Read Aramaic Peshita Deuteronomy 31 Bible Online

Deuteronomy 31 - Aramaic Peshita bible

Deuteronomy 31

¹ܘܐܸܙܲܠ ܡܘܼܫܹܐ: ܘܡܲܠܸܠ ܗܵܠܹܝܢ ܟܠܗܘܿܢ ܦܸܬ̣ܓ̣ܵܡܹ̈ܐ ܥܲܡ ܟܠܹܗ ܝܼܣܪܵܝܹܠ.

²ܘܐܸܡܲܪ ܠܗܘܿܢ: ܒܲܪ ܡܵܐܐ ܐ̄ܢܵܐ ܘܥܸܣܪܝܼܢ ܫܢ̈ܝܼܢ ܝܵܘܡܵܢܵܐ: ܘܠܵܐ ܡܸܫܟܲܚ ܐ̄ܢܵܐ ܬܘܼܒ̣ ܠܡܸܦܲܩ ܘܲܠܡܸܥܲܠ: ܘܡܵܪܝܵܐ ܐܸܢܲܪ ܠܝܼ: ܕܠܵܐ ܬܸܥܒܲܪ ܝܘܿܪܕܢܲܢ ܗܵܢܵܐ.

³ܡܵܪܝܵܐ ܐܲܠܵܗܵܟ݂ ܗܘ̤ ܥܵܒܲܪ ܩܕ݂ܵܡܲܝܟ: ܘܗܘ̤ ܢܵܘܒܸ̇ܕ݂ ܥܲܡܡܹ̈ܐ ܗܵܠܹܝܢ ܡ̣ܢ ܩܕ݂ܵܡܲܝܟ: ܘܬܹܐܪܲܬ̣ ܐܸܢܘܿܢ. ܝܼܫܘܿܥ ܗܘ̤ ܥܵܒܲܪ ܩܕ݂ܵܡܲܝܟ ܐܲܝܟ݂ ܕܐܸܡܲܪ ܡܵܪܝܵܐ.

⁴ܘܢܸܥܒܸ̇ܕ݂ ܠܗܘܿܢ ܡܵܪܝܵܐ ܐܲܝܟ݂ ܕܥܒܲܕ݂ ܠܣܝܼܚܘܿܢ ܘܲܠܥܘܿܓ̣ ܡܲܠܟܹ̈ܐ ܕܐܵܡܘܿܪ̈ܵܝܹܐ: ܘܠܲܐܪܥܗܘܿܢ: ܕܐܵܘܒܸ̇ܕ݂ ܐܸܢܘܿܢ.

⁵ܢܲܫܠܸܡ ܐܸܢܘܿܢ ܡܵܪܝܵܐ ܩܕ݂ܵܡܲܝܟ̇ܘܿܢ: ܘܲܥܒܸ̇ܕ݂ܘ ܠܗܘܿܢ ܐܲܝܟ݂ ܟܠܹܗ ܦܘܼܩܕܵܢܵܐ ܕܦܲܩܕ̇ܬ̇ܟ݂ܘܿܢ.

⁶ܐܸܬ̣ܚܲܝܲܠܘ ܘܐܸܬ̣ܥܲܫܲܢܘ: ܠܵܐ ܬܸܕ݂ܚܠܘܼܢ ܘܠܵܐ ܬܙܘܼܥܘܼܢ ܘܠܵܐ ܬܸܬ̣ܪܲܗܒ̇ܘܼܢ ܡ̣ܢ ܩܕ݂ܵܡܲܝܗܘܿܢ: ܡܸܛܠ ܕܡܵܪܝܵܐ ܐܲܠܵܗܵܟ݂ ܗܘ̤ ܐܵܙܹܠ ܩܕ݂ܵܡܲܝܟ: ܠܵܐ ܢܲܪܦܹܝܟ݂ ܘܠܵܐ ܢܸܫܒ̇ܩܵܟ݂.

⁷ܘܲܩܪܵܐ ܡܘܼܫܹܐ ܠܝܼܫܘܿܥ: ܘܐܸܡܲܪ ܠܹܗ ܠܥܹܝܢ ܟܠܹܗ ܝܼܣܪܵܝܹܠ: ܐܸܬ̣ܚܲܝܲܠ ܘܐܸܬ̣ܥܲܫܲܢ ܡܸܛܠ ܕܐܲܢ̄ܬ̇ ܡܲܥܸܠ ܐܲܢ̄ܬ̇ ܠܹܗ ܠܥܲܡܵܐ ܗܵܢܵܐ: ܠܐܲܪܥܵܐ ܕܝܼܡܵܐ ܡܵܪܝܵܐ ܠܐܲܒ̣ܵܗܲܝ̈ܗܘܿܢ ܠܡܸܬܲܠ ܠܗܘܿܢ: ܘܐܲܢ̄ܬ̇ ܬܵܘܪܬ̣ܝܼܗ̇ ܠܗܘܿܢ.

