Read Aramaic Peshita Philippians 2 Bible Online

Philippians 2 - Aramaic Peshita bible

Philippians 2

¹ܐܸܢ ܐܝܼܬ݂ ܠܟ̣ܘܿܢ ܗܵܟܹܝܠ ܒܘܼܝܵܐܵܐ ܒܲܡܫܝܼܚܵܐ. ܘܐܸܢ ܡܲܡܠܹܐ ܒܠܸܒܵܐ ܒܚܘܼܒܵܐ. ܘܐܸܢ ܫܵܘܬܵܦܘܼܬ݂ܵܐ ܕܪܘܼܚܵܐ. ܘܐܸܢ ܪܘܼܚܵܦܵܐ ܘܪ̈ܲܚܡܹܐ.

²ܫܲܠܸܡܘ ܚܲܕ݂ܘܲܬ݂ܝ. ܕܚܲܕ݂ ܪܸܥܝܵܢܵܐ ܢܸܗܘܹܐ ܠܟ̣ܘܿܢ. ܘܚܲܕ݂ ܚܘܼܒܵܐ. ܘܲܚܕ݂ܵܐ ܢܦܸܫ. ܘܲܚܕ݂ܵܐ ܬܲܪܥܝܼܬ݂ܵܐ.

³ܘܡܸܕܸܡ ܒܚܸܪܝܵܢܵܐ ܐܵܘ ܒܬܸܫܒܿܘܿܚܬܵܐ ܣܪܝܼܩܬܵܐ (ܒܫܘܼܒ݂ܚܵܐ ܣܪܝܼܩܵܐ) ܠܵܐ ܬܸܥܒܕ݂ܘܼܢ. ܐܸܠܵܐ ܒܡܲܟܝܼܟ̣ܘܼܬ݂ ܪܸܥܝܵܢܵܐ. ܟܠܢܵܫ ܠܚܲܒ݂ܪܹܗ ܐܲܝܟ̣ ܕܲܡܝܲܬܲܪ ܡܸܢܹܗ. ܢܸܚܫܘܿܒ݂.

⁴ܘܠܵܐ ܐ̄ܢܵܫ ܕܢܲܦ̮ܫܹܗ ܢܹܐܨܲܦ. ܐܸܠܵܐ ܟܠܢܵܫ ܐܵܦ ܕܚܲܒ݂ܪܹܗ.

⁵ܘܗܵܕܹܐ ܐܸܬ݂ܪܲܥܵܘ ܒܢܲܦ̮ܫܟ̣ܘܿܢ. ܗܵܝ ܕܐܵܦ ܝܼܫܘܿܥ ܡܫܝܼܚܵܐ.

⁶ܗܵܘ ܕܟܲܕ݂ ܐܝܼܬ݂ܵܘܗܝ ܒܲܕ݂ܡܘܼܬ݂ܵܐ ܕܐܲܠܵܗܵܐ. ܠܵܐ ܗ̄ܘܵܐ ܚܛܘܼܦܝܵܐ ܚܲܫܒܵܗܿ ܗܵܕܹܐ ܕܐܝܼܬ݂ܵܘܗܝ ܦܸܚܡܵܐ ܕܐܲܠܵܗܵܐ.

⁷ܐܸܠܵܐ ܢܲܦ̮ܫܹܗ ܣܲܪܸܩ. ܘܲܕ݂ܡܘܼܬ݂ܵܐ ܕܥܲܒ݂ܕܵܐ ܢܣܲܒ݂. ܘܲܗܘܵܐ ܒܲܕ݂ܡܘܼܬ݂ܵܐ ܕܲܒ݂ܢܲܝ̈ܢܵܫܵܐ. ܘܒܸܐܣܟܹܡܵܐ ܐܸܫܬܿܟܲܚ ܐܲܝܟ̣ ܒܲܪܢܵܫܵܐ.

