Read Aramaic Peshita 2 Corinthians 12 Bible Online

2 Corinthians 12 - Aramaic Peshita bible

2 Corinthians 12

¹ܠܡܸܫܬܲܒ݂ܗܵܪܘܼ ܘܵܠܹܐ. ܐܸܠܵܐ ܠܵܐ ܦܲܩܵܚ. ܐܵܬܹܐ ܐ̄ܢܵܐ ܠܝܼ ܓܹܝܪ ܠܚܸܙܘܵܢܹ̈ܐ. ܘܲܠܓܸܠܝܵܢܵܘ̈ܗܝ ܕܡܵܪܲܢ.

²ܝܵܕ݂ܲܥ ܐ̄ܢܵܐ ܓܲܒ݂ܪܵܐ ܒܲܡܫܝܼܚܵܐ ܡܸܢ ܩܕ݂ܵܡ ܐܲܪܒܲܥܸܣܪܹ̈ܐ ܫܢ̈ܝܼܢ. ܐܸܢ ܒܲܦܓܲܪ ܕܹܝܢ ܘܐܸܢ ܕܠܵܐ ܦܓܲܪ. ܠܵܐ ܝܵܕܲܥ ܐ̄ܢܵܐ. ܐܲܠܵܗܵܐ ܗܘܼ ܝܵܕܲܥ. ܕܐܸܬ݂ܚܛܸܦ ܗܘܼ ܗܵܢܵܐ ܥܕܲܡܵܐ ܫܡܲܝܵܐ ܕܲܬ݂ܠܵܬ݂ܵܐ (ܠܬ݂ܘܼܠܬ݂ܵܐ ܕܲܫܡܲܝܵܐ).

³ܘܝܵܕ݂ܲܥ ܐ̄ܢܵܐ ܠܹܗ ܠܗܵܢܵܐ ܒܲܪܢܵܫܵܐ. ܐܸܢ ܒܲܦܓܲܪ ܕܹܝܢ ܘܐܸܢ ܕܠܵܐ ܦܓܲܪ. ܠܵܐ ܝܵܕ݂ܲܥ ܐ̄ܢܵܐ. ܐܲܠܵܗܵܐ ܗܘܼ ܝܵܕ݂ܲܥ.

⁴ܕܐܸܬ݂ܚܛܸܦ ܠܦܲܪܕܲܝܣܵܐ. ܘܲܫܡܲܥ ܡܸܠܹ̈ܐ ܕܠܵܐ ܡܸܬ݂ܡܲܠܠܵܢ. ܐܲܝܠܹܝܢ ܕܠܵܐ ܫܲܠܝܼܛ ܠܒܲܪܢܵܫܵܐ ܠܲܡܡܲܠܵܠܘ ܐܸܢܹܝܢ.

⁵ܥܲܠ ܗܵܢܵܐ ܐܸܫܬܲܒ݂ܗܲܪ. ܥܲܠ ܢܲܦ̮ܫܝ ܕܹܝܢ ܠܵܐ ܐܸܫܬܲܒ݂ܗܲܪ. ܐܸܠܵܐ ܐܸܢ ܒܟ݂ܘܼܪ̈ܗܵܢܹܐ.

⁶ܐܸܢ ܐܸܨܒܹܐ ܓܹܝܪ ܕܐܸܫܬܲܒ݂ܗܲܪ. ܠܵܐ ܗܵܘܹܐ ܐ̄ܢܵܐ ܫܵܛܝܵܐ. ܫܪܵܪܵܐ ܗܘܼ ܓܹܝܪ ܐܵܡܲܪ ܐ̄ܢܵܐ. ܚܵܐܹܣ ܐ̄ܢܵܐ ܕܹܝܢ. ܕܲܠܡܵܐ ܐ̄ܢܵܫ ܢܸܬ݂ܪܲܥܹܐ ܥܠܲܝ ܝܲܬܿܝܼܪ ܡܸܢ ܡܵܐ ܕܚܵܙܹܐ ܠܝܼ. ܘܲܕ݂ܫܵܡܲܥ ܡܹܢܝ.

