Read Aramaic Peshita 1 Corinthians 8 Bible Online

1 Corinthians 8 - Aramaic Peshita bible

1 Corinthians 8

¹ܥܲܠ ܕܸܒ݂ܚܹ̈ܐ ܕܹܝܢ ܕܲܦܬܲܟ݂ܪܹ̈ܐ. ܝܵܕ݂ܥܝܼܢܲܢ ܕܲܒ݂ܟ݂ܠܲܢ ܐܝܼܬ݂ ܝܼܕ݂ܲܥܬ݂ܵܐ. ܘܝܼܕ݂ܲܥܬ݂ܵܐ ܡܲܚܬܿܪܵܐ. ܚܘܼܒܵܐ ܕܹܝܢ ܒܵܢܹܐ.

²ܐܸܢ ܐ̄ܢܵܫ ܕܹܝܢ ܣܵܒܲܪ ܕܝܵܕ݂ܲܥ ܡܸܕܸܡ. ܠܵܐ ܥܕ݂ܲܟܹܝܠ ܡܸܕܸܡ ܝܼܕ݂ܲܥ. ܐܲܝܟ݂ ܡܵܐ ܕܘܵܠܹܐ ܠܹܗ ܠܡܸܕܲܥ.

³ܐܸܢ ܐ̄ܢܵܫ ܕܹܝܢ ܡܲܚܸܒ݂ ܠܐܲܠܵܗܵܐ. ܗܵܢܵܐ ܐܸܬ݂ܝܼܕ݂ܲܥ ܡܸܢܹܗ.

⁴ܥܲܠ ܡܹܐܟ݂ܘܼܠܬܵܐ ܗܵܟܹܝܠ ܕܕܸܒ݂ܚܹ̈ܐ ܕܲܦܬܲܟ݂ܪܹ̈ܐ. ܝܵܕ݂ܥܝܼܢܲܢ ܕܠܵܐ ܗ̄ܘܵܐ ܡܸܕܸܡ ܗܘܼ ܦܬܲܟ݂ܪܵܐ ܒܥܵܠܡܵܐ. ܘܲܕ݂ܠܲܝܬܿ ܐܲܠܵܗܿ ܐ̄ܚܪܹܝܢ ܐܸܠܵܐ ܐܸܢ ܚܲܕ݂.

⁵ܐܵܦܸܢ ܓܹܝܪ ܐܝܼܬ݂ ܕܡܸܬ݂ܩܪܹܝܢ ܐܲܠܵܗܹ̈ܐ. ܐܵܘ ܒܲܫܡܲܝܵܐ ܐܵܘ ܒܐܲܪܥܵܐ. ܐܲܝܟܲܢܵܐ ܕܐܝܼܬ݂ ܐܲܠܵܗܹ̈ܐ ܣܲܓܝܼ̈ܐܹܐ. ܘܡܵܪ̈ܵܘܵܬ݂ܵܐ ܣܲܓܝܼ̈ܐܹܐ.

⁶ܐܸܠܵܐ ܠܲܢ ܕܝܼܠܲܢ ܚܲܕ݂ ܗܘܼ ܐܲܠܵܗܵܐ. ܐܲܒ݂ܵܐ. ܕܟܠ ܡܸܢܹܗ ܘܲܚܢܲܢ ܒܹܗ. ܘܚܲܕ݂ ܡܵܪܝܵܐ ܝܼܫܘܿܥ ܡܫܝܼܚܵܐ. ܕܟܠ ܒܐܝܼܕ݂ܗ ܘܐܵܦ ܚܢܲܢ ܒܐܝܼܕܹܗ.

