Read Aramaic Peshita 1 Corinthians 14 Bible Online

1 Corinthians 14 - Aramaic Peshita bible

1 Corinthians 14

¹ܗܲܪܛܘ ܒܵܬܲܪ ܚܘܼܒܵܐ. ܘܛܲܢܘ ܒܡܵܘ̈ܗܒ݂ܵܬ݂ܵܐ ܕܪܘܼܚܵܐ. ܝܲܬܝܼܪܵܐܝܼܬ݂ ܕܹܝܢ ܕܬܸܬ݂ܢܲܒܘܼܢ.

²ܡܲܢ ܕܲܡܡܲܠܸܠ ܓܹܝܪ ܒܠܸܫܵܢܵܐ. ܠܵܐ ܗ̄ܘܵܐ ܠܲܒ݂ܢܲܝ̈ܢܵܫܵܐ ܡܡܲܠܸܠ. ܐܸܠܵܐ ܠܐܲܠܵܗܵܐ. ܠܵܐ ܓܹܝܪ ܐ̄ܢܵܫ ܫܵܡܲܥ ܡܸܕܸܡ ܕܲܡܡܲܠܸܠ. ܐܸܠܵܐ ܒܪܘܼܚ ܐ̄ܪܵܙܵܐ ܡܡܲܠܸܠ.

³ܐܲܝܢܵܐ ܕܹܝܢ ܕܡܸܬ݂ܢܲܒܹܐ. ܠܲܒ݂ܢܲܝ̈ܢܵܫܵܐ ܡܡܲܠܸܠ ܒܸܢܝܵܢܵܐ ܘܠܘܼܒܵܒ݂ܵܐ. ܘܒ݂ܘܼܝܵܐܵܐ.

⁴ܕܲܡܡܲܠܸܠ ܒܠܸܫܵܢܵܐ. ܢܲܦ̮ܫܹܗ ܗܘܼ ܒܵܢܹܐ. ܘܲܕ݂ܡܸܬ݂ܢܲܒܹܐ. ܥܹܕܬܵܐ ܒܵܢܹܐ.

⁵ܨܵܒܹܐ ܐ̄ܢܵܐ ܕܹܝܢ. ܕܟ݂ܠܟ݂ܘܼܢ ܬܿܡܲܠܠܘܼܢ ܒܠܸܫܵܢܹ̈ܐ. ܝܲܬܝܼܪܵܐܝܼܬ݂ ܕܹܝܢ ܕܬܸܬ݂ܢܲܒܘܼܢ. ܪܲܒ ܗܘܼ ܓܹܝܪ ܐܲܝܢܵܐ ܕܡܸܬ݂ܢܲܒܹܐ. ܡܸܢ ܗܵܘ ܕܲܡܡܲܠܸܠ ܒܠܸܫܵܢܵܐ. ܐܸܢ ܠܵܐ ܡܦܲܫܸܩ. ܐܸܢ ܕܹܝܢ ܡܦܲܫܸܩ. ܥܹܕܬܵܐ ܒܵܢܹܐ.

⁶ܘܗܵܫܵܐ ܐܲܚܲܝ̈. ܐܸܢ ܐܹܬܹܐ ܠܘܵܬ݂ܟ݂ܘܿܢ. ܘܐܹܡܲܠܸܠ ܥܲܡܟ݂ܘܿܢ ܒܠܸܫܵܢܹ̈ܐ: ܡܵܢܵܐ ܡܵܘܬܲܪ ܐ̄ܢܵܐ ܠܟ݂ܘܿܢ. ܐܸܠܵܐ ܐܸܢ ܐܹܡܲܠܸܠ ܥܲܡܟ݂ܘܿܢ. ܐܵܘ ܒܓܸܠܝܵܢܵܐ. ܐܵܘ ܒܝܼܕ݂ܲܥܬ݂ܵܐ. ܐܵܘ ܒܲܢܒ݂ܝܼܘܼܬ݂ܵܐ. ܐܵܘ ܒܝܘܼܠܦܵܢܵܐ.

⁷ܐܵܦ ܨܸܒ݂̈ܘܵܬ݂ܵܐ ܓܹܝܪ ܐܲܝܠܹܝܢ ܕܠܲܝܬܿ ܒܗܹܝܢ ܢܲܦ̮ܫܵܐ. ܘܝܵܗܒܵܢ ܩܵܠܵܐ. ܐܸܢ ܐܲܒܘܼܒ݂ܵܐ. ܘܐܸܢ ܩܝܼܬ݂ܵܪܵܐ. ܐܸܢ ܦܘܼܪܫܵܢܵܐ ܠܵܐ ܥܵܒ݂ܕܵܢ ܒܹܝܬ݂ ܩܝܼܢܬܵܐ ܠܲܚܒܲܪܬ݂ܵܗܿ. ܐܲܝܟܲܢܵܐ ܡܸܬ݂ܝܼܕ݂ܲܥ ܡܸܕܸܡ ܕܡܸܙܕܲܡܲܪ. ܐܵܘ ܡܸܕܸܡ ܕܡܸܬ݂ܢܩܸܫ.

