Read Aramaic Peshita 1 Corinthians 6 Bible Online

1 Corinthians 6 - Aramaic Peshita bible

1 Corinthians 6

¹ܡܲܡܪܲܚ ܐ̄ܢܵܫ ܡܸܢܟ݂ܘܿܢ ܟܲܕ݂ ܐܝܼܬ݂ ܠܹܗ ܕܝܼܢܵܐ ܥܲܡ ܐܲܚܘܼܗܝ. ܕܲܢܕ݂ܘܼܢ ܩܕ݂ܵܡ ܥܵܘܵܠܹ̈ܐ. ܘܠܵܐ ܩܕ݂ܵܡ ܩܲܕܝܼܫܹ̈ܐ .

²ܐܵܘ ܠܵܐ ܝܵܕ݂ܥܝܼܢ ܐ̄ܢܬܘܿܢ ܕܩܲܕܝܼܫܹ̈ܐ ܠܥܵܠܡܵܐ ܢܕ݂ܘܼܢܘܼܢ. ܘܐܸܢ ܥܵܠܡܵܐ ܒܟ݂ܘܿܢ ܡܸܬ̇ܬ̇ܕ̇ܝܼܢ. ܠܵܐ ܫܵܘܹܝܢ ܐ̄ܢܬܘܿܢ ܠܲܡܕ݂ܵܢ ܕܝܼܢܹ̈ܐ ܕܲܩܕܩܹ̈ܐ.

³ܠܵܐ ܝܵܕ݂ܥܝܼܢ ܐ̄ܢܬܘܿܢ ܕܲܠܡܲܠܲܐܟܹ̈ܐ ܕܵܝܢܝܼܢ ܚ̄ܢܲܢ. ܚܲܕ݂ ܟܡܵܐ ܐܲܝܠܹܝܢ ܕܲܕ݂ܥܵܠܡܵܐ ܐܸܢܹܝܢ ܗܵܢܵܐ.

⁴ܐܸܠܵܐ ܐܸܢ ܐܝܼܬ݂ ܠܟ݂ܘܿܢ ܕܝܼܢܵܐ ܥܲܠ ܕܥܵܠܡܵܐ. ܠܐܲܝܠܹܝܢ ܕܲܒ݂ܣܹܝܢ ܒܥܹܕܬܵܐ. ܐܵܘܬܸܿܒ݂ܘ ܠܟ݂ܘܿܢ ܒܕ݂ܝܼܢܵܐ.

⁵ܠܟ݂ܘܼܐܵܪܵܐ ܗܘܼ ܕܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܗܵܟܲܢܵܐ ܠܲܝܬܿ ܒܟ݂ܘܿܢ ܐܵܦܠܵܐ ܚܲܕ݂ ܚܲܟܝܼܡܵܐ. ܕܢܸܫܟܲܚ ܢܲܫܘܹܐ ܒܹܝܬ݂ ܐܲܚܵܐ ܠܐܲܚܘܼܗܝ.

⁶ܐܸܠܵܐ ܐܲܚܵܐ ܥܲܡ ܐܲܚܘܼܗܝ ܡܸܬ̇ܬ̇ܕ̇ܝܼܢ. ܘܬ݂ܘܼܒ݂ ܩܕ݂ܵܡ ܐܲܝܠܹܝܢ ܕܠܵܐ ܡܗܲܝܡܢܝܼܢ.

⁷ܡܸܢ ܟܲܕܘܼ ܗܵܟܹܝܠ ܩܢܘܿܡܟ݂ܘܿܢ ܚܵܒ݂ܬܿܘܿܢ ܠܟ݂ܘܿܢ. ܕܕ݂ܝܼܢܵܐ ܚܲܕ݂ ܥܲܡ ܚܲܕ݂ ܐܝܼܬ݂ ܠܟ݂ܘܿܢ. ܡܛܠ ܡܵܢܵܐ ܓܹܝܪ ܠܵܐ ܡܸܬ݂ܥܲܠܒ݂ܝܼܢ ܐ̄ܢܬܘܿܢ. ܘܡܛܠ ܡܵܢܵܐ ܠܵܐ ܡܸܬ݂ܓܲܠܙܝܼܢ ܐ̄ܢܬܘܿܢ.

