Read Aramaic Peshita 1 Corinthians 12 Bible Online

1 Corinthians 12 - Aramaic Peshita bible

1 Corinthians 12

¹ܥܲܠ ܪ̈ܘܼܚܵܢܝܵܬ݂ܵܐ ܕܹܝܢ ܐܲܚܲܝ̈. ܨܵܒܹ̇ܐ ܐ̄ܢܵܐ ܕܬܸܕ̇ܥܘܼܢ

²ܕܚܲܢܦܹ̈ܐ ܗ̄ܘܲܝܬ݁ܘܿܢ. ܘܠܲܦܬܲܟ݂ܪܹ̈ܐ ܐܲܝܠܹܝܢ ܕܠܲܝܬ݁ ܠܗܘܿܢ ܩܵܠܵܐ ܕܠܵܐ ܦܘܼܪܫܵܢ ܡܸܬ݁ܕܲܒ݂ܪܝܼܢ ܗ̄ܘܲܝܬ݁ܘܿܢ.

³ܡܛܠ ܗܵܢܵܐ ܡܵܘܕܲܥ ܐ̄ܢܵܐ ܠܟ݂ܘܿܢ. ܕܠܲܝܬ݁ ܐ̄ܢܵܫ ܕܲܒ݂ܪܘܼܚܵܐ ܕܐܲܠܵܗܵܐ ܡܡܲܠܸܠ. ܘܐܵܡܲܪ ܕܲܚܪܸܡ ܗܘܼ ܝܼܫܘܿܥ. ܘܐܵܦܠܵܐ ܐ̄ܢܵܫ ܡܸܫܟܲܚ ܠܡܹܐܡܲܪ ܕܡܵܪܝܵܐ ܗܘܼ ܝܼܫܘܿܥ. ܐܸܠܵܐ ܐܸܢ ܒܪܘܼܚܵܐ ܕܩܘܼܕ݂ܫܵܐ.

⁴ܦܘܼܠܵܓܹ̈ܐ ܕܹܝܢ ܕܡܵܘ̈ܗܒ݂ܵܬ݂ܵܐ ܐܝܼܬܲܝܗܘܿܢ. ܐܸܠܵܐ ܚܕ݂ܵܐ ܗܝܼ ܪܘܼܚܵܐ.

⁵ܘܦܘܼܠܵܓܹ̈ܐ ܕܬܸܫ̈ܡܫܵܬ݂ܵܐ ܐܝܼܬܲܝܗܘܿܢ. ܐܸܠܵܐ ܚܲܕ݂ ܗܘܼ ܡܵܪܝܵܐ.

⁶ܘܦܘܼܠܵܓܹ̈ܐ ܕܚܲܝ̈ܠܵܘܵܬ݂ܵܐ ܐܝܼܬ݂. ܐܸܠܵܐ ܚܲܕ݂ ܗܘܼ ܐܲܠܵܗܵܐ. ܕܡܲܥܒܸܕ݂ ܟܠ ܒܟ݂ܠܢܵܫ.

⁷ܠܐ̄ܢܵܫ ܐ̄ܢܵܫ ܕܹܝܢ. ܡܸܬ݂ܝܼܗܸܒ݂ ܠܹܗ ܓܸܠܝܵܢܵܐ ܕܪܘܼܚܵܐ. ܐܲܝܟ݂ ܕܥܵܕ݂ܪܵܐ ܠܹܗ.

⁸ܐܝܼܬ݂ ܕܝܼܗܝܼܒ݂ܵܐ ܠܹܗ ܒܪܘܼܚܵܐ ܡܸܠܬ݂ܵܐ ܕܚܸܟ݂ܡܬ݂ܵܐ. ܠܲܐ̄ܚܪܹܢܵܐ ܕܹܝܢ ܡܸܠܬ݂ܵܐ ܕܝܼܕ݂ܲܥܬ݂ܵܐ. ܒܵܗܿ ܒܪܘܼܚܵܐ.

⁹ܠܲܐ̄ܚܪܹܢܵܐ ܗܲܝܡܵܢܘܼܬ݂ܵܐ. ܒܵܗܿ ܒܪܘܼܚܵܐ. ܠܲܐ̄ܚܪܹܢܵܐ ܡܵܘ̈ܗܒ݂ܵܬ݂ܵܐ ܕܐܵܣܝܘܼܬ݂ܵܐ. ܒܵܗܿ ܒܪܘܼܚܵܐ.

