Read Aramaic Peshita 1 Corinthians 4 Bible Online

1 Corinthians 4 - Aramaic Peshita bible

1 Corinthians 4

¹ܗܵܟܲܢܵܐ ܗ݀ܘܲܝܢ ܚܫܝܼܒ݂ܝܼܢ ܠܟ݂ܘܿܢ. ܐܲܝܟ݂ ܡܫܲܡܫܵܢܹ̈ܐ ܕܲܡܫܝܼܚܵܐ. ܘܪ̈ܲܒܲܝ ܒܵܬܹ̈ܐ ܕܐ̄ܪ̈ܵܙܵܘܗܝ ܕܐܲܠܵܗܵܐ.

²ܗܵܪܟܵܐ ܡܸܟܹܝܠ ܡܸܬ݂ܒܥܹܐ ܒܪ̈ܲܒܲܝ ܒܵܬܹ̈ܐ. ܕܐ̄ܢܵܫ ܟܲܕ݂ ܡܗܲܝܡܲܢ ܢܸܫܬܿܟܲܚ.

³ܠܝܼ ܕܹܝܢ ܗܵܕܹܐ ܒܨܝܼܪܘܼܬ݂ܵܐ ܗܝܼ ܠܝܼ ܕܡܸܢܟ݂ܘܿܢ ܐܸܬ̇ܬ̇ܕ̇ܝܼܢ. ܐܵܘ ܡܸܢ ܟܠ ܒܲܪܢܵܫ. ܐܸܠܵܐ ܐܵܦܠܵܐ ܐܸܢܵܐ ܢܲܦ̮ܫܝ ܕܵܐܹܢ ܐ̄ܢܵܐ.

⁴ܠܵܐ ܓܹܝܪ ܡܸܕܸܡ ܒܢܲܦ̮ܫܝ ܚܫܝܼܫ ܐ̄ܢܵܐ. ܐܸܠܵܐ ܠܵܘ ܒܗܵܕܹܐ ܐܸܙܕܲܕܩܹܬ݂. ܕܲܝܵܢܝ ܓܹܝܪ ܡܵܪܝܵܐ ܗܘܼ.

⁵ܡܛܠ ܗܵܢܵܐ ܠܵܐ ܡܸܢ ܩܕ݂ܵܡ ܙܲܒ݂ܢܵܐ ܬܸܗܘܘܿܢ ܕܵܝܢܝܼܢ. ܥܕ݂ܲܡܵܐ ܕܢܹܐܬܹܐ ܡܵܪܝܵܐ. ܗܵܘ ܕܡܲܢܗܲܪ ܟܲܣ̈ܝܵܬܹܗ ܕܚܸܫܘܿܟ݂ܵܐ. ܘܓ݂ܵܠܹܐ ܡܲܚܫ̈ܒ݂ܵܬ݂ܗܘܿܢ ܕܠܸܒ̈ܵܘܵܬ݂ܵܐ. ܘܗܵܝܕܹܝܢ ܢܸܗܘܹܐ ܫܘܼܒ݂ܚܵܐ ܠܐ̄ܢܵܫ ܐ̄ܢܵܫ. ܡܸܢ ܐܲܠܵܗܵܐ.

⁶ܗܵܠܹܝܢ ܕܹܝܢ ܐܲܚܲܝ̈. ܡܛܠܵܬ݂ܟ݂ܘܿܢ ܗܘܼ ܣܵܡܹܬ݂ ܥܲܠ ܦܲܪܨܘܿܦܵܐ ܕܝܼܠܝ. ܘܕ݂ܵܐܦܲܠܘܿ. ܕܒܲܢ ܬܹܐܠܦܘܼܢ. ܕܠܵܐ ܬܸܬ݂ܪܲܥܘܿܢ ܝܲܬܿܝܼܪ ܡܸܢ ܡܵܐ ܕܲܟ݂ܬ݂ܝܼܒ݂. ܘܐ̄ܢܵܫ ܥܲܠ ܚܲܒ݂ܪܹܗ ܠܵܐ ܢܸܬ̇ܬ̇ܪܝܼܡ ܡܛܠ ܐ̄ܢܵܫ.