⁸ܘܡܵܪܝܵܐ ܗܘ̤ ܐܵܙܹܠ ܩܕ݂ܵܡܲܝܟ: ܘܗܘ̤ ܢܸܗܘܸܐ ܥܲܡܵܟ݂: ܘܠܵܐ ܢܲܪܦܹܝܟ݂ ܘܠܵܐ ܢܸܫܒ̇ܩܵܟ݂: ܠܵܐ ܬܸܕ݂ܚܲܠ ܘܠܵܐ ܬܙܘܼܥ ܘܠܵܐ ܬܸܬ̣ܪܲܗܸܒ̣.

⁹ܘܲܟ݂ܬܲܒ̣ ܡܘܼܫܹܐ ܢܵܡܘܿܣܵܐ ܗܵܢܵܐ ܘܝܲܗ̄ܒܹ̇ܬ̣ ܠܟ݂ܵܗܢܹ̈ܐ ܒ̈ܢܲܝ ܠܹܘܝܼ: ܕܲܫܩܝܼܠܝܼܢ ܩܹܒ̣ܘܼܬ̣ܵܐ: ܕܲܩܝܵܡܹܗ ܕܡܵܪܝܵܐ: ܘܲܠܟ݂ܠܹܗܘܿܢ ܣܵܒܹ̈ܐ ܕܲܒ̣̈ܢܲܝ ܝܼܣܪܵܝܹܠ.

¹⁰ܘܦܲܩܸܕ݂ ܐܸܢܘܿܢ ܡܘܼܫܹܐ: ܘܐܸܡܲܪ ܠܗܘܿܢ: ܡ̣ܢ ܒܵܬܲܪ ܫܒܲܥ ܫܢ̈ܝܼܢ: ܒܙܲܒ̣ܢܵܐ ܕܫܲܢ̄ܬܵܐ ܕܫܘܼܒ̣ܩܵܢܵܐ: ܒܥܲܕ݂ܥܹܕ݂ܵܐ ܕܲܡ̈ܛܲܠܠܸܐ.

¹¹ܡܵܐ ܕܐܵܬܹܐ ܟܠܹܗ ܝܼܣܪܵܝܹܠ ܠܡܸܬ̣ܚܙܵܝܘܼ ܩܕ݂ܵܡ ܡܵܪܝܵܐ ܐܲܠܵܗܵܟ݂: ܒܐܲܬ̣ܪܵܐ ܕܓ̣ܵܒܹܐ: ܩܪܝܼ ܢܵܡܘܿܣܵܐ ܗܵܢܵܐ ܩܕ݂ܵܡ ܟܠܹܗ ܝܼܣܪܵܝܹܠ ܒܐܸܕ݂ܢܲܝ̈ܗܘܿܢ.

¹²ܟܲܢܸܫܲܝܗܝ ܠܥܲܡܵܐ ܓܲܒ̣ܪܹ̈ܐ ܘܢܸܫܹ̈ܐ: ܘܝܼܩܲܪܬܵܐ: ܘܥܵܡܘܿܪܵܐ ܕܲܒ̣ܩܘܼܪ̈ܝܵܟ݂: ܡܸܛܠ ܕܢܸܫܡܥܘܼܢ ܘܢܹܐܠܦܘܼܢ: ܘܢܸܕ݂ܚܠܘܼܢ ܡ̣ܢ ܡܵܪܝܵܐ ܐܲܠܵܗܟ݂ܘܿܢ: ܘܢܸܛܪܘܼܢ ܘܢܸܥܒ̇ܕ݂ܘܼܢ ܟܠܗܘܿܢ ܦܸܬ̣ܓ̣ܵܡܵܘ̈ܗܝ ܕܢܵܡܘܿܣܵܐ ܗܵܢܵܐ.

¹³ܘܲܒ̣ܢܲܝ̈ܗܘܿܢ ܕܠܵܐ ܝܼܕܲܥܘ ܢܸܫܡܥܘܼܢ: ܘܢܹܐܠܦܘܼܢ ܠܡܸܕ݂ܚܲܠ ܡ̣ܢ ܡܵܪܝܵܐ ܐܲܠܵܗܟ݂ܘܿܢ: ܟܠܗܘܿܢ ܝܵܘ̈ܡܵܬ̣ܵܐ ܕܚܲܝܝܼܢ ܐܲܢ̄ܬ̇ܘܿܢ ܒܐܲܪܥܵܐ ܕܥܵܒ̣ܪܝܼܢ ܐܲܢ̄ܬ̇ܘܿܢ ܝܘܿܪܕܢܲܢ ܠܡܹܐܪܬܵܗ̇.

