Read Aramaic Peshita 1 Corinthians 7 Bible Online

1 Corinthians 7 - Aramaic Peshita bible

1 Corinthians 7

¹ܥܲܠ ܐܲܝܠܹܝܢ ܕܲܟ݂ܬܲܒ݂ܬܿܘܢ ܠܝܼ ܕܹܝܢ. ܫܲܦܝܼܪ ܗܘܼ ܠܓܲܒ݂ܪܵܐ ܕܠܲܐܢ̱ܬܿܬ݂ܵܐ ܠܵܐ ܢܸܬ݂ܩܲܪܲܒ݂.

²ܐܸܠܵܐ ܡܛܠ ܙܵܢܝܘܼܬ݂ܵܐ. ܐ̄ܢܵܫ ܐܲܢ̄ܬܿܬܹܗ ܢܹܐܚܘܿܕ݂. ܘܐܲܢ̄ܬܿܬ݂ܵܐ ܠܒܲܥܠܵܗܿ ܬܹܐܚܘܿܕ݂.

³ܓܲܒ݂ܪܵܐ ܠܐܲܢ̄ܬܿܬܹܗ ܚܘܼܒܵܐ ܕܡܸܬ݁ܬ݁ܚܝܼܒ݂ ܢܸܦܪܘܿܥ. ܗܵܟܲܢܵܐ ܐܵܦ ܗܝܼ ܐܲܢ̄ܬܿܬ݂ܵܐ ܠܒܲܥܠܵܗܿ.

⁴ܐܲܢ̄ܬܿܬ݂ܵܐ ܠܵܐ ܫܲܠܝܼܛܵܐ ܥܲܠ ܦܲܓ݂ܪܵܗܿ. ܐܸܠܵܐ ܒܲܥܠܵܗܿ. ܗܵܟܲܢܵܐ ܐܵܦ ܓܲܒ݂ܪܵܐ ܠܵܐ ܫܲܠܝܼܛ ܥܲܠ ܦܲܓ݂ܪܹܗ. ܐܸܠܵܐ ܐܲܢ̄ܬܿܬܹܗ.

⁵ܠܵܐ ܗܵܟܹܝܠ ܬܸܓ݂ܠܙܘܼܢ ܚܲܕ݂ ܠܚܲܕ݂. ܐܸܠܵܐ ܐܸܡܲܬ݂ܝ ܕܲܬ݂ܪ̈ܲܝܟ̇ܘܿܢ ܬܸܫܬܿܘܘܿܢ ܒܲܙܒܲܢ. ܕܬܸܬ݂ܥܢܘܿܢ ܠܨܵܘܡܵܐ ܘܠܲܨܠܘܼܬ݂ܵܐ. ܘܬ݂ܘܼܒ݂ ܠܵܗܿ ܠܲܨܒ݂ܘܼܬ݂ܵܐ ܬܸܬ݂ܦܢܘܿܢ. ܕܠܵܐ ܢܢܲܣܹܝܟ݂ܘܿܢ ܣܵܛܵܢܵܐ ܡܛܠ ܪܸܓ݁ܬ݂ܵܐ ܕܦܲܓ݂ܪܟ݂ܘܿܢ.

⁶ܗܵܕܹܐ ܕܹܝܢ ܐܵܡܲܪ ܐ̄ܢܵܐ ܐܲܝܟ݂ ܕܠܲܡܚܝܼܠܹ̈ܐ. ܠܵܘ ܡܸܢ ܦܘܼܩܕܵܢܵܐ.

⁷ܐܸܢܵܐ ܓܹܝܪ ܨܵܒܹܐ ܐ̄ܢܵܐ. ܕܟ݂ܠܗܘܿܢ ܒܢܲܝ̈ܢܵܫܵܐ ܐܲܟ݂ܘܵܬ݂ܝ ܢܸܗܘܘܿܢ ܒܕ݂ܲܟ݂ܝܘܼܬ݂ܵܐ. ܐܸܠܵܐ ܟܠܢܵܫ ܡܵܘܗܲܒ݂ܬܵܐ ܝܼܗܝܼܒ݂ܵܐ ܠܹܗ ܡܸܢ ܐܲܠܵܗܵܐ. ܐܝܼܬ݂ ܕܗܵܟܲܢܵܐ. ܘܐܝܼܬ݂ ܕܗܵܟܲܢܵܐ.

