Read Aramaic Peshita Colossians 2 Bible Online

Colossians 2 - Aramaic Peshita bible

Colossians 2

¹ܨܵܒܹܐ ܐ̄ܢܵܐ ܕܹܝܢ ܕܬܸܕ݂ܥܘܼܢ. ܐܲܝܢܵܐ ܐܵܓ݂ܘܿܢܵܐ ܐܝܼܬ݂ ܠܝܼ ܚܠܵܦܲܝܟܿܘܿܢ. ܘܲܚܠܵܦ ܗܵܢܘܿܢ ܕܲܒ݂ܠܵܕ݂ܝܼܩܝܼܵܐ. ܘܲܚܠܵܦ ܫܲܪܟܵܐ ܐܲܝܠܹܝܢ ܕܦܲܪܨܘܿܦܝ ܠܵܐ ܚܙܵܘ ܒܲܒ݂ܣܲܪ.

²ܕܢܸܬ݂ܒܲܝܐܘܼܢ ܠܸܒܵܘܵܬ݂ܗ̈ܘܿܢ ܘܢܸܬ݂ܩܲܪܒ݂ܘܼܢ ܒܚܘܼܒܵܐ ܠܟ݂ܠܹܗ ܥܘܼܬ݂ܪܵܐ ܕܲܦܝܵܣܵܐ ܘܲܠܣܘܼܟܵܠܵܐ ܕܝܼܕ݂ܲܥܬܹܗ ܕܐ̄ܪܵܙܵܐ ܕܐܲܠܵܗܵܐ ܐܲܒ݂ܵܐ. ܘܕ݂ܲܡܫܝܼܚܵܐ.

³ܗܵܘ ܕܒܹܗ ܟܲܣܝܵܢ ܟܠܗܹܝܢ ܣܝܼܡܵܬ݂ܵܐ ܕܚܸܟ݂ܡܬ݂ܵܐ ܘܕ݂ܝܼܕ݂ܲܥܬ݂ܵܐ.

⁴ܗܵܕܹܐ ܕܹܝܢ ܐܵܡܲܪ ܐ̄ܢܵܐ. ܕܠܵܐ ܐ̄ܢܵܫ ܢܸܗܘܹܐ ܡܲܛܥܹܐ ܠܟ݂ܘܿܢ ܒܲܦܝܵܣܵܐ ܕܡܸܠܹ̈ܐ.

⁵ܐܵܦܸܢ ܒܲܒ݂ܣܲܪ ܓܹܝܪ ܦܲܪܝܼܩ ܐ̄ܢܵܐ ܡܸܢܟ݂ܘܿܢ. ܐܸܠܵܐ ܒܪܘܼܚ ܥܲܡܟ݂ܘܿܢ ܐ̄ܢܵܐ. ܘܚܵܕܹ̈ܐ ܐ̄ܢܵܐ ܕܚܵܙܹܐ ܐ̄ܢܵܐ ܡܛܲܟܣܘܼܬ݂ܟ݂ܘܿܢ ܘܫܲܪܝܼܪܘܼܬ݂ܵܐ ܕܗܲܝܡܵܢܘܼܬ݂ܟ݂ܘܿܢ ܕܒܲܡܫܝܼܚܵܐ.

⁶ܐܲܝܟܲܢܵܐ ܗܵܟܹܝܠ ܕܩܲܒܸܠܬܿܘܿܢ ܠܝܼܫܘܿܥ ܡܫܝܼܚܵܐ ܡܵܪܲܢ. ܒܹܗ ܗܲܠܸܟ݂ܘ.

⁷ܟܲܕ݂ ܡܫܲܪܪܝܼܢ ܥܸܩܪ̈ܲܝܟ݁ܘܿܢ. ܘܡܸܬ݂ܒܢܹܝܢ ܐ̄ܢܬܘܿܢ ܒܹܗ. ܘܡܸܬ݂ܩܲܝܡܝܼܢ ܐ̄ܢܬܘܿܢ ܒܗܲܝܡܵܢܘܼܬ݂ܵܐ ܗܵܝ ܕܝܼܠܸܦܬܿܘܿܢ. ܕܒ݂ܵܗܿ ܬܸܬ݂ܝܲܬܿܪܘܼܢ ܒܬ݂ܵܘܕܝܼܬ݂ܵܐ.