⁸ܐܸܠܵܐ ܐܲܢ̄ܬܿܘܿܢ ܥܵܠܒ̇ܝܼܢ ܐ̄ܢܬܘܿܢ ܘܓ݂ܵܠܙܝܼܢ ܐܢ̄ܬܘܿܢ. ܐܵܦ ܠܐܲܚܲܝ̈ܟܘܿܢ.

⁹ܐܵܘ ܠܵܐ ܝܵܕ݂ܥܝܼܢ ܐ̄ܢܬܘܿܢ. ܕܥܵܘܵܠܹܐ ܡܲܠܟܘܼܬܹܗ ܕܐܲܠܵܗܵܐ ܠܵܐ ܝܵܪܬܿܝܼܢ. ܠܵܐ ܬܸܛܥܘܿܢ. ܠܵܐ ܙܲܢܵܝܹ̈ܐ. ܘܠܵܐ ܦܵܠܚܲܝ̈ ܦܬܲܟ݂ܪܹ̈ܐ. ܘܠܵܐ ܓܲܝܵܪܹ̈ܐ. ܘܠܵܐ ܡܚܲܒܠܹ̈ܐ. ܘܠܵܐ ܫܵܟ݂ܒܲܝ̈ ܥܲܡ ܕܸܟ݂ܪܹ̈ܐ.

¹⁰ܘܠܵܐ ܥܵܠܘܿܒܹ̈ܐ. ܘܠܵܐ ܓܲܢܵܒܹ̈ܐ. ܘܠܵܐ ܪ̈ܵܘܵܝܹܐ. ܘܠܵܐ ܡܨܲܥܪ̈ܵܢܹܐ. ܘܠܵܐ ܚܵܛܘܿܦܹ̈ܐ: ܗܵܠܹܝܢ ܡܲܠܟܘܼܬܹܗ ܕܐܲܠܵܗܵܐ ܠܵܐ ܝܵܪܬܿܝܼܢ.

¹¹ܘܗܵܠܹܝܢ ܐܝܼܬ݂ ܗ̄ܘܲܝ̈ ܒܐ̄ܢܵܫ ܐ̄ܢܵܫ ܡܸܢܟ݂ܘܿܢ. ܐܸܠܵܐ ܣܚܲܝܬܿܘܿܢ ܘܐܸܬ݂ܩܲܕܲܫܬܿܘܿܢ. ܘܐܸܙܕܲܕܲܩܬܿܘܿܢ. ܒܲܫܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܘܲܒܪܘܼܚܹܗ ܕܐܲܠܵܗܲܢ.

¹²ܟܠ ܫܲܠܝܼܛ ܠܝܼ. ܐܸܠܵܐ ܠܵܐ ܟܠ ܦܲܩܵܚ ܠܝܼ. ܟܠ ܫܲܠܝܼܛ ܠܝܼ. ܐܸܠܵܐ ܥܠܲܝ ܐ̄ܢܵܫ ܠܵܐ ܢܸܫܬܲܠܲܛ.

¹³ܡܹܐܟ݂ܘܼܠܬܵܐ ܕܟܲܪܣܵܐ. ܘܟܲܪܣܵܐ ܕܡܹܐܟ݂ܘܼܠܬܵܐ. ܐܲܠܵܗܵܐ ܕܹܝܢ ܠܬܲܪ̈ܬܲܝܗܹܝܢ ܡܒܲܛܸܠ. ܦܲܓ݂ܪܵܐ ܕܹܝܢ ܠܵܐ ܠܙܵܢܝܘܼܬ݂ܵܐ. ܐܸܠܵܐ ܠܡܵܪܲܢ. ܘܡܵܪܲܢ ܠܦܲܓ݂ܪܵܐ.