¹⁴ܘܐܸܡܲܪ ܡܵܪܝܵܐ ܠܡܘܼܫܹܐ: ܗܵܐ ܩܪܸܒ̣ܘ ܝܵܘܡܲܝ̈ܟ ܠܲܡܡܵܬ̣: ܩܪܝܼ ܠܝܼܫܘܿܥ: ܘܩܘܼܡ ܒܡܲܫܟܲܢܙܲܒ̣ܢܵܐ ܘܐܹܦܲܩܕ݂ܝܼܘܗܝ. ܘܐܸܙܲܠܘ ܡܘܼܫܹܐ ܘܝܼܫܘܿܥ: ܘܩܵܡܘ ܒܡܲܫܟܲܢ ܙܲܒ̣ܢܵܐ.

¹⁵ܘܐܸܬ̣ܚܠܝܼ ܡܵܪܝܵܐ ܠܡܲܫܟܲܢܙܲܒ̣ܢܵܐ ܒܥܲܡܘܼܕ݂ܵܐ ܕܲܥܢܵܢܵܐ: ܘܩܵܡ ܥܲܡܘܼܕ݂ܵܐ ܕܲܥܢܵܢܵܐ ܒܬܲܪܥܵܐ ܕܡܲܫܟܲܢ ܙܲܒ̣ܢܵܐ.

¹⁶ܘܐܸܡܲܪ ܡܵܪܝܵܐ ܠܡܘܼܫܹܐ: ܗܵܐ ܐܲܢ̄ܬ̇ ܫܵܟܹܒ̣ ܐܲܢ̄ܬ̇ ܥܲܡ ܐܲܒ̣ܵܗܲܝ̈ܟ: ܘܩܵܐܹ̇ܡ ܥܲܡܵܐ ܗܵܢܵܐ: ܘܛܵܥܹܐ ܒܵܬܲܪ ܐܲܠܵܗܹ̈ܐ ܢܘܼܟ݂ܪ̈ܵܝܹܐ ܕܐܲܪܥܵܐ: ܕܗܘ̤ ܥܵܐܹ̇ܠ ܠܬܲܡܵܢ ܒܲܝܢܵܬ̣ܟ݂ܘܿܢ: ܘܫܵܒܹܩ ܠܝܼ ܘܲܡܒܲܛܸܠ ܩܝܵܡܝ ܕܐܲܩܝܼܡܹ̇ܬ̣ ܥܲܡܹܗ.

¹⁷ܘܡܸܬ̣ܚܲܡܲܬ̣ ܪܘܼܓ̣ܙܝ ܥܠܵܘܗܝ ܒܝܵܘܡܵܐ ܗܵܘ̇: ܘܐܸܫܒ̇ܘܿܩ ܐܸܢܘܿܢ ܘܐܲܗܦܸܟ݂ ܐܲܦܲܝ̈ ܡܸܢܗܘܿܢ: ܘܢܸܗܘܘܿܢ ܠܡܹܐܟ݂ܘܼܠܬܵܐ: ܘܬܸܡܛܹܝܘܗܝ ܒܝܼܫܬܵܐ ܣܲܓ̇ܝܼܐܬ̣ܵܐ ܘܥܵܩܬ̣ܵܐ. ܘܢܹܐܡܲܪ ܒܝܵܘܡܵܐ ܗܵܘ̇: ܡܸܛܠ ܕܠܲܝܬ̇ ܐܲܠܵܗܝ ܒܓ̣ܵܘܝ: ܐܲܪ̈ܥܵܢܝ ܗܵܠܹܝܢ ܟܠܗܹܝܢ ܒܝܼ̈ܫܵܬ̣ܵܐ.

¹⁸ܘܐܸܢܵܐ ܐܲܗܦܸܟ݂ ܐܲܦܲܝ̈ ܡܸܢܗܘܿܢ ܒܝܵܘܡܵܐ ܗܵܘ̇: ܡܸܛܠ ܟܠܵܗ̇ ܒܝܼܫܬܵܐ ܕܲܥܒܲܕ݂ܘ: ܥܲܠ ܕܲܣܛܵܘ ܒܵܬܲܪ ܐܲܠܵܗܹ̈ܐ ܐ̄ܚܪ̈ܵܢܹܐ.

