Read Aramaic Peshita 1 Corinthians 10 Bible Online

1 Corinthians 10 - Aramaic Peshita bible

1 Corinthians 10

¹ܨܵܒܹܐ ܐ̄ܢܵܐ ܕܹܝܢ ܕܬܸܕ݂ܥܘܼܢ ܐܲܚܲܝ̈. ܕܐܲܒ݂ܵܗܲܝ̈ܢ ܟܠܗܘܿܢ ܬܚܹܝܬ݂ ܥܢܵܢܵܐ ܗܘܵܘ. ܘܟ݂ܠܗܘܿܢ ܒܝܲܡܵܐ ܥܒܲܪܘ.

²ܘܟ݂ܠܗܘܿܢ ܒܝܲܕ݂ ܡܘܼܫܹܐ ܥܡܲܕ݂ܘ ܒܲܥܢܵܢܵܐ ܘܲܒ݂ܝܲܡܵܐ.

³ܘܟ݂ܠܗܘܿܢ ܚܕ݂ܵܐ ܡܹܐܟ݂ܘܼܠܬܵܐ ܕܪܘܼܚܵܐ ܐܸܟܲܠܘ.

⁴ܘܟ݂ܠܗܘܿܢ ܚܲܕ݂ ܡܲܫܬܿܝܵܐ ܕܪܘܼܚܵܐ ܐܸܫܬܿܝܼܘ. ܫܵܬܹܝܢ ܗ̄ܘܼܵܘ ܓܹܝܪ ܡܸܢ ܟܹܐܦܵܐ ܕܪܘܼܚܵܐ ܕܐܵܬ݂ܝܵܐ ܗ̄ܘܵܬ݂ ܥܲܡܗܘܿܢ. ܟܹܐܦܵܐ ܕܹܝܢ ܗܵܝ. ܗܘܼ ܗܘܵ݀ܐ ܡܫܝܼܚܵܐ.

⁵ܐܸܠܵܐ ܠܵܐ ܗ̄ܘܵܐܒܣܘܿܓ݂ܐܗܘܿܢ ܐܸܨܛܒ݂ܝܼ ܐܲܠܵܗܵܐ. ܢܦܲܠܘ ܓܹܝܪ ܒܡܲܕ݂ܒܪܵܐ.

⁶ܗܵܠܹܝܢ ܕܹܝܢ ܛܘܼܦ̮ܣܵܐ ܠܲܢ ܗܘܼ ܗܘܵ݀ܘ. ܕܠܵܐ ܗܘܲܝܢ ܪܵܓ݁ܝܼܢ ܒ̈ܝܼܫܵܬ݂ܵܐ. ܐܲܝܟܲܢܵܐ ܕܗܸܢܘܿܢ ܪܲܓ݂ܘ.

⁷ܘܐܵܦܠܵܐ ܢܸܗܘܹܐ ܦܵܠܚܲܝ̈ ܦܬܲܟ݂ܪܹ̈ܐ: ܐܲܝܟܲܢܵܐ ܕܐܵܦ ܡܸܢܗܘܿܢ ܦܠܲܚܘ. ܐܲܝܟ݂ ܕܲܟ݂ܬ݂ܝܼܒ݂. ܕܝܼܬܸܒ݂ ܥܲܡܵܐ ܠܡܹܐܟܲܠ ܘܲܠܡܸܫܬܵܐ. ܘܩܵܡܘ ܠܡܸܫܬܿܥܵܝܘܼ.

⁸ܘܐܵܦܠܵܐ ܢܙܲܢܹܐ. ܐܲܝܟܲܢܵܐ ܕܡܸܢܗܘܿܢ ܙܲܢܝܼܘ. ܘܲܢܦܲܠܘ ܒܚܲܕ݂ ܝܵܘܡܵܐ ܥܸܣܪܝܼܢ ܘܲܬ݂ܠܵܬ݂ܵܐ ܐܲܠܦ̈ܝܼܢ.

⁹ܘܠܵܐ ܢܢܲܣܹܐ ܠܲܡܫܝܼܚܵܐ. ܐܲܝܟܲܢܵܐ ܕܡܸܢܗܘܿܢ ܢܲܣܝܼܘ. ܘܐܵܘܒܸܕ݂ܘ ܐܸܢܘܿܢ ܚ̈ܘܵܘܵܬ݂ܵܐ.