⁸ܘܐܸܢ ܩܲܪܢܵܐ ܬܸܩܪܹܐ ܩܵܠܵܐ ܕܠܵܐ ܦܪܝܼܫ. ܡܲܢܘܼ ܢܸܬܿܛܲܝܲܒ݂ ܠܲܩܪܵܒ݂ܵܐ.

⁹ܗܵܟܲܢܵܐ ܐܵܦ ܐܲܢ̄ܬܘܿܢ. ܐܸܢ ܬܹܐܡܪܘܼܢ ܡܸܠܬ݂ܵܐ ܒܠܸܫܵܢܵܐ. ܘܠܵܐ ܬܸܗܘܹܐ ܡܦܲܫܩܵܐ. ܐܲܝܟܲܢܵܐ ܡܸܬ݂ܝܼܕ݂ܲܥ ܡܸܕܸܡ ܕܐܵܡܪܝܼܢ ܐܢ̄ܬܘܿܢ. ܗܵܘܹܝܬܿܘܢ ܠܟ݂ܘܿܢ. ܐܲܝܟ݂ ܗܵܘ ܕܥܲܡ ܐܵܐܲܪ ܡܡܲܠܠܝܼܢ ܐܢ̄ܬܘܿܢ.

¹⁰ܗܵܐ ܓܹܝܪ ܓܸܢܣܹ̈ܐ ܕܠܸܫܵܢܹ̈ܐ ܣܲܓܝܼ̈ܐܹܐ ܐܝܼܬ݂ ܒܥܵܠܡܵܐ. ܘܠܲܝܬܿ ܚܲܕ݂ ܡܸܢܗܘܿܢ ܕܠܵܐ ܩܵܠܵܐ.

¹¹ܘܐܸܢ ܠܵܐ ܝܵܕ݂ܲܥ ܐ̄ܢܵܐ ܚܲܝܠܹܗ ܕܩܵܠܵܐ. ܗܵܘܹܐ ܐ̄ܢܵܐ ܠܝܼ ܒܲܪܒܪܵܝܵܐ ܠܗܵܘ ܕܲܡܡܲܠܸܠ. ܘܐܵܦ ܗܵܘ ܕܲܡܡܲܠܸܠ ܗܵܘܹܐ ܠܹܗ ܠܝܼ ܒܲܪܒܪܵܝܵܐ.

¹²ܗܵܟܲܢܵܐ ܐܵܦ ܐܲܢ̄ܬܘܿܢ. ܡܛܠ ܕܛܲܢܵܢܹ̈ܐ ܐܲܢ̄ܬܿܘܿܢ ܕܡܵܘ̈ܗܒ݂ܵܬ݂ܵܐ ܕܪܘܼܚܵܐ. ܠܒܸܢܝܵܢܵܐ ܕܥܹܕܬܵܐ. ܒܥܵܘ ܕܬܸܬ݂ܝܲܬܿܪܘܼܢ.

¹³ܘܗܵܘ ܕܲܡܡܲܠܸܠ ܒܠܸܫܵܢܵܐ. ܢܨܲܠܹܐ ܕܲܢܦܲܫܸܩ.

¹⁴ܐܸܢ ܗܘܼ ܓܹܝܪ ܕܲܗܘܹܝܬ݂ ܡܨܲܠܹܐ ܒܠܸܫܵܢܵܐ. ܪܘܼܚܝ ܗܘܼ ܡܨܲܠܝܵܐ. ܡܲܕܲܥܝ ܕܹܝܢ ܕܠܵܐ ܦܹܐܪ̈ܝܼܢ ܗ̄ܘܼ.

¹⁵ܡܵܢܵܐ ܗܵܟܹܝܠ ܐܸܥܒܸܕ݂. ܐܹܨܲܠܹܐ ܒܪܘܼܚܝ. ܘܐܹܨܲܠܹܐ ܐܵܦ ܒܡܲܕܲܥܝ. ܘܐܹܙܲܡܲܪ ܒܪܘܼܚܝ. ܘܐܹܙܲܡܲܪ ܐܵܦ ܒܡܲܕܲܥܝ.

