Read Aramaic Peshita 1 Corinthians 1 Bible Online

1 Corinthians 1 - Aramaic Peshita bible

1 Corinthians 1

¹ܦܵܘܠܘܿܣ ܩܲܪܝܵܐ ܘܲܫܠܝܼܚܵܐ ܕܝܼܫܘܿܥ ܡܫܝܼܚܵܐ ܒܨܸܒ݂ܝܵܢܹܗ ܕܐܲܠܵܗܵܐ. ܘܣܘܼܣܬܹܢܝܼܣ ܐܲܚܵܐ.

²ܠܥܹܕܬܵܐ ܕܐܲܠܵܗܵܐ ܕܲܒ݂ܩܘܿܪܲܢܬ̇ܘܿܣ. ܩܪܲܝܵܐ ܘܩܲܕܝܼܫܹ̈ܐ ܕܲܒ݂ܝܼܫܘܿܥ ܡܫܝܼܚܵܐ ܡܩܲܕܫܝܼܢ. ܘܲܠܟ݂ܠܗܘܿܢ ܐܲܝܠܹܝܢ ܕܩܵܪܹܝܢ ܫܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܒܟ݂ܠ ܐܲܬܲܪ. ܕܝܼܠܗܘܿܢ ܘܕ݂ܝܼܠܲܢ.

³ܛܲܝܒܘܼܬ̣ܵܐ ܥܲܡܟ݂ܘܿܢ ܘܲܫܠܵܡܵܐ. ܡܸܢ ܐܲܠܵܗܵܐ ܐܲܒ݂ܘܼܢ. ܘܡܸܢ ܡܵܪܲܢ ܝܼܫܘܿܥ ܡܫܝܼܚܵܐ.

⁴ܡܵܘܕܹܐ ܐ̄ܢܵܐ ܠܐܲܠܵܗܝ ܒܟ݂ܠܙܒܲܢ ܚܠܵܦܲܝܟܿܘܿܢ. ܥܲܠ ܛܲܝܒܘܼܬ̣ܵܐ ܕܐܲܠܵܗܵܐ ܕܐܬ݂ܝܲܗܒܲܬ݂ ܠܟ݂ܘܿܢ. ܒܝܼܫܘܿܥ ܡܫܝܼܚܵܐ.

⁵ܕܲܒܟ݂ܠ ܡܸܕܸܡ ܥܬܲܪܬܿܘܢ ܒܹܗ. ܒܟ݂ܠ ܡܸܠܵܐ. ܘܲܒܟ݂ܠ ܝܼܕ݂ܲܥܬ̣ܵܐ.

⁶ܐܲܝܟ݂ ܕܣܵܗܕܘܼܬܹܗ ܕܲܡܫܝܼܚܵܐ ܐܸܫܬܲܪܪܲܬ݂ ܒܟ݂ܘܿܢ.

⁷ܕܠܵܐ ܐܸܬ݂ܒܲܨܲܪܬܿܘܢ ܒܲܚܕ݂ܵܐ ܡܸܢ ܡܵܘܗ̈ܒ݂ܵܬܹܗ: ܐܸܠܵܐ ܡܣܲܟܹ̇ܝܢ ܐ̄ܢܬܘܿܢ ܠܓܸܠܝܵܢܹܗ ܕܡܵܪܲܢ ܝܼܫܘܿܥ ܡܫܝܼܚܵܐ.

⁸ܕܗܘܼ ܢܫܲܪܲܪܟ݂ܘܿܢ ܥܕ݂ܲܡܵܐ ܠܲܐ̄ܚܪܵܝܬܵܐ. ܕܲܕ݂ܠܵܐ ܪܸܫܝܵܢ ܬܸܗܘܘܿܢ ܒܝܵܘܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ.

⁹ܡܗܲܝܡܲܢ ܗ̄ܘܼ ܐܲܠܵܗܵܐ ܕܒ݂ܐܝܼܕ݂ܗ ܐܸܬ݂ܩܪܝܼܬܿܘܢ ܠܫܵܘܬܵܦܘܼܬ̣ܵܐ ܕܲܒ݂ܪܹܗ ܝܼܫܘܿܥ ܡܫܝܼܚܵܐ ܡܵܪܲܢ.

