܸܫܡܲܥ ܥܕܲܡܵܐ ܠܝܵܘܡܵܢܵܐ.

⁵ܘܕܲܒܲܪܟ݂ܘܿܢ ܐܲܪܒ̇ܥܝܼܢ ܫܢܝܼ̈ܢ ܒܡܲܕ݂ܒ̇ܪܵܐ: ܠܵܐ ܒܠܝܼܘ ܢܲܚܬܲܝ̈ܟ̇ܘܿܢ ܡܸܢܟ݂ܘܿܢ: ܘܲܡܣܵܢܲܝ̈ܟ̇ܘܿܢ ܠܵܐ ܒܠܝܼܘ ܡ̣ܢ ܪܸܓ̣ܠܲܝܟ̇ܘܿܢ.

⁶ܘܠܲܚܡܵܐ ܠܵܐ ܐܸܟܲܠܬܲܘܿܢ: ܘܚܲܡܪܵܐ ܘܫܲܟ݂ܪܵܐ ܠܵܐ ܐܸܫܬ̇ܝܼܬ̇ܘܿܢ: ܡܸܛܠ ܕܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ݂ܘܿܢ.

⁷ܘܐܲܝܼܬ̇ܝܼܬ̇ܘܿܢ ܠܐܲܬ̣ܪܵܐ ܗܵܢܵܐ: ܘܲܢܦܲܩ ܣܝܼܚܘܿܢ ܡܲܠܟܵܐ ܕܚܸܫܒ̇ܘܿܢ: ܘܥܘܿܓ̣ ܡܲܠܟܵܐ ܕܡܲܬ̣ܢܝܼܢ ܠܐܘܼܪܥܲܢ ܠܲܩܪܵܒ̣ܵܐ: ܘܲܚܪܲܒ̣ܢ ܐܸܢܘܿܢ.

⁸ܘܲܢܣܲܒ̣ܢ ܐܲܪܥܗܘܿܢ: ܘܝܲܗ̄ܒ̣ܢܵܗ̇ ܝܘܼܪܬܵܢܵܐ ܠܪܘܼܒܹܝܠ: ܘܲܠܓ̣ܵܕ݂: ܘܲܠܦܸܠܚܹܗ ܕܫܲܒ̣ܛܵܐ ܕܲܡܢܲܫܹܐ.

⁹ܛܲܪܘ ܦܘܼܩ̈ܕܵܢܵܘܗܝ ܕܢܵܡܘܿܣܵܐ ܗܵܢܵܐ: ܘܲܥܒܸܕ݂ܘ ܐܸܢܘܿܢ: ܕܲܗ̤ܘܲܝܬ̇ܘܿܢ ܡܲܣܩܝܼܢ ܠܪܹܫ ܟܠ ܡܸܕܸ̇ܡ ܕܥܵܒ̣ܕ̇ܝܼܢ ܐ̄ܢܬ̇ܘܿܢ.

¹⁰ܐܲܢ̄ܬ̇ܘܿܢ ܩܵܝ̇ܡܝܼܢ ܐܲܢ̄ܬ̇ܘܿܢ ܝܵܘܡܵܢܵܐ ܩܕ݂ܵܡ ܡܵܪܝܵܐ ܐܲܠܵܗܟ݂ܘܿܢ: ܟܠܗܘܿܢ ܪܹ̈ܫܲܝ ܫܲܒ̣ܛܲܝ̈ܟ̇ܘܿܢ: ܘܣܵܒܲܝ̈ܟ̇ܘܿܢ: ܘܣܵܦܪ̈ܲܝܟ̇ܘܿܢ: ܟܠܗܘܿܢ ܓܲܒ̣ܪܹ̈ܐ ܕܝܼܣܪܵܝܹܠ.

¹¹ܘܝܼܩܲܪܬ̇ܟ݂ܘܿܢ: ܘܢܸܫܲܝ̈ܟ̇ܘܿܢ: ܘܥܵܡܘܿܪܵܐ ܕܲܒ̣ܓ̣ܵܘ ܡܲܫܪܝܼܬ̣ܵܟ݂: ܡ̣ܢ ܠܵܩܹܛ ܩܲܝ̈ܣܲܝܟ: ܘܲܥܕܲܡܵܐ ܠܡܵܠܹܐ ܡܲܝ̈ܟ.