¹⁰ܠܲܐ̄ܚܪܹܢܵܐ ܕܹܝܢ ܚܲܝ̈ܠܹܐ. ܠܲܐ̄ܚܪܹܢܵܐ ܕܹܝܢ ܢܒ݂ܝܼܘܼܬ݂ܵܐ. ܠܲܐ̄ܚܪܹܢܵܐ ܕܹܝܢ ܦܵܪܘܿܫܘܼܬ݂ܵܐ ܕܪܘܼܚܵܐ. ܠܲܐ̄ܚܪܹܢܵܐ ܕܹܝܢ ܙ̈ܢܲܝܵܐ ܕܠܸܫܵܢܹ̈ܐ. ܠܲܐ̄ܚܪܹܢܵܐ ܕܹܝܢ ܦܘܼܫܵܩܵܐ ܕܠܸܫܵܢܹ̈ܐ.

¹¹ܟܠܗܹܝܢ ܕܹܝܢ ܗܵܠܹܝܢ ܚܕ݂ܵܐ ܗܝܼ ܪܘܼܚܵܐ ܣܵܥܪܵܐ. ܘܲܡܦܲܠܓ݂ܵܐ ܠܟ݂ܠܢܵܫ ܐܲܝܟ݂ ܕܗܝܼ ܨܵܒ݂ܝܵܐ.

¹²ܐܲܟ݂ܙܢܵܐ ܓܹܝܪ ܕܦܲܓ݂ܪܵܐ ܚܲܕ݂ ܗ̄ܘܼ. ܘܐܝܼܬ݂ ܒܹܗ ܗܲܕܵܡܹ̈ܐ ܣܲܓܝܼ̈ܐܹܐ. ܟܠܗܘܿܢ ܕܹܝܢ ܗܲܕܵܡܹ̈ܐ ܕܦܲܓ݂ܪܵܐ. ܟܲܕ݂ ܣܲܓܝܼ̈ܐܹܐ. ܐܝܼܬܲܝܗܘܿܢ ܚܲܕ݂ ܐܸܢܘܿܢ ܦܓܲܪ. ܗܵܟܲܢܵܐ ܐܵܦ ܡܫܝܼܚܵܐ.

¹³ܐܵܦ ܚܢܲܢ ܓܹܝܪ ܟܠܲܢ. ܒܲܚܕ݂ܵܐ ܪܘܼܚ ܠܚܲܕ݂ ܦܓܲܪ ܥܡܲܕ݂ܢ. ܐܸܢ ܝܗ̄ܘܼܕ݂ܵܝܹ̈ܐ. ܘܐܸܢ ܐܲܪ̈ܡܵܝܹܐ: ܘܐܸܢ ܥܲܒ݂ܕܹ̈ܐ. ܘܐܸܢ ܒܢܲܝ̈ ܚܹܐܪܹ̈ܐ. ܘܟ݂ܠܲܢ ܚܕ݂ܵܐ ܪܘܼܚܵܐ ܐܸܫܬ݁ܝܼܢ.

¹⁴ܐܵܦ ܦܲܓ݂ܪܵܐ ܓܹܝܪ ܠܵܐ ܗ̄ܘܵܐ ܚܲܕ݂ ܗܲܕܵܡ. ܐܸܠܵܐ ܣܲܓܝܼ̈ܐܹܐ.

¹⁵ܐܸܢ ܬܹܐܡܲܪ ܓܹܝܪ ܪܸܓ݂ܠܵܐ. ܕܡܛܠ ܕܠܵܐ ܗ̄ܘܹܝܬ݂ ܐܝܼܕ݂ܵܐ. ܠܵܐ ܗ̄ܘܹܝܬ݂ ܡܸܢܹܗ ܡܸܢ ܦܲܓ݂ܪܵܐ. ܠܵܘ ܡܛܠ ܗܵܕܹܐ ܠܲܝܬܹ݁ܝܗ ܡܸܢܹܗ ܡܸܢ ܦܲܓ݂ܪܵܐ.

¹⁶ܘܐܸܢ ܬܹܐܡܲܪ ܐܸܕ݂ܢܵܐ. ܥܲܠ ܕܠܵܐ ܗ̄ܘܹܝܬ݂ ܥܲܝܢܵܐ. ܠܵܐ ܗ̄ܘܹܝܬ݂ ܡܸܢܹܗ ܡܸܢ ܦܲܓ݂ܪܵܐ. ܠܵܘ ܡܛܠ ܗܵܕܹܐ ܠܲܝܬܹ݁ܝܗ ܡܸܢܹܗ ܡܸܢ ܦܲܓ݂ܪܵܐ.

