Read Aramaic Peshita 1 Corinthians 15 Bible Online

1 Corinthians 15 - Aramaic Peshita bible

1 Corinthians 15

¹ܡܵܘܕܲܥ ܐ̄ܢܵܐ ܠܟ݂ܘܿܢ ܕܹܝܢ ܐܲܚܲܝ̈. ܐܹܘܲܢܓܲܠܝܼܘܿܢ ܕܣܲܒܲܪܬܿܟ݂ܘܿܢ. ܘܩܲܒܸܠܬܿܘܿܢܵܝܗܝ. ܘܩܵܡܬܿܘܢ ܒܹܗ.

²ܘܒܹܗ ܚܵܐܹܝܢ ܐܢ̄ܬܘܿܢ. ܒܐܲܝܕ݂ܵܐ ܡܸܠܬ݂ܵܐ ܣܲܒܲܪܬܿܟ݂ܘܿܢ. ܐܸܢ ܥܵܗܕܝܼܢ ܐܢ̄ܬܘܿܢ. ܐܸܢ ܠܵܐ ܗ̄ܘܵܐ ܣܪܝܼܩܵܐܝܼܬ݂ ܗܲܝܡܸܢܬܿܘܢ.

³ܐܲܫܠܡܸܬ݂ ܠܟ݂ܘܿܢ ܓܹܝܪ ܡܸܢ ܠܘܼܩܕ݂ܲܡ ܐܲܝܟ݂ ܡܸܕܸܡ ܕܩܲܒܠܹܬ݂. ܕܲܡܫܝܼܚܵܐ ܡܝܼܬ݂ ܥܲܠ ܐܲܦܲܝ̈ ܚܛܵܗܲܝ̈ܢ: ܐܲܝܟܲܢܵܐ ܕܲܟܬ݂ܝܼܒ݂.

⁴ܘܕܐܸܬ݂ܩܒܲܪ (ܕܐܸܬ݂ܩܒܲܪ). ܘܩܼܵܡ ܠܲܬ݂ܠܵܬ݂ܵܐ ܝܵܘܡ̈ܝܼܢ: ܐܲܝܟ݂ ܕܲܟܬ݂ܝܼܒ݂.

⁵ܘܐܸܬ݂ܚܙܝܼ ܠܟܹܐܦܵܐ. ܘܒ݂ܵܬ݂ܪܹܗ ܠܲܬ݂ܪܸܥܣܲܪ.

⁶ܘܒܵܬܲܪܟܸܢ ܐܸܬ݂ܚܙܝܼ ܠܝܲܬܿܝܼܪ ܡܸܢ ܚܲܡܸܫܡܵܐܐ ܐܲܚ̈ܝܼܢ ܐܲܟ݂ܚܕ݂ܵܐ. ܕܣܲܓܝܼ̈ܐܹܐ ܡܸܢܗܘܿܢ ܩܲܝܵܡܝܼܢ ܐܸܢܘܿܢ ܥܕ݂ܲܡܵܐ ܠܗܵܫܵܐ. ܘܡܸܢܗܘܿܢ ܕܡܸܟ݂ܘ.

⁷ܘܡܸܢ ܒܵܬܲܪ ܗܵܠܹܝܢ ܐܸܬ݂ܚܙܝܼ ܠܝܲܥܩܘܿܒ݂. ܘܒ݂ܵܬ݂ܪܹܗ ܠܲܫܠܝܼܚܹ̈ܐ ܟܠܗܘܿܢ.

⁸ܠܚܲܪܬ݂ܵܐ ܕܹܝܢ ܕܟ݂ܠܗܘܿܢ. ܐܲܝܟ݂ ܕܲܠܝܲܚܛܵܐ. ܐܸܬ݂ܚܙܝܼ ܐܵܦ ܠܝܼ.

⁹ܐܸܢܵܐ ܐ̄ܢܵܐ ܓܹܝܪ ܙܥܘܿܪܗܘܿܢ ܕܲܫܠܝܼܚܹ̈ܐ. ܘܠܵܐ ܫܵܘܹܐ ܐ̄ܢܵܐ ܕܐܸܬ݂ܩܪܹܐ ܫܠܝܼܚܵܐ. ܡܛܠ ܕܪܸܕ݂ܦܹܬ݂ ܥܹܕܬܹ݁ܗ ܕܐܲܠܵܗܵܐ.