⁸ܘܡܲܟܸܟ̣ ܢܲܦ̮ܫܹܗ. ܘܐܸܫܬܿܡܲܥ ܥܕ݂ܲܡܵܐ ܠܡܵܘܬܵܐ. ܡܵܘܬܵܐ ܕܹܝܢ. ܕܲܙܩܝܼܦܵܐ.

⁹ܡܛܠ ܗܵܢܵܐ ܐܵܦ ܐܲܠܵܗܵܐ ܐܲܣܓ݁ܝܼ ܪܲܡܪܡܹܗ. ܘܝܲܗ̄ܒ݂ ܠܹܗ ܫܡܵܐ ܕܲܡܝܲܬܲܪ ܡܸܢ ܟܠ ܫܡܵܗܝܼ̈ܢ.

¹⁰ܕܒܲܫܡܹܗ ܕܝܼܫܘܿܥ ܟܠ ܒܪܘܿܟ̣ ܬܸܟܘܿܦ ܕܒܲܫܡܲܝܵܐ. ܘܒܲܐܪܥܵܐ. ܘܕ݂ܲܠܬܲܚܬܿ ܡܸܢ ܐܲܪܥܵܐ.

¹¹ܘܟ̣ܠ ܠܸܫܵܢ ܢܵܘܕܹܐ ܕܡܵܪܝܵܐ ܗ̄ܘܼ ܝܼܫܘܿܥ ܡܫܝܼܚܵܐ ܠܫܘܼܒ݂ܚܵܐ ܕܐܲܠܵܗܵܐ ܐܲܒ݂ܘܼܗܝ.

¹²ܡܸܟܹܝܠ ܚܲܒܝܼܒܲܝ̈. ܐܲܝܟܲܢܵܐ ܕܲܒܟ̣ܠܙܒܲܢ ܐܸܫܬܿܡܲܥܬܿܘܿܢ. ܠܵܐ ܟܲܕ݂ ܩܲܪܝܼܒ݂ ܐ̄ܢܵܐ ܠܟ̣ܘܿܢ ܒܲܠܚܘܿܕ݂. ܐܸܠܵܐ ܗܵܫܵܐ ܕܪܲܚܝܼܩ ܐ̄ܢܵܐ ܡܸܢܟ̣ܘܿܢ. ܝܲܬܝܼܪܵܐܝܼܬ݂ ܒܕܸܚܠܬ݂ܵܐ ܘܒܲܪܬܹܝܬ݂ܵܐ. ܦܠܘܿܚܘ ܦܘܼܠܚܵܢܵܐ ܕܚܲܝܲܝ̈ܟ݁ܘܿܢ.

¹³ܐܲܠܵܗܵܐ ܗ̄ܘܼ ܓܹܝܪ ܡܚܲܦܸܛ ܒܟ̣ܘܿܢ. ܐܵܦ ܠܡܸܨܒܵܐ ܐܵܦ ܠܡܸܣܥܲܪ. ܗܵܘ ܡܸܕܸܡ ܕܨܵܒܹܝܢ ܐܢ̄ܬܘܿܢ.

¹⁴ܟܠ ܡܸܕܸܡ ܗܘܲܝܬܿܘܿܢ ܥܵܒ݂ܕܝܼܢ: ܕܠܵܐ ܪܸܛܢܵܐ ܘܲܕ݂ܠܵܐ ܦܘܼܠܵܓ݂.

¹⁵ܕܬܸܗܘܘܿܢ ܬܲܡܝܼܡܹܐ ܘܲܕ݂ܠܵܐ ܡܘܼܡ. ܐܲܝܟ̣ ܒ̈ܢܲܝܵܐ ܕܟܲܝ̈ܵܐ ܕܐܲܠܵܗܵܐ. ܕܥܵܡܪܝܼܢ ܒܕ݂ܵܪܵܐ ܥܲܣܩܵܐ ܘܲܡܥܲܩܡܵܐ. ܘܐܸܬ݂ܚܙܵܘ ܒܲܝܢܵܬ݂ܗܘܿܢ ܐܲܝܟ̣ ܢܲܗܝܼܪܹ̈ܐ ܒܥܵܠܡܵܐ.