¹⁰ܘܐܵܦܠܵܐ ܬܸܪܛܢܘܼܢ. ܐܲܝܟܲܢܵܐ ܕܡܸܢܗܘܿܢ ܪܛܸܢܘ. ܘܐܸܒܲܕ݂ܘ ܒܐܝܼܕܲܝ̈ ܡܚܲܒܠܵܢܵܐ.

¹¹ܗܵܠܹܝܢ ܕܹܝܢ ܟܠܗܹܝܢ ܕܲܓ݂ܕ݂ܲܫ ܠܗܘܿܢ. ܠܛܘܼܦ̮ܣܲܢ ܗܘܲܝ̈. ܘܐܸܬ݂ܟܬܸܒ݂ ܡܛܠ ܡܲܪܕܘܬ݂ܵܐ ܕܝܼܠܲܢ. ܕܚܲܪܬ݂ܗܘܿܢ ܕܥܵܠܡܹ̈ܐ ܥܠܲܝܢ ܡܲܛܝܲܬ݀.

¹²ܡܸܟܹܝܠ ܡܲܢ ܕܣܵܒܲܪ ܕܩܵܡ. ܢܸܙܕܗܲܪ ܕܠܵܐ ܢܸܦܸܠ.

¹³ܢܸܣܝܘܿܢܵܐ ܠܵܐ ܡܲܛܝܼܟ݂ܘܿܢ. ܐܸܠܵܐ ܕܲܒ݂ܢܲܝ̈ܢܵܫܵܐ. ܡܗܲܝܡܲܢ ܗܘܼ ܕܹܝܢ ܐܲܠܵܗܵܐ. ܕܠܵܐ ܢܲܪܦܹܝܟ݂ܘܿܢ ܕܬܸܬ݂ܢܲܣܘܿܢ ܝܲܬܿܝܼܪ ܡܲܢ ܡܸܕܸܡ ܕܲܡܨܹܝܢ ܐܢ̄ܬܘܿܢ. ܐܸܠܵܐ ܢܸܥܒܸܕ݂ ܠܢܸܣܝܘܿܢܟ݂ܘܿܢ ܡܲܦܩܵܢܵܐ. ܐܲܝܟܲܢܵܐ ܕܬܸܫܟܚܘܼܢ ܠܲܡܣܲܝܒܵܪܘܼ.

¹⁴ܡܛܠ ܗܵܢܵܐ ܚܲܒܝܼܒܲܝ̈. ܥܪܘܿܩܘ ܡܸܢ ܦܘܼܠܚܵܢܵܐ ܕܲܦܬܲܟ݂ܪܹ̈ܐ.

¹⁵ܐܲܝܟ݂ ܕܲܠܚܲܟܝܼܡܹ̈ܐ ܐܵܡܲܪ ܐ̄ܢܵܐ. ܕܘܼܢܘ ܐܲܢ̄ܬܿܘܿܢ ܡܸܕܸܡ ܕܐܵܡܲܪ ܐ̄ܢܵܐ.

¹⁶ܟܵܣܵܐ ܗܵܘ ܕܬ݂ܵܘܕܝܼܬ݂ܵܐ ܕܲܡܒܲܪܟ݂ܝܼܢܲܢ. ܠܵܐ ܗ̄ܘܵܐ ܫܵܘܬܵܦܘܼܬ݂ܵܐ ܐܝܼܬ݂ܵܘܗܝ ܕܲܕ݂ܡܹܗ ܕܲܡܫܝܼܚܵܐ. ܘܠܲܚܡܵܐ ܗܵܘ ܕܩܵܨܹܝܢܲܢ. ܠܵܐ ܗ̄ܘܵܐ ܫܵܘܬܵܦܘܼܬ݂ܵܐ ܐܝܼܬ݂ܵܘܗܝ ܕܦܲܓ݂ܪܹܗ ܕܲܡܫܝܼܚܵܐ.

¹⁷ܐܲܝܟܲܢܵܐ ܕܚܲܕ݂ ܗܘܼ ܠܲܚܡܵܐ ܗܵܘ. ܗܵܟܲܢܵܐ ܟܠܲܢ ܚܲܕ݂ ܚܢܲܢ ܦܓܲܪ. ܟܠܲܢ ܓܹܝܪ ܡܸܢ ܗܵܘ ܗܘܼ ܚܲܕ݂ ܠܲܚܡܵܐ ܢܵܣܒܝܼܢܲܢ.

