Read Aramaic Peshita Ephesians 4 Bible Online

Ephesians 4 - Aramaic Peshita bible

Ephesians 4

¹ܒܵܥܹܐ ܐ̄ܢܵܐ ܗܵܟܹܝܠ ܡܸܢܟ݂ܘܿܢ ܐܸܢܵܐ ܐܲܣܝܼܪܵܐ ܒܡܵܪܲܢ. ܕܲܬ݂ܗܲܠܟ݂ܘܿܢ ܐܲܝܟܲܢܵܐ ܕܝܵܐܹܐ ܠܩܸܪܝܵܢܵܐ ܕܐܸܬ݂ܩܪܝܼܬܿܘܿܢ.

²ܒܟ݂ܠܵܗܿ ܡܲܟܝܼܟ݂ܘܼܬ݂ ܪܸܥܝܵܢܵܐ. ܘܢܝܼܚܘܼܬ݂ܵܐ ܘܢܲܓ݁ܝܼܪܘܼܬ݂ ܪܘܼܚܵܐ. ܘܲܗܘܲܝܬܿܘܿܢ ܡܣܲܝܒܪܝܼܢ ܚܲܕ݂ ܠܚܲܕ݂ ܒܚܘܼܒܵܐ.

³ܘܲܗܘܲܝܬܿܘܿܢ ܚܦܝܼܛܝܼܢ ܠܡܸܛܲܪ ܐܵܘܝܘܼܬ݂ܵܐ ܕܪܘܼܚܵܐ ܒܲܚܙܵܩܵܐ ܕܲܫܠܵܡܵܐ.

⁴ܕܬܸܗܘܘܿܢ ܒܚܲܕ݂ ܦܲܓ݂ܪܵܐ ܘܒܲܚܕ݂ܵܐ ܪܘܼܚܵܐ. ܐܲܝܟ݂ ܡܵܐ ܕܐܸܬ݂ܩܪܝܼܬܿܘܿܢ ܒܚܲܕ݂ ܣܲܒ݂ܪܵܐ ܕܩܸܪܝܵܢܟ݂ܘܿܢ.

⁵ܚܲܕ݂ ܗܘܼ ܓܹܝܪ ܡܵܪܝܵܐ. ܘܲܚܕ݂ܵܐ ܗܲܝܡܵܢܘܼܬ݂ܵܐ. ܘܲܚܕ݂ܵܐ ܡܲܥܡܘܿܕ݂ܝܼܬ݂ܵܐ.

⁶ܘܚܲܕ݂ ܐܲܠܵܗܵܐ ܐܲܒ݂ܵܐ ܕܟ݂ܠ. ܘܥܲܠ ܟܠ ܘܲܒ݂ܝܲܕ݂ ܟܠ ܘܲܒ݂ܟ݂ܠܲܢ.

⁷ܠܚܲܕ݂ ܚܲܕ݂ ܡܸܢܲܢ ܕܹܝܢ ܐܸܬ݂ܝܲܗܒܲܬ݂ ܛܲܝܒܘܼܬ݂ܵܐ. ܐܲܝܟ݂ ܡܫܘܼܚܬ݂ܵܐ ܕܡܵܘܗܲܒ݂ܬܹܗ ܕܲܡܫܝܼܚܵܐ.

⁸ܡܛܠ ܗܵܢܵܐ ܐܲܡܝܼܪ. ܕܲܣܠܸܩ ܠܲܡܪܵܘܡܵܐ ܘܲܫܒ݂ܵܐ ܫܒ݂ܝܼܬ݂ܵܐ. ܘܝܲܗ̄ܒ݂ ܡܵܘ̈ܗܒ݂ܵܬ݂ܵܐ ܠܲܒܢܲܝ̈ܢܵܫܵܐ.

⁹ܕܲܣܠܸܩ ܕܹܝܢ ܡܵܢܵܐ ܗ݉ܝܼ. ܐܸܠܵܐ ܐܸܢ ܕܐܵܦ ܢܚܸܬ݂ ܠܘܼܩܕ݂ܲܡ ܠܬܲܚ̈ܬܵܝܵܬ݂ܵܗܿ ܕܐܲܪܥܵܐ.