⁸ܐܵܡܲܪ ܐ̄ܢܵܐ ܕܹܝܢ ܠܐܲܝܠܹܝܢ ܕܠܲܝܬܿ ܠܗܘܿܢ ܢܸܫܹ̈ܐ. ܘܠܲܐܪ̈ܡܠܵܬ݂ܵܐ. ܕܦܲܩܵܚ ܠܗܘܿܢ ܐܸܢ ܢܩܵܘܘܢ ܐܲܟ݂ܘܵܬ݂ܝ.

⁹ܐܸܢ ܠܵܐ ܕܹܝܢ ܡܣܲܝܒܪܝܼܢ. ܢܸܙܕܵܘܓ݂ܘܼܢ. ܦܲܩܵܚ ܓܹܝܪ ܠܡܸܣܲܒ݂ ܐܲܢ̄ܬܿܬ݂ܵܐ ܛܵܒ݂ ܡܸܢ ܕܲܠܡܹܐܩܲܕ݂ ܒܪܸܓ݁ܬ݂ܵܐ.

¹⁰ܠܐܲܝܠܹܝܢ ܕܹܝܢ ܕܐܝܼܬ݂ ܠܗܘܿܢ ܢܸܫܹ̈ܐ. ܡܦܲܩܸܕ݂ ܐ̄ܢܵܐ. ܠܵܐ ܐܸܢܵܐ ܐܸܠܵܐ ܡܵܪܝ. ܕܐܲܢ̄ܬܿܬ݂ܵܐ ܡܸܢ ܒܲܥܠܵܗܿ ܠܵܐ ܬܸܦܪܘܿܫ.

¹¹ܘܐܸܢ ܬܸܦܪܘܿܫ. ܬܿܩܵܘܹܐ ܕܠܵܐ ܓܲܒ݂ܪܵܐ. ܐܵܘ ܠܒܲܥܠܵܗܿ ܬܸܬ݂ܪܲܥܹܐ. ܘܓܲܒ݂ܪܵܐ ܠܐܲܢ̄ܬܿܬܹܗ ܠܵܐ ܢܸܫܒܘܿܩ.

¹²ܠܫܲܪܟܵܐ ܕܹܝܢ ܐܵܡܲܪ ܐ̄ܢܵܐ. ܐܸܢܵܐ ܠܵܐ ܡܵܪܝ. ܐܸܢ ܐܝܼܬ݂ ܐܲܚܵܐ ܕܐܝܼܬ݂ ܠܹܗ ܐܲܢ̄ܬܿܬ݂ܵܐ ܕܠܵܐ ܡܗܲܝܡܢܵܐ. ܘܗܝܼ ܨܵܒ݂ܝܵܐ ܕܬܸܥܡܲܪ ܥܲܡܹܗ. ܠܵܐ ܢܸܫܒܩܝܼܗܿ.

¹³ܘܐܲܢ̄ܬܿܬ݂ܵܐ. ܐܲܝܕ݂ܵܐ ܕܐܝܼܬ݂ ܠܵܗܿ ܒܲܥܠܵܐ ܕܠܵܐ ܡܗܲܝܡܸܢ. ܘܗܘܼ ܨܵܒܹܐ ܕܢܸܥܡܲܪ ܥܲܡܵܗܿ. ܠܵܐ ܬܸܫܒ̇ܘܿܩ ܒܲܥܠܵܗܿ.

¹⁴ܡܩܲܕܲܫ ܗܘܼ ܓܹܝܪ ܓܲܒ݂ܪܵܐ ܐܲܝܢܵܐ ܕܠܵܐ ܡܗܲܝܡܸܢ. ܒܐܲܢ̄ܬܿܬ݂ܵܐ ܕܲܡܗܲܝܡܢܵܐ. ܘܲܡܩܲܕܫܵܐ ܗܝܼ ܐܲܢ̄ܬܿܬ݂ܵܐ ܐܲܝܕ݂ܵܐ ܕܠܵܐ ܡܗܲܝܡܢܵܐ. ܒܓܲܒ݂ܪܵܐ ܕܲܡܗܲܝܡܸܢ. ܘܐܸܢ ܠܵܐ. ܒܢܲܝ̈ܗܘܿܢ ܛܲܡܐܝܼܢ ܐܸܢܘܿܢ. ܗܵܫܵܐ ܕܹܝܢ ܕܟܹܝܢ ܐܸܢܘܿܢ.

