Read Aramaic Peshita 1 Corinthians 2 Bible Online

1 Corinthians 2 - Aramaic Peshita bible

1 Corinthians 2

¹ܘܐܸܢܵܐ ܐܲܚܲܝ̈ ܟܲܕ݂ ܐܸܬܹܝܬ݂ ܠܘܵܬ݂ܟ݂ܘܿܢ. ܠܵܐ ܒܡܲܡܠܠܵܐ ܪܵܘܪܒ݂ܵܐ ܐܵܦܠܵܐܒܚܸܟ݂ܡܬ݂ܵܐ. ܣܲܒܲܪܬܿܟ݂ܘܿܢ ܐ̄ܪܵܙܹܗ ܕܐܲܠܵܗܵܐ.

²ܘܠܵܐ ܕܵܢܹܬ݂ ܢܲܦ̮ܫܝ ܒܲܝܢܵܬ݂ܟ݂ܘܿܢ. ܐܲܝܟ݂ ܕܡܸܕܸܡ ܝܵܕ݂ܲܥ ܐ̄ܢܵܐ. ܐܸܠܵܐ ܐܸܢ ܠܝܼܫܘܿܥ ܡܫܝܼܚܵܐ. ܐܵܦ ܠܹܗ ܟܲܕ݂ ܙܩܝܼܦ.

³ܘܐܸܢܵܐ ܒܕܸܚܠܬ݂ܵܐ ܣܲܓܝܼܐܬ݂ܵܐ. ܘܒܲܪܬܹܝܬ݂ܵܐ ܗ̄ܘܹܝܬ݂ ܠܘܵܬ݂ܟ݂ܘܿܢ.

⁴ܘܡܸܠܲܬ݂ܝ ܘܟ݂ܵܪܘܿܙܘܼܬ݂ܝ. ܠܵܐ ܗܘܸܵܬ݂ ܒܲܡܦܝܼܣܵܢܘܼܬ݂ܵܐ ܕܡܸܠܹ̈ܐ ܕܚܸܟ݂ܡܬ݂ܵܐ. ܐܸܠܵܐ ܒܬܲܚܘܝܼܬ݂ܵܐ ܕܪܘܼܚܵܐ ܘܲܕ݂ܚܲܝܠܵܐ.

⁵ܕܠܵܐ ܬܸܗܘܹܐ ܗܲܝܡܵܢܘܼܬ݂ܟ݂ܘܿܢ ܒܚܸܟ݂ܡܬ݂ܵܐ ܕܲܒ݂ܢܲܝ̈ܢܵܫܵܐ: ܐܸܠܵܐ ܒܚܲܝܠܵܐ ܕܐܲܠܵܗܵܐ.

⁶ܚܸܟ݂ܡܬ݂ܵܐ ܕܹܝܢ ܡܡܲܠܠܝܼܢܲܢ ܒܲܓ݂ܡܝܼܪܹ̈ܐ. ܚܸܟ݂ܡܬ݂ܵܐ ܠܵܐ ܕܗܵܢܵܐ ܥܵܠܡܵܐ. ܐܵܦܠܵܐ ܕܫܲܠܝܼܛܵܢܵܘ̈ܗܝ ܕܥܵܠܡܵܐ ܗܵܢܵܐ ܕܡܸܬ݂ܒܲܛܠܝܼܢ.

⁷ܐܸܠܵܐ ܡܡܲܠܠܝܼܢ ܚ̄ܢܲܢ ܚܸܟ݂ܡܬ݂ܵܐ ܕܐܲܠܵܗܵܐ ܒܐ̄ܪܵܙ. ܗܵܝ ܕܲܡܟܲܣܝܵܐ ܗ̄ܘܵܬ݂. ܘܩܲܕܸܡ ܗ̄ܘܵܐ ܦܲܪܫܵܗܿ ܐܲܠܵܗܵܐ ܡܸܢ ܩܕ݂ܵܡ ܥܵܠܡܹ̈ܐ. ܠܫܘܼܒ݂ܚܵܐ ܕܝܼܠܲܢ.

⁸ܗܵܝ ܕܚܲܕ݂ ܡܸܢ ܫܲܠܝܼܛܵܢܹ̈ܐ ܕܥܵܠܡܵܐ ܗܵܢܵܐ ܠܵܐ ܝܲܕ݂ܥܵܗܿ. ܐܸܠܘܼ ܓܹܝܪ ܝܲܕ݂ܥܘܼܗܿ. ܠܵܘ ܠܡܵܪܵܗܿ ܕܬܸܫܒܿܘܿܚܬܵܐ ܙܵܩܦܝܼܢ ܗ̄ܘܼܵܘ.