¹²ܕܠܵܐ ܬܸܥܒ̇ܕ݂ܘܼܢ ܥܲܠ ܩܝܵܡܹܗ ܕܡܵܪܝܵܐ ܐܲܠܵܗܟ݂ܘܿܢ: ܘܥܲܠ ܡܵܘ̈ܡܵܬܹܗ ܕܡܵܪܝܵܐ ܐܲܠܵܗܟ݂ܘܿܢ: ܕܐܲܩܝܼܡ ܥܲܡܟ݂ܘܿܢ ܝܵܘܡܵܢܵܐ.

¹³ܡܸܛܠ ܕܲܢܩܝܼܡܵܟ݂ ܠܹܗ ܝܵܘܡܵܢܵܐ ܥܲܡܵܐ: ܘܗܘ̤ ܢܸܗܘܸܐ ܠܵܟ݂ ܐܲܠܵܗܵܐ ܐܲܝܟ݂ ܕܐܸܡܲܪ ܠܵܟ݂: ܘܐܲܝܟ݂ ܕܝܼܡܵܐ ܠܐܲܒ̣ܵܗܲܝ̈ܟ: ܠܐܲܒ̣ܪܵܗܵܡ: ܘܠܐܝܼܣܚܵܩ: ܘܲܠܝܲܥܩܘܿܒ̣.

¹⁴ܠܵܐ ܗ̄ܘ̣ܵܐ ܥܲܡܟ݂ܘܿܢ ܒܲܠܚܘܿܕܲܝܟ̇ܘܿܢ ܡܩܝܼܡ ܐ̄ܢܵܐ ܩܝܵܡܵܐ ܗܵܢܵܐ ܘܡܵܘܡܵܬ̣ܵܐ ܗܵܕܹܐ.

¹⁵ܐܸܠܵܐ ܥܲܡ ܟܠܡ̇ܢ ܕܗܵܪܟܵܐ ܗ̄ܘ̣: ܘܥܲܡܲܢ ܩܵܐܹ̇ܡ ܝܵܘܡܵܢܵܐ ܩܕ݂ܵܡ ܡܵܪܝܵܐ ܐܲܠܵܗܲܢ: ܘܥܲܡ ܟܠ ܡ̇ܢ ܕܠܵܐ ܗ̄ܘ̣ܵܐ ܥܲܡܲܢ ܗܵܪܟܵܐ ܝܵܘܡܵܢܵܐ.

¹⁶ܡܸܛܠ ܕܐܲܢ̄ܬ̇ܘܿܢ ܝܵܕ݂ܥܝܼܢ ܐܲܢ̄ܬ̇ܘܿܢ: ܕܲܥܡܲܪܢ ܒܐܲܪܥܵܐ ܕܡܸܨܪܹܝܢ: ܘܲܥܒܲܕܢ ܒܹܝܬ̣ ܥܲܡܡܹ̈ܐ ܕܲܥܒܲܪܬ̇ܘܿܢ.

¹⁷ܘܲܚܙܲܝܬ̇ܘܿܢ ܛܲܢܦ̈ܘܵܬ̣ܗܘܿܢ: ܘܕܸܚ̈ܠܵܬ̣ܗܘܿܢ ܕܩܲܝܣܵܐ: ܘܲܕ݂ܟܹܐܦܵܐ: ܘܲܕ݂ܣܹܐܡܵܐ: ܘܲܕ̇ܕܲܗܒ̣ܵܐ: ܕܲܩܪܝܼܡܝܼܢ.

¹⁸ܕܲܠܡܵܐ ܐܝܼܬ̣ ܒܟ݂ܘܿܢ ܓܲܒ̣ܪܵܐ: ܐܵܘ ܐܲܢ̄ܬ̇ܬ̣ܵܐ: ܐܵܘ ܫܲܪܒ̇ܬ̣ܵܐ: ܐܵܘ ܫܲܒ̣ܛܵܐ: ܕܣܵܛܹܐ ܠܸܒܹ̇ܗ ܝܵܘܡܵܢܵܐ ܡ̣ܢ ܡܵܪܝܵܐ ܐܲܠܵܗܲܢ: ܠܡܹܐܙܲܠ ܠܡܸܦܠܲܚ ܠܐܲܠܵܗܹ̈ܐ ܕܥܲܡܡܹ̈ܐ ܗܵܢܘܿܢ: ܕܲܠܡܵܐ ܐܝܼܬ̣ ܒܟ݂ܘܿܢ ܥܸܩܵܪܵܐ ܕܡܵܘܥܸܐ ܡܸܪܬ̣ܵܐ ܘܓܸـ̈ܕ̇ܕܹܐ.