⁷ܡܲܢܘܼ ܓܹܝܪ ܒܨܵܟ݂. ܐܵܘ ܡܵܢܵܐ ܐܝܼܬ݂ ܠܵܟ݂ ܕܠܵܐ ܢܣܲܒ݂ܬܿ. ܘܐܸܢ ܢܣܲܒ݂ܬܿ. ܠܡܵܢܵܐ ܡܸܫܬܲܒ݂ܗܲܪ ܐܲܢ̄ܬܿ ܐܲܝܟ݂ ܗܵܘ ܕܠܵܐܢܣܲܒ݂ܬܿ.

⁸ܡܸܢ ܟܲܕܘܼ ܣܒܲܥܬܿܘܿܢ ܠܟ݂ܘܿܢ ܘܲܥܬܲܪܬܿܘܿܢ. ܘܒܸܠܥܵܕ݂ܲܝܢ ܐܲܡܠܸܟ݂ܬܿܘܿܢ. ܐܸܫܬܿܘܿܦ ܕܹܝܢ ܐܲܡܠܸܟ݂ܬܿܘܿܢ. ܕܐܵܦ ܚܢܲܢ ܢܲܡܠܸܟ݂ ܥܲܡܟ݂ܘܿܢ.

⁹ܣܵܒܲܪ ܐ̄ܢܵܐ ܓܹܝܪ ܕܠܲܢ ܠܲܫܠܝܼܚܹ̈ܐ. ܐ̄ܚܪ̈ܵܝܹܐ ܗ̄ܘܼ ܣܵܡܲܢ ܐܲܠܵܗܵܐ ܐܲܝܟ݂ ܕܲܠܡܵܘܬܵܐ. ܕܲܗܘܲܝܢ ܬܹܐܵܛܪܘܿܢ ܠܥܵܠܡܵܐ. ܘܲܠܡܲܠܲܐܟܹ̈ܐ. ܘܠܲܒ݂ܢܲܝ̈ܢܵܫܵܐ.

¹⁰ܚܢܲܢ ܫܵܛܲܝ̈ܵܐ ܡܛܠ ܡܫܝܼܚܵܐ. ܐܲܢ̄ܬܿܘܿܢ ܕܹܝܢ ܚܲܟܝܼܡܹ̈ܐ ܒܲܡܫܝܼܚܵܐ. ܚܢܲܢ ܟܪ̈ܝܼܗܹܐ. ܘܐܲܢ̄ܬܿܘܿܢ ܚܲܝܠܬ݂ܵܢܹ̈ܐ. ܐܲܢ̄ܬܿܘܿܢ ܡܸܫܬܲܒܚܝܼܢ. ܘܲܚܢܲܢ ܡܸܨܛܲܥܪܝܼܢ.

¹¹ܥܕ݂ܲܡܵܐ ܠܗܵܕܹܐ ܫܵܥܬ݂ܵܐ. ܟܲܦܢܝܼܢ ܚ̄ܢܲܢ. ܘܲܨܗܹܝܢ ܚ̄ܢܲܢ. ܘܥܲܪܛܸܠܵܝܝܼܢ ܚ̄ܢܲܢ. ܘܡܸܬ݂ܩܲܦܚܝܼܢ ܚ̄ܢܲܢ. ܘܒܹܝܬ݂ ܩܝܵܡܵܐ ܠܲܝܬܿ ܠܲܢ.

¹²ܘܠܵܐܹܝܢ ܚ̄ܢܲܢ. ܟܲܕ݂ ܦܵܠܚܝܼܢ ܚ̄ܢܲܢ ܒܐܝܼܕ݂ܲܝ̈ܢ. ܡܨܲܥܪܝܼܢ ܠܲܢ. ܘܲܡܒܲܪܟ݂ܝܼܢ ܚ̄ܢܲܢ. ܪܵܕ݂ܦܝܼܢ ܠܲܢ. ܘܲܡܣܲܝܒܪܝܼܢ ܚ̄ܢܲܢ.

¹³ܡܨܲܚܹܝܢ ܠܲܢ. ܘܒ݂ܵܥܹܝܢ ܚ̄ܢܲܢ ܡܸܢܗܘܿܢ. ܐܲܝܟ݂ ܢܦܵܬ݂ܵܐ ܕܥܵܠܡܵܐ ܗ݀ܘܲܝܢ. ܘܟ݂ܘܦܵܪܵܐ ܕܟ݂ܠܢܵܫ ܥܕ݂ܲܡܵܐ ܠܗܵܫܵܐ.