¹⁶ܘܐܸܢ ܠܵܐ ܐܸܢ ܡܒܲܪܸܟ݂ ܐܲܢ̄ܬܿ ܒܪܘܼܚ. ܗܵܘ ܕܲܡܡܲܠܹܐ ܕܘܼܟܬܹܗ ܕܗܸܕ݂ܝܘܿܛܵܐ. ܐܲܝܟܲܢܵܐ ܢܹܐܡܲܪ ܐܵܡܹܝܢ ܥܲܠ ܬܵܘܕܝܼܬ݂ܵܟ݂ ܕܝܼܠܵܟ݂. ܡܛܠ ܕܡܵܢܵܐ ܐܵܡܲܪ ܐܲܢ̄ܬܿ ܠܵܐ ܝܵܕ݂ܲܥ.

¹⁷ܐܲܢ̄ܬܿ ܓܹܝܪ ܫܲܦܝܼܪ ܡܒܲܪܸܟ݂ ܐܲܢ̄ܬܿ. ܐܸܠܵܐ ܚܲܒ݂ܪܵܟ݂ ܠܵܐ ܡܸܬ݂ܒܲܢܹܐ.

¹⁸ܡܵܘܕܹܐ ܐ̄ܢܵܐ ܠܐܲܠܵܗܵܐ. ܕܝܲܬܿܝܼܪ ܡܸܢ ܟܠܟ݂ܘܿܢ ܡܡܲܠܸܠ ܐ̄ܢܵܐ ܒܠܸܫܵܢܹ̈ܐ.

¹⁹ܐܸܠܵܐ ܒܥܹܕܬܵܐ ܨܵܒܹܐ ܐ̄ܢܵܐ ܕܚܲܡܸܫ ܡܸܠܝܼ̈ܢ ܒܡܲܕܲܥܝ ܐܹܡܲܠܸܠ. ܕܐܵܦ ܐ̄ܚܪܵܢܹ̈ܐ ܐܲܠܸܦ. ܝܲܬܿܝܼܪ ܡܸܢ ܪܸܒܘܼ ܡܸܠܝܼ̈ܢ ܒܠܸܫܵܢܵܐ.

²⁰ܐܲܚܲܝ̈. ܠܵܐ ܗܘܲܝܬܿܘܿܢ ܛܠܹܝܢ ܒܪܸ̈ܥܝܵܢܲܝܟܿܘܿܢ. ܐܸܠܵܐ ܠܒ̈ܝܼܫܵܬ݂ܵܐ ܗܘܵܘ ܝܲܠܘܼܕܹ̈ܐ. ܘܲܒ݂ܪܸ̈ܥܝܵܢܲܝܟܿܘܿܢ ܗܘܵܘ ܓܡܝܼܪܝܼܢ.

²¹ܒܢܵܡܘܿܣܵܐ ܟܬ݂ܝܼܒ݂. ܕܲܒ݂ܡܲܡܠ̱ܠܵܐ ܢܘܼܟ݂ܪܵܝܵܐ ܘܲܒ݂ܠܸܫܵܢܵܐ ܐ̄ܚܪܹܢܵܐ. ܐܹܡܲܠܸܠ ܥܲܡܹܗ ܥܲܡ ܥܲܡܵܐ ܗܵܢܵܐ. ܐܵܦܠܵܐ ܗܵܟܲܢܵܐ ܢܸܫܡܥܘܼܢܵܢܝ. ܐܵܡܲܪ ܡܵܪܝܵܐ.

²²ܡܵܕܹܝܢ ܠܸܫܵܢܹ̈ܐ ܠܐܵܬ݂ܵܐ ܗܘܼ ܣܝܼܡܝܼܢ. ܠܵܐ ܠܲܡܗܲܝܡܢܹ̈ܐ. ܐܸܠܵܐ ܠܐܲܝܠܹܝܢ ܕܠܵܐ ܡܗܲܝܡܢܝܼܢ. ܢܒ݂̈ܝܼܵܘܵܬ݂ܵܐ ܕܹܝܢ. ܠܵܐ ܗ̄ܘܵܐ ܠܐܲܝܠܹܝܢ ܕܠܵܐ ܡܗܲܝܡܢܝܼܢ. ܐܸܠܵܐ ܠܐܲܝܠܹܝܢ ܕܲܡܗܲܝܡܢܝܼܢ.