¹⁰ܒܛܲܝܒܘܼܬܹܗ ܕܹܝܢ ܕܐܲܠܵܗܵܐ ܐܝܼܬܲܝ ܡܸܕܸܡ ܕܐܝܼܬܲܝ. ܘܛܲܝܒܘܼܬܹܗ ܕܒ݂ܝܼ. ܠܵܐ ܗܘܸܵܬ݂ ܣܪܝܼܩܵܐ. ܐܸܠܵܐ ܝܲܬܿܝܼܪ ܡܸܢ ܟܠܗܘܿܢ ܠܐܝܼܬ݂. ܠܵܐ ܐܸܢܵܐ. ܐܸܠܵܐ ܛܲܝܒܘܼܬܹܗ ܕܥܲܡܝ.

¹¹ܐܸܢ ܐܸܢܵܐ ܗܵܟܹܝܠ ܘܐܸܢ ܗܸܢܘܿܢ. ܗܵܟܲܢܵܐ ܡܲܟ݂ܪܙܝܼܢ ܚ̄ܢܲܢ. ܘܗܵܟܲܢܵܐ ܗܲܝܡܸܢܬܿܘܢ.

¹²ܐܸܢ ܕܹܝܢ ܡܫܝܼܚܵܐ ܡܸܬ݂ܟܪܸܙ ܕܩܵܡ ܡܸܢ ܒܹܝܬ݂ ܡܝܼܬܹ̈ܐ. ܐܲܝܟܲܢܵܐ ܐܝܼܬ݂ ܒܟ݂ܘܿܢ ܐ̄ܢܵܫܵܐ ܕܐܵܡܪܝܼܢ. ܠܲܝܬܿ ܚܵܝܲܬ݂ ܡܝܼܬܹ̈ܐ.

¹³ܘܐܸܢ ܚܵܝܲܬ݂ ܡܝܼܬܹ̈ܐ ܠܲܝܬܿ. ܐܵܦܠܵܐ ܡܫܝܼܚܵܐ ܩܵܡ.

¹⁴ܘܐܸܢ ܡܫܝܼܚܵܐ ܠܵܐ ܩܵܡ. ܣܪܝܼܩܵܐ ܗܝܼ ܟܵܪܘܿܙܘܼܬܲܢ. ܣܪܝܼܩܵܐ ܐܵܦ ܗܲܝܡܵܢܘܼܬ݂ܟ݂ܘܿܢ.

¹⁵ܡܸܫܬܲܟ݂ܚܝܼܢ ܚ̱ܢܲܢ ܕܹܝܢ ܐܵܦ ܣܵܗܕܹ̈ܐ ܕܲܓܵܠܹܐ ܕܐܲܠܵܗܵܐ. ܕܐܲܣܗܸܕ݂ܢ ܥܲܠ ܐܲܠܵܗܵܐ ܕܐܲܩܝܼܡ ܠܲܡܫܝܼܚܵܐ. ܟܲܕ݂ ܠܵܐ ܐܲܩܝܼܡ.

¹⁶ܐܸܢ ܡܝܼܬܹ̈ܐ ܓܹܝܪ ܠܵܐ ܩܵܝܡܝܼܢ. ܐܵܦܠܵܐ ܡܫܝܼܚܵܐ ܩܵܡ.

¹⁷ܘܐܸܢ ܡܫܝܼܚܵܐ ܠܵܐ ܩܵܡ. ܒܲܛܵܠܵܐ ܗܝܼ ܗܲܝܡܵܢܘܼܬ݂ܟ݂ܘܿܢ. ܘܲܥܕ݂ܲܟܹܝܠ ܒܲܚܛܵܗܲܝ̈ܟ݁ܘܿܢ ܐܲܢ̄ܬܘܿܢ.

¹⁸ܘܲܟ݂ܒܲܪ ܐܵܦ ܐܲܝܠܹܝܢ ܕܲܕ݂ܡܸܟ݂ܘ ܒܲܡܫܝܼܚܵܐ. ܐܸܒܲܕ݂ܘ ܠܗܘܿܢ.

