Read Aramaic Peshita 1 Thessalonians 1 Bible Online

1 Thessalonians 1 - Aramaic Peshita bible

1 Thessalonians 1

¹ܦܵܘܠܘܿܣ ܘܣܸܠܘܵܢܘܿܣ ܘܛܝܼܡܵܬܹܐܘܿܣ. ܠܥܹܕܬܵܐ ܕܬܸܣܵܠܘܿܢܝܼܩܵܝܹ̈ܐ ܕܒܲܐܠܵܗܵܐ ܐܲܒ݂ܵܐ ܘܲܒ݂ܡܵܪܲܢ ܝܼܫܘܿܥ ܡܫܝܼܚܵܐ. ܛܲܝܒܘܼܬ݂ܵܐ ܥܲܡܟ݂ܘܿܢ ܘܲܫܠܵܡܵܐ.

²ܡܵܘܕܹܝܢ ܚ̄ܢܢ ܠܐܲܠܵܗܵܐ ܒܟ݂ܠܙܒܲܢ ܥܲܠ ܟܠܟ݂ܘܿܢ. ܘܡܸܬܿܕܲܟ݂ܪܝܼܢ ܚ̄ܢܲܢ ܠܟ݂ܘܿܢ ܒܲܨ̈ܠܵܘܵܬܲܢ ܐܲܡܝܼܢܵܐܝܼܬ݂.

³ܘܥܵܗܕܝܼܢ ܚ̄ܢܲܢ ܩܕ݂ܵܡ ܐܲܠܵܗܵܐ ܐܲܒ݂ܵܐ. ܥܒ݂ܵܕܹ̈ܐ ܕܗܲܝܡܵܢܘܼܬ݂ܟ݂ܘܿܢ. ܘܥܲܡܠܵܐ ܕܚܘܼܒܟ݂ܘܿܢ. ܘܲܡܣܲܝܒܪܵܢܘܼܬ݂ܵܐ ܕܣܲܒ݂ܪܟ݂ܘܿܢ. ܕܲܒ݂ܡܵܪܲܢ ܝܼܫܘܿܥ ܡܫܝܼܚܵܐ.

⁴ܝܵܕ݂ܥܝܼܢ ܚ̄ܢܲܢ ܓܹܝܪ ܓܲܒ݂ܝܘܼܬ݂ܟ݂ܘܿܢ ܐܲܚܲܝ̈ ܚܲܒܝܼܒ݂ܵܘܗܝ ܕܐܲܠܵܗܵܐ.

⁵ܡܛܠ ܕܲܡܣܲܒܪܵܢܘܼܬܲܢ ܠܵܐ ܗ̄ܘܵܐ ܒܡܸܠܹ̈ܐ ܒܲܠܚܘܿܕ݂ ܗܘܸܵܬ݂ ܠܘܵܬ݂ܟ݂ܘܿܢ. ܐܸܠܵܐ ܐܵܦ ܒܚܲܝܠܵܐ. ܘܲܒ݂ܪܘܼܚܵܐ ܕܩܘܼܕ݂ܫܵܐ. ܘܒܲܦܝܵܣܵܐ ܫܲܪܝܼܪܵܐ. ܐܵܦ ܐܲܢ̄ܬܿܘܿܢ ܝܵܕ݂ܥܝܼܢ ܐܢ̄ܬܘܿܢ. ܐܲܝܟܲܢܵܐ ܗܘܲܝܢ ܒܲܝܢܵܬ݂ܟ݂ܘܿܢ ܡܛܠܵܬ݂ܟ݂ܘܿܢ.

⁶ܘܐܲܢ̄ܬܿܘܿܢ ܒܲܢ ܐܸܬܿܕܲܡܝܼܬܿܘܢ ܘܲܒ݂ܡܵܪܲܢ. ܕܩܲܒܸܠܬܿܘܿܢ ܡܸܠܬ݂ܵܐ ܒܐܘܼܠܨܵܢܵܐ ܪܲܒܵܐ ܘܲܒ݂ܚܲܕ݂ܘܼܬ݂ܵܐ ܕܪܘܼܚܵܐ ܕܩܘܼܕ݂ܫܵܐ.

⁷ܘܲܗܘܲܝܬܿܘܿܢ ܕܡܘܼܬ݂ܵܐ ܠܟ݂ܠܗܘܿܢ ܡܗܲܝܡܢܹ̈ܐ ܕܐܝܼܬ݂ ܒܡܵܩܹܕܘܿܢܝܼܵܐ . ܘܒܲܐܟ݂ܵܐܝܼܵܐ.

⁸ܡܸܢܟ݂ܘܿܢ ܓܹܝܪ ܐܸܫܬܲܡܥܲܬ݂ ܡܸܠܬܹܗ ܕܡܵܪܲܢ. ܠܵܐ ܒܲܠܚܘܿܕ݂ ܒܡܵܩܹܕܘܿܢܝܼܵܐ ܘܒܲܐܟ݂ܵܐܝܼܵܐ. ܐܸܠܵܐ ܒܟ݂ܠ ܐܲܬܲܪ ܗܲܝܡܵܢܘܼܬ݂ܟ݂ܘܿܢ ܕܒܲܐܠܵܗܵܐ ܐܸܫܬܲܡܥܲܬ݂. ܐܲܝܟܲܢܵܐ ܕܠܵܐ ܢܸܣܬܿܢܸܩ ܕܢܹܐܡܲܪ ܥܠܲܝܟܿܘܿܢ ܡܸܕܸܡ.

⁹ܗܸܢܘܿܢ ܓܹܝܪ ܡܸܫܬܲܥܹܝܢ. ܐܲܝܢܵܐ ܡܲܥܠܵܢܵܐ ܗܘܵܐ ܠܲܢ ܠܘܵܬ݂ܟ݂ܘܿܢ. ܘܐܲܝܟܲܢܵܐ ܐܸܬ݂ܦܢܝܼܬܿܘܿܢ ܠܘܵܬ݂ ܐܲܠܵܗܵܐ ܡܸܢ ܕܸܚܠܲܬ݂ ܦܬܲܟ݂ܪܹ̈ܐ: ܕܬܸܦܠܚܘܼܢ ܠܐܲܠܵܗܵܐ ܚܲܝܵܐ ܘܫܲܪܝܼܪܵܐ.

¹⁰ܟܲܕ݂ ܡܣܲܟܹܝܢ ܐ̄ܢܬܿܘܢ ܠܲܒ݂ܪܹܗ ܡܸܢ ܫܡܲܝܵܐ. ܠܝܼܫܘܿܥ ܗܵܘ ܕܐܲܩܝܼܡ ܡܸܢ ܒܹܝܬ݂ ܡܝܼܬܹ̈ܐ ܕܗܘܼ ܡܦܲܨܹܐ ܠܲܢ ܡܸܢ ܪܘܼܓ݂ܙܵܐ ܕܐܵܬܹܐ.