Read Aramaic Peshita 1 Corinthians 13 Bible Online

1 Corinthians 13 - Aramaic Peshita bible

1 Corinthians 13

¹ܐܸܢ ܒܟ݂ܠ ܠܸܫܵܢ ܕܲܒ݂ܢܲܝ̈ܢܵܫܵܐ ܐܹܡܲܠܸܠ ܘܒܲܕ݂ܡܲܠܲܐܟܹ̈ܐ: ܘܚܘܼܒܵܐ ܠܵܐ ܢܸܗܘܹܐ ܒܝܼ. ܗ̄ܘܹܝܬ݂ ܠܝܼ ܢܚܵܫܵܐ ܕܙܵܐܹܡ. ܐܵܘ ܨܸܨܠܵܐ ܕܝܵܗܹܒ݂ ܩܵܠܵܐ.

²ܘܐܸܢ ܬܸܗܘܹܐ ܒܝܼ ܢܒ݂ܝܼܘܼܬ݂ܵܐ. ܘܐܸܕܲܥ ܐ̄ܪ̈ܵܙܹܐ ܟܠܗܘܿܢ ܘܟ݂ܠܵܗܿ ܝܼܕ݂ܲܥܬ݂ܵܐ. ܘܐܸܢ ܬܸܗܘܹܐ ܒܝܼ ܟܠܵܗܿ ܗܲܝܡܵܢܘܼܬ݂ܵܐ ܐܲܝܟܲܢܵܐ ܕܛܘܼܪܹ̈ܐ ܐܹܫܲܢܹܐ. ܘܚܘܼܒܵܐ ܠܲܝܬܿ ܒܝܼ. ܠܵܐ ܗ̄ܘܹܝܬ݂ ܡܸܕܸܡ.

³ܘܐܸܢ ܐܵܘܟܸܠ ܟܠ ܕܐܝܼܬ݂ ܠܝܼ ܠܡܸܣܟܹܢܹ̈ܐ: ܘܐܸܢ ܐܲܫܠܸܡ ܦܲܓ݂ܪܝ ܕܢܹܐܩܲܕ݂. ܘܚܘܼܒܵܐ ܠܵܐ ܢܸܗܘܹܐ ܒܝܼ. ܡܸܕܸܡ ܠܵܐ ܝܵܬܲܪ ܐ̄ܢܵܐ.

⁴ܚܘܼܒܵܐ ܢܲܓ݁ܝܼܪܵܐ ܗܝܼ ܪܘܼܚܹܗ. ܘܒܲܣܝܼܡ. ܚܘܼܒܵܐ ܠܵܐ ܚܵܣܹܡ. ܚܘܼܒܵܐ ܠܵܐ ܡܸܫܬܿܓܸܫ. ܘܠܵܐ ܡܸܬ݂ܚܬܲܪ.

⁵ܘܠܵܐ ܣܵܥܲܪ ܕܒܸܗܬܿܬ݂ܵܐ. ܘܠܵܐ ܒܵܥܹܐ ܕܝܼܠܹܗ. ܘܠܵܐ ܡܸܬ݁ܬ݁ܦܝܼܪ. ܘܠܵܐ ܡܸܬ݂ܪܲܥܹܐ ܕܒ݂ܝܼܫ.

⁶ܠܵܐ ܚܵܕܹܐ ܒܥܵܘܠܵܐ. ܐܸܠܵܐ ܚܵܕܹܐ ܒܩܘܼܫܬܵܐ.

⁷ܟܠ ܡܸܕܸܡ ܡܣܲܝܒܲܪ. ܟܠ ܡܸܕܸܡ ܡܗܲܝܡܸܢ. ܟܠ ܡܣܲܒܲܪ. ܟܠ ܣܵܒܹ̇ܠ.

⁸ܚܘܼܒܵܐ ܡܸܡܬ݂ܘܿܡ ܠܵܐ ܢܵܦܹܿܠ. ܢܒ݂̈ܝܼ̈ܘܵܬ݂ܵܐ ܓܹܝܪ ܢܸܬ݂ܒܲܛܠܵܢ. ܘܠܸܫܵܢܹ̈ܐ ܢܸܫܬܲܬܿܩܘܼܢ. ܘܝܼܕ݂ܲܥܬ݂ܵܐ ܬܸܬ݂ܒܲܛܲܠ.

⁹ܩܲܠܝܼܠ ܗܘܼ ܓܹܝܪ ܡܸܢ ܣܲܓܝܼ ܝܵܕ݂ܥܝܼܢ ܚ̄ܢܲܢ. ܘܩܲܠܝܼܠ ܡܸܢ ܣܲܓܝܼ ܡܸܬ݂ܢܲܒܹܝܢ ܚ̄ܢܲܢ.

¹⁰ܐܸܡܲܬ݂ܝ ܕܹܝܢ ܕܬܹܐܬܹܐ ܓܡܝܼܪܘܼܬ݂ܵܐ. ܗܵܝܕܹܝܢ ܢܸܬ݂ܒܲܛܲܠ ܗܵܘ ܡܸܕܸܡ ܕܩܲܠܝܼܠ ܗ̄ܘܵܐ.

¹¹ܟܲܕ݂ ܝܲܠܘܼܕ݂ܵܐ ܗ̄ܘܹܝܬ݂. ܐܲܝܟ݂ ܝܲܠܘܼܕ݂ܵܐ ܡܡܲܠܸܠ ܗ̄ܘܹܝܬ݂. ܘܐܲܝܟ݂ ܝܲܠܘܼܕ݂ܵܐ ܡܸܬ݂ܪܲܥܹܐ ܗ̄ܘܹܝܬ݂. ܘܐܲܝܟ݂ ܝܲܠܘܼܕ݂ܵܐ ܡܸܬ݂ܚܲܫܲܒ݂ ܗ̄ܘܹܝܬ݂. ܟܲܕ݂ ܗ̄ܘܹܝܬ݂ ܕܹܝܢ ܓܲܒ݂ܪܵܐ. ܒܲܛܠܹܬ݂ ܗܵܠܹܝܢ ܕܛܲܠܝܘܼܬ݂ܵܐ.

¹²ܗܵܫܵܐ ܐܲܝܟ݂ ܕܲܒ݂ܡܲܚܙܝܼܬ݂ܵܐ ܚܵܙܹܝܢ ܚ̄ܢܲܢ. ܒܦܸܠܐܬ݂ܵܐ. ܗܵܝܕܹܝܢ ܕܹܝܢ ܐܲܦܝܼ̈ܢ ܠܘܼܩܒܲܠ ܐܲܦܝܼ̈ܢ. ܗܵܫܵܐ ܝܵܕ݂ܲܥ ܐ̄ܢܵܐ ܩܲܠܝܼܠ ܡܸܢ ܣܲܓܝܼ. ܗܵܝܕܹܝܢ ܕܹܝܢ ܐܸܕܲܥ ܐܲܝܟ݂ ܡܵܐ ܕܐܸܬ݂ܝܲܕ݂ܥܹܬ݂.

¹³ܗܵܠܹܝܢ ܐܸܢܹܝܢ ܓܹܝܪ ܬܿܠܵܬ݂ ܕܲܡܟܲܬܿܪ̈ܵܢ: ܗܲܝܡܵܢܘܼܬ݂ܵܐ ܘܣܲܒ݂ܪܵܐ. ܘܚܘܼܒܵܐ. ܕܪܲܒ ܕܹܝܢ ܡܸܢܗܹܝܢ ܚܘܼܒܵܐ.