¹⁵ܐܸܢ ܕܹܝܢ ܗܵܘ ܕܠܵܐ ܡܗܲܝܡܸܢ ܦܵܪܹܫ. ܢܸܦܪܘܿܫ. ܠܵܐ ܡܫܲܥܒܲܕ݂ ܐܲܚܵܐ ܐܵܘ ܚܵܬ݂ܵܐ ܒܗܵܠܹܝܢ. ܠܲܫܠܵܡܵܐ ܗܘܼ ܩܪܵܢ ܐܲܠܵܗܵܐ.

¹⁶ܡܵܢܵܐ ܓܹܝܪ ܝܵܕ݂ܥܵܐ ܐܲܢ̄ܬܿܝ ܐܲܢ̄ܬܿܬ݂ܵܐ. ܐܸܢ ܠܒܲܥܠܹܟ݂ܝ ܬܲܚܹܝܢ. ܐܵܘ ܐܲܢ̄ܬܿ ܓܲܒ݂ܪܵܐ ܝܵܕ݂ܲܥ ܐܲܢ̄ܬܿ. ܐܸܢ ܠܐܲܢ̄ܬܿܬ݂ܵܟ݂ ܬܲܚܹܐ.

¹⁷ܐܸܠܵܐ ܐ̄ܢܵܫ ܐ̄ܢܵܫ ܐܲܝܟ݂ ܕܲܦܠܲܓ݂ ܠܹܗ ܡܵܪܝܵܐ. ܘܐ̄ܢܵܫ ܐܲܝܟ݂ ܕܲܩܪܵܝܗܝ ܐܲܠܵܗܵܐ. ܗܵܟܲܢܵܐ ܢܗܲܠܸܟ݂. ܘܐܵܦ ܠܟ̣ܠܗܹܝܢ ܥܹ̈ܕ݂ܵܬܵܐ ܗܵܟܲܢܵܐ ܡܦܲܩܸܕ݂ ܐ̄ܢܵܐ.

¹⁸ܐܸܢ ܟܲܕ݂ ܓܙܝܼܪ ܐ̄ܢܵܫ ܐܸܬ݂ܩܪܝܼ. ܠܵܐ ܢܸܗܦܘܼܟ݂ ܠܹܗ ܠܥܘܼܪܠܘܼܬ݂ܵܐ. ܘܐܸܢ ܒܥܘܼܪܠܘܼܬ݂ܵܐ ܐܸܬ݂ܩܪܝܼ. ܠܵܐ ܢܸܓ݂ܙܘܿܪ.

¹⁹ܓܙܘܼܪܬܵܐ ܓܹܝܪ ܠܵܐ ܗ̄ܘܵܬ݂ ܡܸܕܸܡ. ܐܵܦ ܠܵܐ ܥܘܼܪܠܘܼܬ݂ܵܐ. ܐܸܠܵܐ ܢܛܘܼܪܬܵܐ ܕܦܘܼܩܕܵܢܵܘ̈ܗܝ ܕܐܲܠܵܗܵܐ.

²⁰ܟܠܢܵܫ ܒܩܸܪܝܵܢܵܐ ܕܐܸܬ݂ܩܪܝܼ. ܒܹܗ ܢܩܵܘܹܐ.

²¹ܐܸܢ ܥܲܒ݂ܕܵܐ ܐܸܬ݂ܩܪܝܼܬܿ. ܠܵܐ ܢܸܬ݂ܒܛܸܠ ܠܵܟ݂. ܐܸܠܵܐ ܐܵܦܸܢ ܡܸܫܟܲܚ ܐܲܢ̄ܬܿ ܠܡܸܬ݂ܚܲܪܵܪܘܼ. ܓܒ݂ܝܼ ܠܵܟ݂ ܕܬܸܦܠܘܿܚ.