¹⁴ܐܲܠܵܗܵܐ ܕܹܝܢ ܘܲܠܡܵܪܲܢ ܐܲܩܝܼܡ. ܘܠܲܢ ܡܩܝܼܡ ܒܚܲܝܠܹܗ.

¹⁵ܠܵܐ ܝܵܕ݂ܥܝܼܢ ܐ̄ܢܬܘܿܢ ܕܦܲܓ݂ܪ̈ܲܝܟ̇ܘܿܢ ܗܲܕܵܡܹ̈ܐ ܐܸܢܘܿܢ ܕܲܡܫܝܼܚܵܐ. ܢܸܣܲܒ݂ ܗܲܕܵܡܵܐ ܕܲܡܫܝܼܚܵܐ ܢܸܥܒܕ݂ܝܼܘܗܝ ܗܲܕܡܵܐ ܕܙܵܢܝܼܬ݂ܵܐ. ܚܵܣ.

¹⁶ܐܵܘ ܠܵܐ ܝܵܕ݂ܥܝܼܢ ܐܢ̄ܬܘܿܢ. ܕܡܲܢ ܕܢܵܩܹܦ ܠܙܵܢܝܼܬ݂ܵܐ. ܚܲܕ݂ ܗܘܼ ܦܓܲܪ. ܐܲܡܝܼܪ ܓܹܝܪ. ܕܢܸܗܘܘܿܢ ܬܪ̈ܲܝܗܘܿܢ ܚܲܕ݂ ܦܓܲܪ.

¹⁷ܡܲܢ ܕܢܵܩܹܦ ܕܹܝܢ ܠܡܵܪܲܢ. ܗܵܘܹܐ ܥܲܡܹܗ ܚܕ݂ܵܐ ܪܘܼܚ.

¹⁸ܥܪܘܿܩܘ ܡܸܢ ܙܵܢܝܘܼܬ݂ܵܐ. ܟܠ ܚܛܝܼܬ݂ܵܐ ܕܢܸܥܒܸܕ݂ ܒܲܪܢܵܫܵܐ. ܠܒܲܪ ܡܸܢ ܦܲܓ݂ܪܹܗ ܗܝܼ. ܡܲܢ ܕܲܡܙܲܢܹܐ ܕܹܝܢ. ܒܦܲܓ݂ܪܹܗ ܗܘܼ ܚܵܛܹܐ.

¹⁹ܐܵܘ ܠܵܐ ܝܵܕ݂ܥܝܼܢ ܐܢ̄ܬܘܿܢ. ܕܦܲܓ݂ܪܟ݂ܘܿܢ ܗܲܝܟܠܵܐ ܗܘܼ ܕܪܘܼܚܵܐ ܕܩܘܼܕ݂ܫܵܐ. ܕܥܵܡܪܵܐ ܒܟ݂ܘܿܢ. ܗܵܝ ܕܩܲܒܸܠܬܿܘܢ ܡܸܢ ܐܲܠܵܗܵܐ. ܘܠܵܐ ܗܘܲܝܬܿܘܿܢ ܕܢܲܦ̮ܫܟ݂ܘܿܢ.

²⁰ܐܸܙܕܒܸܢܬܿܘܿܢ ܓܹܝܪ ܒܲܕ݂ܡܲܝ̈ܵܐ. ܗܘܲܝܬܿܘܿܢ ܗܵܟܹܝܠ ܡܫܲܒܚܝܼܢ ܠܐܲܠܵܗܵܐ ܒܦܲܓ݂ܪܟ݂ܘܿܢܘܲܒ݂ܪܘܼܚܟ݂ܘܿܢ. ܗܵܢܘܿܢ ܕܐܝܼܬܲܝܗܘܿܢ ܕܐܲܠܵܗܵܐ.