Read Aramaic Peshita 2 Corinthians 6 Bible Online

2 Corinthians 6 - Aramaic Peshita bible

2 Corinthians 6

¹ܘܐܲܝܟ݂ ܡܥܲܕܪ̈ܵܢܹܐ. ܒܵܥܹܝܢ ܚ̄ܢܲܢ ܡܸܢܟ݂ܘܿܢ. ܕܠܵܐ ܬܸܣܬܲܪܲܩ ܒܟ݂ܘܿܢ ܛܲܝܒܘܼܬ݂ܵܐ ܕܐܲܠܵܗܵܐ ܕܩܲܒܸܠܬܿܘܿܢ.

²ܐܸܡܲܪ ܓܹܝܪ. ܕܲܒ݂ܙܲܒ݂ܢܵܐ ܡܩܲܒܠܵܐ ܥܢܹܝܬ݂ܵܟ݂. ܘܲܒ݂ܝܵܘܡܵܐ ܕܚܲܝܹ̈ܐ ܥܲܕܲܪܬܵܟ݂. ܗܵܐ ܗܵܫܵܐ ܙܲܒ݂ܢܵܐ ܡܩܲܒܠܵܐ. ܘܗܵܐ ܗܵܫܵܐ ܝܵܘܡܵܐ ܕܚܲܝܹ̈ܐ.

³ܠܡܵܐ ܒܡܸܕܸܡ ܬܸܬܿܠܘܼܢ ܠܐ̄ܢܵܫ ܥܸܠܬ݂ܵܐ ܕܬ݂ܘܼܩܠܬ݂ܵܐ. ܕܠܵܐ ܢܸܗܘܹܐ ܡܘܼܡܵܐ ܒܬܸܫܡܸܫܬܲܢ.

⁴ܐܸܠܵܐ ܒܟ݂ܠ ܡܸܕܸܡ ܢܚܵܘܹܐ ܢܲܦ̮ܫܲܢ. ܕܲܡܫܲܡܫܵܢܹ̈ܐ ܚܢܲܢ ܕܐܲܠܵܗܵܐ. ܒܲܡܣܲܝܒܪܵܢܘܼܬ݂ܵܐ ܣܲܓܝܼܐܬ݂ܵܐ. ܒܐܘܼܠܨܵܢܹ̈ܐ. ܒܐܵܢܲܢܩ̈ܘܿܣ. ܒܲܚܒ݂ܘܼܫ̈ܝܹܐ.

⁵ܒܢܸܓ݂ܕܹ̈ܐ. ܒܐܲܣܘܼܪܹ̈ܐ. ܒܲܫܓ݂ܘܼܫܝܹ̈ܐ. ܒܠܹܐܘܬ݂ܵܐ. ܒܫܲܗܪܵܐ. ܒܨܵܘܡܵܐ.

⁶ܒܕ݂ܲܟ݂ܝܘܼܬ݂ܵܐ. ܒܝܼܕ݂ܲܥܬ݂ܵܐ. ܒܢܲܓ݁ܝܼܪܘܼܬ݂ ܪܘܼܚܵܐ. ܒܒܲܣܝܼܡܘܼܬ݂ܵܐ. ܒܪܘܼܚܵܐ ܕܩܘܼܕ݂ܫܵܐ. ܒܚܘܼܒܵܐ ܕܠܵܐ ܢܸܟ݂ܠܵܐ.

⁷ܒܡܸܠܬ݂ܵܐ ܕܩܘܼܫܬܵܐ. ܒܚܲܝܠܵܐ ܕܐܲܠܵܗܵܐ. ܒܙܲܝܢܵܐ ܕܙܲܕܝܼܩܘܼܬ݂ܵܐ ܕܲܒ݂ܝܲܡܝܼܢܵܐ ܘܲܒ݂ܣܸܡܵܠܵܐ.

⁸ܒܫܘܼܒ݂ܚܵܐ ܘܲܒ݂ܨܲܥܪܵܐ. ܒܩܘܼܠܵܣܵܐ ܘܲܒ݂ܓ݂ܘܢܵܝܵܐ. ܐܲܝܟ݂ ܡܲܛܥܝܵܢܹ̈ܐ. ܘܫܲܪܝܼܪܹ̈ܐ.

⁹ܐܲܝܟ݂ ܠܵܐ ܝܼܕ݂ܝܼܥܹ̈ܐ. ܘܝܼܕ݂ܝܼܥܝܼܢ ܚ̄ܢܲܢ. ܐܲܝܟ݂ ܡܵܝܬܝܼܢ ܚ̄ܢܲܢ. ܘܗܵܐ ܚܲܝܝܼܢ ܚ̄ܢܲܢ. ܐܲܝܟ݂ ܕܡܸܬ݂ܪܕܹܝܢ ܚ̄ܢܲܢ. ܘܠܵܐ ܡܵܝܬܿܝܼܢ ܚ̄ܢܲܢ.