⁸ܐܸܙܕܲܗ̄ܪܘ ܕܲܠܡܵܐ ܐ̄ܢܵܫ ܢܚܲܠܸܨܟ݂ܘܿܢ ܒܦܝܼܠܵܣܘܿܦܘܼܬ݂ܵܐ ܘܲܒ݂ܛܵܥܝܘܼܬ݂ܵܐ ܣܪܝܼܩܬܵܐ. ܐܲܝܟ݂ ܝܘܼܠܦܵܢܹ̈ܐ ܕܲܒ݂ܢܲܝ̈ܢܵܫܵܐ. ܘܐܲܝܟ݂ ܐܸܣܛܘܼܟ݂ܣܵܘ̈ܗܝ ܕܥܵܠܡܵܐ. ܘܠܵܐ ܐܲܝܟ݂ ܡܫܝܼܚܵܐ.

⁹ܕܒܹܗ ܥܵܡܲܪ ܟܠܹܗ ܡܘܼܠܵܝܵܐ ܕܐܲܠܵܗܘܼܬ݂ܵܐ ܓܘܼܫܡܵܢܵܐܝܼܬ݂.

¹⁰ܘܒܹܗ ܐܵܦ ܐܲܢ̄ܬܿܘܿܢ ܡܸܫܬܲܡܠܹܝܢ ܐ̄ܢܬܿܘܢ. ܕܗܘܼ ܐܝܼܬ݂ܵܘܗܝ ܪܹܫܵܐ ܕܟܠܗܹܝܢ ܐܲܪ̈ܟ݁ܘܿܣ ܘܫܘܼܠܛܵܢܹ̈ܐ.

¹¹ܘܒܹܗ ܐܸܬ݂ܓ݁ܙܲܪܬܿܘܢ ܓܙܘܼܪܬܵܐ ܕܠܵܐ ܒܐܝܼܕ݂ܝܼ̈ܢ ܒܲܫܠܵܚ ܒܸܣܪܵܐ ܕܲܚܛܵܗܹ̈ܐ. ܒܲܓ݂ܙܘܼܪܬܹ݁ܗ ܕܲܡܫܝܼܚܵܐ.

¹²ܘܐܸܬ݂ܩܒܲܪܬܿܘܿܢ ܥܲܡܹܗ ܒܡܲܥܡܘܿܕ݂ܝܼܬ݂ܵܐ. ܘܒܹܗ ܩܵܡܬܿܘܿܢ ܥܲܡܹܗ. ܕܗܲܝܡܸܢܬܿܘܿܢ ܒܚܲܝܠܵܐ ܕܐܲܠܵܗܵܐ ܕܐܲܩܝܼܡܹܗ ܡܸܢ ܒܹܝܬ݂ ܡܝܼܬܹ̈ܐ.

¹³ܘܲܠܟ݂ܘܿܢ ܕܡܝܼܬ݂ܝܼܢ ܗܘܲܝܬܿܘܿܢ ܒܲܚܛܵܗܲܝ̈ܟ݁ܘܿܢ ܘܲܒ݂ܥܘܼܪܠܘܼܬ݂ ܒܸܣܪܟ݂ܘܿܢ. ܐܲܚܝܼܟ݂ܘܿܢ ܥܲܡܹܗ. ܘܲܫܒܲܩ ܠܲܢ ܟܠܗܘܿܢ ܚܛܵܗܲܝ̈ܢ.

¹⁴ܘܲܥܛܵܐ ܒܦܘܼܩܕܵܢܵܘ̈ܗܝ ܫܛܵܪ ܚܵܘܒܲܝ̈ܢ: ܗܵܘ ܕܐܝܼܬ݂ܵܘܗܝ ܗ̄ܘܵܐ ܣܲܩܘܼܒ݂ܠܲܢ. ܘܫܲܩܠܹܗ ܡܸܢ ܡܨܲܥܬ݂ܵܐ ܘܩܲܒ݂ܥܹܗ ܒܲܙܩܝܼܦܹܗ.

¹⁵ܘܒܲܫܠܵܚ ܦܲܓ݂ܪܹܗ ܦܲܪܣܝܼ ܠܐܲܪ̈ܟ݁ܘܿܣ ܘܲܠܫܲܠܝܼܛܵܢܹ̈ܐ. ܘܐܲܒ݂ܗܸܬ݂ ܐܸܢܘܿܢ ܓܲܠܝܵܐܝܼܬ݂ ܒܲܩܢܘܿܡܹܗ.