¹⁹ܘܐܸܢ ܒܗܵܠܹܝܢ ܗܘܼ ܚܲܝܹ̈ܐ ܒܲܠܚܘܿܕ݂ ܡܣܲܒܪܝܼܢܲܢ ܒܲܡܫܝܼܚܵܐ. ܕܵܘܹܝܢ ܚ̄ܢܲܢ ܗܘܼ ܡܸܢ ܟܠܗܘܿܢ ܒܢܲܝ̈ܢܵܫܵܐ.

²⁰ܗܵܫܵܐ ܕܹܝܢ ܡܫܝܼܚܵܐ ܩܵܡ ܡܸܢ ܒܹܝܬ݂ ܡܝܼܬܹ̈ܐ. ܘܲܗܘܵܐ ܪܹܫܝܼܬ݂ܵܐ ܕܕܲܡܟܹ̈ܐ.

²¹ܘܐܲܝܟܲܢܵܐ ܕܲܒ݂ܝܲܕ݂ ܒܲܪܢܵܫܵܐ ܗܘܵܐ ܡܵܘܬܵܐ. ܗܵܟܲܢܵܐ ܐܵܦ ܒܝܲܕ݂ ܒܲܪܢܵܫܵܐ ܗܵܘܝܵܐ ܚܵܝܲܬ݂ ܡܝܼܬܹ̈ܐ.

²²ܐܲܝܟܲܢܵܐ ܓܹܝܪ ܕܒ݂ܵܐܕ݂ܵܡ ܟܠܗܘܿܢ ܒܢܲܝ̈ܢܵܫܵܐ ܡܵܝܬܿܝܼܢ. ܗܵܟܲܢܵܐ ܐܵܦ ܒܲܡܫܝܼܚܵܐ ܟܠܗܘܿܢ ܚܵܐܹܝܢ.

²³ܐ̄ܢܵܫ ܐ̄ܢܵܫ ܒܛܲܟ݂ܣܹܗ. ܪܹܫܝܼܬ݂ܵܐ ܗܘܵܐ ܡܫܝܼܚܵܐ. ܒܵܬܲܪܟܸܢ ܐܲܝܠܹܝܢ ܕܕ݂ܲܡܫܝܼܚܵܐ ܐܸܢܘܿܢ ܒܡܹܐܬ݂ܝܼܬܹܗ.

²⁴ܘܗܵܝܕܹܝܢ ܬܸܗܘܹܐ ܚܲܪܬ݂ܵܐ. ܡܵܐ ܕܡܲܫܠܸܡ ܡܲܠܟܘܼܬ݂ܵܐ ܠܐܲܠܵܗܵܐ ܐܲܒ݂ܵܐ. ܡܵܐ ܕܒ̣ܵܛܸܠ ܟܠ ܪܹܫ ܘܟ݂ܠ ܫܘܼܠܛܵܢ. ܘܟ݂ܠ ܚܲܝ̈ܠܝܼܢ.

²⁵ܥܬ݂ܝܼܕ݂ ܗܘܼ ܓܹܝܪ ܕܢܲܡܠܸܟ݂ ܥܕ݂ܲܡܵܐ ܕܲܢܣܝܼܡ ܒܥܸܠܕܒ݂ܵܒ݂ܵܘ̈ܗܝ ܟܠܗܘܿܢ ܬܚܹܝܬ݂ ܪܸ̈ܓ݂ܠܵܘܗܝ.

²⁶ܘܲܐ̄ܚܪܵܝܵܐ ܒܥܸܠܕܒ݂ܵܒ݂ܵܐ ܡܸܬ݂ܒܲܛܲܠ. ܡܵܘܬܵܐ.

²⁷ܟܠ ܓܹܝܪ ܫܲܥܒܸܕ݂ ܬܚܹܝܬ݂ ܪܸ̈ܓ݂ܠܵܘܗܝ. ܡܵܐ ܕܐܵܡܲܪ ܕܹܝܢ. ܕܟ݂ܠܡܸܕܸܡ ܡܸܫܬܲܥܒܲܕ݂ ܠܹܗ. ܝܼܕ݂ܝܼܥܵܐ ܕܲܣܛܲܪ ܡܸܢ ܗܵܘ ܕܫܲܥܒܸܕ݂ ܠܹܗ ܟܠ.

