Read Aramaic Peshita 2 Corinthians 10 Bible Online

2 Corinthians 10 - Aramaic Peshita bible

2 Corinthians 10

¹ܐܸܢܵܐ ܕܹܝܢ ܦܵܘܠܘܿܣ ܒܵܥܹܐ ܐ̄ܢܵܐ ܡܸܢܟ݂ܘܿܢ. ܒܢܝܼܚܘܼܬܹܗ ܘܲܒ݂ܡܲܟܝܼܟ̣ܘܼܬܹܗ ܕܲܡܫܝܼܚܵܐ. ܕܐܵܦܸܢ ܒܐܲܦܝܼ̈ܢ ܡܲܟܝܼܟ݂ ܐ̄ܢܵܐ ܠܘܵܬ݂ܟ݂ܘܿܢ. ܐܸܠܵܐ ܟܲܕ݂ ܪܲܚܝܼܩ ܐ̄ܢܵܐ ܬܿܟ݂ܝܼܠ ܐ̄ܢܵܐ ܥܠܲܝܟܿܘܿܢ.

²ܒܵܥܹܐ ܐ̄ܢܵܐ ܕܹܝܢ ܡܸܢܟ݂ܘܿܢ. ܕܠܵܐ ܡܵܐ ܕܐܸܬܹܝܬ݂. ܐܸܬ݂ܐܠܸܨ ܒܬ݂ܘܼܟ݂ܠܵܢܵܐ ܕܐܝܼܬ݂ ܠܝܼ. ܕܐܲܫܝܼܚ ܐܲܝܟ݂ ܕܡܸܬ݂ܪܲܥܹܐ ܐ̄ܢܵܐ. ܥܲܠ ܐ̄ܢܵܫܵܐ ܐܲܝܠܹܝܢ ܕܚܵܫܒܝܼܢ ܠܲܢ ܕܐܲܝܟ݂ ܕܒܲܒ݂ܣܲܪ ܡܗܲܠܟ݂ܝܼܢ ܚ̄ܢܲܢ.

³ܐܵܦܸܢ ܒܲܒ݂ܣܲܪ ܓܹܝܪ ܡܗܲܠܟ݂ܝܼܢ ܚ̄ܢܲܢ. ܐܸܠܵܐ ܠܵܐ ܗ̄ܘܵܐ ܕܒܸܣܪܵܐ ܦܵܠܚܝܼܢ ܚ̄ܢܲܢ.

⁴ܙܲܝܢܵܐ ܓܹܝܪ ܕܦܵܠܚܘܼܬܲܢ. ܠܵܐ ܗ̄ܘܵܐ ܕܒܸܣܪܵܐ. ܐܸܠܵܐ ܕܚܲܝܠܵܐ ܕܐܲܠܵܗܵܐ. ܘܒܹܗ ܟܵܒ݂ܫܝܼܢ ܚ̄ܢܲܢ ܚܸܣܢܹ̈ܐ ܡܪ̈ܝܼܕܹܐ.

⁵ܘܣܵܬ݂ܪܝܼܢ ܚ̄ܢܲܢ ܡܲܚܫ̈ܒ݂ܵܬ݂ܵܐ. ܘܟ݂ܠ ܪܵܘܡܵܐ ܕܡܸܬ݁ܬ݁ܪܝܼܡ ܠܘܼܩܒܲܠ ܝܼܕ݂ܲܥܬܹܗ ܕܐܲܠܵܗܵܐ. ܘܫܵܒܹܝܢ ܚ̄ܢܲܢ ܟܠ ܬܲܪ̈ܥܝܵܢ ܠܡܲܫܡܲܥܬܹܗ ܕܲܡܫܝܼܚܵܐ.

⁶ܘܲܡܛܲܝܒ݂ܝܼܢ ܚ̄ܢܲܢ ܠܡܸܥܒܲܕ݂ ܬܿܒܲܥܬ݂ܵܐ ܡܸܢ ܐܲܝܠܹܝܢ ܕܠܵܐ ܡܸܫܬܲܡܥܝܼܢ. ܡܵܐ ܕܐܸܬ݂ܡܲܠܝܲܬ݂ ܡܸܫܬܲܡܥܵܢܘܼܬ݂ܟ݂ܘܿܢ.

