Read Aramaic Peshita 2 Corinthians 4 Bible Online

2 Corinthians 4 - Aramaic Peshita bible

2 Corinthians 4

¹ܡܛܠ ܗܵܢܵܐ ܠܵܐ ܡܵܐ̇ܢܵܐ ܠܲܢ ܒܬܸܫܡܸܫܬܵܐ ܗܵܕܹܐ ܕܐܲܚܝܼܕ݂ܝܼܢ ܚ̄ܢܲܢ. ܐܲܝܟ݂ ܪ̈ܲܚܡܹܐ ܕܲܗܘܵܘ ܥܠܲܝܢ.

²ܐܸܠܵܐ ܐܲܣܠܝܼܢ ܚ̄ܢܲܢ ܟܲܣ̈ܝܵܬ݂ܵܗܿ ܕܒܸܗܬܿܬ݂ܵܐ. ܘܠܵܐ ܡܗܲܠܟ݂ܝܼܢ ܚ̄ܢܲܢ ܒܚܵܪܥܘܬ݂ܵܐ. ܘܠܵܐ ܢܵܟ݂ܠܝܼܢ ܚ̄ܢܲܢ ܡܸܠܬܹܗ ܕܐܲܠܵܗܵܐ. ܐܸܠܵܐ ܒܓܲܠܝܘܼܬ݂ܵܐ ܕܲܫܪܵܪܵܐ ܡܚܵܘܹܝܢ ܚ̄ܢܲܢ ܢܲܦ̮ܫܲܢ. ܠܟ݂ܠܗܘܿܢ ܪܸ̈ܥܝܵܢܹܐ ܕܲܒ݂ܢܲܝ̈ܢܵܫܵܐ ܩܕ݂ܵܡ ܐܲܠܵܗܵܐ.

³ܘܐܸܢ ܕܹܝܢ ܡܟܲܣܲܝ ܗܘܼ ܐܹܘܲܢܓܲܠܝܼܘܿܢ ܕܝܼܠܲܢ. ܠܐܲܝܠܹܝܢ ܕܐܵܒ݂ܕܝܼܢ ܗܘܼ ܡܟܲܣܲܝ.

⁴ܐܲܝܠܹܝܢ ܕܐܲܠܵܗܹܗ ܕܥܵܠܡܵܐ ܗܵܢܵܐ ܥܵܘܲܪ ܡܲܕܥܲܝ̈ܗܘܿܢ ܥܲܠ ܕܠܵܐ ܡܗܲܝܡܢܝܼܢ. ܕܠܵܐ ܢܸܕ݂ܢܲܚ ܠܗܘܿܢ ܢܘܼܗܪܹܗ ܕܐܘܲܢܓܲܠܝܼܘܿܢ ܕܫܘܼܒ݂ܚܹܗ ܕܲܡܫܝܼܚܵܐ. ܕܗܘܝܘܼ ܕܡܘܼܬܹܗ ܕܐܲܠܵܗܵܐ.

⁵ܠܵܐ ܗ̄ܘܵܐ ܓܹܝܪ ܢܲܦ̮ܫܲܢ ܡܲܟ݂ܪܙܝܼܢ ܚ̄ܢܲܢ. ܐܸܠܵܐ ܠܲܡܫܝܼܚܵܐ ܝܼܫܘܿܥ ܡܵܪܲܢ. ܠܢܲܦ̮ܫܲܢ ܕܹܝܢ. ܕܥܲܒ݂ܕܲܝ̈ܟ݁ܘܿܢ ܚܢܲܢ ܡܛܠ ܝܼܫܘܿܥ.

⁶ܡܛܠ ܕܐܲܠܵܗܵܐ ܗܘܼ ܕܐܵܡܲܪ ܕܡܸܢ ܚܸܫܘܿܟ݂ܵܐ ܢܘܼܗܪܵܐ ܢܸܕ݂ܢܲܚ. ܗܘܼ ܕܢܲܚ ܒܠܸܒ̈ܵܘܵܬܲܢ. ܕܢܸܬ݂ܢܲܗܲܪ ܒܝܼܕ݂ܲܥܬ݂ܵܐ ܕܫܘܼܒ݂ܚܹܗ ܕܐܲܠܵܗܵܐ. ܒܦܲܪܨܘܿܦܹܗ ܕܝܼܫܘܿܥ ܡܫܝܼܚܵܐ.

⁷ܐܝܼܬ݂ ܠܲܢ ܕܹܝܢ ܣܝܼܡܬ݂ܵܐ ܗܵܕܹܐ ܒܡܵܐܢܵܐ ܕܚܸܨܦܵܐ. ܕܪܲܒܘܼܬ݂ܵܐ ܕܚܲܝܠܵܐ ܡܸܢ ܐܲܠܵܗܵܐ ܬܸܗܘܹܐ. ܘܠܵܐ ܡܸܢܲܢ.

⁸ܒܟ݂ܠܡܸܕܸܡ ܓܹܝܪ (ܕܹܝܢ) ܡܸܬ݂ܐܲܠܨܝܼܢ ܚ̄ܢܲܢ ܐܸܠܵܐ ܠܵܐ ܡܸܬ݂ܚܲܢܩܝܼܢ ܚ̄ܢܲܢ. ܡܸܬܿܛܲܪܦܝܼܢ ܚ̄ܢܲܢ ܐܸܠܵܐ ܠܵܐ ܚܵܝܒ̇ܝܼܢ ܚ̄ܢܲܢ.

⁹ܡܸܬ݂ܪܲܕ݂ܦܝܼܢ ܚ̄ܢܲܢ ܐܸܠܵܐ ܠܵܐ ܡܸܫܬܲܒ݂ܩܝܼܢ ܚ̄ܢܲܢ. ܡܸܣܬܲܚܦܝܼܢ ܚ̄ܢܲܢ ܐܸܠܵܐ ܠܵܐ ܐܵܒ݂ܕܝܼܢ ܚ̄ܢܲܢ.