²⁸ܘܡܵܐ ܕܐܸܫܬܲܥܒܲܕ݂ ܠܹܗ ܟܠ. ܗܵܝܕܹܝܢ ܗܘܼ ܒܪܵܐ ܢܸܫܬܲܥܒܲܕ݂ ܠܗܵܘ ܕܫܲܥܒܸܕ݂ ܠܹܗ ܟܠ. ܕܢܸܗܘܹܐ ܐܲܠܵܗܵܐ ܟܠ ܒܟ݂ܠ.

²⁹ܘܐܸܠܵܐ ܡܵܢܵܐ ܢܸܥܒܕ݂ܘܼܢ ܗܵܢܘܿܢ ܕܥܵܡܕܝܼܢ ܚܠܵܦ ܡܝܼܬܹ̈ܐ. ܐܸܢ ܡܝܼܬܹ̈ܐ ܠܵܐ ܩܵܝܡܝܼܢ. ܡܵܢܵܐ ܥܵܡܕܝܼܢ ܚܠܵܦ ܡܝܼܬܹ̈ܐ.

³⁰ܘܲܠܡܵܢܵܐ ܐܵܦ ܚܢܲܢ ܒܟ݂ܠ ܫܵܥܵܐ ܒܩܹܘܲܢܕܹܝܢܘܿܣ ܩܵܝܡܝܼܢܲܢ.

³¹ܝܵܡܹܐ ܐ̄ܢܵܐ ܒܫܘܼܒ݂ܗܵܪܟ݂ܘܿܢ ܐܲܚܲܝ̈: ܕܐܝܼܬ݂ ܠܝܼ ܒܡܵܪܲܢ ܝܼܫܘܿܥ ܡܫܝܼܚܵܐ. ܕܟܠܝܘܿܡ ܡܵܐܹܬ݂ ܐ̄ܢܵܐ.

³²ܐܸܢ ܐܲܝܟ݂ ܕܒܹܝܬ݂ ܒܢܲܝ̈ܢܵܫܵܐ: ܐܸܫܬܿܕ݂ܝܼܬ݂ ܠܚܲܝ̈ܘܵܬ݂ܵܐ ܒܐܵܦܸܣܘܿܣ. ܡܵܢܵܐ ܐܸܬ݂ܗܢܝܼܬ݂. ܐܸܢ ܡܝܼܬܹ̈ܐ ܠܵܐ ܩܵܝܡܝܼܢ. ܢܹܐܟ݂ܘܿܠ ܘܢܸܫܬܹܐ. ܡܚܵܪ ܓܹܝܪ ܡܵܝܬܿܝܼܢܲܢ.

³³ܠܵܐ ܬܸܛܥܘܿܢ. ܡܚܲܒ̈ܠܵܢ ܪܸ̈ܥܝܵܢܹܐ ܒܲܣܝܼܡܹ̈ܐ ܫܘܿܥ̈ܝܵܬ݂ܵܐ ܒ̈ܝܼܫܵܬ݂ܵܐ.

³⁴ܐܲܥܝܼܪܘ ܠܸܒܟ݂ܘܿܢ ܙܲܕܝܼܩܵܐܝܼܬ݂. ܘܠܵܐ ܬܸܚܛܘܼܢ. ܐܝܼܬ݂ ܓܹܝܪ ܐ̄ܢܵܫܵܐ ܕܝܼܕ݂ܲܥܬ݂ܵܐ ܕܐܲܠܵܗܵܐ ܠܲܝܬܿ ܒܗܘܿܢ. ܠܒܸܗܬܲܬ݂ܟ݂ܘܿܢ ܗܘܼ ܐܵܡܲܪ ܐ̄ܢܵܐ.

³⁵ܢܹܐܡܲܪ ܐ̄ܢܵܫ ܡܸܢܟ݂ܘܿܢ. ܕܐܲܝܟܲܢܵܐ ܩܵܝܡܝܼܢ ܡܝܼܬܹ̈ܐ: ܘܒܲܐܝܢܵܐ ܦܲܓ݂ܪܵܐ ܐܵܬܹ݁ܝܢ.

³⁶ܣܲܟ݂ܠܵܐ. ܙܲܪܥܵܐ ܕܙܵܪܲܥ ܐܲܢ̄ܬܿ. ܐܸܢ ܠܵܐ ܡܵܐܹܬ݂. ܠܵܐ ܚܵܝܹ̇ܐ.