¹⁹ܡܸܟܹ̇ܝܠ ܟܬ̣ܘܿܒ̣ ܠܗܘܿܢ ܬܸܫܒ̇ܘܿܚܬܵܐ ܗܵܕܹܐ: ܘܐܲܠܸܦܹܝܗ̇ ܠܲܒ̣̈ܢܲܝ ܝܼܣܪܵܝܹܠ: ܘܣܝܼܡܹܝܗ̇ ܒܦܘܼܡܗܘܿܢ: ܡܸܛܠ ܕܬܸܗܘܸܐ ܠܝܼ ܬܸܫܒ̇ܘܿܚܬܵܐ ܗܵܕܹܐ ܠܣܵܗܕ̇ܘܼܬ̣ܵܐ ܒܲܒ̣̈ܢܲܝ ܝܼܣܪܵܝܹܠ.

²⁰ܡܸܛܠ ܕܡܲܥܸܠ ܐ̄ܢܵܐ ܠܗܘܿܢ ܠܐܲܪܥܵܐ ܕܝܼܡܝܼܬ̣ ܠܐܲܒ̣ܵܗܲܝ̈ܗܘܿܢ: ܕܡܲܪܕ̇ܝܵܐ ܚܲܠܒ̣ܵܐ ܘܕܸܒ̣ܫܵܐ: ܘܐܵܟ݂ܠܝܼܢ ܘܣܵܒ̣ܥܝܼܢ ܘܡܸܬ̣ܦܲܢܩܝܼܢ: ܘܣܵܛܹܝܢ ܒܵܬܲܪ ܐܲܠܵܗܹ̈ܐ ܐ̄ܚܪ̈ܵܢܹܐ: ܘܦܵܠܚܝܼܢ ܠܗܘܿܢ ܘܡܲܪܓ̇ܙܝܼܢ ܠܝܼ: ܘܲܡܒܲܛܠܝܼܢ ܩܝܵܡܝ.

²¹ܘܡܵܐ ܕܡܛܝܼ ܐܸܢܘܿܢ ܒܝܼ̈ܫܵܬ̣ܵܐ ܣܲܓ̇ܝܼܵـ̈ܐܬ̣ܵܐ ܘܥܵـ̈ܩܵܬ̣ܵܐ: ܬܸܩܪܸܐ ܬܸܫܒ̇ܘܿܚܬܵܐ ܗܵܕܹܐ ܩܕ݂ܵܡܲܝܗܘܿܢ ܠܣܵܗܕ̇ܘܼܬ̣ܵܐ: ܕܠܵܐ ܬܸܬܛܥܸܐ ܡ̣ܢ ܦܘܼܡܵܐ ܕܙܲܪܥܗܘܿܢ: ܡܸܛܠ ܕܝܵܕܲܥ ܐ̄ܢܵܐ ܝܲܨܪܗܘܿܢ ܘܟ݂ܠ ܕܥܵܒ̣ܕ̇ܝܼܢ ܗܵܪܟܵܐ ܝܵܘܡܵܢܵܐ: ܥܲܕ݂ܠܵܐ ܐܲܥܸܠ ܐܸܢܘܿܢ ܠܐܲܪܥܵܐ ܕܝܼܡܝܼܬ̣ ܠܐܲܒ̣ܵܗܲܝ̈ܗܘܿܢ.

²²ܘܲܟ݂ܬܲܒ̣ ܡܘܼܫܹܐ ܬܸܫܒ̇ܘܿܚܬܵܐ ܗܵܕܹܐ ܒܝܵܘܡܵܐ ܗܵܘ̇: ܘܐܲܠܦܵܗ̇ ܠܲܒ̣̈ܢܲܝ ܝܼܣܪܵܝܹܠ.

²³ܘܦܲܩܸܕ݂ ܠܝܼܫܘܿܥ ܒܲܪܢܘܿܢ: ܘܐܸܡܲܪ ܠܹܗ: ܐܸܬ̣ܚܲܝܲܠ ܘܐܸܬ̣ܥܲܫܲܢ: ܡܸܛܠ ܕܐܲܢ̄ܬ̇ ܡܲܥܸܠ ܐܲܢ̄ܬ̇ ܠܲܒ̣̈ܢܲܝ ܝܼܣܪܵܝܹܠ ܠܐܲܪܥܵܐ ܕܝܼܡܝܼܬ̣ ܠܗܘܿܢ: ܘܐܸܢܵܐ ܐܸܗܘܸܐ ܥܲܡܵܟ݂.

