Read Aramaic Peshita 1 Corinthians 5 Bible Online

1 Corinthians 5 - Aramaic Peshita bible

1 Corinthians 5

¹ܣܵܟ݂ܵܐ ܡܸܫܬܲܡܥܵܐ ܒܲܝܢܵܬ݂ܟ݂ܘܿܢ ܙܵܢܝܘܼܬ݂ܵܐ. ܘܕ݂ܲܐܝܟ݂ ܗܵܕܹܐ ܙܵܢܝܘܼܬ݂ܵܐ ܐܲܝܕ݂ܵܐ ܕܐܵܦܠܵܐ ܒܹܝܬ݂ ܚܲܢܦܹ̈ܐ ܡܸܫܬܲܡܗܵܐ. ܥܕ݂ܲܡܵܐ ܕܢܸܣܲܒ݂ ܒܪܵܐ ܐܲܢ̄ܬܲܬ݂ ܐܲܒ݂ܘܼܗܝ.

²ܘܐܲܢ̄ܬܿܘܿܢ ܚܬ݂ܝܼܪ̈ܝܼܢ ܐܢ̄ܬܘܿܢ. ܘܠܵܐ ܕܹܝܢ ܝܲܬܝܼܪܵܐܝܼܬ݂ ܝܼܬܸܒ݂ܬܿܘܿܢ ܒܐܸܒ݂ܠܵܐ. ܕܢܸܫܬܿܩܸܠ ܡܸܢ ܒܲܝܢܵܬ݂ܟ݂ܘܿܢ ܗܵܘ ܡܲܢ ܕܗܵܢܵܐ ܣܘܼܥܪܵܢܵܐ ܣܥܲܪ.

³ܐܸܢܵܐ ܓܹܝܪ ܟܲܕ݂ ܪܲܚܝܼܩ ܐ̄ܢܵܐ ܡܸܢܟ݂ܘܿܢ ܒܲܦܓܲܪ. ܘܩܲܪܝܼܒ݂ ܐ̄ܢܵܐ ܠܟ݂ܘܿܢ ܒܪܘܼܚ. ܡܸܢ ܟܲܕܘܼ ܕܵܢܹܬ݂ ܐܲܝܟ݂ ܩܲܪܝܼܒ݂ܵܐ ܠܗܵܘ ܡܲܢ ܕܗܵܕܹܐ ܣܵܥܲܪ.

⁴ܕܒܲܫܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܬܸܬ݂ܟܲܢܫܘܿܢ ܟܠܟ݂ܘܿܢ. ܘܐܸܢܵܐ ܥܲܡܟ݂ܘܿܢ ܒܪܘܼܚ. ܥܲܡ ܚܲܝܠܹܗ ܕܡܵܪܲܢ ܝܼܫܘܿܥ ܡܫܝܼܚܵܐ.

⁵ܘܬܲܫܠܡܘܼܢܹܗ ܠܗܵܢܵܐ ܠܣܵܛܵܢܵܐ ܠܐܲܒ݂ܕ݂ܵܢܵܐ ܕܦܲܓ݂ܪܹܗ. ܕܲܒ݂ܪܘܼܚ ܢܸܚܹܐ ܒܝܵܘܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ.

⁶ܠܵܐ ܫܲܦܝܼܪ ܫܘܼܒ݂ܗܵܪܟ݂ܘܿܢ. ܠܵܐ ܝܵܕ݂ܥܝܼܢ ܐ̄ܢܬܘܿܢ ܕܲܚܡܝܼܪܵܐ ܩܲܠܝܼܠ ܟܠܵܗܿ ܓܒ݂ܝܼܠܬܵܐ ܡܲܚܡܲܥ.

⁷ܕܲܟܵܘ ܡܸܢܟ݂ܘܿܢ ܚܡܝܼܪܵܐ ܥܲܬܿܝܼܩܵܐ. ܕܬܸܗܘܘܿܢ ܓܒ݂ܝܼܠܬܵܐ ܚܕܲܬܵܐ. ܐܲܝܟܲܢܵܐ ܕܐܝܼܬܲܝܟܘܿܢ ܦܲܛܝܼܪܵܐ. ܦܸܨܚܵܐ ܓܹܝܪ ܕܝܼܠܲܢ. ܡܫܝܼܚܵܐ ܗܘܼ. ܕܐܬ݂ܢܟܸܣ ܚܠܵܦܲܝܢ.