⁷ܘܲܕ݂ܠܵܐ ܐܸܬ݁ܬ݁ܪܝܼܡ ܒܝܲܬܝܼܪܘܼܬ݂ܵܐ ܕܓܸܠܝܵܢܹ̈ܐ. ܐܸܫܬܿܠܸܡ ܠܝܼ ܫܦܵܝܵܐ ܠܒܸܣܪܝ. ܡܲܠܲܐܟܹܗ ܕܣܵܛܵܢܵܐ. ܕܢܸܗܘܹܐ ܡܩܲܦܲܚ ܠܝܼ ܕܠܵܐ ܐܸܬ݁ܬ݁ܪܝܼܡ.

⁸ܘܥܲܠ ܗܵܢܵܐ ܬܿܠܵܬ݂ ܙܲܒ݂ܢ̈ܝܼܢ ܒܥܹܝܬ݂ ܡܸܢ ܡܵܪܝ ܕܢܲܦܪܸܩ ܡܹܢܝ.

⁹ܘܐܸܡܲܪ ܠܝܼ ܣܵܦܩܵܐ ܠܵܟ݂ ܛܲܝܒܘܼܬ݂ܝ. ܚܲܝܠܝ ܓܹܝܪ ܒܲܟ݂ܪܝܼܗܘܼܬ݂ܵܐ ܗܘܼ ܡܸܬ݂ܓ݁ܡܲܪ. ܚܵܕ݂ܝܵܐܝܼܬ݂ ܗܵܟܹܝܠ ܐܸܫܬܲܒ݂ܗܲܪ ܒܟ݂ܘܼܪ̈ܗܵܢܲܝ. ܕܢܲܓܸ݁ܢ ܥܠܲܝ ܚܲܝܠܹܗ ܕܲܡܫܝܼܚܵܐ.

¹⁰ܡܛܠ ܗܵܢܵܐ ܨܵܒܹܐ ܐ̄ܢܵܐ ܒܟ݂ܘܼܪ̈ܗܵܢܹܐ. ܒܨܲܥܪܵܐ. ܒܐܘܼܠܨܵܢܹ̈ܐ. ܒܲܪܕ݂ܘܼܦܝܵܐ. ܒܲܚܒ݂ܘܼܫܝܵܐ ܕܥܲܠ ܐܲܦܲܝ̈ ܡܫܝܼܚܵܐ. ܐܸܡܲܬ݂ܝ ܕܲܟ݂ܪܝܼܗ ܐ̄ܢܵܐ ܓܹܝܪ. ܗܵܝܕܹܝܢ ܗܘܼ ܚܲܝܠܬ݂ܵܢ ܐ̄ܢܵܐ.

¹¹ܗܵܐ ܗ̄ܘܹܝܬ݂ ܚܲܣܝܼܪ ܪܸܥܝܵܢܵܐ ܒܫܘܼܒ݂ܗܵܪܝ. ܕܐܲܢ̄ܬܿܘܿܢ ܐܲܠܲܨܬܿܘܿܢܵܢܝ. ܚܲܝܵܒ݂ܝܼܢ ܗܘܲܝܬܿܘܿܢ ܓܹܝܪ. ܕܐܲܢ̄ܬܿܘܿܢ ܬܲܣܗܕ݂ܘܼܢ ܥܠܲܝ. ܡܛܠ ܕܠܵܐ ܒܲܨܪܹܬ݂ ܡܸܕܸܡ ܡܸܢ ܫܠܝܼܚܹ̈ܐ. ܐܲܝܠܹܝܢ ܕܛܵܒ݂ ܡܝܲܬܿܪܝܼܢ. ܘܐܵܦܸܢ ܠܵܐ ܗ̄ܘܹܝܬ݂ ܡܸܕܸܡ.

