Read Aramaic Peshita 2 Corinthians 5 Bible Online

2 Corinthians 5 - Aramaic Peshita bible

2 Corinthians 5

¹ܝܵܕ݂ܥܝܼܢ ܚ̄ܢܲܢ ܓܹܝܪ ܕܐܸܢ ܒܲܝܬܲܢ ܕܒܲܐܪܥܵܐ ܗܵܢܵܐ ܕܦܲܓ݂ܪܵܐ ܢܸܫܬܿܪܹܐ. ܐܸܠܵܐ ܐܝܼܬ݂ ܠܲܢ ܒܸܢܝܵܢܵܐ ܕܡܸܢ ܐܲܠܵܗܵܐ. ܒܲܝܬܵܐ ܕܠܵܐ ܒܲܥܒ݂ܵܕ݂ ܐܝܼ̈ܕ݂ܲܝܵܐ ܒܲܫܡܲܝܵܐ ܠܥܵܠܲܡ.

²ܐܵܦ ܥܲܠ ܗܵܕܹܐ ܓܹܝܪ ܡܸܬܿܬܲܢܚܝܼܢ ܚ̄ܢܲܢ. ܘܲܣܘܹܝܢ ܚ̄ܢܲܢ ܕܢܸܠܒܲܫ ܒܲܝܬܲܢ ܕܡܸܢ ܫܡܲܝܵܐ.

³ܐܸܠܵܐ ܐܵܦ ܡܵܐ ܕܲܠܒܸܫܢ ܢܸܫܬܿܟܲܚ ܠܲܢ ܥܲܪܛܸܠ.

⁴ܟܲܕ݂ ܐܝܼܬܲܝܢ ܓܹܝܪ ܗܵܫܵܐ ܒܗܵܢܵܐ ܒܲܝܬܵܐ. ܡܸܬܿܬܲܢܚܝܼܢ ܚ̄ܢܲܢ ܡܸܢ ܝܘܼܩܪܹܗ. ܘܠܵܐ ܨܵܒܹܝܢ ܚ̄ܢܲܢ ܠܡܸܫܠܚܹܗ. ܐܸܠܵܐ ܕܢܸܠܒܲܫ ܠܥܸܠ ܡܸܢܹܗ. ܕܬܸܬ݂ܒܠܲܥ ܡܝܼܬ݂ܘܼܬܹܗ ܒܚܲܝܹ̈ܐ.

⁵ܘܕ݂ܲܡܥܲܬܸܿܕ݂ ܠܲܢ ܠܵܗܿ ܠܗܵܕܹܐ. ܐܲܠܵܗܵܐ ܗܘܼ. ܗܵܘ ܕܝܲܗ̄ܒ݂ ܠܲܢ ܪܲܗܒ݂ܘܿܢܵܐ ܕܪܘܼܚܹܗ.

⁶ܡܛܠ ܕܝܵܕ݂ܥܝܼܢ ܚ̄ܢܲܢ ܗܵܟܹܝܠ ܘܲܡܦܵܣܝܼܢ ܚ̄ܢܲܢ: ܕܲܟ݂ܡܵܐ ܕܲܒ݂ܦܲܓ݂ܪܵܐ ܫܪܹܝܢ ܚ̄ܢܲܢ ܥܲܢܝܼܕ݂ܝܼܢ ܚ̄ܢܲܢ ܡܸܢ ܡܵܪܲܢ.

⁷ܒܗܲܝܡܵܢܘܼܬ݂ܵܐ ܗܘܼ ܓܹܝܪ ܡܗܲܠܟ݂ܝܼܢ ܚ̄ܢܲܢ ܘܠܵܐ ܒܲܚܙܵܝܵܐ.

⁸ܡܛܠ ܗܵܢܵܐ ܬܿܟ݂ܝܼܠܝܼܢ ܚ̄ܢܲܢ ܘܲܡܣܵܘܚܝܼܢ ܚ̄ܢܲܢ. ܕܢܸܥܢܲܕ݂ ܡܸܢ ܦܲܓ݂ܪܵܐ. ܘܢܸܗܘܹܐ ܠܘܵܬ݂ ܡܵܪܲܢ.