¹⁸ܚܙܵܘ ܠܝܼܣܪܵܝܹܠ ܕܒܲܒ݂ܣܲܪ. ܠܵܐ ܗ̄ܘܵܐ ܐܲܝܠܹܝܢ ܕܐܵܟ݂ܠܝܼܢ ܕܸܒ݂ܚܹ̈ܐ. ܗܵܘܹܝܢ ܫܵܘܬܵܦܹ̈ܐ ܠܡܲܕ݂ܒܚܵܐ.

¹⁹ܡܵܢܵܐ ܗܵܟܹܝܠ ܐܵܡܲܪ ܐ̄ܢܵܐ. ܕܲܦܬܲܟ݂ܪܵܐ ܡܸܕܸܡ ܐܝܼܬ݂ܵܘܗܝ. ܐܵܘ ܕܒ݂ܚܵܐ ܕܲܦܬܲܟ݂ܪܵܐ ܡܸܕܸܡ ܗ̄ܘܼ. ܠܵܐ.

²⁰ܐܸܠܵܐ ܗܵܘ ܡܸܕܸܡ ܕܕ݂ܵܒ݂ܚܝܼܢ ܚܲܢܦܹ̈ܐ. ܠܫܹܐܕܹ̈ܐ ܗ̄ܘܼ ܕܵܒ݂ܚܝܼܢ. ܘܠܵܐ ܠܐܲܠܵܗܵܐ. ܠܵܐ ܕܹܝܢ ܨܵܒܹܐ ܐ̄ܢܵܐ ܕܬܸܗܘܘܿܢ ܫܵܘܬܵܦܹ̈ܐ ܠܫܹܐܕܹ̈ܐ.

²¹ܠܵܐ ܡܸܫܟܿܚܝܼܢ ܐ̄ܢܬܘܿܢ ܕܬܸܫܬܿܘܿܢ ܟܵܣܵܐ ܕܡܵܪܲܢ. ܘܟ݂ܵܣܵܐ ܕܫܹܐܕܹ̈ܐ. ܘܠܵܐ ܡܸܫܟܿܚܝܼܢ ܐ̄ܢܬܘܿܢ ܕܬܸܫܬܵܘܬܿܦܘܼܢ ܒܦܵܬ݂ܘܿܪܵܐ ܕܡܵܪܲܢ. ܘܲܒ݂ܦܵܬ݂ܘܿܪܵܐ ܕܫܹܐܕܹ̈ܐ.

²²ܐܵܘ ܕܲܠܡܵܐ ܡܲܛܵܢܘܼ ܡܲܛܢܝܼܢ ܚ̄ܢܲܢ ܠܡܵܪܲܢ. ܕܲܠܡܵܐ ܚܲܣܝܼܢܝܼܢ ܚ̄ܢܲܢ ܡܸܢܹܗ.

²³ܟܠ ܡܸܕܸܡ ܫܲܠܝܼܛ ܠܝܼ. ܐܸܠܵܐ ܠܵܐ ܟܠ ܡܸܕܸܡ ܦܲܩܵܚ. ܟܠ ܡܸܕܸܡ ܫܲܠܝܼܛ ܠܝܼ. ܐܸܠܵܐ ܠܵܐ ܟܠ ܡܸܕܸܡ ܡܒܲܢܹܐ.

²⁴ܠܵܐ ܐ̄ܢܵܫ ܕܢܲܦ̮ܫܹܗ ܢܸܗܘܹܐ ܒܵܥܹܐ. ܐܸܠܵܐ ܟܠܢܵܫ ܐܵܦ ܕܚܲܒ݂ܪܹܗ.

²⁵ܟܠ ܡܸܕܸܡ ܕܡܸܙܕܲܒܲܢ ܒܡܵܩܹܠܘܿܢ ܗܘܲܝܬܿܘܿܢ ܐܵܟ݂ܠܝܼܢ. ܕܠܵܐ ܥܘܼܩܵܒ݂ܵܐ ܡܛܠ ܬܹܐܪܬܵܐ.