¹⁰ܒܟ݂ܠܙܒܲܢ (ܒܟ݂ܠܙܒܲܢ ܓܹܝܪ) ܡܝܼܬ݂ܘܼܬܹܗ ܕܝܼܫܘܿܥ ܒܦܲܓ݂ܪ̈ܲܝܢ ܫܩܝܼܠܝܼܢ ܚ̄ܢܲܢ. ܕܐܵܦ ܚܲܝܵܘ̈ܗܝ ܕܝܼܫܘܿܥ ܒܦܲܓ݂ܪ̈ܲܝܢ ܢܸܬ݂ܓ݁ܠܘܿܢ.

¹¹ܐܸܢ ܚܢܲܢ ܓܹܝܪ ܚܲܝܹ̈ܐ ܠܡܵܘܬܵܐ ܡܸܫܬܲܠܡܝܼܢ ܚ̄ܢܲܢ. ܡܛܠ ܝܼܫܘܿܥ. ܗܵܟܲܢܵܐ ܐܵܦ ܚܲܝܵܘ̈ܗܝ ܕܝܼܫܘܿܥ ܢܸܬ݂ܓ݁ܠܘܿܢ ܒܦܲܓ݂ܪܲܢ ܗܵܢܵܐ ܕܡܵܐܹܬ݂.

¹²ܗܵܫܵܐ ܡܵܘܬܵܐ ܒܲܢ ܡܸܬ݂ܚܲܦܲܛ. ܘܚܲܝܹ̈ܐ ܒܟ݂ܘܿܢ.

¹³ܐܵܦ ܚܢܲܢ ܗܵܟܹܝܠ ܕܲܚܕ݂ܵܐ ܗܝܼ ܪܘܼܚܵܐܕܗܲܝܡܵܢܘܼܬ݂ܵܐ ܐܝܼܬ݂ ܠܲܢ. ܐܲܝܟ݂ ܕܲܟ݂ܬ݂ܝܼܒ݂. ܕܗܲܝܡܢܹܬ݂. ܡܛܠ ܗܵܢܵܐ ܐܵܦ ܡܲܠܠܹܬ݂. ܡܗܲܝܡܢܝܼܢ ܚ̄ܢܲܢ. ܡܛܠ ܗܵܢܵܐ ܐܵܦ ܡܡܲܠܠܝܼܢ ܚ̄ܢܲܢ.

¹⁴ܘܝܵܕ݂ܥܝܼܢ ܚ̄ܢܲܢ ܕܗܵܘ ܡܲܢ ܕܐܲܩܝܼܡ ܠܡܵܪܲܢ ܝܼܫܘܿܥ. ܐܵܦ ܠܲܢ ܒܝܲܕ݂ ܝܼܫܘܿܥ ܢܩܝܼܡ. ܘܲܢܩܲܪܒܲܢ ܥܲܡܟ݂ܘܿܢ ܠܘܵܬܹܗ.

¹⁵ܟܠܡܸܕܸܡ ܓܹܝܪ ܡܛܠܵܬ݂ܟ݂ܘܿܢ ܗ̄ܘܼ. ܕܟܲܕ݂ ܡܸܬ݂ܝܲܬܿܪܵܐ ܛܲܝܒܘܼܬ݂ܵܐ ܒܝܲܕ݂ ܣܲܓܝܼ̈ܐܹܐ. ܬܸܣܓܹ݁ܐ ܬܵܘܕܝܼܬ݂ܵܐ ܠܫܘܼܒ݂ܚܹܗ ܕܐܲܠܵܗܵܐ.

¹⁶ܡܛܠ ܗܵܢܵܐ ܠܵܐ ܡܵܐ̇ܢܵܐ ܠܲܢ. ܐܵܦ ܐܸܢ ܒܲܪܢܵܫܲܢ ܓܹܝܪ ܒܲܪܵܝܵܐ ܡܸܬ݂ܚܲܒܲܠ. ܐܸܠܵܐ ܕܡܸܢ ܠܓ݂ܵܘ ܡܸܬ݂ܚܲܕܲܬ݂ ܝܘܿܡ ܡܸܢ ܝܘܿܡ.

¹⁷ܐܘܼܠܨܵܢܹܗ ܓܹܝܪ ܕܙܲܒ݂ܢܵܐ ܗܵܢܵܐ. ܟܲܕ݂ ܛܵܒ݂ ܙܥܘܿܪ ܘܩܲܠܝܼܠ. ܫܘܼܒ݂ܚܵܐ ܪܲܒܵܐ ܕܠܵܐ ܣܵܟ݂ܵܐ ܠܥܵܠܲܡ ܥܵܠܡܝܼܢ ܡܛܲܝܸܒ݂ ܠܲܢ.

¹⁸ܕܠܵܐ ܚܵܕܹܝܢ ܚ̄ܢܲܢ ܒܗܵܠܹܝܢ ܕܡܸܬ݂ܚܲܙ̈ܝܵܢ. ܐܸܠܵܐ ܒܗܵܠܹܝܢ ܕܠܵܐ ܡܸܬ݂ܚܲܙ̈ܝܵܢ. ܕܡܸܬ݂ܚܲܙ̈ܝܵܢ ܓܹܝܪ ܕܙܲܒ݂ܢܵܐ ܐܸܢܹܝܢ. ܕܠܵܐ ܡܸܬ݂ܚܲܙ̈ܝܵܢ ܕܹܝܢ ܕܲܠܥܵܠܲܡ ܐܸܢܹܝܢ.