Read Aramaic Peshita 2 Corinthians 13 Bible Online

2 Corinthians 13 - Aramaic Peshita bible

2 Corinthians 13

¹ܗܵܕܹܐ ܕܲܬ݂ܠܵܬ݂ ܗ̄ܝܼ ܙܲܒ݂ܢ̈ܝܼܢ ܕܐܵܬܹܐ ܐ̄ܢܵܐ ܠܘܵܬ݂ܟ݂ܘܿܢ. ܕܥܲܠ ܦܘܼܡ ܬܪܹܝܢ ܘܲܬ݂ܠܵܬ݂ܵܐ ܣܵܗܕܝܼ̈ܢ ܬܿܩܘܼܡ ܟܠ ܡܸܠܵܐ.

²ܡܸܢ ܩܕ݂ܝܼܡ ܐܸܡܪܹܬ݂ ܗ̄ܘܹܝܬ݂ ܠܟ݂ܘܿܢ. ܘܬ݂ܘܼܒ݂ ܡܩܲܕܸܡ ܐ̄ܢܵܐ ܐܵܡܲܪ ܐ̄ܢܵܐ ܠܟ݂ܘܿܢ. ܐܲܝܟ݂ ܕܐܵܦ ܬܲܪܬܹܿܝܢ ܙܲܒ݂ܢ̈ܝܼܢ ܕܲܗܘܹܝܬ݂ ܠܘܵܬ݂ܟ݂ܘܿܢ ܐܸܡܪܹܬ݂ ܠܟ݂ܘܿܢ. ܘܐܵܦ ܗܵܫܵܐ ܟܲܕ݂ ܪܲܚܝܼܩ ܐ̄ܢܵܐ ܟܵܬܹܒ݂ ܐ̄ܢܵܐ. ܠܗܵܠܹܝܢ ܕܲܚܛܵܘ. ܘܲܠܫܲܪܟܵܐ ܕܲܐ̄ܚܪ̈ܵܢܹܐ. ܕܐܸܢ ܐܹܬܹܐ ܬܘܼܒ݂. ܠܵܐ ܐܹܚܘܼܣ.

³ܡܛܠ ܕܒ݂ܘܼܩܝܵܐ ܒܵܥܹܝܢ ܐ̄ܢܬܿܘܢ ܕܲܡܫܝܼܚܵܐ ܕܲܡܡܲܠܸܠ ܒܝܼ. ܗܵܘ ܕܠܵܐ ܗܘܵܐ ܡܚܝܼܠ ܒܟ݂ܘܿܢ. ܐܸܠܵܐ ܚܲܝܠܬ݂ܵܢ ܗܘܼ ܒܟ݂ܘܿܢ.

⁴ܐܵܦܸܢ ܐܸܙܕܩܸܦ ܓܹܝܪ ܒܲܡܚܝܼܠܘܼܬ݂ܵܐ. ܐܸܠܵܐ ܚܲܝ ܗܘܼ ܒܚܲܝܠܵܐ ܕܐܲܠܵܗܵܐ. ܘܐܵܦ ܚܢܲܢ ܡܚܝܼܠܝܼܢ ܚ̄ܢܲܢ ܥܲܡܹܗ. ܐܸܠܵܐ ܚܲܝܝܼܢ ܚ̱ܢܲܢ ܥܲܡܹܗ ܒܚܲܝܠܵܐ ܕܐܲܠܵܗܵܐ ܕܲܒ݂ܟ݂ܘܿܢ.

⁵ܢܲܦ̮ܫܟ݂ܘܿܢ ܒܩܵܘ. ܐܸܢ ܒܵܗܿ ܒܗܲܝܡܵܢܘܼܬ݂ܵܐ ܩܵܝܡܝܼܢ ܐܢ̄ܬܘܿܢ. ܢܲܦ̮ܫܟ݂ܘܿܢ ܐܲܣܵܘ. ܐܵܘ ܠܵܐ ܡܸܫܬܵܘܕܥܝܼܢ ܐ̄ܢܬܿܘܿܢ ܕܝܼܫܘܿܥ ܡܫܝܼܚܵܐ ܒܟ݂ܘܿܢ ܗ̄ܘܼ. ܘܐܸܢ ܠܵܐ ܡܲܣ̈ܠܲܝܵܐ ܐܲܢ̄ܬܘܿܢ.