³⁷ܘܗܵܘ ܡܸܕܸܡ ܕܙܵܪܲܥ ܐܲܢ̄ܬܿ. ܠܵܐ ܗ̄ܘܵܐ ܗܵܘ ܦܲܓ݂ܪܵܐ ܕܲܥܬ݂ܝܼܕ݂ ܠܡܸܗܘܵܐ. ܙܵܪܲܥ ܐܲܢ̄ܬܿ. ܐܸܠܵܐ ܦܪܸܕ݁ܬܵܐ ܥܲܪܛܸܠܵܝܬܵܐ ܕܚܸ̈ܛܹܐ. ܐܵܘ ܕܲܣܥܵܪܹ̈ܐ. ܐܵܘ ܕܫܲܪܟܵܐ ܕܙܲܪ̈ܥܘܿܢܹܐ.

³⁸ܐܲܠܵܗܵܐ ܕܹܝܢ ܝܵܗܹܒ݂ ܠܹܗ ܦܲܓ݂ܪܵܐ. ܐܲܝܟܲܢܵܐ ܕܨܵܒܹܐ. ܘܲܠܚܲܕ݂ ܚܲܕ݂ ܡܸܢ ܙܲܪ̈ܥܘܿܢܹܐ ܦܲܓ݂ܪܵܐ ܕܲܟ݂ܝܵܢܹܗ.

³⁹ܠܵܐ ܗ̄ܘܵܐ ܕܹܝܢ ܟܠ ܦܓܲܪ ܫܘܹܐ. ܐ̄ܚܪܹܝܢ ܗܘܼ ܓܹܝܪ ܦܲܓ݂ܪܵܐ ܕܒܲܪ ܐ̄ܢܵܫܵܐ. ܘܲܐ̄ܚܪܹܝܢ ܕܲܒ݂ܥܝܼܪܵܐ. ܘܲܐ̄ܚܪܹܝܢ ܕܦܵܪܲܚܬ݂ܵܐ. ܘܲܐ̄ܚܪܹܝܢ ܕܢܘܼܢܹ̈ܐ.

⁴⁰ܘܐܝܼܬ݂ ܦܲܓ݂ܪܹ̈ܐ ܫܡܲܝܵܢܹ̈ܐ. ܘܐܝܼܬ݂ ܦܲܓ݂ܪܹ̈ܐ ܐܲܪ̈ܥܵܢܵܝܹܐ. ܐܸܠܵܐ ܐ̄ܚܪܹܝܢ ܗܘܼ ܫܘܼܒ݂ܚܵܐ ܕܲܫܡܲܝܵܢܹ̈ܐ. ܘܲܐ̄ܚܪܹܝܢ ܕܐܲܪ̈ܥܵܢܵܝܹܐ.

⁴¹ܘܲܐ̄ܚܪܹܝܢ ܗܘܼ ܫܘܼܒ݂ܚܵܐ ܕܫܸܡܫܵܐ. ܘܲܐ̄ܚܪܹܝܢ ܫܘܼܒ݂ܚܵܐ ܕܣܲܗܪܵܐ. ܘܐܲܚܪܹܝܢ ܫܘܼܒ݂ܚܵܐ ܕܟ̣ܵܘܟܒܹ̈ܐ. ܘܟ݂ܵܘܟܒ݂ܵܐ ܡܸܢ ܟܵܘܟܒ݂ܵܐ ܡܝܲܬܲܪ ܗܘܼ ܒܫܘܼܒ݂ܚܵܐ.

⁴²ܗܵܟܲܢܵܐ ܐܵܦ ܚܵܝܲܬ݂ ܡܝܼܬܹ̈ܐ. ܡܸܙܕܲܪܥܝܼܢ ܒܲܚܒ݂ܵܠܵܐ. ܩܵܝܡܝܼܢ ܕܠܵܐ ܚܒ݂ܵܠܵܐ.

⁴³ܡܸܙܕܲܪܥܝܼܢ ܒܨܲܥܪܵܐ. ܩܵܝܡܝܼܢ ܒܫܘܼܒ݂ܚܵܐ. ܡܸܙܕܲܪܥܝܼܢ ܒܲܟ݂ܪܝܼܗܘܬ݂ܵܐ. ܩܵܝܡܝܼܢ ܒܚܲܝܠܵܐ.