⁷ܒܦܲܪ̈ܨܘܿܦܹܐ ܚܵܝܪܝܼܢ ܐܢ̄ܬܘܿܢ. ܐܸܢ ܐ̄ܢܵܫ ܬܿܟ݂ܝܼܠ ܥܲܠ ܢܲܦ̮ܫܹܗ. ܕܕ݂ܲܡܫܝܼܚܵܐ ܗܘܼ. ܗܵܢܵܐ ܢܸܕܲܥ ܡܸܢ ܢܲܦ̮ܫܹܗ. ܕܐܲܝܟ݂ ܕܗܘܼ ܕܲܡܫܝܼܚܵܐ. ܗܵܟܲܢܵܐ ܐܵܦ ܚܢܲܢ.

⁸ܐܸܢ ܓܹܝܪ ܐܵܦ ܡܸܕܸܡ ܝܲܬܿܝܼܪ ܐܸܫܬܲܒ݂ܗܲܪ ܥܲܠ ܫܘܼܠܛܵܢܵܐ ܕܝܲܗ̄ܒ݂ ܠܝܼ ܡܵܪܲܢ. ܠܵܐ ܒܵܗܹܬ݂ ܐ̄ܢܵܐ. ܡܛܠ ܕܲܠܒܸܢܝܵܢܵܐ ܗܘܼ ܕܝܼܠܟ݂ܘܿܢ ܝܲܗ̄ܒ݂ ܠܲܢ. ܘܠܵܐ ܠܣܘܼܚܵܦܟ݂ܘܿܢ.

⁹ܡܲܗܡܹܐ ܐ̄ܢܵܐ ܕܹܝܢ. ܕܠܵܐ ܐܸܣܬܿܒܲܪ ܐܲܝܟ݂ ܗܵܘ ܕܲܡܕܲܚܵܠܘ ܡܕܲܚܸܠ ܐ̄ܢܵܐ ܠܟ݂ܘܿܢ ܒܐܸܓ݁ܪ̈ܵܬ݂ܝ.

¹⁰ܡܛܠ ܕܐܝܼܬ݂ ܐ̄ܢܵܫܵܐ ܕܐܵܡܪܝܼܢ. ܕܐܸܓ݁ܪ̈ܵܬ݂ܵܐ ܝܲܩܝܼܪ̈ܵܢ ܘܚܲܣܝܼ̈ܢܵܢ. ܡܹܐܬ݂ܝܹܗ ܕܹܝܢ ܕܓ݂ܘܼܫܡܵܐ ܟܪܝܼܗ. ܘܡܸܠܬܹܗ ܫܝܼܛܵܐ.

¹¹ܐܸܠܵܐ ܗܵܕܹܐ ܢܸܬ݂ܪܲܥܹܐ ܡܲܢ ܕܗܵܟܲܢܵܐ ܐܵܡܲܪ. ܕܐܲܝܟܲܢܵܐ ܕܐܝܼܬܲܝܢ ܒܡܸܠܬ݂ܵܐ ܕܐܸܓܲܪܬܲܢ ܟܲܕ݂ ܪܲܚܝܼܩܝܼܢ ܚ̄ܢܲܢ. ܗܵܟܲܢܵܐ ܐܝܼܬܲܝܢ ܐܵܦ ܡܵܐ ܕܩܲܪܝܼܒ݂ܝܼܢ ܚ̄ܢܲܢ ܒܲܥܒ݂ܵܕ݂ܵܐ.