¹⁰ܒܵܥܹܐ ܐ̄ܢܵܐ ܕܹܝܢ ܡܸܢܟ݂ܘܿܢ ܐܲܚܲܝ̈: ܒܲܫܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܕܬܸܗܘܹܐ ܚܕ݂ܵܐ ܡܸܠܬ̣ܵܐ ܠܟ݂ܠܟ݂ܘܿܢ. ܘܠܵܐ ܢܸܗܘܝܵܢ ܒܟ݂ܘܿܢ ܦܵܠ̈ܓ̇ܘܵܬ̣ܵܐ. ܐܸܠܵܐ ܕܬܸܗܘܘܿܢ ܓܡܝܼܪ̈ܝܼܢ ܒܲܚܕ݂ܵܐ ܬܲܪܥܝܼܬ̣ܵܐ ܘܲܒ݂ܚܲܕ݂ ܪܸܥܝܵܢܵܐ.

¹¹ܫܠܲܚܘ ܠܝܼ ܓܹܝܪ ܥܠܲܝܟܿܘܿܢ ܐܲܚܲܝ̈ ܡܸܢ ܒܹܝܬ݂ ܟܠܵܐܹܐ. ܕܚܸܪ̈ܝܵܢܹܐ ܐܝܼܬ݂ ܒܲܝܢܵܬ݂ܟ݂ܘܿܢ.

¹²ܗܵܕܹܐ ܕܹܝܢ ܐܵܡܲܪ ܐ̄ܢܵܐ. ܕܐܝܼܬ݂ ܡܸܢܟ݂ܘܿܢ ܕܐܵܡܲܪ. ܐܸܢܵܐ ܕܦܵܘܠܘܿܣ ܐ̄ܢܵܐ. ܘܐܝܼܬ݂ ܕܐܵܡܲܪ. ܐܸܢܵܐ ܕܐܵܦܲܠܘܿ ܐ̄ܢܵܐ. ܘܐܝܼܬ݂ ܕܐܵܡܲܪ. ܐܸܢܵܐ ܕܟܹܐܦܵܐ ܐ̄ܢܵܐ. ܘܐܝܼܬ݂ ܕܐܵܡܲܪ. ܐܸܢܵܐ ܕܲܡܫܝܼܚܵܐ ܐ̄ܢܵܐ.

¹³ܕܲܠܡܵܐ ܐܸܬ݂ܦܲܠܲܓ݂ ܠܹܗ ܡܫܝܼܚܵܐ. ܐܵܘ ܠܡܵܐ ܦܵܘܠܘܿܣ ܐܸܙܕܩܸܦ ܥܲܠ ܐܲܦܲܝ̈ܟܿܘܿܢ. ܐܵܘ ܒܲܫܡܹܗ ܕܦܵܘܠܘܿܣ ܥܡܲܕܬܿܘܢ.

¹⁴ܡܵܘܕܹܐ ܐ̄ܢܵܐ ܠܐܲܠܵܗܝ. ܕܲܠܐ̄ܢܵܫ ܡܸܢܟ݂ܘܿܢ ܠܵܐ ܐܲܥܡ̇ܕܹܬ݂. ܐܸܠܵܐ ܠܲܩܪܝܼܣܦܘܿܣ ܘܲܠܓ݂ܵܐܝܼܘܿܣ.

¹⁵ܕܠܵܐ ܐ̄ܢܵܫ ܢܹܐܡܲܪ ܕܲܒ݂ܫܹܡܝ ܐܲܥܡ̇ܕܹܬ݂.

¹⁶ܐܲܥܡ̇ܕܹܬ݂ ܕܹܝܢ ܐܵܦ ܠܒܲܝܬܹ݁ܗ ܕܐܸܣܛܲܦܵܢܵܐ. ܬܘܼܒ݂ ܕܹܝܢ ܠܵܐ ܝܵܕ݂ܲܥ ܐ̄ܢܵܐ. ܐܸܢ ܠܐ̄ܢܵܫ ܐ̄ܚܪܹܝܢ ܐܲܥܡ̇ܕܹܬ݂.