²²ܐܲܝܢܵܐ ܓܹܝܪ ܕܥܲܒ݂ܕܵܐ ܐܸܬ݂ܩܪܝܼ ܒܡܵܪܲܢ. ܡܚܲܪܪܵܐ ܗܘܼ ܕܐܲܠܵܗܵܐ. ܗܵܟܲܢܵܐ ܐܵܦ ܐܲܝܢܵܐ ܕܒܲܪ ܚܹܐܪܹ̈ܐ ܐܸܬ݂ܩܪܝܼ. ܥܲܒ݂ܕܵܐ ܗܘܼ ܕܲܡܫܝܼܚܵܐ.

²³ܒܲܕ݂ܡܲܝ̈ܵܐ ܐܸܙܕܒܸܢܬܿܘܿܢ. ܠܵܐ ܬܸܗܘܘܿܢ ܥܲܒ݂ܕܹ̈ܐ ܕܲܒ݂ܢܲܝ̈ܢܵܫܵܐ.

²⁴ܟܠܢܵܫ ܒܡܸܕܸܡ ܕܐܬ݂ܩܪܝܼ ܐܲܚܲܝ̈. ܒܹܗ ܢܩܵܘܹܐ ܠܘܵܬ݂ ܐܲܠܵܗܵܐ.

²⁵ܥܲܠ ܒܬ݂ܘܼܠܘܼܬ݂ܵܐ ܕܹܝܢ. ܦܘܼܩܕܵܢܵܐ ܡܸܢ ܐܲܠܵܗܵܐ ܠܵܐ ܐܲܚܝܼܕ݂ ܐ̄ܢܵܐ. ܡܸܠܟܵܐ ܕܹܝܢ ܝܵܗܹܒ݂ ܐ̄ܢܵܐ. ܐܲܝܟ݂ ܓܲܒ݂ܪܵܐ ܕܐܸܬ݂ܚܲܢܢܹܬ݂ ܡܸܢ ܐܲܠܵܗܵܐ ܕܐܸܗܘܹܐ ܡܗܲܝܡܲܢ.

²⁶ܘܣܵܒܲܪ ܐ̄ܢܵܐ ܕܗܵܕܹܐ ܫܲܦܝܼܪܵܐ. ܡܛܠ ܐܵܢܲܢܩܹܐ ܕܙܲܒ݂ܢܵܐ. ܕܦܲܩܵܚ ܠܹܗ ܠܒܲܪܢܵܫܵܐ. ܕܗܵܟܲܢܵܐ ܢܸܗܘܹܐ.

²⁷ܐܲܣܝܼܪ ܐܲܢ̄ܬܿ ܒܐܲܢ̄ܬܿܬ݂ܵܐ. ܠܵܐ ܬܸܒ݂ܥܹܐ ܫܪܵܝܵܐ. ܫܪܹܐ ܐܲܢ̄ܬܿ ܡܸܢ ܐܲܢ̄ܬܿܬ݂ܵܐ. ܠܵܐ ܬܸܒ݂ܥܹܐ ܐܲܢ̄ܬܿܬ݂ܵܐ.

²⁸ܘܐܸܢ ܬܸܣܲܒ݂ ܐܲܢ̄ܬܿܬ݂ܵܐ ܠܵܐ ܚܵܛܹܐ ܐܲܢ̄ܬܿ. ܘܐܸܢ ܒܬ݂ܘܼܠܬܵܐ ܬܸܗܘܹܐ ܠܓܲܒ݂ܪܵܐ ܠܵܐ ܚܵܛܝܵܐ. ܐܘܼܠܨܵܢܵܐ ܕܹܝܢ ܒܲܦܓܲܪ ܗܵܘܹܐ ܠܐܲܝܠܹܝܢ ܕܗܵܟܲܢܵܐ ܐܸܢܘܿܢ. ܐܸܢܵܐ ܕܹܝܢ ܥܠܲܝܟܿܘܿܢ ܚܵܐܹܣ ܐ̄ܢܵܐ.