⁹ܘܡܸܬ݂ܚܲܦܛܝܼܢ ܚ̄ܢܲܢ ܕܐܸܢ ܥܵܢܘܿܕܹ̈ܐ ܚܢܲܢ ܘܐܸܢ ܥܵܡܘܪܹ̈ܐ. ܠܹܗ ܗܘܲܝܢ ܫܵܦܪܝܼܢ.

¹⁰ܟܠܲܢ ܓܹܝܪ ܥܬ݂ܝܼܕ݂ܝܼܢ ܚ̄ܢܲܢ ܠܲܡܩܵܡ ܩܕ݂ܵܡ ܒܹܝܡ ܕܲܡܫܝܼܚܵܐ. ܕܢܸܬ݂ܦܪܲܥ ܐ̄ܢܵܫ ܐ̄ܢܵܫ ܒܦܲܓ݂ܪܹܗ ܡܸܕܸܡ ܕܲܥܒ݂ܝܼܕ݂ ܠܹܗ. ܐܸܢ ܕܛܵܒ݂ ܘܐܸܢ ܕܒ݂ܝܼܫ.

¹¹ܡܛܠ ܕܝܵܕ݂ܥܝܼܢ ܚ̄ܢܲܢ ܗܵܟܹܝܠ ܕܸܚܠܬܹܗ ܕܡܵܪܲܢ. ܠܲܒ̣ܢܲܝ̈ܢܵܫܵܐ ܗܘܼ ܡܦܝܼܣܝܼܢ ܚ̄ܢܲܢ. ܠܐܲܠܵܗܵܐ ܕܹܝܢ ܓܠܹܝܢ ܚ̄ܢܲܢ. ܣܵܒܲܪ ܐ̄ܢܵܐ ܕܹܝܢ ܕܐܵܦ ܠܡܲܕܥܲܝ̈ܟ݁ܘܿܢ ܕܝܼܠܟ݂ܘܿܢ ܓܠܹܝܢ ܚ̄ܢܲܢ.

¹²ܠܵܐ ܗ̄ܘܵܐ ܬܘܼܒ݂ ܢܲܦ̮ܫܲܢ ܡܫܲܒܚܝܼܢ ܚ̄ܢܲܢ ܠܟ݂ܘܿܢ. ܐܸܠܵܐ ܥܸܠܬ݂ܵܐ ܗܘܼ ܝܵܗܒܝܼܢ ܚ̄ܢܲܢ ܠܟ݂ܘܿܢ. ܕܲܗܘܲܝܬܿܘܿܢ ܡܸܫܬܲܒ݂ܗܪܝܼܢ ܒܲܢ. ܠܘܵܬ݂ ܗܵܢܘܿܢ ܕܒܲܐܦܹ̈ܐ ܗ̄ܘܼ ܡܸܫܬܲܒ݂ܗܪܝܼܢ. ܘܠܵܐ ܒܠܸܒܵܐ.

¹³ܐܸܢ ܓܹܝܪ ܫܵܛܹܝܢ ܚ̄ܢܲܢ. ܠܐܲܠܵܗܵܐ. ܘܐܸܢ ܬܲܩܢܝܼܢ ܚ̄ܢܲܢ. ܠܟ݂ܘܿܢ.

¹⁴ܚܘܼܒܹܗ ܓܹܝܪ ܕܲܡܫܝܼܚܵܐ ܐܵܠܹܨ ܠܲܢ. ܕܪܵܢܹܝܢ ܚ̄ܢܲܢ ܗܵܕܹܐ. ܕܚܲܕ݂ ܚܠܵܦ ܟܠܢܵܫ ܡܝܼܬ݂. ܡܵܕܹܝܢ ܟܠܢܵܫ ܡܝܼܬ݂ ܠܹܗ.