¹⁷ܠܵܐ ܓܹܝܪ ܫܲܕܪܲܢܝ ܡܫܝܼܚܵܐ. ܠܡܲܥܡܵܕ݂ܘܼ. ܐܸܠܵܐ ܠܲܡܣܲܒܵܪܘܼ. ܠܵܐ ܒܚܸܟ݂ܡܲܬ݂ ܡܸܠܹ̈ܐ: ܕܠܵܐ ܢܸܣܬܲܪܲܩ ܙܩܝܼܦܹܗ ܕܲܡܫܝܼܚܵܐ.

¹⁸ܡܸܠܬ̣ܵܐ ܓܹܝܪ ܕܲܙܩܝܼܦܵܐ. ܠܐܲܒ݂ܝܼܕܹ̈ܐ ܫܵܛܝܘܼܬ̣ܵܐ ܗܝܼ. ܠܲܢ ܕܹܝܢ ܠܐܲܝܠܹܝܢ ܕܚܲܝܝܼܢܲܢ. ܚܲܝܠܵܐ ܗܝܼ ܕܐܲܠܵܗܵܐ.

¹⁹ܟܬ݂ܝܼܒ݂ ܓܹܝܪ. ܕܐܵܘܒܸ̇ܕ݂ ܚܸܟ݂ܡܬ̣ܵܐ ܕܚܲܟܝܼ̈ܡܹܐ. ܘܐܸܓ݂ܠܘܿܙ ܬܲܪܥܝܼܬ̣ܵܐ ܕܣܲܟܘܼܠܬ̣ܵܢܹ̈ܐ.

²⁰ܐܲܝܟܵܐ ܗܘܼ ܚܲܟܝܼܡܵܐ. ܐܵܘ ܐܲܝܟܵܐ ܗܘܼ ܣܵܦܪܵܐ. ܐܵܘ ܐܲܝܟܵܐ ܗܘܼ ܕܵܪܘܿܫܵܐ ܕܥܵܠܡܵܐ ܗܵܢܵܐ. ܠܵܐ ܗܵܐ ܐܲܫܛܝܵܗܿ ܐܲܠܵܗܵܐ ܚܸܟ݂ܡܬܹܗ ܕܥܵܠܡܵܐ ܗܵܢܵܐ.

²¹ܡܛܠ ܓܹܝܪ ܕܲܒ݂ܚܸܟ݂ܡܬܹܗ ܕܐܲܠܵܗܵܐ. ܠܵܐ ܝܼܕ݂ܲܥ ܥܵܠܡܵܐ ܒܚܸܟ݂ܡܬ̣ܵܐ ܠܐܲܠܵܗܵܐ. ܨܒ݂ܵܐ ܐܲܠܵܗܵܐ ܕܲܒ݂ܫܵܛܝܘܼܬ̣ܵܐ ܕܟ݂ܵܪܘܿܙܘܼܬ̣ܵܐ ܢܲܚܹܐ ܠܐܲܝܠܹܝܢ ܕܲܡܗܲܝܡܢܝܼܢ.

²²ܡܛܠ ܕܝܗ̄ܘܼܕ݂ܵܝܹ̈ܐ ܐܵܬ݂ܘܵܬ̣ܵܐ ܫܵܐ̇ܠܝܼܢ. ܘܐܲܪ̈ܡܵܝܹܐ ܚܸܟ݂ܡܬ̣ܵܐ ܒܵܥܹ̇ܝܢ.

²³ܚܢܲܢ ܕܹܝܢ ܡܲܟ݂ܪܙܝܼܢ ܚ̄ܢܲܢ ܡܫܝܼܚܵܐ ܟܲܕ݂ ܙܩܝܼܦ. ܬܘܼܩܠܬܵܐ ܠܲܝܗ̄ܘܼܕ݂ܵܝܹ̈ܐ ܘܠܐܲܪ̈ܡܵܝܹܐ ܫܵܛܝܘܼܬ̣ܵܐ.