²⁹ܘܗܵܕܹܐ ܐܵܡܲܪ ܐ̄ܢܵܐ ܐܲܚܲܝ̈. ܕܙܲܒ݂ܢܵܐ ܡܸܟܹܝܠ ܐܸܙܕܲܠܗܲܙ ܠܹܗ. ܕܐܲܝܠܹܝܢ ܕܐܝܼܬ݂ ܠܗܘܿܢ ܢܸܫܹ̈ܐ. ܢܸܗܘܘܿܢ ܐܲܝܟ݂ ܕܠܲܝܬܿ ܠܗܘܿܢ.

³⁰ܘܐܲܝܠܹܝܢ ܕܒ݂ܵܟܹܝܢ. ܐܲܝܟ݂ ܠܵܐ ܒܵܟܹܝܢ. ܘܐܲܝܠܹܝܢ ܕܚܵܕܹܝܢ. ܐܲܝܟ݂ ܠܵܐ ܚܵܕܹܝܢ. ܘܐܲܝܠܹܝܢ ܕܙܵܒ݂ܢܝܼܢ. ܐܲܝܟ݂ ܠܵܐ ܡܩܲܕܹܝܢ.

³¹ܘܐܲܝܠܹܝܢ ܕܡܸܬ݂ܚܲܫܚܝܼܢ ܒܥܵܠܡܵܐ ܗܵܢܵܐ. ܠܵܐ ܠܒܲܪ ܡܸܢ ܙܸܕ݂ܩܵܐ ܕܲܚܫܲܚܬ݂ܵܐ. ܥܵܒܲܪ ܠܹܗ ܓܹܝܪ ܐܸܣܟܹܡܹܗ ܕܥܵܠܡܵܐ ܗܵܢܵܐ.

³²ܡܛܠ ܗܵܢܵܐ ܨܵܒܹܐ ܐ̄ܢܵܐ ܕܲܕ݂ܠܵܐ ܨܸܦܬ݂ܵܐ ܬܸܗܘܘܿܢ. ܐܲܝܢܵܐ ܓܹܝܪ ܕܠܲܝܬܿ ܠܹܗ ܐܲܢ̄ܬܿܬ݂ܵܐ. ܪܵܢܹܐ ܒܲܕ݂ܡܵܪܹܗ. ܕܐܲܝܟܲܢܵܐ ܢܸܫܦܲܪ ܠܡܵܪܹܗ.

³³ܘܐܲܝܢܵܐ ܕܐܝܼܬ݂ ܠܹܗ ܐܲܢ̄ܬܿܬ݂ܵܐ. ܝܵܨܹܦ ܕܥܵܠܡܵܐ. ܕܐܲܝܟܲܢܵܐ ܢܸܫܦܲܪ ܠܐܲܢ̄ܬܿܬܹܗ.

³⁴ܦܘܼܪܫܵܢܵܐ ܕܹܝܢ ܐܝܼܬ݂ ܐܵܦ ܒܲܝܢܵܬ݂ ܐܲܢ̄ܬܿܬ݂ܵܐ ܠܲܒܬ݂ܘܼܠܬܵܐ. ܐܲܝܕ݂ܵܐ ܕܲܠܓܲܒ݂ܪܵܐ ܠܵܐ ܗܘܸܵܬ݂. ܪܵܢܝܵܐ ܒܡܵܪܵܗܿ. ܕܬܸܗܘܹܐ ܩܲܕܝܼܫܵܐ ܒܦܲܓ݂ܪܵܗܿ ܘܲܒ݂ܪܘܼܚܵܗܿ. ܘܐܲܝܕ݂ܵܐ ܕܐܝܼܬ݂ ܠܵܗܿ ܒܲܥܠܵܐ. ܪܵܢܝܵܐ ܕܥܵܠܡܵܐ. ܕܐܲܝܟܲܢܵܐ ܬܸܫܦܲܪ ܠܒܲܥܠܵܗܿ.