¹²ܠܵܐ ܓܹܝܪ ܡܲܡܪܚܝܼܢ ܚ̄ܢܲܢ ܕܢܸܚܫܘܼܒ݂ ܐܵܘ ܕܲܢܦܲܚܸܡ ܢܲܦ̮ܫܲܢ ܥܲܡ ܗܵܢܘܿܢ ܕܲܡܫܲܒ݂ܗܪܝܼܢ ܢܲܦ̮ܫܗܘܿܢ. ܐܸܠܵܐ ܡܛܠ ܕܗܸܢܘܿܢ ܒܗܘܿܢ ܠܗܘܿܢ ܡܦܲܚܡܝܼܢ. ܠܵܐ ܡܸܣܬܲܟܠܝܼܢ.

¹³ܚܢܲܢ ܕܹܝܢ ܠܵܐ ܡܸܫܬܲܒ݂ܗܪܝܼܢ ܚ̄ܢܲܢ ܝܲܬܿܝܼܪ ܡܸܢ ܡܫܘܼܚܬܲܢ. ܐܸܠܵܐ ܒܲܡܫܘܼܚܬ݂ܵܐ ܕܲܬ݂ܚܘܼܡܵܐ ܕܲܦܠܲܓ݂ ܠܲܢ ܐܲܠܵܗܵܐ. ܕܢܸܡܛܹܐ ܐܵܦ ܥܕ݂ܲܡܵܐ ܠܘܵܬ݂ܟ݂ܘܿܢ.

¹⁴ܠܵܐ ܗ̄ܘܵܐ ܓܹܝܪ ܐܲܝܟ݂ ܕܠܵܐ ܡܸܬ݂ܡܲܛܹܝܢ ܚ̄ܢܲܢ ܠܘܵܬ݂ܟ݂ܘܿܢ. ܡܵܬ݂ܚܝܼܢ ܚ̄ܢܲܢ ܢܲܦ̮ܫܲܢ. ܥܕ݂ܲܡܵܐ ܓܹܝܪ ܠܘܵܬ݂ܟ݂ܘܿܢ ܡܲܛܝܼܢ ܒܲܣܒܲܪܬܹܗ ܕܲܡܫܝܼܚܵܐ.

¹⁵ܘܠܵܐ ܡܸܫܬܲܒ݂ܗܪܝܼܢ ܚ̄ܢܲܢ ܠܒܲܪ ܡܸܢ ܡܫܘܼܚܬܲܢ ܒܥܲܡܠܵܐ ܕܲܐ̄ܚܪ̈ܵܢܹܐ. ܐܸܠܵܐ ܐܝܼܬ݂ ܠܲܢ ܣܲܒ݂ܪܵܐ. ܕܟܲܕ݂ ܪܵܒ݂ܝܵܐ ܗܲܝܡܵܢܘܼܬ݂ܟ݂ܘܿܢ ܒܟ݂ܘܿܢ. ܢܸܬ݂ܪܵܘܪܲܒ݂ ܐܲܝܟ݂ ܡܫܘܼܚܬܲܢ. ܘܢܸܬ݂ܝܲܬܲܪ

¹⁶ܐܵܦ ܠܗܲܠ ܡܸܢܟ݂ܘܿܢ ܠܲܡܣܲܒܵܪܘܼ. ܠܵܐ ܒܲܡܫܘܼܚܬ݂ܵܐ ܕܲܐ̄ܚܪ̈ܵܢܹܐ: ܒܐܲܝܠܹܝܢ ܕܡܲܬ݂ܩ̈ܢܵܢ ܢܸܫܬܲܒ݂ܗܲܪ.

¹⁷ܗܵܘ ܕܹܝܢ ܕܡܸܫܬܲܒ݂ܗܲܪ. ܒܡܵܪܝܵܐ ܢܸܫܬܲܒ݂ܗܲܪ.

¹⁸ܠܵܐ ܗ̄ܘܵܐ ܓܹܝܪ ܡܲܢ ܕܢܲܦ̮ܫܹܗ ܡܫܲܒܲܚ. ܗܵܘ ܗܘܼ ܒܩܹ̈ܐ. ܐܸܠܵܐ ܡܲܢ ܕܡܵܪܝܵܐ ܢܫܲܒܚܝܼܘܗܝ.