¹⁶ܠܵܐ ܗܵܟܹܝܠ ܐ̄ܢܵܫ ܢܕ݂ܵܘܸܕ݂ܟ݂ܘܿܢ. ܒܡܹܐܟ݂ܠܵܐ ܘܲܒ݂ܡܲܫܬܿܝܵܐ ܐܵܘ ܒܦܘܼܠܵܓ݂ܵܐ ܕܥܹܐܕܹ̈ܐ ܘܲܕ݂ܪܹܫ ܝܲܪ̈ܚܹܐ ܘܲܕ݂ܫܲܒܹ̈ܐ:

¹⁷ܗܵܠܹܝܢ ܕܐܝܼܬܲܝܗܹܝܢ ܛܸܠܵܢ̈ܝܵܬ݂ܵܐ ܕܐܲܝܠܹܝܢ ܕܲܥܬ݂ܝܼܕ݂ܵܢ: ܦܲܓ݂ܪܵܐ ܕܹܝܢ ܡܫܝܼܚܵܐ ܗ̄ܘܼ.

¹⁸ܘܲܠܡܵܐ ܐ̄ܢܵܫ ܢܸܨܒܹܐ ܒܡܲܟܝܼܟ݂ܘܬ݂ ܪܸܥܝܵܢܵܐ ܠܲܡܚܲܝܵܒ݂ܘܼܬ݂ܟ݂ܘܿܢ. ܕܬܸܫܬܲܥܒܕ݂ܘܼܢ ܠܦܘܼܠܚܵܢܵܐ ܕܡܲܠܲܐܟܹ̈ܐ: ܒܲܕ݂ܣܵܥܹܐ ܥܲܠ ܡܸܕܸܡ ܕܠܵܐ ܚܙܵܐ. ܘܲܣܪܝܼܩܵܐܝܼܬ݂ ܡܸܬ݂ܚܬܲܪ ܒܪܸܥܝܵܢܵܐ ܕܒܸܣܪܹܗ.

¹⁹ܘܠܵܐ ܐܵܚܹܕ݂ ܪܹܫܵܐ. ܕܡܸܢܹܗ ܟܠܹܗ ܦܲܓ݂ܪܵܐ ܡܸܬ݂ܪܲܟܲܒ݂. ܘܡܸܬ݂ܩܲܝܲܡ ܒܫܸܪ̈ܝܵܢܹܐ ܘܲܒ݂ܗܲܕܵܡܹ̈ܐ. ܘܪܵܒܹܐ ܬܲܪܒܝܼܬ݂ܵܐ ܕܐܲܠܵܗܵܐ.

²⁰ܐܸܢ ܓܹܝܪ ܡܝܼܬ݁ܬ݁ܘܿܢ ܥܲܡ ܡܫܝܼܚܵܐ ܡܸܢ ܐܸܣܛܘܼܟ݂ܣܵܘ̈ܗܝ ܕܥܵܠܡܵܐ. ܠܡܵܢܵܐ ܐܲܝܟ݂ ܗܵܘ ܕܚܲܝܼܝܢ ܐ̄ܢܬܘܿܢ ܒܥܵܠܡܵܐ ܡܸܬ݁ܬ݁ܕ݁ܝܼܢܝܼܢ ܐ̄ܢܬܘܿܢ.

²¹ܠܵܐ ܠܲܡ ܬܸܩܪܘܿܒ݂ ܘܠܵܐ ܬܸܛܥܲܡ ܘܠܵܐ ܬܸܩܲܦ.

²²ܕܐܝܼܬܲܝܗܹܝܢ ܗܵܠܹܝܢ ܚܫܲܚܬ݂ܵܐ ܕܡܸܬ݂ܚܲܒܠܵܐ. ܘܦܘܼܩܵܕܹ̈ܐ ܐܸܢܹܝܢ ܘܝܘܼܠܦܵܢܹ̈ܐ ܕܲܒ݂ܢܲܝ̈ܢܵܫܵܐ.

²³ܘܡܸܬ݂ܚܲܙ̈ܝܵܢ ܕܐܝܼܬ݂ ܒܗܹܝܢ ܡܸܠܬ݂ܵܐ ܕܚܸܟ݂ܡܬ݂ܵܐ ܒܦܲܪܨܘܿܦ ܡܲܟܝܼܟܘܼܬ݂ܵܐ ܘܕܸܚܠܲܬ݂ ܐܲܠܵܗܵܐ. ܘܲܕ݂ܠܵܐ ܚܵܝܣܝܼܢ ܥܲܠ ܦܲܓ݂ܪܵܐ ܠܵܘ ܒܡܸܕܸܡ ܕܲܡܝܲܩܲܪ. ܐܸܠܵܐ ܒܐܲܝܠܹܝܢ ܕܲܚܫܲܚܬ݂ܵܐ ܐܸܢܹܝܢ ܕܒܸܣܪܵܐ.