²³ܐܸܢ ܗܘܼ ܗܵܟܹܝܠ ܕܬܸܬ݂ܟܲܢܲܫ ܟܠܵܗܿ ܥܹܕܬܵܐ. ܘܟ݂ܠܗܘܿܢ ܒܠܸܫܵܢܹ̈ܐ ܢܡܲܠܠܘܼܢ. ܘܢܸܥܠܘܼܢ ܗܸܕ݂ܝ̈ܘܿܛܹܐ. ܐܵܘ ܐܲܝܠܹܝܢ ܕܠܵܐ ܡܗܲܝܡܢܝܼܢ. ܠܵܐ ܐܵܡܪܝܼܢ. ܕܗܵܠܹܝܢ ܫܢܵܘ ܠܗܘܿܢ.

²⁴ܘܐܸܢ ܟܠܟ݂ܘܿܢ ܬܸܗܘܘܿܢ ܡܸܬ݂ܢܲܒܹܝܢ. ܘܢܸܥܘܿܠ ܠܘܵܬ݂ܟ݂ܘܿܢ ܗܸܕ݂ܝܘܿܛܵܐ. ܐܵܘ ܡܲܢ ܕܠܵܐ ܡܗܲܝܡܸܢ. ܡܸܬ݂ܒܨܹܐ ܡܸܢ ܟܠܟ݂ܘܿܢ. ܘܡܸܬ݂ܟܵܘܲܢ ܡܸܢ ܟܠܟ݂ܘܿܢ.

²⁵ܘܟܲܣ̈ܝܵܬ݂ܵܐ ܕܠܸܒܹܗ ܡܸܬ݂ܓܲܠܝܵܢ. ܘܗܵܝܕܹܝܢ ܢܸܦܸܠ ܥܲܠ ܐܲܦܵܘ̈ܗܝ. ܘܢܸܣܓ݁ܘܿܕ݂ ܠܐܲܠܵܗܵܐ. ܘܢܹܐܡܲܪ. ܫܲܪܝܼܪܵܐܝܼܬ݂ ܐܲܠܵܗܵܐ ܐܝܼܬ݂ ܒܟ݂ܘܿܢ.

²⁶ܐܵܡܲܪ ܐ̄ܢܵܐ ܗܵܟܹܝܠ ܐܲܚܲܝ̈. ܕܐܸܡܲܬ݂ܝ ܕܡܸܬ݂ܟܲܢܫܝܼܢ ܐܢ̄ܬܘܿܢ. ܠܐܲܝܢܵܐ ܡܸܢܟ݂ܘܿܢ ܕܐܝܼܬ݂ ܠܹܗ ܡܲܙܡܘܪܵܐ ܢܹܐܡܲܪ. ܘܐܲܝܢܵܐ ܕܐܝܼܬ݂ ܠܹܗ ܝܘܼܠܦܵܢܵܐ. ܘܐܲܝܢܵܐ ܕܐܝܼܬ݂ ܠܹܗ ܓܸܠܝܵܢܵܐ. ܘܐܲܝܢܵܐ ܕܐܝܼܬ݂ ܠܹܗ ܠܸܫܵܢܵܐ. ܘܐܲܝܢܵܐ ܕܐܝܼܬ݂ ܠܹܗ ܦܘܼܫܵܩܵܐ. ܟܠܗܹܝܢ ܠܒܸܢܝܵܢܵܐ ܢܸܗܘܝܵܢ.

²⁷ܘܐܸܢ ܒܠܸܫܵܢܵܐ ܐ̄ܢܵܫ ܢܡܲܠܸܠ. ܬܪܹܝܢ ܢܡܲܠܠܘܼܢ. ܘܟܲܕ݂ ܣܲܓܝܼ ܬܿܠܵܬ݂ܵܐ. ܘܚܲܕ݂ ܚܲܕ݂ ܢܡܲܠܠܘܼܢ. ܘܚܲܕ݂ ܢܦܲܫܸܩ.

²⁸ܘܐܸܢ ܠܲܝܬܿ ܕܲܡܦܲܫܸܩ. ܢܸܫܬܿܘܿܩ ܠܹܗ ܒܥܹܕܬܵܐ ܗܵܘ ܕܲܡܡܲܠܸܠ ܒܠܸܫܵܢܵܐ. ܘܒܲܝܢܵܘܗܝ ܠܢܲܦ̮ܫܹܗ ܘܠܲܐܠܵܗܵܐ ܢܡܲܠܸܠ.

²⁹ܢܒ݂ܝܹ̈ܐ ܕܹܝܢ ܬܪܹܝܢ ܐܵܘ ܬܿܠܵܬ݂ܵܐ ܢܡܲܠܠܘܼܢ. ܘܫܲܪܟܵܐ ܢܦܲܪܫܘܼܢ.