¹⁰ܗܵܘ ܕܲܢܚܸܬ݂. ܗܘܸܝܘܼ ܗܵܘ ܕܐܵܦ ܣܠܸܩ. ܠܥܸܠ ܡܸܢ ܟܠܗܘܿܢ ܫܡܲܝܵܐ. ܕܲܢܫܲܠܸܡ ܟܠ.

¹¹ܘܗܘܼ ܝܲܗ̄ܒ݂: ܐܝܼܬ݂ ܕܲܫܠܝܼܚܹ̈ܐ. ܘܐܝܼܬ݂ ܕܲܢܒ݂ܝܹ̈ܐ. ܘܐܝܼܬ݂ ܕܲܡܣܲܒܪ̈ܵܢܹܐ. ܘܐܝܼܬ݂ ܕܪ̈ܵܥܵܘܵܬ݂ܵܐ. ܘܐܝܼܬ݂ ܕܡܲܠܦܵܢܹ̈ܐ:

¹²ܠܲܓ݂ܡܵܪܵܐ ܕܩܲܕܝܼܫܹ̈ܐ. ܠܲܥܒ݂ܵܕ݂ܵܐ ܕܬܸܫܡܸܫܬܵܐ. ܠܒܸܢܝܵܢܵܐ ܕܦܲܓ݂ܪܵܐ ܕܲܡܫܝܼܚܵܐ.

¹³ܥܕ݂ܲܡܵܐ ܕܟ݂ܠܲܢ ܢܸܗܘܹܐ ܚܲܕ݂ ܡܸܕܸܡ ܒܗܲܝܡܵܢܘܼܬ݂ܵܐ ܘܒ݂ܝܼܕ݂ܲܥܬ݂ܵܐ ܕܲܒ݂ܪܹܗ ܕܐܲܠܵܗܵܐ. ܘܚܲܕ݂ ܓܲܒ݂ܪܵܐ ܓܡܝܼܪܵܐ ܒܲܡܫܘܼܚܬ݂ܵܐ ܕܩܵܘܡܬ݂ܵܐ ܕܫܘܼܡܠܵܝܹܗ ܕܲܡܫܝܼܚܵܐ.

¹⁴ܘܠܵܐ ܢܸܗܘܹܐ ܝܲܠܘܼܕܹ̈ܐ ܕܡܸܙܕܲܥܙܥܝܼܢ ܘܡܸܫܬܲܢܹܝܢ ܠܟ݂ܠ ܪܘܼܚ ܕܝܘܼܠܦܵܢܹ̈ܐ ܢܟ݂ܝܼ̈ܠܹܐ ܕܲܒ݂ܢܲܝ̈ܢܵܫܵܐ: ܗܵܢܘܿܢ ܕܲܒ݂ܚܵܪܥܘܼܬ݂ܗܘܿܢ ܡܸܨܛܲܢܥܝܼܢ ܕܢܲܛܥܘܿܢ.

¹⁵ܐܸܠܵܐ ܗܘܲܝܢ ܫܲܪܝܼܪܝܼܢ ܒܚܘܼܒܲܢ. ܕܟ݂ܠܡܸܕܸܡ ܕܝܼܠܲܢ ܢܸܪܒܹܐ ܒܲܡܫܝܼܚܵܐ. ܕܗܘܸܝܘܼ ܪܹܫܵܐ.

¹⁶ܘܡܸܢܹܗ ܟܠܹܗ ܦܲܓ݂ܪܵܐ ܡܸܬ݂ܪܲܟܲܒ݂ ܘܡܸܬ݂ܩܲܛܲܪ ܒܟ݂ܠ ܫܵܪ̈ܝܵܢ: ܐܲܝܟ݂ ܡܵܘܗܲܒ݂ܬܵܐ ܕܡܸܬ݂ܝܲܗܒܵܐ ܒܲܡܫܘܼܚܬ݂ܵܐ ܠܟ݂ܠ ܗܲܕܵܡ. ܠܬܲܪܒܝܼܬ݂ܵܐ ܕܝܼܠܹܗ ܕܦܲܓ݂ܪܵܐ. ܕܲܒ݂ܚܘܼܒܵܐ ܢܸܫܬܲܠܲܡ ܒܸܢܝܵܢܹܗ.