¹⁵ܘܲܚܠܵܦ ܟܠܢܵܫ ܗܘܼ ܡܝܼܬ݂. ܕܐܲܝܠܹܝܢ ܕܚܲܝܝܼܢ ܠܵܐ ܠܢܲܦ̮ܫܗܘܿܢ ܢܸܚܘܿܢ. ܐܸܠܵܐ ܠܗܵܘ ܐܲܝܢܵܐ ܕܥܲܠ ܐܲܦܲܝ̈ܗܘܿܢ ܡܝܼܬ݂ ܘܩ̣ܵܡ.

¹⁶ܘܡܸܟܹܝܠ ܚܢܲܢ ܠܐ̄ܢܵܫ ܒܲܦܓܲܪ ܠܵܐ ܝܵܕ݂ܥܝܼܢܲܢ. ܘܐܸܢ ܝܼܕ݂ܲܥܢ ܒܲܦܓܲܪ ܠܲܡܫܝܼܚܵܐ. ܐܸܠܵܐ ܡܸܢ ܗܵܫܵܐ ܠܵܐ ܝܵܕ݂ܥܝܼܢܲܢ.

¹⁷ܟܠܡܲܢ ܕܒܲܡܫܝܼܚܵܐ ܗܘܼ ܗܵܟܹܝܠ. ܒܪܝܼܬ݂ܵܐ ܗܘܼ ܚܕ݂ܲܬ݂ܵܐ. ܥܲܬܿܝܼ̈ܩܵܬ݂ܵܐ ܥܒܲܪ ܠܗܹܝܢ.

¹⁸ܘܟ݂ܠ ܡܸܕܸܡ ܗܘܵܐ ܚܲܕ݂ܬ݂ܵܐ ܡܸܢ ܐܲܠܵܗܵܐ. ܗܵܘ ܕܪܲܥܝܲܢ ܠܹܗ ܒܲܡܫܝܼܚܵܐ. ܘܝܲܗ̄ܒ݂ ܠܲܢ ܬܸܫܡܸܫܬܵܐ ܕܬܲܪܥܘܼܬ݂ܵܐ.

¹⁹ܐܲܠܵܗܵܐ ܗ̄ܘܵܐ ܓܹܝܪ ܒܲܡܫܝܼܚܵܐ. ܗܵܘ ܕܪܲܥܝܼ ܠܥܵܠܡܵܐ ܥܲܡ ܪܲܒܘܼܬܹܗ. ܘܠܵܐ ܚܫܲܒ݂ ܠܗܘܿܢ ܚܛܵܗܲܝ̈ܗܘܿܢ. ܘܣܵܡ ܒܲܢ ܕܝܼܠܲܢ ܡܸܠܬ݂ܵܐ ܕܬܲܪܥܘܼܬ݂ܵܐ.

²⁰ܐܝܼܙܓܲܕܹ̈ܐ ܚܢܲܢ ܗܵܟܹܝܠ ܚܠܵܦ ܡܫܝܼܚܵܐ. ܘܐܲܝܟ݂ ܗܵܘ ܕܐܲܠܵܗܵܐ ܒܵܥܹܐ ܡܸܢܟ݂ܘܿܢ ܒܐܝܼܕ݂ܲܢ. ܚܠܵܦ ܡܫܝܼܚܵܐ ܗܵܟܹܝܠ ܒܵܥܹܝܢ ܚ̄ܢܲܢ. ܐܸܬ݂ܪܲܥܵܘ ܠܐܲܠܵܗܵܐ.

²¹ܗܵܘ ܓܹܝܪ ܕܠܵܐ ܝܵܕ݂ܲܥ ܗ̄ܘܵܐ ܚܛܝܼܬ݂ܵܐ. ܡܛܠܵܬ݂ܟ݂ܘܿܢ ܚܛܝܼܬ݂ܵܐ ܥܲܒ݂ܕܹܗ. ܕܲܚܢܲܢ ܢܸܗܘܹܐ ܒܹܗ ܙܲܕܝܼܩܘܼܬ݂ܵܐ ܕܐܲܠܵܗܵܐ.