³⁰ܘܐܸܢ ܠܲܐ̄ܚܪܹܢܵܐ ܢܸܬ݂ܓ݁ܠܹܐ ܟܲܕ݂ ܝܵܬܹ݁ܒ݂. ܩܲܕ݂ܡܵܝܵܐ ܢܸܫܬܿܘܿܩ ܠܹܗ.

³¹ܡܸܫܟܿܚܝܼܢ ܐ̄ܢܬܘܿܢ ܓܹܝܪ ܟܠܟ݂ܘܿܢ ܕܚܲܕ݂ ܚܲܕ݂ ܬܸܬ݂ܢܲܒܘܼܢ. ܕܟ݂ܠܢܵܫ ܢܹܐܠܲܦ. ܘܟ݂ܠܢܵܫ ܢܸܬ݂ܒܲܝܲܐ.

³²ܪܘܼܚܵܐ ܓܹܝܪ ܕܲܢܒ݂ܝܹ̈ܐ ܠܲܢܒ݂ܝܹ̈ܐ ܡܸܫܬܲܥܒܕ݂ܵܐ.

³³ܡܛܠ ܕܐܲܠܵܗܵܐ ܠܵܐ ܗ̄ܘܵܐ ܕܲܫܓ݂ܘܼܫܝܵܐ. ܐܸܠܵܐ ܕܲܫܠܵܡܵܐ. ܐܲܝܟ݂ ܕܲܒ݂ܟ̣ܠܗܹܝܢ ܥܹ̈ܕ̣ܵܬܵܐ ܕܩܲܕܝܼܫܹ̈ܐ.

³⁴ܢܸܫܲܝ̈ܟ݁ܘܿܢ ܒܥܹܕܬܵܐ ܢܸܗܘ̈ܝܵܢ ܫܲܬܿܝܼܩܵܢ. ܠܵܐ ܓܹܝܪ ܡܲܦܲܣ ܠܗܹܝܢ ܕܲܢܡܲܠܠܵܢ. ܐܸܠܵܐ ܕܢܸܫܬܲܥܒܕ݂ܵܢ: ܐܲܝܟܲܢܵܐ ܕܐܵܦ ܢܵܡܘܿܣܵܐ ܐܸܡܲܪ.

³⁵ܘܐܸܢ ܡܸܕܸܡ ܨܵܒ݂ܝܵܢ ܕܢܹܐܠܦܵܢ: ܒܒ݂ܵܬܲܝ̈ܗܹܝܢ ܢܫܲܐܠܵܢ ܠܒܲܥܠܲܝ̈ܗܹܝܢ. ܒܹܗܬܿܬ݂ܵܐ ܗܝܼ ܓܹܝܪ ܕܢܸܫܹ̈ܐ ܒܥܹܕܬܵܐ ܢܡܲܠܠܵܢ.

³⁶ܐܵܘ ܕܲܠܡܵܐ ܡܸܢܟ݂ܘܿܢ ܗ̄ܘܼ ܢܸܦܩܲܬ݂ ܡܸܠܬܹܗ ܕܐܲܠܵܗܵܐ. ܐܵܘ ܠܘܵܬ݂ܟ݂ܘܿܢ ܗ̄ܘܼ ܒܲܠܚܘܿܕ݂ ܡܛܵܬ݂.

³⁷ܐܸܢ ܐ̄ܢܵܫ ܕܹܝܢ ܡܸܢܟ݂ܘܿܢ ܣܵܒܲܪ ܕܲܢܒ݂ܝܼܵܐ ܗܘܼ. ܐܵܘ ܕܪܘܼܚܵܐ ܗܘܼ. ܢܸܕܲܥ ܗܵܠܹܝܢ ܕܟܵܬܹܒ݂ ܐ̄ܢܵܐ ܠܟ݂ܘܿܢ. ܕܦܘܼܩܕܵܢܹ̈ܐ ܐܸܢܘܿܢ ܕܡܵܪܲܢ.

³⁸ܐܸܢ ܐ̄ܢܵܫ ܕܹܝܢ ܠܵܐ ܝܵܕ݂ܲܥ. ܠܵܐ ܢܸܕܲܥ.

³⁹ܛܲܢܘ ܗܵܟܹܝܠ ܐܲܚܲܝ̈ ܠܡܸܬ݂ܢܲܒܵܝܘܼ. ܘܠܲܡܡܲܠܵܠܘܼ ܒܠܸܫܵܢܹ̈ܐ ܠܵܐ ܬܸܟ݂ܠܘܼܢ.

⁴⁰ܟܠ ܡܸܕܸܡ ܕܹܝܢ ܒܐܸܣܟܹܡܵܐ ܘܲܒ̣ܛܲܟ݂ܣܵܐ ܢܸܗܘܹܐ.