¹⁷ܐܸܠܘܼ ܓܹܝܪ ܟܠܹܗ ܦܲܓ݂ܪܵܐ ܥܲܝܢܹ̈ܐ ܗ̄ܘܵܐ. ܐܲܝܟܵܐ ܗ̄ܘܵܬ݂ ܡܲܫܡܲܥܬ݂ܵܐ. ܘܐܸܠܘܼ ܟܠܹܗ ܡܲܫܡܲܥܬ݂ܵܐ ܗ̄ܘܵܐ. ܐܲܝܟܲܢܵܐ ܡܪܝܼܚ ܗ̄ܘܵܐ.

¹⁸ܗܵܫܵܐ ܕܹܝܢ ܐܲܠܵܗܵܐ ܣܵܡ ܟܠܚܲܕ݂ ܚܲܕ݂ ܡܸܢ ܗܲܕܵܡܹ̈ܐ ܒܦܲܓ݂ܪܵܐ. ܐܲܝܟܲܢܵܐ ܕܗܘܼ ܨܒ݂ܵܐ.

¹⁹ܐܸܠܘܼ ܕܹܝܢ ܟܠܗܘܿܢ ܚܲܕ݂ ܗ̄ܘܵܘ ܗܲܕܵܡܵܐ. ܐܲܝܟܵܐ ܗ̄ܘܵܐ ܦܲܓ݂ܪܵܐ.

²⁰ܗܵܫܵܐ ܕܹܝܢ ܗܲܕܵܡܹ̈ܐ ܐܝܼܬܲܝܗܘܿܢ ܣܲܓܝܼ̈ܐܹܐ. ܚܲܕ݂ ܗܘܼ ܕܹܝܢ ܦܲܓ݂ܪܵܐ.

²¹ܠܵܐ ܡܸܫܟܚܵܐ ܥܲܝܢܵܐ ܕܬܹܐܡܲܪ ܠܐܝܼܕ݂ܵܐ. ܕܠܵܐ ܡܸܬ݂ܒܲܥܝܵܐ ܐܲܢ̄ܬ݁ܝ ܠܝܼ. ܐܵܦܠܵܐ ܪܹܫܵܐ ܡܸܫܟܲܚ ܕܢܹܐܡܲܪ ܠܪܸ̈ܓ݂ܠܹܐ. ܕܠܵܐ ܡܸܬ݂ܒܲܥ̈ܝܵܢ ܐ̄ܢܬܹ݁ܝܢ ܠܝܼ.

²²ܐܸܠܵܐ ܝܲܬܝܼܪܵܐܝܼܬ݂ ܐܲܝܠܹܝܢ ܗܲܕܵܡܹ̈ܐ ܕܡܸܣܬܲܒ݂ܪܝܼܢ ܕܲܡܚܝܼܠܝܼܢ. ܥܠܲܝܗܘܿܢ ܗܘܼ ܣܘܼܢܩܵܢܵܐ.

²³ܘܐܲܝܠܹܝܢ ܕܣܵܒ݂ܪܝܼܢ ܚ̄ܢܲܢ ܕܲܡܨܲܥܪܝܼܢ ܐܸܢܘܿܢ ܒܦܲܓ݂ܪܵܐ. ܠܗܵܠܹܝܢ ܐܝܼܩܵܪܵܐ ܝܲܬܝܼܪܵܐ ܡܲܣܓܹ݁ܝܢ ܚ̄ܢܲܢ. ܘܐܲܝܠܹܝܢ ܕܲܕ݂ܢܘܼܟܵܦܵܐ ܐܸܢܘܿܢ. ܐܸܣܟܹܡܵܐ ܝܲܬܝܼܪܵܐ ܥܵܒ݂ܕܝܼܢ ܚ̄ܢܲܢ ܠܗܘܿܢ.

²⁴ܐܲܝܠܹܝܢ ܕܹܝܢ ܗܲܕܵܡܹ̈ܐ ܕܐܝܼܬ݂ ܒܲܢ ܕܲܡܝܲܩܪܝܼܢ. ܠܵܐ ܡܸܬ݂ܒܥܹܐ ܠܗܘܿܢ ܐܝܼܩܵܪܵܐ. ܐܲܠܵܗܵܐ ܓܹܝܪ ܡܲܙܓܹܗ ܠܦܲܓ݂ܪܵܐ. ܘܝܲܗ̄ܒ݂ ܐܝܼܩܵܪܵܐ ܝܲܬܝܼܪܵܐ ܠܗܲܕܵܡܵܐ ܐܲܝܢܵܐ ܕܲܙܥܘܿܪ.