⁴⁴ܡܸܙܕܲܪܥܝܼܢ ܦܲܓ݂ܪܵܐ ܢܲܦ̮ܫܵܢܵܝܵܐ. ܩܵܐܹܡ ܦܲܓ݂ܪܵܐ ܪܘܼܚܵܢܵܝܵܐ. ܐܝܼܬ݂ ܓܹܝܪ ܦܲܓ݂ܪܵܐ ܕܲܢܦܸܫ. ܘܐܝܼܬ݂ ܦܲܓ݂ܪܵܐ ܕܪܘܼܚ.

⁴⁵ܗܵܟܲܢܵܐ ܐܵܦ ܟܬ݂ܝܼܒ݂. ܗܘܵܐ ܐܵܕ݂ܵܡ ܒܲܪܢܵܫܵܐ ܩܲܕ݂ܡܵܝܵܐ ܠܲܢܦܸܫ ܚܲܝܵܐ. ܘܐܵܕ݂ܵܡ ܐ̄ܚܪܵܝܵܐ ܠܪܘܼܚܵܐ ܡܲܚܝܵܢܝܼܬ݂ܵܐ.

⁴⁶ܐܸܠܵܐ ܠܵܐ ܗ̄ܘܵܐ ܠܘܼܩܕ݂ܲܡ ܪܘܼܚܵܢܵܝܵܐ. ܐܸܠܵܐ ܢܲܦ̮ܫܵܢܵܝܵܐ. ܘܗܵܝܕܹܝܢ ܪܘܼܚܵܢܵܝܵܐ.

⁴⁷ܒܲܪܢܵܫܵܐ ܩܲܕ݂ܡܵܝܵܐ ܥܲܦܪܵܢܵܐ ܕܡܸܢ ܐܲܪܥܵܐ. ܒܲܪܢܵܫܵܐ ܕܲܬ݂ܪܹܝܢ ܡܵܪܝܵܐ ܡܸܢ ܫܡܲܝܵܐ.

⁴⁸ܐܲܝܟܲܢܵܐ ܕܐܝܼܬ݂ܵܘܗܝ ܗܵܘ ܥܲܦܪܵܢܵܐ. ܗܵܟܲܢܵܐ ܐܵܦ ܥܲܦܪ̈ܵܢܹܐ. ܘܐܲܝܟܲܢܵܐ ܕܐܝܼܬ݂ܵܘܗܝ ܗܵܘ ܕܡܸܢ ܫܡܲܝܵܐ. ܗܵܟܲܢܵܐ ܐܵܦ ܫܡܲܝܵܢܹ̈ܐ.

⁴⁹ܘܐܲܝܟ݂ ܕܲܠܒܸܫܢ ܕܡܘܼܬ݂ܵܐ ܕܗܵܘ ܕܡܸܢ ܥܲܦܪܵܐ. ܗܵܟܲܢܵܐ ܢܸܠܒܲܫ ܕܡܘܼܬ݂ܵܐ ܕܗܵܘ ܕܡܸܢ ܫܡܲܝܵܐ.

⁵⁰ܗܵܕܹܐ ܕܹܝܢ ܐܵܡܲܪ ܐ̄ܢܵܐ ܐܲܚܲܝ̈. ܕܒܸܣܪܵܐ ܘܲܕ݂ܡܵܐ ܡܲܠܟܘܼܬ݂ܵܐ ܕܲܫܡܲܝܵܐ ܠܡܹܐܪܲܬ݂ ܠܵܐ ܡܸܫܟܿܚܝܼܢ. ܘܠܵܐ ܚܒ݂ܵܠܵܐ ܝܵܪܹܬ݂ ܠܵܐ ܡܸܬ݂ܚܲܒܠܵܢܘܼܬ݂ܵܐ.

⁵¹ܗܵܐ ܐܵܡܲܪ ܐ̄ܢܵܐ ܠܟ݂ܘܿܢ ܐ̄ܪܵܙܵܐ. ܠܵܘ ܟܠܲܢ ܢܸܕ݂ܡܲܟ݂. ܟܠܲܢ ܕܹܝܢ ܢܸܬ݂ܚܲܠܲܦ.