¹⁷ܗܵܕܹܐ ܕܹܝܢ ܐܵܡܲܪ ܐ̄ܢܵܐ ܘܲܡܣܲܗܸܕ݂ ܐ̄ܢܵܐ ܒܡܵܪܝܵܐ. ܕܡܸܢ ܗܵܫܵܐ ܠܵܐ ܬܸܗܘܘܿܢ ܡܗܲܠܟ݂ܝܼܢ ܐܲܝܟ݂ ܫܲܪܟܵܐ ܕܥܲܡ̈ܡܹܐ. ܕܲܡܗܲܠܟ݂ܝܼܢ ܒܲܣܪܝܼܩܘܼܬ݂ ܪܸܥܝܵܢܗܘܿܢ.

¹⁸ܘܚܸܫܘܿܟ݂ܝܼܢ ܒܡܲܕܥܲܝ̈ܗܘܿܢ. ܘܢܘܼܟ݂ܪܵܝܼܝܢ ܐܸܢܘܿܢ ܡܸܢ ܚܲܝܵܘ̈ܗܝ ܕܐܲܠܵܗܵܐ. ܡܛܠ ܕܠܲܝܬܿ ܒܗܘܿܢ ܝܼܕ݂ܲܥܬ݂ܵܐ. ܘܡܛܠ ܥܘܝܼܪܘܼܬ݂ ܠܸܒܗܘܿܢ.

¹⁹ܗܵܢܘܿܢ ܕܲܦܣܲܩܘ ܣܲܒ݂ܪܗܘܿܢ. ܘܐܲܫܠܸܡܘ ܢܲܦ̮ܫܗܘܿܢ ܠܦܲܚܙܘܼܬ݂ܵܐ. ܘܲܠܦܘܼܠܚܵܢܵܐ ܕܟ݂ܠܵܗܿ ܛܲܢܦܘܼܬ݂ܵܐ ܒܝܲܥܢܘܼܬ݂ܗܘܿܢ.

²⁰ܐܲܢ̄ܬܿܘܿܢ ܕܹܝܢ ܠܵܐ ܗ̄ܘܵܐ ܗܵܟܲܢܵܐ ܝܼܠܸܦܬܿܘܿܢܵܝܗܝ ܠܲܡܫܝܼܚܵܐ.

²¹ܐܸܢ ܫܲܪܝܼܪܵܐܝܼܬ݂ ܫܡܲܥܬܿܘܿܢܵܝܗܝ ܘܒܹܗ ܝܼܠܸܦܬܿܘܿܢ. ܐܲܝܟ݂ ܡܵܐ ܕܐܝܼܬ݂ܵܘܗܝ ܩܘܼܫܬܵܐ ܒܝܼܫܘܿܥ.

²²ܐܸܠܵܐ ܕܲܬ݂ܢܝܼܚܘܼܢ ܡܸܢܟ݂ܘܿܢ ܗܘܼܦܵܟܲܝ̈ܟ݁ܘܿܢ ܩܲܕ݂ܡܵܝܹ̈ܐ: ܠܒܲܪܢܵܫܵܐ ܗܵܘ ܥܲܬܿܝܼܩܵܐ ܕܡܸܬ݂ܚܲܒܲܠ ܒܲܪ̈ܓ݂ܝܼܓ݂ܵܬ݂ܵܐ ܕܛܘܼܥܝܲܝ.

²³ܘܬܸܬ݂ܚܲܕܬ݂ܘܼܢ ܒܪܘܼܚܵܐ ܕܡܲܕܥܲܝ̈ܟ݁ܘܿܢ:

²⁴ܘܬܸܠܒܫܘܿܢ ܠܒܲܪܢܵܫܵܐ ܚܲܕ݂ܬ݂ܵܐ ܗܵܘ ܕܒܲܐܠܵܗܵܐ ܐܸܬ݂ܒܪܝܼ ܒܙܲܕܝܼܩܘܼܬ݂ܵܐ. ܘܲܒ݂ܚܲܣܝܘܼܬ݂ܵܐ ܕܩܘܼܫܬܵܐ.