²⁵ܕܠܵܐ ܬܸܗܘܹܐ ܦܵܠܓ݁ܘܼܬ݂ܵܐ ܒܦܲܓ݂ܪܵܐ. ܐܸܠܵܐ ܟܠܗܘܿܢ ܗܲܕܵܡܹ̈ܐ ܫܲܘܝܵܐܝܼܬ݂ ܚܲܕ݂ ܥܲܠ ܚܲܕ݂ ܢܸܗܘܘܿܢ ܝܵܨܦܝܼܢ.

²⁶ܕܐܸܡܲܬ݂ܝ ܕܚܲܕ݂ ܗܲܕܵܡ ܢܸܗܘܹܐ ܟܵܐܹܒ݂. ܟܠܗܘܿܢ ܢܸܗܘܘܿܢ ܚܵܫܝܼܢ. ܘܐܸܢ ܡܸܫܬܲܒܲܚ ܚܲܕ݂ ܗܲܕܵܡ. ܟܠܗܘܿܢ ܗܲܕܵܡܹ̈ܐ ܢܸܗܘܘܿܢ ܡܸܫܬܲܒܚܝܼܢ.

²⁷ܐܲܢ̄ܬ݁ܘܿܢ ܕܹܝܢ ܦܲܓ݂ܪܹܗ ܐܲܢ̄ܬ݁ܘܿܢ ܕܲܡܫܝܼܚܵܐ. ܘܗܲܕܵܡܹ̈ܐ ܒܕ݂ܘܼܟܲܬ݂ܟ݂ܘܿܢ.

²⁸ܣܵܡ ܓܹܝܪ ܐܲܠܵܗܵܐ ܒܥܹܕܬܹ݁ܗ. ܠܘܼܩܕ݂ܲܡ ܫܠܝܼܚܹ̈ܐ. ܒܵܬܲܪܗܘܿܢ ܢܒ݂ܝܹ̈ܐ. ܒܵܬܲܪܗܘܿܢ ܡܲܠܦܵܢܹ̈ܐ. ܒܵܬܲܪܗܘܿܢ ܥܵܒ݂ܕܲܝ̈ ܚܲܝ̈ܠܹܐ. ܒܵܬܲܪܗܘܿܢ ܡܵܘ̈ܗܒ݂ܵܬ݂ܵܐ ܕܐܵܣܝܘܼܬ݂ܵܐ. ܘܲܡܥܲܕܪ̈ܵܢܹܐ ܘܲܡܕ݂ܲܒܪ̈ܵܢܹܐ. ܘܲܙܢܲܝ̈ܵܐ ܕܠܸܫܵܢܹܐ.

²⁹ܕܲܠܡܵܐ ܟܠܗܘܿܢ ܫܠܝܼܚܹ̈ܐ. ܕܲܠܡܵܐ ܟܠܗܘܿܢ ܢܒ݂ܝܹ̈ܐ. ܠܡܵܐ ܟܠܗܘܿܢ ܡܲܠܦܵܢܹ̈ܐ. ܠܡܵܐ ܟܠܗܘܿܢ ܣܵܥܪ̈ܲܝ ܚܲܝ̈ܠܹܐ.

³⁰ܠܡܵܐ ܠܟ݂ܠܗܘܿܢ ܐܝܼܬ݂ ܠܗܘܿܢ ܡܵܘ̈ܗܒ݂ܵܬ݂ܵܐ ܕܐܵܣܝܘܼܬ݂ܵܐ. ܠܡܵܐ ܟܠܗܘܿܢ ܒܠܸܫܵܢܹ̈ܐ ܡܡܲܠܠܝܼܢ. ܐܵܘ ܕܲܠܡܵܐ ܟܠܗܘܿܢ ܡܦܲܫܩܝܼܢ.

³¹ܐܸܢ ܕܹܝܢ ܛܵܢܝܼܢ ܐ̄ܢܬܘܿܢ ܒܡܵܘ̈ܗܒ݂ܵܬ݂ܵܐ ܪܵܘܪ̈ܒ݂ܵܬ݂ܵܐ. ܐܸܢܵܐ ܬܘܼܒ݂ ܐܹܚܵܘܹܝܟ݂ܘܿܢ ܐܘܼܪܚܵܐ ܕܲܡܝܲܬܿܪܵܐ.