²⁴ܠܗܵܢܘܿܢ ܕܹܝܢ ܕܲܩܪܹܝܢ. ܝܗ̄ܘܼܕ݂ܵܝܹ̈ܐ ܘܐܲܪ̈ܡܵܝܹܐ. ܡܫܝܼܚܵܐ ܚܲܝܠܵܐ ܗܘܼ ܕܐܲܠܵܗܵܐ. ܘܚܸܟ݂ܡܬ̣ܵܐ ܕܐܲܠܵܗܵܐ.

²⁵ܡܛܠ ܕܫܵܛܝܘܼܬܹܗ ܕܐܲܠܵܗܵܐ ܚܲܟܝܼܡܵܐ ܗܝܼ ܡܸܢ ܒܢܲܝ̈ܢܵܫܵܐ. ܘܲܟ݂ܪܝܼܗܘܼܬܹܗ ܕܐܲܠܵܗܵܐ ܚܲܝܠܬ̣ܵܢܝܵܐ ܗܝܼ ܡܸܢ ܒܢܲܝ̈ܢܵܫܵܐ.

²⁶ܚܙܵܘ ܓܹܝܪ ܐܵܦ ܩܪܵܝܬܿܟ݂ܘܿܢ ܐܲܚܲܝ̈: ܕܠܵܐ ܣܲܓܝܼܐܝܼܢ ܒܟ݂ܘܿܢ ܚܲܟܝܼܡܹ̈ܐ ܒܲܒ݂ܣܲܪ. ܘܠܵܐ ܣܲܓܝܼܐܝܼܢ ܒܟ݂ܘܿܢ ܚܲܝܠܬ̣ܵܢܹ̈ܐ. ܘܠܵܐ ܣܲܓܝܼܐܝܼܢ ܒܟ݂ܘܿܢ ܒܢܲܝ̈ ܛܘܿܗܡܵܐ ܪܲܒܵܐ.

²⁷ܐܸܠܵܐ ܓܒ݂ܵܐ ܐܲܠܵܗܵܐ ܠܣܲܟ݂ܠܵܘ̈ܗܝ ܕܥܵܠܡܵܐ ܕܢܲܒ݂ܗܸܬ݂ ܠܚܲܟܝܼܡܹ̈ܐ. ܘܲܓ݂ܒ݂ܵܐ ܟܪ̈ܝܼܗܵܘܗܝ ܕܥܵܠܡܵܐ ܕܢܲܒ݂ܗܸܬ݂ ܠܚܲܝܠܬ̣ܵܢܹ̈ܐ.

²⁸ܘܲܓ݂ܒ݂ܵܐ ܠܐܲܝܠܹܝܢ ܕܲܒ݂ܨܝܼܪ ܛܘܿܗܡܗܘܿܢ ܒܥܵܠܡܵܐ. ܘܲܠܡܲܣ̈ܠܲܝܵܐ. ܘܠܲܐܝܠܹܝܢ ܕܠܲܝܬܿ ܐܸܢܘܿܢ. ܕܲܢܒܲܛܸܠ ܠܐܲܝܠܹܝܢ ܕܐܝܼܬܲܝܗܘܿܢ.

²⁹ܕܠܵܐ ܢܸܫܬܲܒ݂ܗܲܪ ܟܠܒܣܲܪ ܩܕ݂ܵܡܵܘܗܝ.

³⁰ܐܵܦ ܐܲܢ̄ܬܿܘܿܢ ܕܹܝܢ ܡܸܢܹܗ ܐܲܢ̄ܬܿܘܿܢ ܒܝܼܫܘܿܥ ܡܫܝܼܚܵܐ. ܗܵܘ ܕܲܗܘܵܐ ܠܲܢ ܚܸܟ݂ܡܬ̣ܵܐ ܡܸܢ ܐܲܠܵܗܵܐ. ܘܙܲܕܝܼܩܘܼܬ݂ܵܐ ܘܩܲܕܝܼܫܘܼܬ݂ܵܐ ܘܦܘܼܪܩܵܢܵܐ.

³¹ܐܲܝܟ݂ ܕܲܟܬ݂ܝܼܒ݂. ܕܡܲܢ ܕܡܸܫܬܲܒ݂ܗܲܪ ܒܡܵܪܝܵܐ ܢܸܫܬܲܒ݂ܗܲܪ.