¹⁰ܐܲܝܟ݂ ܕܟܲܪܝܵܐ ܠܲܢ. ܘܲܒܟ݂ܠܙܒܲܢ ܚܵܕܹܝܢ ܚ̄ܢܲܢ. ܐܲܝܟ݂ ܡܸܣܟܹܢܹ̈ܐ. ܘܲܠܣܲܓܝܼ̈ܐܹܐ ܡܲܥܬܿܪܝܼܢ ܚ̄ܢܲܢ. ܐܲܝܟ݂ ܕܡܸܕܸܡ ܠܲܝܬܿ ܠܲܢ. ܘܟ݂ܠܡܸܕܸܡ ܐܲܚܝܼܕ݂ܝܼܢ ܚ̄ܢܲܢ.

¹¹ܦܘܼܡܲܢ ܦܬ݂ܝܼܚ ܗܘܼ ܠܘܵܬ݂ܟ݂ܘܿܢ ܩܘܿܪ̈ܢܬ݂ܵܝܹܐ. ܘܠܸܒܲܢ ܪܘܝܼܚ.

¹²ܠܵܐ ܐܲܠܝܼܨܝܼܢ ܐ̄ܢܬܿܘܿܢ ܒܲܢ. ܐܲܠܝܼܨܝܼ. ܐ̄ܢܬܿܘܢ ܕܹܝܢ ܒܪ̈ܲܚܡܲܝܟ݁ܘܿܢ.

¹³ܐܲܝܟ݂ ܕܠܲܒ̣̈ܢܲܝܵܐ ܕܹܝܢ ܐܵܡܲܪ ܐ̄ܢܵܐ. ܦܘܼܪܥܘܼܢܝ ܚܘܼܒ݂ܠܝ ܕܲܠܘܵܬ݂ܟ݂ܘܿܢ. ܘܪܵܘܲܚܘ ܚܘܼܒܟ݂ܘܿܢ ܠܘܵܬ݂ܝ.

¹⁴ܘܠܵܐ ܬܸܗܘܘܿܢ ܒܢܲܝ̈ ܙܵܘܓܵܐ ܠܐܲܝܠܹܝܢ ܕܠܵܐ ܡܗܲܝܡܢܝܼܢ. ܐܲܝܕ݂ܵܐ ܓܹܝܪ ܫܵܘܬܵܦܘܼܬ݂ܵܐ ܐܝܼܬ݂ ܠܙܲܕܝܼܩܘܼܬ݂ܵܐ ܥܲܡ ܥܵܘܠܵܐ. ܐܵܘ ܐܲܝܢܵܐ ܚܘܼܠܛܵܢܵܐ ܐܝܼܬ݂ ܠܢܲܗܝܼܪܵܐ ܥܲܡ ܚܸܫܘܿܟ݂ܵܐ.

¹⁵ܐܵܘ ܐܲܝܕ݂ܵܐ ܫܲܠܡܘܼܬ݂ܵܐ ܐܝܼܬ݂ ܠܲܡܫܝܼܚܵܐ ܥܲܡ ܣܵܛܵܢܵܐ. ܐܵܘ ܐܲܝܕ݂ܵܐ ܡܢܵܬ݂ܵܐ ܐܝܼܬ݂ ܠܕ݂ܲܡܗܲܝܡܸܢ ܥܲܡ ܕܠܵܐ ܡܗܲܝܡܸܢ.

¹⁶ܐܲܝܕ݂ܵܐ ܕܹܝܢ ܐܵܘܝܘܼܬ݂ܵܐ ܐܝܼܬ݂ ܠܗܲܝܟܠܹܗ ܕܐܲܠܵܗܵܐ ܥܲܡ ܕܫܹܐܕܹ̈ܐ. ܐܲܢ̄ܬܿܘܿܢ ܕܹܝܢ ܗܲܝܟܠܹܗ ܐܲܢ̄ܬܿܘܿܢ ܕܐܲܠܵܗܵܐ ܚܲܝܵܐ. ܐܲܝܟܲܢܵܐ ܕܐܲܡܝܼܪ. ܕܐܸܥܡܲܪ ܒܗܘܿܢ. ܘܐܹܗܲܠܸܟ݂ ܒܗܘܿܢ. ܘܐܸܗܘܹܐ ܐܲܠܵܗܗܘܿܢ. ܘܗܸܢܘܿܢ ܢܸܗܘܘܿܢ ܠܝܼ ܥܲܡܵܐ.

¹⁷ܡܛܠ ܗܵܢܵܐ ܦܘܿܩܘ ܡܸܢ ܒܲܝܢܵܬ݂ܗܘܿܢ. ܘܐܸܬ݂ܦܲܪܫܘ ܡܸܢܗܘܿܢ. ܐܵܡܲܪ ܡܵܪܝܵܐ. ܘܲܠܛܲܡܹ̈ܐܐ ܠܵܐ ܬܸܬ݂ܩܲܪܒ݂ܘܼܢ. ܘܐܸܢܵܐ ܐܹܩܲܒܸܠܟ݂ܘܿܢ.

¹⁸ܘܐܸܗܘܹܐ ܠܟ݂ܘܿܢ ܠܐܲܒ݂ܵܐ. ܘܐܲܢ̄ܬܿܘܿܢ ܬܸܗܘܘܿܢ ܠܝܼ ܠܲܒ̣̈ܢܲܝܵܐ ܘܠܲܒ݂̈ܢܵܬ݂ܵܐ: ܐܵܡܲܪ ܡܵܪܝܵܐ ܕܟ̣ܠ ܐܲܚܝܼܕ݂.