¹⁹ܘܡܵܐ ܕܲܫܡܲܥ ܦܸܬ̣ܓ̣ܵܡܹ̈ܐ ܕܡܵܘܡܵܬ̣ܵܐ ܗܵܕܹܐ: ܢܸܬ̣ܚܲܫܲܒ̣ ܒܠܸܒܹ̇ܗ: ܘܢܹܐܡܲܪ: ܫܠܵܡܵܐ ܢܸܗܘܸܐ ܠܝܼ ܕܲܒ̣ܨܸܒ̣ܝܵܢ ܠܹܒ̇ܝ ܐܵܙܹܠ ܐ̄ܢܵܐ: ܕܢܵܘܣܸܦ ܪܵܘܵܝܘܼܬ̣ܵܐ ܥܲܠ ܨܸܗܝܘܼܬ̣ܵܐ.

²⁰ܠܵܐ ܢܸܨܛܒܸܐ ܡܵܪܝܵܐ ܠܡܸܫܒܲܩ ܠܹܗ: ܐܸܠܵܐ ܗܵܝܕܹ̇ܝܢ ܢܸܥܫܲܢ ܪܘܼܓ̣ܙܹܗ ܕܡܵܪܝܵܐ ܘܲܛܢܵܢܹܗ ܒܓܲܒ̣ܪܵܐ ܗܵܘ̇: ܘܬܹܐܬܸܐ ܥܠܵܘܗܝ ܟܠܵܗ̇ ܠܵܘܛܬ̣ܵܐ ܕܲܟ݂ܬ̣ܝܼܒ̣ܵܐ ܒܲܟ݂ܬ̣ܵܒ̣ܵܐ ܗܵܢܵܐ: ܘܢܸܥܛܸܐ ܡܵܪܝܵܐ ܫܡܹܗ ܡ̣ܢ ܬܚܹܝܬ̣ ܫܡܲܝܵܐ.

²¹ܘܢܸܦܪܫܝܼܘܗܝ ܡܵܪܝܵܐ ܠܒ̣ܝܼܫܬܵܐ ܡ̣ܢ ܟܠܗܘܿܢ ܫܲܒ̣ܛܹ̈ܐ ܕܝܼܣܪܵܝܹܠ: ܐܲܝܟ݂ ܟܠܗܹܝܢ ܠܵܘ̈ܛܵܬ̣ܵܐ ܕܲܩܝܵܡܵܐ ܕܲܟ݂ܬ̣ܝܼ̈ܒ̣ܵܢ ܒܲܟ݂ܬ̣ܵܒ̣ܵܐ ܕܢܵܡܘܿܣܵܐ ܗܵܢܵܐ.

²²ܘܢܹܐܡܲܪ ܕܵܪܵܐ ܐ̄ܚܪܹܢܵܐ: ܒܢܲܝ̈ܟ̇ܘܿܢ ܕܲܢܩܘܼܡܘܼܢ ܒܵܬܲܪܟ݂ܘܿܢ: ܘܢܘܼܟ݂ܪ̈ܵܝܹܐ ܕܢܹܐܬ̣ܘܿܢ ܡ̣ܢ ܐܲܪܥܵܐ ܪܲܚܝܼܩܬܵܐ: ܘܢܸܚܙܘܼܢ ܡܲܚ̈ܘܵܬ̣ܵܗ̇ ܕܐܵܪܥܵܐ ܗܵܝ̇: ܘܟ݂ܘܼܪ̈ܗܵܢܹܐ ܕܐܲܝܬ̇ܝܼ ܥܠܹܝܗ̇ ܡܵܪܝܵܐ.