¹²ܐܵܬ݂̈ܘܵܬ݂ܵܐ ܕܲܫܠܝܼܚܹ̈ܐ ܥܸܒ݂ܕܹܬ݂ ܒܲܝܢܵܬ݂ܟ݂ܘܿܢ. ܒܟ݂ܠ ܡܣܲܝܒܪܵܢܘܼ. ܘܒܲܓ݂ܒܲܪ̈ܘܵܬ݂ܵܐ. ܘܲܒ݂ܬܸܕ݂ܡܪ̈ܵܬ݂ܵܐ. ܘܲܒ݂ܚܲܝ̈ܠܹܐ.

¹³ܒܡܵܢܵܐ ܓܹܝܪ ܐܸܬ݂ܒܲܨܲܪܬܿܘܿܢ ܡܸܢ ܥܹ̈ܕܵܬܵܐ ܐ̄ܚܪ̈ܵܢܝܵܬ݂ܵܐ. ܐܸܠܵܐ ܐܸܢ ܒܗܵܕܹܐ ܕܐܸܢܵܐ ܠܵܐ ܝܸܩܪܹܬ݂ ܥܠܲܝܟܿܘܿܢ. ܫܒ݂ܘܿܩܘ ܠܝܼ ܗܵܕܹܐ ܣܲܟ݂ܠܘܼܬ݂ܵܐ.

¹⁴ܗܵܐ ܗܵܕܹܐ ܕܲܬ݂ܠܵܬ݂ ܗ̄ܝܼ ܙܲܒ݂ܢ̈ܝܼܢ ܕܲܡܛܲܝܲܒ݂ ܐ̄ܢܵܐ ܕܐܹܬܹܐ ܠܘܵܬ݂ܟ݂ܘܿܢ. ܘܠܵܐ ܐܹܩܲܪ ܥܠܲܝܟܿܘܿܢ. ܡܛܠ ܕܠܵܐ ܒܵܥܹܐ ܐ̄ܢܵܐ ܕܝܼܠܟ݂ܘܿܢ. ܐܸܠܵܐ ܠܟ݂ܘܿܢ. ܠܵܐ ܓܹܝܪ ܚܲܝܵܒ݂ܝܼܢ ܒ̈ܢܲܝܵܐ ܠܲܡܣܵܡ ܣܝܼ̈ܡܵܬ݂ܵܐ ܠܐܲܒ݂ܵܗܹ̈ܐ. ܐܸܠܵܐ ܐܲܒ݂ܵܗܹ̈ܐ ܠܲܒ݂ܢܲܝ̈ܗܘܿܢ.

¹⁵ܐܸܢܵܐ ܕܹܝܢ ܚܵܕ݂ܝܵܐܝܼܬ݂ ܘܢܲܦ̈ܩܵܬ݂ܵܐ ܐܲܦܸܩ. ܘܐܵܦ ܩܢܘܿܡܝ ܐܸܬܸܿܠ ܥܲܠ ܐܲܦܲܝ̈ ܢܲܦ̮ܫܵܬ݂ܟ݂̈ܘܿܢ. ܐܵܦܸܢ ܟܲܕ݂ ܝܲܬܝܼܪܵܐܝܼܬ݂ ܡܲܚܸܒ݂ ܐ̄ܢܵܐ ܠܟ݂ܘܿܢ. ܐܲܢ̄ܬܿܘܿܢ ܒܨܝܼܪܵܐܝܼܬ݂ ܡܲܚܒ݂ܝܼܢ ܐ̄ܢܬܘܿܢ ܠܝܼ.

¹⁶ܘܲܟ݂ܒܲܪ ܐܸܢܵܐ ܠܵܐ ܝܸܩܪܸܬ݂ ܥܠܲܝܟܿܘܿܢ. ܐܸܠܵܐ ܐܲܝܟ݂ ܓܲܒ݂ܪܵܐ ܚܵܪܥܵܐ. ܒܢܸܟ݂ܠܵܐ ܓܢܲܒ݂ܬܿܟ݂ܘܿܢ.