⁹ܐܸܠܵܐ ܐܲܝܟ݂ ܕܲܟܬ݂ܝܼܒ݂. ܕܥܲܝܢܵܐ ܠܵܐ ܚܙܵܬ݂: ܘܐܸܕ݂ܢܵܐ ܠܵܐ ܫܸܡܥܲܬ݂: ܘܥܲܠ ܠܸܒܵܐ ܕܒܲܪܢܵܫܵܐ ܠܵܐ ܣܠܸܩ. ܡܸܕܸܡ ܕܛܲܝܸܒ݂ ܐܲܠܵܗܵܐ ܠܐܲܝܠܹܝܢ ܕܪܵܚܡܝܼܢ ܠܹܗ.

¹⁰ܠܲܢ ܕܹܝܢ ܓܠܵܐ ܐܲܠܵܗܵܐ ܒܪܘܼܚܹܗ. ܪܘܼܚܵܐ ܓܹܝܪ ܟܠ ܡܸܕܸܡ ܒܵܨܝܵܐ. ܐܵܦ ܥܘܼܡܩܵܘ̈ܗܝ ܕܐܲܠܵܗܵܐ.

¹¹ܐܲܝܢܵܘ ܓܹܝܪ ܒܲܪܢܵܫܵܐ ܕܝܵܕ݂ܲܥ ܕܲܒ݂ܒܲܪܢܵܫܵܐ. ܐܸܠܵܐ ܐܸܢ ܪܘܼܚܵܐ ܕܒܲܪܢܵܫܵܐ ܕܒܹܗ. ܗܵܟܲܢܵܐ ܐܵܦ ܕܒܲܐܠܵܗܵܐ ܐ̄ܢܵܫ ܠܵܐ ܝܵܕ݂ܲܥ. ܐܸܠܵܐ ܐܸܢ ܪܘܼܚܹܗ ܕܐܲܠܵܗܵܐ.

¹²ܚܢܲܢ ܕܹܝܢ ܠܵܐ ܗ̄ܘܵܐ ܪܘܼܚܵܐ ܕܥܵܠܡܵܐ ܢܣܲܒ݂ܢ. ܐܸܠܵܐ ܪܘܼܚܵܐ ܕܡܸܢ ܐܲܠܵܗܵܐ. ܕܢܸܕܲܥ ܡܵܘܗ̈ܒ݂ܵܬ݂ܵܐ ܕܡܸܢ ܐܲܠܵܗܵܐ ܐܸܬ݂ܝܼܗܸܒ݂ ܠܲܢ.

¹³ܐܲܝܠܹܝܢ ܕܐܵܦ ܡܡܲܠܠܝܼܢ ܚ̄ܢܲܢ. ܠܵܐ ܗ̄ܘܵܐ ܒܝܘܼܠܦܵܢܵܐ ܕܡܸܠܹ̈ܐ ܕܚܸܟ݂ܡܬ݂ܵܐ ܕܲܒ݂ܢܲܝ̈ܢܵܫܵܐ: ܐܸܠܵܐ ܒܝܘܼܠܦܵܢܵܐ ܕܪܘܼܚܵܐ. ܘܲܠܪ̈ܘܼܚܵܢܹܐ ܪ̈ܘܼܚܵܢܝܵܬ݂ܵܐ ܡܦܲܚܡܝܼܢܲܢ.

¹⁴ܒܲܪܢܵܫܵܐ ܓܹܝܪ ܕܒܲܢܦܸܫ ܗ̄ܘܼ. ܠܵܐ ܡܩܲܒܸܠ ܪ̈ܘܼܚܵܢܝܵܬ݂ܵܐ. ܫܵܛܝܘܼܬ݂ܵܐ ܐܸܢܹܝܢ ܓܹܝܪ ܠܹܗ. ܘܠܵܐ ܡܸܫܟܲܚ ܕܢܸܕܲܥ ܕܲܒ݂ܪܘܼܚ ܡܸܬ̇ܬ̇ܕ̇ܝܼܢ.

¹⁵ܪܘܼܚܵܢܵܐ ܕܹܝܢ ܟܠܡܸܕܸܡ ܕܵܐܹܢ. ܘܗܘܼ ܡܸܢ ܐ̄ܢܵܫ ܠܵܐ ܡܸܬ̇ܬ̇ܕ̇ܝܼܢ.

¹⁶ܡܲܢܘܼ ܓܹܝܪ ܝܼܕ݂ܲܥ ܪܸܥܝܵܢܹܗ ܕܡܵܪܝܵܐ ܕܢܲܠܦܝܼܘܗܝ. ܠܲܢ ܕܹܝܢ ܪܸܥܝܵܢܵܐ ܕܲܡܫܝܼܚܵܐ ܐܝܼܬ݂ ܠܲܢ.