⁷ܐܸܠܵܐ ܠܵܐ ܗ̄ܘܵܐ ܒܟ݂ܠܢܵܫ ܝܼܕ݂ܲܥܬ݂ܵܐ. ܐܝܼܬ݂ ܓܹܝܪ ܐ̄ܢܵܫܵܐ ܕܲܒ݂ܬܹܐܪܬܿܗܘܿܢ ܥܕ݂ܲܡܵܐ ܠܗܵܫܵܐ. ܕܥܲܠ ܦܬܲܟ݂ܪܹ̈ܐ ܐܲܝܟ݂ ܕܲܕ݂ܒ݂ܝܼܚܵܐ ܐܵܟ݂ܠܝܼܢ. ܘܡܛܠ ܕܲܟ݂ܪܝܼܗܵܐ ܬܹܐܪܬܿܗܘܿܢ ܡܸܬܿܛܵܘܫܵܐ.

⁸ܡܹܐܟ݂ܘܼܠܬܵܐ ܕܹܝܢ ܠܵܐ ܡܩܲܪܒ݂ܵܐ ܠܲܢ ܠܐܲܠܵܗܵܐ. ܠܵܐ ܓܹܝܪ ܐܸܢ ܐܵܟ݂ܠܝܼܢܲܢ ܡܸܬ݂ܝܲܬܿܪܝܼܢ ܚ̄ܢܲܢ. ܘܠܵܐ ܐܸܢ ܠܵܐ ܢܹܐܟ݂ܘܿܠ ܡܸܬ݂ܒܲܨܪܝܼܢ ܚ̄ܢܲܢ.

⁹ܚܙܵܘ ܕܹܝܢ. ܕܲܠܡܵܐ ܫܘܼܠܛܵܢܟ݂ܘܿܢ ܗܵܢܵܐ ܢܸܗܘܹܐ ܬܘܼܩܠܬ݂ܵܐ ܠܲܟ݂ܪ̈ܝܼܗܹܐ.

¹⁰ܐܸܢ ܐ̄ܢܵܫ ܓܹܝܪ ܢܸܚܙܹܝܟ݂ ܠܵܟ݂. ܕܐܝܼܬ݂ ܒܵܟ݂ ܝܼܕ݂ܲܥܬ݂ܵܐ. ܕܲܣܡܝܼܟ݂ ܐܲܢ̄ܬܿ ܒܹܝܬ݂ ܦܬܲܟ݂ܪܹ̈ܐ. ܠܵܐ ܗܵܐ ܬܹܐܪܬܹ݁ܗ ܡܛܠ ܕܲܟ݂ܪܝܼܗ ܗ̄ܘܼ. ܡܸܫܬܲܪܪܵܐ ܠܡܹܐܟܲܠ ܕܲܕ݂ܒ݂ܝܼܚܵܐ.

¹¹ܘܐܵܒܹܕ݂ ܠܹܗ ܒܝܼܕ݂ܲܥܬ݂ܵܟ݂ ܕܝܼܠܵܟ݂ ܗܵܘ ܐܲܝܢܵܐ ܕܲܡܪܲܥ. ܕܡܛܠܵܬܹܗ ܡܝܼܬ݂ ܡܫܝܼܚܵܐ.

¹²ܘܐܸܢ ܗܵܟܲܢܵܐ ܡܲܣܟܠܝܼܢ ܐ̄ܢܬܘܿܢ ܒܐܲܚܲܝ̈ܟ̇ܘܿܢ. ܘܲܡܩܲܦܚܝܼܢ ܐ̄ܢܬܘܿܢ ܬܹܐܪ̈ܵܬ݂ܗܘܿܢ ܡܲܪ̈ܥܵܬ݂ܵܐ. ܒܲܡܫܝܼܚܵܐ ܗܘܼ ܡܲܣܟܠܝܼܢ ܐܢ̄ܬܘܿܢ.

¹³ܡܛܠ ܗܵܢܵܐ ܐܸܢ ܡܹܐܟ݂ܘܼܠܬܵܐ ܡܲܟ݂ܫܠܵܐ ܠܐܵܚܝ. ܠܥܵܠܲܡ ܒܸܣܪܵܐ ܠܵܐ ܐܹܟ݂ܘܠ. ܕܠܵܐ ܐܲܟ݂ܫܸܠ ܠܐܵܚܝ.