⁶ܡܣܲܒܲܪ ܐ̄ܢܵܐ ܕܹܝܢ ܕܬܸܕ݂ܥܘܼܢ. ܕܲܚܢܲܢ ܠܵܐ ܗ̄ܘܲܝܢ ܡܲܣܠܹܝܢ.

⁷ܒܵܥܹܐ ܐ̄ܢܵܐ ܕܹܝܢ ܡܸܢ ܐܲܠܵܗܵܐ. ܕܠܵܐ ܢܸܗܘܹܐ ܒܟ݂ܘܿܢ ܡܸܕܸܡ ܕܒ݂ܝܼܫ. ܐܲܝܟ݂ ܕܒ݂ܘܼܩܝܲܢ ܕܝܼܠܲܢ ܢܸܬ݂ܚܙܹܐ. ܐܸܠܵܐ ܕܐܲܢ̄ܬܿܘܿܢ ܬܸܗܘܘܿܢ ܣܵܥܪܝܼܢ ܛܵܒ݂ܵܬ݂ܵܐ: ܘܲܚܢܲܢ ܢܸܗܘܹܐ ܐܲܝܟ݂ ܡܲܣ̈ܠܲܝܵܐ.

⁸ܠܵܐ ܓܹܝܪ ܡܸܫܟܿܚܝܼܢ ܚ̄ܢܲܢ ܕܢܸܥܒܸܕ݂ ܡܸܕܸܡ ܠܘܼܩܒܲܠ ܩܘܼܫܬܵܐ. ܐܸܠܵܐ ܚܠܵܦ ܩܘܼܫܬܵܐ.

⁹ܚܵܕܹܝܢ ܚ̄ܢܲܢ ܕܹܝܢ ܡܵܐ ܕܲܚܢܲܢ ܟܪܝܼܗܝܼܢ. ܘܐܲܢ̄ܬܿܘܿܢ ܚܲܝܠܬ݂ܵܢܝܼܢ. ܗܵܕܹܐ ܓܹܝܪ ܐܵܦ ܡܨܲܠܹܝܢ ܚ̄ܢܲܢ. ܕܐܲܢ̄ܬܿܘܿܢ ܬܸܬܿܓܲܡܪܘܼܢ.

¹⁰ܡܛܠ ܗܵܢܵܐ ܟܲܕ݂ ܪܲܚܝܼܩ ܐ̄ܢܵܐ ܗܵܠܹܝܢ ܟܵܬܹܒ݂ ܐ̄ܢܵܐ. ܕܠܵܐ ܡܵܐ ܕܐܸܬܹܝܬ݂ ܩܲܫܝܵܐܝܼܬ݂ ܐܸܣܥܘܿܪ ܐܲܝܟ݂ ܫܘܼܠܛܵܢܵܐ ܕܝܲܗ̄ܒ݂ ܠܝܼ ܡܵܪܝ. ܠܒܸܢܝܵܢܟ݂ܘܿܢ ܘܠܵܐ ܠܣܘܼܚܵܦܟ݂ܘܿܢ.

¹¹ܡܸܟܹܝܠ ܐܲܚܲܝ̈. ܚܕ݂ܵܘ ܘܐܸܬ݂ܓܲܡ̱ܪܘ. ܘܐܸܬ݂ܒܲܝܲܐܘ. ܘܐܵܘܝܘܼܬ݂ܵܐ ܘܫܲܝܢܵܐ ܢܸܗܘܹܐ ܒܟ݂ܘܿܢ. ܘܐܲܠܵܗܵܐ ܕܚܘܼܒܵܐ ܘܲܕ݂ܫܲܠܡܘܼܬ݂ܵܐ ܢܸܗܘܹܐ ܥܲܡܟ݂ܘܿܢ.

¹²ܫܲܐܸܠܘ ܒܲܫܠܵܡܵܐ ܚܲܕ݂ ܕܚܲܕ݂ ܒܢܘܼܫܩܬܵܐ ܩܲܕܝܼܫܬܵܐ.

¹³ܫܵܐܠܝܼܢ ܒܲܫܠܵܡܟ݂ܘܿܢ ܟܠܗܘܿܢ ܩܲܕܝܼܫܹ̈ܐ.

¹⁴ܫܠܵܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܘܚܘܒܹܗ ܕܐܲܠܵܗܵܐ. ܘܫܵܘܬܵܦܘܼܬ݂ܵܐ ܕܪܘܼܚܵܐ ܕܩܘܼܕ݂ܫܵܐ. ܥܲܡ ܟܠܟ݂ܘܿܢ. ܐܵܡܹܝܢ.