¹⁶ܕܐܝܼܬܲܝܟܿܘܿܢ ܠܗܘܿܢ ܒܕ݂ܘܼܟܲܬ݂ ܚܲܝܹ̈ܐ ܠܫܘܼܒ݂ܗܵܪܝ ܕܝܼܠܝ ܒܝܵܘܡܹܗ ܕܲܡܫܝܼܚܵܐ. ܕܠܵܐ ܗ̄ܘܵܐ ܐܝܼܩܹܐ ܪܸܗܛܹܬ݂ ܘܠܵܐ ܣܪܝܼܩܵܐܝܼܬ݂ ܥܸܡܠܹܬ݂.

¹⁷ܐܸܠܵܐ ܐܵܦܸܢ ܡܸܬ݂ܢܲܩܹܐ ܐ̄ܢܵܐ ܥܲܠ ܕܸܒ݂ܚܬ݂ܵܐ ܘܬܸܫܡܸܫܬܵܐ ܕܗܲܝܡܵܢܘܼܬ݂ܟ̣ܘܿܢ. ܚܵܕܹܐ ܐ̄ܢܵܐ ܘܪܵܘܹܙ ܐ̄ܢܵܐ ܥܲܡ ܟܠܟ̣ܘܿܢ.

¹⁸ܗܵܟܲܢܵܐ ܐܵܦ ܐܲܢ̄ܬܿܘܿܢ ܚܕ݂ܵܘ ܘܲܪܘܲܙܘ ܥܲܡܝ.

¹⁹ܡܣܲܒܲܪ ܐ̄ܢܵܐ ܕܹܝܢ ܒܡܵܪܲܢ ܝܼܫܘܿܥ. ܕܐܹܫܲܕܲܪ ܠܘܵܬ݂ܟ̣ܘܿܢ ܠܛܝܼܡܵܬܹܐܘܿܣ ܒܲܥܓܲܠ. ܕܐܵܦ ܠܝܼ ܢܸܗܘܹܐ ܠܝܼ ܢܝܵܚܵܐ. ܟܲܕ݂ ܐܹܠܲܦ ܡܛܠܵܬ݂ܟ̣ܘܿܢ.

²⁰ܠܲܝܬܿ ܠܝܼ ܓܹܝܪ ܐ̄ܚܪܹܝܢ ܗܵܪܟܵܐ ܕܐܲܝܟ̣ ܢܲܦ̮ܫܝ ܗ̄ܘܼ. ܕܐܲܟ̣ܝܼܦܵܐܝܼܬ݂ ܝܵܨܹܦ ܕܝܼܠܟ̣ܘܿܢ.

²¹ܟܠܗܘܿܢ ܓܹܝܪ ܕܢܲܦ̮ܫܗܘܿܢ ܗܘܼ ܒܵܥܹܝܢ. ܘܠܵܐ ܕܝܼܫܘܿܥ ܡܫܝܼܚܵܐ.

²²ܒܘܼܩܝܹܗ ܕܹܝܢ ܕܗܵܢܵܐ ܝܵܕ݂ܥܝܼܬܿܘܢ. ܕܐܲܝܟ̣ ܒܪܵܐ ܥܲܡ ܐܲܒ݂ܘܼܗܝ. ܗܵܟܲܢܵܐ ܦܵܠܲܚ ܥܲܡܝ ܒܲܣܒܲܪܬ݂ܵܐ.

²³ܠܗܵܢܵܐ ܡܣܲܒܲܪ ܐ̄ܢܵܐ. ܕܐܹܫܲܕܲܪ ܠܘܵܬ݂ܟ̣ܘܿܢ ܒܲܥܓܲܠ ܡܵܐ ܕܲܚܙܹܝܬ݂ ܡܵܐ ܕܲܠܘܵܬ݂ܝ.