²⁴ܘܟܲܕ݂ ܫܲܠܸܡ ܡܘܼܫܹܐ ܠܡܸܟ݂ܬܲܒ̣ ܦܸܬ̣ܓ̣ܵܡܵܘ̈ܗܝ ܕܢܵܡܘܿܣܵܐ ܗܵܢܵܐ ܒܣܸܦܪܵܐ ܥܕܲܡܵܐ ܕܲܫܠܸܡܘ.

²⁵ܦܲܩܸܕ݂ ܡܘܼܫܹܐ ܠܠܹܘܵܝܹ̈ܐ ܕܲܫܩܝܼܠܝܼܢ ܩܹܒ̣ܘܼܬ̣ܵܐ ܕܲܩܝܵܡܹܗ ܕܡܵܪܝܵܐ: ܘܐܸܡܲܪ ܠܗܘܿܢ.

²⁶ܣܲܒ̣ܘ ܣܸܦܪܵܐ ܗܵܢܵܐ ܕܢܵܡܘܿܣܵܐ: ܘܣܝܼܡܘܼܗܝ ܒܣܸܛܪܵܐ ܕܩܹܒ̣ܘܼܬ̣ܵܐ ܕܲܩܝܵܡܹܗ ܕܡܵܪܝܵܐ ܐܲܠܵܗܟ݂ܘܿܢ: ܘܢܸܗܘܸܐ ܠܟ݂ܘܿܢ ܬܲܡܵܢ ܣܵܗܕܵܐ.

²⁷ܡܸܛܠ ܕܐܸܢܵܐ ܝܵܕܲܥ ܐ̄ܢܵܐ ܡܡܲܪܡܪܵܢܘܼܬ̣ܟ݂ܘܿܢ: ܘܲܩܕ݂ܵܠܟ݂ܘܿܢ ܩܲܫܝܵܐ: ܘܗܵܐ ܥܲܕ݂ ܐܸܢܵܐ ܚܲܝ ܥܲܡܟ݂ܘܿܢ ܝܵܘܡܵܢܵܐ ܡܲܪܡܲܪܬ̇ܘܿܢ ܠܡܵܪܝܵܐ: ܘܐܵܦ ܡ̣ܢ ܒܵܬܲܪ ܕܡܵܐܹ̇ܬ̣ ܐ̄ܢܵܐ.

²⁸ܟܲܢܸܫܘ ܠܘܵܬ̣ܝ ܟܠܗܘܿܢ ܣܵܒܹ̈ܐ ܕܫܲܒ̣ܛܲܝ̈ܟ̇ܘܿܢ: ܘܣܵܦܪ̈ܲܝܟ̇ܘܿܢ: ܘܐܹܡܲܪ ܠܟ݂ܘܿܢ ܗܵܠܹܝܢ ܦܸܬ̣ܓ̣ܵܡܹ̈ܐ: ܘܐܲܣܗܸܕ݂ ܒܟ݂ܘܿܢ ܫܡܲܝܵܐ ܘܐܲܪܥܵܐ.

²⁹ܡܸܛܠ ܕܝܵܕܲܥ ܐ̄ܢܵܐ ܕܡ̣ܢ ܒܵܬܲܪ ܡܵܘܬ̇ܝ ܡܚܲܒܵܠܘܼ ܡܚܲܒ̇ܠܝܼܢ ܐܲܢ̄ܬ̇ܘܿܢ: ܘܣܵܛܹܝܢ ܐܲܢ̄ܬ̇ܘܿܢ ܡ̣ܢ ܐܘܼܪܚܵܐ ܕܦܲܩܸܕ̇ܬ̇ܟ݂ܘܿܢ: ܘܐܵܪܥܵܐ ܠܟ݂ܘܿܢ ܒܝܼܫܬܵܐ ܒܚܲܪܬ̣ܵܐ ܕܝܵܘ̈ܡܵܬ̣ܵܐ: ܡܵܐ ܕܥܒܲܕ̇ܬ̇ܘܿܢ ܒܝܼܫܬܵܐ ܩܕ݂ܵܡ ܡܵܪܝܵܐ: ܘܐܲܪܓܸܙܬ̇ܘܿܢܵܝܗܝ ܒܲܥܒ̣ܵܕ݂ܵܐ ܕܐܝܼܕܲܝ̈ܟ̇ܘܿܢ.

³⁰ܘܐܸܡܲܪ ܡܘܼܫܹܐ ܩܕ݂ܵܡ ܟܠܹܗ ܟܢܘܼܫܬܵܐ ܕܝܼܣܪܵܝܹܠ: ܦܸܬ̣ܓ̣ܵܡܹ̈ܐ ܕܬܸܫܒ̇ܘܼܚܬܵܐ ܗܵܕܹܐ ܥܕܲܡܵܐ ܕܲܫܠܸܡܘܪ.