¹⁴ܠܵܐ ܗ̄ܘܵܐ ܐܲܝܟ݂ ܕܐܲܒ݂ܗܸܬ݂ܟ݂ܘܿܢ ܟܵܬܹܒ݂ ܐ̄ܢܵܐ ܗܵܠܹܝܢ. ܐܸܠܵܐ ܐܲܝܟ݂ ܕܠܲܒ݂̈ܢܲܝܵܐ ܚܲܒܝܼܒܹ̈ܐ ܡܲܪܬܹܐ ܐ̄ܢܵܐ.

¹⁵ܐܸܢ ܓܹܝܪ ܪܸܒ̇ܘܿ ܬܵܪ̈ܐܹܐ ܢܸܗܘܘܿܢ ܠܟ݂ܘܿܢ ܒܲܡܫܝܼܚܵܐ. ܐܸܠܵܐ ܠܵܐ ܣܲܓܝܼ̈ܐܹܐ ܐܲܒ݂ܵܗܹ̈ܐ. ܒܝܼܫܘܿܥ ܓܹܝܪ ܡܫܝܼܚܵܐ. ܐܸܢܵܐ ܗܘܼ ܐܵܘܠܸܕ݂ܬܿܟ݂ܘܿܢ ܒܲܣܒܲܪܬ݂ܵܐ.

¹⁶ܒܵܥܹܐ ܐ̄ܢܵܐ ܗܵܟܹܝܠ ܡܸܢܟ݂ܘܿܢ ܕܒ݂ܝܼ ܬܸܬܿܕܲܡܘܿܢ.

¹⁷ܡܛܠ ܗܵܢܵܐ ܫܲܕܪܹܬ݂ ܠܘܵܬ݂ܟ݂ܘܿܢ ܠܛܝܼܡܵܬܹܐܘܿܣ. ܕܐܝܼܬ݂ܵܘܗܝ ܒܹܪܝ ܚܲܒܝܼܒ݂ܵܐ. ܘܲܡܗܲܝܡܢܵܐ ܒܡܵܪܝܵܐ. ܕܗܘܼ ܢܥܲܗܸܕ݂ܟ݂ܘܿܢ ܐܘܼܪ̈ܚܵܬ݂ܝ ܕܒܲܡܫܝܼܚܵܐ. ܐܲܝܟ݂ ܡܸܕܸܡ ܕܡܲܠܸܦ ܐ̄ܢܵܐ ܒܟ݂ܠܗܹܝܢ ܥܹ̈ܕ݂ܵܬ݂ܵܐ.

¹⁸ܐܲܝܟ݂ ܗܵܘ ܕܹܝܢ ܕܠܵܐ ܐܵܬܹܐ ܐ̄ܢܵܐ ܠܘܵܬ݂ܟ݂ܘܿܢ. ܐܸܬ݂ܚܬܲܪܘ ܐ̄ܢܵܫܵܐ ܡܸܢܟ݂ܘܿܢ.

¹⁹ܐܸܠܵܐ ܐܸܢ ܡܵܪܝܵܐ ܨܵܒܹܐ. ܒܲܥܓܲܠ ܐܵܬܹܐ ܐ̄ܢܵܐ ܠܘܵܬ݂ܟ݂ܘܿܢ. ܘܐܸܕܲܥ ܠܵܐ ܡܸܠܲܬ݂ܗܘܿܢ ܕܗܵܠܹܝܢ ܕܲܡܪܝܼܡܝܼܢ ܢܲܦ̮ܫܗܘܿܢ. ܐܸܠܵܐ ܚܲܝܠܗܘܿܢ.

²⁰ܡܲܠܟܘܼܬܹܗ ܓܹܝܪ ܕܐܲܠܵܗܵܐ ܠܵܐ ܗ̄ܘܵܬ݂ ܒܡܸܠܬ݂ܵܐ. ܐܸܠܵܐ ܒܚܲܝܠܵܐ.

²¹ܐܲܝܟܲܢܵܐ ܨܵܒܹܝܬܘܿܢ. ܒܚܘܼܛܪܵܐ ܐܹܬܹܐ ܠܘܵܬ݂ܟ݂ܘܿܢ. ܐܵܘ ܒܚܘܼܒܵܐ. ܘܲܒ݂ܪܘܼܚܵܐ ܡܲܟܝܼܟ݂ܬܵܐ.