³⁵ܗܵܕܹܐ ܕܹܝܢ ܠܥܘܼܕ݂ܪܵܢܟ݂ܘܿܢ ܗܘܼ ܕܝܼܠܟ݂ܘܿܢ ܐܵܡܲܪ ܐ̄ܢܵܐ. ܠܵܐ ܗ̄ܘܵܐ ܡܲܚܢܘܿܩܝܼܬ݂ܵܐ ܪܵܡܹܐ ܐ̄ܢܵܐ ܠܟ݂ܘܿܢ. ܐܸܠܵܐ ܕܬܸܗܘܘܿܢ ܐܲܡܝܼܢܝܼܢ ܠܘܵܬ݂ ܡܵܪܟ݂ܘܿܢ ܒܐܸܣܟܹܡܵܐ ܫܲܦܝܼܪܵܐ. ܟܲܕ݂ ܠܵܐ ܪܵܢܹܝܢ ܐ̄ܢܬܘܿܢ ܒܥܵܠܡܵܐ.

³⁶ܐܸܢ ܐ̄ܢܵܫ ܕܹܝܢ ܣܵܒܲܪ ܕܡܸܬ݂ܒܲܙܲܚ ܒܲܒ݂ܬ݂ܘܼܠܬܹ݁ܗ. ܕܲܥܒܲܪ ܙܲܒ݂ܢܵܗܿ. ܘܠܵܐ ܝܲܗܒܵܗܿ ܠܓܲܒ݂ܪܵܐ. ܘܘܵܠܝܵܐ ܕܢܸܬܿܠܝܼܗܿ. ܐܲܝܟ݂ ܕܨܵܒܹܐ ܢܸܥܒܸܕ݂. ܠܵܐ ܚܵܛܹܐ. ܬܸܙܕܵܘܲܓ݂.

³⁷ܐܲܝܢܵܐ ܕܹܝܢ ܕܫܲܪܝܼܪܵܐܝܼܬ݂ ܦܣܲܩ ܒܪܸܥܝܵܢܹܗ. ܘܠܵܐ ܐܵܠܨܵܐ ܠܹܗ ܨܒ݂ܘܼܬ݂ܵܐ. ܘܫܲܠܝܼܛ ܥܲܠ ܨܸܒ݂ܝܵܢܹܗ. ܘܗܵܟܲܢܵܐ ܕܵܢ ܒܠܸܒܹܗ. ܕܢܸܛܲܪ ܒܬ݂ܘܼܠܬܹ݁ܗ. ܫܲܦܝܼܪ ܥܵܒܹܿܕ݂.

³⁸ܘܐܲܝܢܵܐ ܗܵܟܹܝܠ ܕܝܵܗܹܒ݂ ܒܬ݂ܘܼܠܬܹ݁ܗ. ܫܲܦܝܼܪ ܥܵܒܹܿܕ݂. ܘܐܲܝܢܵܐ ܕܠܵܐ ܝܵܗܹܒ݂ ܒܬ݂ܘܼܠܬܹ݁ܗ. ܝܲܬܝܼܪܵܐܝܼܬ݂ ܫܲܦܝܼܪ ܥܵܒܹܿܕ݂.

³⁹ܐܲܢ̄ܬܿܬ݂ܵܐ ܟܡܵܐ ܕܚܲܝ ܒܲܥܠܵܗܿ. ܐܲܣܝܼܪܵܐ ܗܝܼ ܒܢܵܡܘܿܣܵܐ. ܐܸܢ ܕܹܝܢ ܢܸܕ݂ܡܲܟ݂ ܒܲܥܠܵܗܿ. ܡܚܲܪܪܵܐ ܗܝܼ ܕܬܸܗܘܹܐ ܠܡܲܢ ܕܨܵܒ݂ܝܵܐ. ܒܲܠܚܘܿܕ݂ ܒܡܵܪܲܢ.

⁴⁰ܛܘܼܒܹܝܗ̇ ܕܹܝܢ ܐܸܢ ܗܵܟܲܢܵܐ ܬܿܩܵܘܹܐ ܐܲܝܟ݂ ܪܸܥܝܵܢܝ ܕܝܼܠܝ. ܣܵܒܲܪ ܐ̄ܢܵܐ ܕܹܝܢ ܐܵܦ ܐܸܢܵܐ. ܕܪܘܼܚܵܐ ܕܐܲܠܵܗܵܐ ܐܝܼܬ݂ ܒܝܼ.