⁵²ܚܲܪܝܼܦܵܐܝܼܬ݂. ܐܲܝܟ݂ ܪܦܵܦ ܥܲܝܢܵܐ. ܒܩܲܪܢܵܐ ܐ̄ܚܪܵܝܬܵܐ ܟܲܕ݂ ܬܸܩܪܹܐ. ܘܲܢܩܘܼܡܘܼܢ ܡܝܼܬܹ̈ܐ ܕܠܵܐ ܚܒ݂ܵܠܵܐ ܘܲܚܢܲܢ ܢܸܬ݂ܚܲܠܲܦ.

⁵³ܥܬ݂ܝܼܕ݂ ܗܘܼ ܓܹܝܪ ܗܵܢܵܐ ܕܡܸܬ݂ܚܲܒܲܠ ܕܢܸܠܒܲܫ ܠܵܐ ܡܸܬ݂ܚܲܒܠܵܢܘܼܬ݂ܵܐ. ܘܗܵܢܵܐ ܕܡܵܐܹܬ݂ ܕܢܸܠܒܲܫ ܠܵܐ ܡܵܝܘܿܬ݂ܘܬ݂ܵܐ.

⁵⁴ܡܵܐ ܕܠܵܒܹܫ ܕܹܝܢ ܗܵܢܵܐ ܕܡܸܬ݂ܚܲܒܲܠ ܠܵܐ ܡܸܬ݂ܚܲܒܠܵܢܘܼܬ݂ܵܐ. ܘܗܵܢܵܐ ܕܡܵܐܹܬ݂ ܠܵܐ ܡܵܝܘܿܬ݂ܘܬ݂ܵܐ. ܗܵܝܕܹܝܢ ܬܸܗܘܹܐ ܡܸܠܬ݂ܵܐ ܗܵܝ ܕܲܟ̣ܬ݂ܝܼܒ݂ܐ. ܕܐܸܬ݂ܒܠܲܥ ܡܵܘܬܵܐ ܒܙܵܟ̣ܘܼܬ݂ܵܐ.

⁵⁵ܐܲܝܟܵܘ ܥܘܼܩܣܵܟ݂ ܡܵܘܬܵܐ. ܐܵܘ ܐܲܝܟܵܐ (ܘܐܲܝܟܵܐ) ܗܝܼ ܙܵܟ݂ܘܼܬܹܟ݂ܝ ܫܝܘܿܠ.

⁵⁶ܥܘܼܩܣܹܗ ܕܹܝܢ ܕܡܵܘܬܵܐ ܚܛܝܼܬ݂ܵܐ ܗܝܼ. ܘܚܲܝܠܵܐ ܕܲܚܛܝܼܬ݂ܵܐ ܢܵܡܘܿܣܵܐ ܗܘܼ.

⁵⁷ܛܲܝܒܘܼ ܕܹܝܢ ܠܐܲܠܵܗܵܐ. ܕܝܲܗ̄ܒ݂ ܠܲܢ ܙܵܟ̣ܘܼܬ݂ܵܐ ܒܝܲܕ݂ ܡܵܪܲܢ ܝܼܫܘܿܥ ܡܫܝܼܚܵܐ.

⁵⁸ܡܸܟܹܝܠ ܐܲܚܲܝ̈ ܘܚܲܒܝܼܒܲܝ̈. ܗܘܵܘ ܡܫܲܪܪܝܼܢ. ܘܠܵܐ ܬܸܗܘܘܿܢ ܡܸܬ݁ܬ݁ܙܝܼܥܝܼܢ. ܐܸܠܵܐ ܗܘܵܘ ܡܸܬ݂ܝܲܬܿܪܝܼܢ ܒܟ݂ܠܙܒܲܢ ܒܲܥܒ݂ܵܕ݂ܗ ܕܡܵܪܝܵܐ. ܟܲܕ݂ ܝܵܕ݂ܥܝܼܢ ܐܢ̄ܬܘܿܢ. ܕܥܲܡܠܟ݂ܘܿܢ ܠܵܐ ܗ̄ܘܵܐ ܣܪܝܼܩ ܒܡܵܪܝܵܐ.