²³ܟܸܒ̣ܪܝܼܬܵܐ: ܘܡܸܠܚܵܐ ܝܲܩܝܼܕ̇ܬܵܐ: ܟܠܵܗ̇ ܐܲܪܥܵܐ ܠܵܐ ܬܸܙܕ̇ܪܲܥ: ܘܠܵܐ ܬܵܘܥܸܐ: ܘܠܵܐ ܢܸܣܲܒ̣ ܒܵܗ̇ ܟܠ ܥܣܸܒ̣: ܐܸܠܵܐ ܬܸܗܘܸܐ ܐܲܝܟ݂ ܨܒ̣ܘܿܐܵܝܹܡ ܕܲܗܦܲܟ݂ ܐܸܢܹܝܢ ܡܵܪܝܵܐ ܒܪܘܼܓ̣ܙܹܗ ܘܲܒ̣ܚܸܡܬܹܗ.

²⁴ܘܢܹܐܡܪܘܼܢ ܟܠܗܘܿܢ ܥܲܡܡܹ̈ܐ: ܥܲܠ ܡܵܢܵܐ ܥܒܲܕ݂ ܡܵܪܝܵܐ ܗܵܟܲܢܵܐ ܠܐܲܪܥܵܐ ܗܵܕܹܐ: ܘܥܲܠ ܡܵܢܵܐ ܐܸܬ̣ܚܲܡܲܬ̣ ܪܘܼܓ̣ܙܹܗ ܗܵܢܵܐ ܪܲܒܵܐ.

²⁵ܘܢܹܐܡܪܘܼܢ: ܥܲܠ ܕܲܫܒܲܩܘ ܩܝܵܡܹܗ ܕܡܵܪܝܵܐ ܐܲܠܵܗܵܐ ܕܐܲܒ̣ܵܗܲܝ̈ܗܘܿܢ: ܕܐܲܩܝܼܡ ܥܲܡܗܘܿܢ ܟܲܕ݂ ܐܲܦܸܩ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ.

²⁶ܘܐܸܙܲܠܘ ܘܲܦܠܲܚܘ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܘܣܓܸܕ݂ܘ ܠܗܘܿܢ: ܐܲܠܵܗܹ̈ܐ ܕܠܵܐ ܝܼܕܲܥܘ ܐܸܢܘܿܢ: ܘܠܵܐ ܐܸܬ̣ܦܲܠܲܓ̣ܘ ܠܗܘܿܢ.

²⁷ܘܐܸܬ̣ܚܲܡܲܬ̣ ܪܘܼܓ̣ܙܹܗ ܕܡܵܪܝܵܐ ܥܲܠ ܐܲܪܥܵܐ ܗܵܝ̇: ܕܢܲܝܬܸ̇ܐ ܥܠܹܝܗ̇ ܡܠܗܹܝܢ ܠܵܘ̈ܛܵܬ̣ܵܐ ܕܲܟ݂ܬ̣̈ܝܼܒ̣ܵܢ ܒܲܟ݂ܬ̣ܵܒ̣ܵܐ ܗܵܢܵܐ.

²⁸ܘܢܸܥܩܘܿܪ ܐܸܢܘܿܢ ܡܵܪܝܵܐ ܡ̣ܢ ܐܲܬ̣ܪܗܘܿܢ: ܒܚܸܡܬ̣ܵܐ ܘܲܒ̣ܪܘܼܓ̣ܙܵܐ ܪܲܒܵܐ: ܘܢܸܫܕܸ̇ܐ ܐܸܢܘܿܢ ܠܐܲܪܥܵܐ ܐ̄ܚܪܹܬ̣ܵܐ ܐܲܝܟ݂ ܕܝܵܘܡܵܢܵܐ.

²⁹ܣܬ̇ܝܼܪ̈ܵܬ̣ܵܐ ܕܡܵܪܝܵܐ ܐܸܢܹܝܢ ܐܲܠܵܗܲܢ: ܘܓܲܠ̈ܝܵܬ̣ܵܐ ܕܝܼܠܲܢ ܘܕܲܒ̣̈ܢܲܝܢ ܠܥܵܠܲܡ: ܘܢܸܥܒܸ̇ܕ݂ ܟܠܗܘܿܢ ܦܸܬ̣ܓ̣ܵܡܵܘ̈ܗܝ ܕܢܵܡܘܿܣܵܐ ܗܵܢܵܐ.