⁸ܡܛܠ ܗܵܢܵܐ ܢܸܥܒܸܕ݂ ܥܲܕ݂ܥܹܕ݂ܵܐ. ܠܵܐ ܒܲܚܡܝܼܪܵܐ ܥܲܬܿܝܼܩܵܐ ܘܠܵܐ ܒܲܚܡܝܼܪܵܐ ܕܒ݂ܝܼܫܘܼܬ݂ܵܐ ܘܲܕ݂ܡܲܪܝܼܪܘܼܬ݂ܵܐ. ܐܸܠܵܐ ܒܲܚܡܝܼܪܵܐ ܕܕ݂ܲܟ݂ܝܘܼܬ݂ܵܐ ܘܲܕ݂ܩܲܕܝܼܫܘܼܬ݂ܵܐ.

⁹ܟܸܬ݂ܒܹܬ݂ ܠܟ݂ܘܿܢ ܒܐܸܓܲܪܬܵܐ. ܕܠܵܐ ܬܸܬ݂ܚܲܠܛܘܼܢ ܥܲܡ ܙܲܢܵܝܹ̈ܐ.

¹⁰ܠܵܐ ܕܹܝܢ ܐܵܡܲܪ ܐ̄ܢܵܐ ܥܲܠ ܙܲܢܵܝܹ̈ܐ ܕܲܒ݂ܥܵܠܡܵܐ ܗܵܢܵܐ. ܐܵܘ ܥܲܠ ܥܵܠܘܿܒܹ̈ܐ. ܐܵܘ ܥܲܠ ܚܵܛܘܿܦܹ̈ܐ. ܐܵܘ ܥܲܠ ܦܵܠܚܲܝ̈ ܦܬܲܟ݂ܪܹ̈ܐ. ܘܐܸܢ ܠܵܐ. ܚܲܝܵܒ݂ܝܼܢ ܗܘܲܝܬܿܘܿܢ ܐܵܦ ܡܸܢ ܥܵܠܡܵܐ ܠܡܸܦܲܩ.

¹¹ܗܵܕܹܐ ܕܹܝܢ ܕܟܸܬ݂ܒܹܬ݂ ܠܟ݂ܘܿܢ ܕܠܵܐ ܬܸܬ݂ܚܲܠܛܘܼܢ. ܐܸܢ ܐܝܼܬ݂ ܕܡܸܬ݂ܩܪܹܐ ܐܲܚܵܐ. ܘܐܝܼܬ݂ܵܘܗܝ ܙܲܢܵܝܵܐ. ܐܵܘ ܥܵܠܘܿܒ݂ܵܐ. ܐܵܘ ܦܵܠܲܚ ܦܬܲܟ݂ܪܹ̈ܐ. ܐܵܘ ܡܨܲܥܪܵܢ. ܐܵܘ ܪܵܘܵܝ. ܐܵܘ ܚܵܛܘܿܦ. ܥܲܡ ܐܲܝܢܵܐ ܕܗܵܟܲܢܵܐ ܗܘܼ. ܐܵܦܠܵܐ ܠܲܚܡܵܐ ܠܡܹܐܟܲܠ.

¹²ܡܵܐ ܠܝܼ ܓܹܝܪ ܠܲܡܕ݂ܵܢ ܠܒܲܪ̈ܵܝܹܐ. ܐܲܢ̄ܬܿܘܿܢ (ܐܲܢ̄ܬܿܘܿܢ ܕܹܝܢ) ܠܕ݂ܲܠܓ݂ܵܘ ܕܘܼܢܘ.

¹³ܠܒܲܪ̈ܵܝܹܐ ܕܹܝܢ ܐܲܠܵܗܵܐ ܕܵܐܹܢ. ܘܫܘܼܩܠܘܼܗܝ ܠܒ݂ܝܼܫܵܐ ܡܸܢ ܒܲܝܢܵܬ݂ܟ݂ܘܿܢ.