²⁴ܘܲܬ݂ܟ̣ܝܼܠ ܐ̄ܢܵܐ ܥܲܠ ܡܵܪܝ. ܕܐܵܦ ܐܸܢܵܐ ܒܲܥܓܲܠ ܐܵܬܹܐ ܐ̄ܢܵܐ ܠܘܵܬ݂ܟ̣ܘܿܢ.

²⁵ܗܵܫܵܐ ܕܹܝܢ ܐܲܠܲܨܬܲܢܝ ܨܒ݂ܘܼܬ݂ܵܐ. ܕܐܹܫܲܕܲܪ ܠܘܵܬ݂ܟ̣ܘܿܢ ܠܐܲܦܲܦܪܘܿܕ݂ܝܼܛܘܿܣ ܐܲܚܵܐ. ܕܐܝܼܬ݂ܵܘܗܝ ܡܥܲܕܪܵܢܵܐ ܘܦܵܠܚܵܐ ܕܥܲܡܝ. ܕܝܼܠܟ̣ܘܿܢ ܕܹܝܢ ܫܠܝܼܚܵܐ ܘܲܡܫܲܡܫܵܢܵܐ ܕܲܚܫܲܚܬ݂ܝ.

²⁶ܡܛܠ ܕܲܣܘܹܐ ܗ̄ܘܵܐ ܠܡܸܚܙܵܐ ܠܟ̣ܠܟ̣ܘܿܢ. ܘܲܡܥܵܩ ܗ̄ܘܵܐ ܕܝܼܕܲܥ ܕܲܫܡܲܥܬܿܘܿܢ ܕܐܸܬ݂ܟܪܲܗ.

²⁷ܐܵܦ ܐܸܬ݂ܟܪܲܗ ܓܹܝܪ ܥܕ݂ܲܡܵܐ ܠܡܵܘܬܵܐ. ܐܸܠܵܐ ܐܲܠܵܗܵܐ ܪܲܚܸܡ ܥܠܵܘܗܝ. ܠܵܐ ܗ̄ܘܵܐ ܕܹܝܢ ܥܠܵܘܗܝ ܒܲܠܚܘܿܕ݂. ܐܸܠܵܐ ܐܵܦ ܥܠܲܝ. ܕܠܵܐ ܬܸܗܘܹܐ ܠܝܼ ܥܵܩܵܐ ܥܲܠ ܥܵܩܵܐ.

²⁸ܚܦܝܼܛܵܐܝܼܬ݂ ܗܵܟܹܝܠ ܫܲܕܲܪܬܹ݁ܗ ܠܘܵܬ݂ܟ̣ܘܿܢ. ܕܟܲܕ݂ ܬܸܚܙܘܿܢܵܝܗܝ ܬܘܼܒ݂ ܬܸܚܕܘܿܢ. ܘܠܝܼ ܩܲܠܝܼܠ ܢܸܗܘܹܐ ܢܦܹܐܫܵܐ.

²⁹ܩܲܒܿܠܘܼܗܝ ܗܵܟܹܝܠ ܒܡܵܪܝܵܐ ܒܟ̣ܠ ܚܲܕ݂ܘܵܐ. ܘܠܲܐܝܠܹܝܢ ܕܗܵܟܲܢܵܐ ܐܸܢܘܿܢ. ܒܐܝܼܩܵܪܵܐ ܐܲܚܘܿܕ݂ܘ ܐܸܢܘܿܢ.

³⁰ܡܛܠ ܥܒ݂ܵܕ݂ܵܐ ܓܹܝܪ ܕܲܡܫܝܼܚܵܐ ܥܕ݂ܲܡܵܐ ܠܡܵܘܬܵܐ ܡܲܛܝܼ. ܘܒܲܣܲܪ ܥܲܠ ܢܲܦ̮ܫܹܗ. ܕܲܢܡܲܠܹܐ ܡܸܕܸܡ ܕܒܲܨܲܪܬܿܘܿܢ ܗܘܲܝܬܿܘܿܢ ܒܬܸܫܡܸܫܬܵܐ ܕܲܠܘܵܬ݂ܝ.