²⁶ܕܡܵܪܝܵܐ ܗܝܼ ܓܹܝܪ ܐܲܪܥܵܐ ܒܲܡܠܹܐܵܗܿ.

²⁷ܐܸܢ ܐ̄ܢܵܫ ܕܹܝܢ ܡܸܢ ܚܲܢܦܹ̈ܐ ܩܵܪܹܐ ܠܟ݂ܘܿܢ. ܘܨܵܒܹܝܢ ܐ̄ܢܬܘܿܢ ܠܡܹܐܙܲܠ. ܟܠܡܸܕܸܡ ܕܡܸܬ̇ܬ̇ܣܝܼܡ ܩܕ݂ܵܡܲܝܟ̇ܘܿܢ ܐܲܟ݂ܘܿܠܘ. ܕܠܵܐ ܥܘܼܩܵܒ݂ܵܐ ܡܛܠ ܬܹܐܪܬܵܐ.

²⁸ܐܸܢ ܐ̄ܢܵܫ ܕܹܝܢ ܢܹܐܡܲܪ ܠܟ݂ܘܿܢ. ܕܗܵܢܵܐ ܕܲܕ݂ܒ݂ܝܼܚܵܐ ܗܘܼ. ܠܵܐ ܬܹܐܟ݂ܠܘܼܢ. ܡܛܠ ܗܵܘ ܕܐܸܡܲܪ ܠܟ݂ܘܿܢ. ܘܡܛܠ ܬܹܐܪܬܵܐ.

²⁹ܬܹܐܪܬܵܐ ܕܹܝܢ ܐܵܡܲܪ ܐ̄ܢܵܐ. ܠܵܐ ܗ̄ܘܵܐ ܕܝܼܠܟ݂ܘܿܢ. ܐܸܠܵܐ ܕܗܵܘ ܕܐܵܡܲܪ. ܠܡܵܢܵܐ ܓܹܝܪ ܚܹܐܪܘܼܬ݂ܝ ܡܸܬ̇ܬ̇ܕ̇ܝܼܢܵܐ ܡܸܢ ܬܹܐܪܬܵܐ ܕܐܲܚܪ̈ܵܢܹܐ.

³⁰ܐܸܢ ܐܸܢܵܐ ܒܛܲܝܒܘܼܬ݂ܵܐ ܡܸܬ݂ܚܲܫܲܚ ܐ̄ܢܵܐ. ܡܵܢܵܐ ܡܸܬ݂ܓܲܕܲܦ ܐ̄ܢܵܐ ܥܲܠ ܡܸܕܸܡ ܕܐܸܢܵܐ ܡܵܘܕܹܐ ܐ̄ܢܵܐ.

³¹ܐܸܢ ܐܵܟ݂ܠܝܼܢ ܐ̄ܢܬܘܿܢ ܗܵܟܹܝܠ. ܘܐܸܢ ܫܵܬܹܝܢ ܐܢ̄ܬܘܿܢ. ܘܐܸܢ ܡܸܕܸܡ ܥܵܒ݂ܕܝܼܢ ܐܢ̄ܬܘܿܢ. ܟܠ ܡܸܕܸܡ ܠܬܸܫܒܿܘܿܚܬܵܐ ܕܐܲܠܵܗܵܐ ܗܘܲܝܬܿܘܿܢ ܥܵܒ݂ܕܝܼܢ.

³²ܕܠܵܐ ܬܘܼܩܠܵܐ ܗܘܵܘ ܠܲܝܗܘܼܕ݂ܵܝܹ̈ܐ ܘܠܲܐܪ̈ܡܵܝܹܐ ܘܲܠܥܕܬܹ݁ܗ ܕܐܲܠܵܗܵܐ.

³³ܐܲܝܟ݂ ܕܐܵܦ ܐܸܢܵܐ ܒܟ݂ܠ ܡܸܕܸܡ ܠܟ݂ܠܢܵܫ ܫܵܦܲܪ ܐ̄ܢܵܐ. ܘܠܵܐ ܒܵܥܹܐ ܐ̄ܢܵܐ ܡܸܕܸܡ ܕܠܝܼ ܦܲܩܵܚ. ܐܸܠܵܐ ܡܸܕܸܡ ܕܲܠܣܲܓܝܼ̈ܐܹܐ ܦܲܩܵܚ. ܕܢܚܘܿܢ.