²⁵ܡܛܠ ܗܵܢܵܐ ܐܲܢܝܼܚܘ ܡܸܢܟ݂ܘܿܢ ܟܲܕܵܒ݂ܘܼܬ݂ܵܐ ܘܡܲܠܸܠܘ ܩܘܼܫܬܵܐ ܐ̄ܢܵܫ ܥܲܡ ܩܲܪܝܼܒܹܗ. ܗܲܕܵܡܹ̈ܐ ܚܢܲܢ ܓܹܝܪ ܚܲܕ݂ ܕܚܲܕ݂.

²⁶ܪܓܲܙܘ ܘܠܵܐ ܬܸܚܛܘܿܢ. ܘܫܸܡܫܵܐ ܥܲܠ ܪܘܼܓ݂ܙܟ݂ܘܿܢ ܠܵܐ ܢܸܥܪܲܒ݂.

²⁷ܘܠܵܐ ܬܸܬܿܠܘܼܢ ܐܲܬ݂ܪܵܐ ܠܵܐܟܹܠܩܲܪܨܵܐ.

²⁸ܘܐܲܝܢܵܐ ܕܓ݂ܵܢܹܒ݂ ܗ̄ܘܵܐ ܡܸܟܹܝܠ ܠܵܐ ܢܸܓ݂ܢܘܿܒ݂. ܐܸܠܵܐ ܢܸܠܐܹܐ ܒܐܝܼܕ݂ܵܘ̈ܗܝ ܘܢܸܦܠܘܿܚ ܛܵܒ݂ܵܬ݂ܵܐ: ܕܢܸܗܘܹܐ ܠܹܗ ܠܡܸܬܲܠ ܠܡܲܢ ܕܲܣܢܝܼܩ.

²⁹ܟܠ ܡܸܠܵܐ ܣܲܢܝܵܐ ܡܸܢ ܦܘܼܡܟ݂ܘܿܢ ܠܵܐ ܬܸܦܘܿܩ. ܐܸܠܵܐ ܐܲܝܕ݂ܵܐ ܕܫܲܦܝܼܪܵܐ ܘܚܵܫܚܵܐ ܠܒܸܢܝܵܢܵܐ. ܕܬܸܬܸܿܠ ܛܲܝܒܘܼܬ݂ܵܐ ܠܐܲܝܠܹܝܢ ܕܫܵܡܥܝܼܢ.

³⁰ܘܠܵܐ ܬܸܗܘܘܿܢ ܡܥܝܼܩܝܼܢ ܠܪܘܼܚܵܐ ܩܲܕܝܼܫܬܵܐ ܕܐܲܠܵܗܵܐ. ܕܐܸܬ݂ܚܬ݂ܡܬܿܘܿܢ ܒܹܗ ܠܝܵܘܡܵܐ ܕܦܘܼܪܩܵܢܵܐ.

³¹ܟܠܵܗܿ ܡܲܪܝܼܪܘܬ݂ܵܐ ܘܚܸܡܬ݂ܵܐ ܘܪܘܼܓ݂ܙܵܐ ܘܪܵܘܒܵܐ ܘܓ̣ܘܕܵܦܵܐ ܢܸܫܬܲܩ̈ܠܵܢ ܡܸܢܟ݂ܘܿܢ. ܥܲܡ ܟܠܵܗܿ ܒܝܼܫܘܼܬ݂ܵܐ.

³²ܘܲܗܘܲܝܬܿܘܿܢ ܒܲܣܝܼܡܝܼܢ ܚܲܕ݂ ܠܘܵܬ݂ ܚܲܕ݂. ܘܲܡܪܲܚܡܵܢܝܼܢ. ܘܲܗܘܲܝܬܿܘܿܢ ܫܵܒ݂ܩܝܼܢ ܚܲܕ݂ ܠܚܲܕ݂. ܐܲܝܟܲܢܵܐ ܕܐܲܠܵܗܵܐ ܒܲܡܫܝܼܚܵܐ ܫܒܲܩ ܠܲܢ.