¹⁷ܠܡܵܐ ܒܝܲܕ݂ ܐ̄ܢܵܫ ܐ̄ܚܪܹܝܢ ܕܫܲܕܪܹܬ݂ ܠܘܵܬ݂ܟ݂ܘܿܢ. ܐܸܬ݂ܝܲܥܢܹܬ݂ ܥܠܲܝܟܿܘܿܢ.

¹⁸ܡܸܢ ܛܸܛܘܿܣ ܒܥܹܝܬ݂. ܘܫܲܕܪܹܬ݂ ܥܲܡܹܗ ܠܐܲܚܹ̈ܐ. ܠܡܵܐ ܡܸܕܸܡ ܐܸܬ݂ܝܲܥܲܢ ܥܠܲܝܟܿܘܿܢ ܛܸܛܘܿܣ. ܠܵܘ ܒܲܚܕ݂ܵܐ ܪܘܼܚܵܐ ܗܲܠܸܟ݂ܢ. ܘܲܒ݂ܗܹܝܢ ܒܥܸܩ̈ܒ݂ܵܬ݂ܵܐ.

¹⁹ܠܡܵܐ ܬܘܼܒ݂ ܣܵܒ݂ܪܝܼܢ ܐ̄ܢܬܘܿܢ ܕܲܠܟ݂ܘܿܢ ܢܵܦܩܝܼܢ ܚ̄ܢܲܢ ܪܘܼܚܵܐ. ܩܕ݂ܵܡ ܐܲܠܵܗܵܐ ܒܲܡܫܝܼܚܵܐ ܡܡܲܠܠܝܼܢ ܚ̄ܢܲܢ. ܘܟܠܗܹܝܢ ܚܲܒܝܼܒܲܝ̈. ܡܛܠ ܒܸܢܝܵܢܵܐ ܗܘܼ ܕܝܼܠܟ݂ܘܿܢ.

²⁰ܕܵܚܹܠ ܐ̄ܢܵܐ ܓܹܝܪ ܕܲܠܡܵܐ ܐܹܬܹܐ ܠܘܵܬ݂ܟ݂ܘܿܢ. ܘܠܵܐ ܐܸܫܟܲܚܟ݂ܘܿܢ ܐܲܝܟ݂ ܕܨܵܒܹܐ ܐ̄ܢܵܐ. ܘܐܸܫܬܿܟܲܚ ܠܟ݂ܘܿܢ ܐܵܦ ܐܸܢܵܐ ܐܲܝܟ݂ ܡܵܐ ܕܠܵܐ ܨܵܒܹܝܢ ܐ̄ܢܬܿܘܢ. ܕܲܠܡܵܐ ܚܸܪܝܵܢܵܐ. ܘܲܚܣܵܡܵܐ. ܘܚܸܡܬ݂ܵܐ. ܘܥܸܨܝܵܢܵܐ. ܘܡܹܐܟܲܠܩܲܪܨܵܐ. ܘܪܸܛܢܵܐ. ܘܲܚܬ݂ܝܼܪܘܼܬ݂ܵܐ. ܘܲܫܓ݂ܘܼܫܝܵܐ.

²¹ܕܲܠܡܵܐ ܟܲܕ݂ ܐܹܬܹܐ ܠܘܵܬ݂ܟ݂ܘܿܢ. ܢܡܲܟܟܲܢܝ ܐܲܠܵܗܝ. ܘܐܸܬ݂ܐܒܸܠ ܥܲܠ ܣܲܓܝܼ̈ܐܹܐ ܐܲܝܠܹܝܢ ܕܲܚܛܵܘ ܘܠܵܐ ܬܵܒ݂ܘ. ܡܸܢ ܛܲܢܦܘܼܬ݂ܵܐ. ܘܡܸܢ ܙܵܢܝܘܼܬ݂ܵܐ. ܘܡܸܢ ܦܲܚܙܘܼܬ݂ܵܐ. ܕܲܥܒܲܕ݂ܘ.