Read Aramaic Peshita 1 Thessalonians 3 Bible Online

1 Thessalonians 3 - Aramaic Peshita bible

1 Thessalonians 3

¹ܘܡܛܠ ܕܠܵܐ ܚܲܡܣܸܢܢ. ܨܒܲܝܢ ܠܲܡܦܵܫ ܒܐܵܬܹܢܘܿܣ ܒܲܠܚܘܿܕܲܝܢ.

²ܘܲܢܫܲܕܲܪ ܠܘܵܬ݂ܟ݂ܘܿܢ ܠܛܝܼܡܵܬܹܐܘܿܣ ܐܲܚܘܼܢ ܘܲܡܫܲܡܫܵܢܵܐ ܕܐܲܠܵܗܵܐ. ܘܲܡܥܲܕܪܵܢܲܢ ܒܲܣܒܲܪܬܹܗ ܕܲܡܫܝܼܚܵܐ. ܕܲܢܫܲܪܲܪܟ݂ܘܿܢ ܘܢܸܒ݂ܥܹܐ ܡܸܢܟ݂ܘܿܢ ܥܲܠ ܗܲܝܡܵܢܘܼܬ݂ܟ݂ܘܿܢ.

³ܕܠܵܐ ܐ̄ܢܵܫ ܡܸܢܟ݂ܘܿܢ ܬܸܬ݂ܩܲܛܲܥ ܠܹܗ ܒܐܘܼܠܨܵܢܹ̈ܐ ܗܵܠܹܝܢ. ܐܲܢ̄ܬܿܘܿܢ ܓܹܝܪ ܝܵܕ݂ܥܝܼܢ ܐܢ̄ܬܘܿܢ. ܕܲܠܗܵܕܹܐ ܗܘܼ ܣܝܼܡܝܼܢ ܚ̄ܢܲܢ.

⁴ܐܵܦ ܟܲܕ݂ ܠܘܵܬ݂ܟ݂ܘܿܢ ܗܘܲܝܢ ܓܹܝܪ. ܩܲܕܸܡܢ ܐܸܡܲܪܢ ܠܟ݂ܘܿܢ. ܕܲܥܬ݂ܝܼܕ݂ܝܼܢ ܚ̄ܢܲܢ ܠܡܸܬ݂ܐܲܠܵܨܘܼ. ܐܲܝܟܲܢܵܐ ܕܝܵܕ݂ܥܝܼܢ ܐ̄ܢܬܘܿܢ ܕܲܗܘܵܐ.

⁵ܡܛܠ ܗܵܢܵܐ ܐܵܦ ܐܸܢܵܐ ܠܵܐ ܚܲܡܣܢܹܬ݂. ܥܕ݂ܲܡܵܐ ܕܫܲܕܪܹܬ݂ ܕܐܸܕܲܥ ܗܲܝܡܵܢܘܼܬ݂ܟ݂ܘܿܢ. ܕܕ݂ܲܠܡܵܐ ܢܢܲܣܹܝܟ݂ܘܿܢ ܡܢܲܣܝܵܢܵܐ. ܘܢܸܗܘܹܐ ܥܲܡܠܲܢ ܣܪܝܼܩܵܐ.

⁶ܗܵܫܵܐ ܕܹܝܢ ܡܸܢ ܕܐܸܬ݂ܵܐ ܠܘܵܬܲܢ ܛܝܼܡܵܬܹܐܘܿܣ ܡܸܢ ܨܸܐܕ݂ܲܝܟ݁ܘܿܢ. ܘܣܲܒ݂ܪܲܢ ܥܲܠ ܗܲܝܡܵܢܘܼܬ݂ܟ݂ܘܿܢ ܘܥܲܠ ܚܘܼܒܟ݂ܘܿܢ ܘܕܐܝܼܬ݂ ܠܘܵܬ݂ܟ݂ܘܿܢ ܥ̱ܘܗܕܵܢܲܢ ܛܵܒ݂ܵܐ ܒܟ݂ܠܥܸܕܵܢ: ܘܲܣܘܹܝܢ ܐ̄ܢܬܘܿܢ ܠܡܸܚܙܝܲܢ ܐܲܝܟܲܢܵܐ ܕܐܵܦ ܚܢܲܢ ܠܟ݂ܘܿܢ.

⁷ܡܛܠ ܗܵܢܵܐ ܐܸܬ݂ܒܲܝܲܐܢ ܒܟ݂ܘܿܢ ܐܲܚܲܝ̈ܢ: ܥܲܠ ܟܠܗܹܝܢ ܥܵܩ̈ܵܬܲܢ ܘܐܘܼܠܨܵܢܲܝ̈ܢ. ܡܛܠ ܗܲܝܡܵܢܘܼܬ݂ܟ݂ܘܿܢ.

⁸ܘܗܵܫܵܐ ܗܘܼ ܚܲܝܼܝܢܲܢ. ܐܸܢ ܐܲܢ̄ܬܿܘܿܢ ܬܸܬ݂ܩܲܝܡܘܼܢ ܒܡܵܪܲܢ.

⁹ܐܲܝܕ݂ܵܐ ܓܹܝܪ ܬܵܘܕܝܼܬ݂ܵܐ ܡܸܫܟܿܚܝܼܢ ܚ̄ܢܲܢ ܠܡܸܦܪܲܥ ܚܠܵܦܲܝܟܿܘܿܢ ܠܐܲܠܵܗܵܐ. ܥܲܠ ܟܠ ܚܲܕ݂ܘܼܬ݂ܵܐ ܕܚܵܕܹܝܢ ܚ̄ܢܲܢ ܡܛܠܵܬ݂ܟ݂ܘܿܢ.

¹⁰ܐܸܠܵܐ ܕܲܩܕ݂ܵܡ ܐܲܠܵܗܵܐ ܝܲܬܝܼܪܵܐܝܼܬ݂ ܢܸܬ݂ܟܲܫܲܦ ܒܠܸܠܝܵܐ ܘܒ݂ܐܝܼܡܵܡܵܐ . ܕܢܸܚܙܹܐ ܐܲܦܲܝ̈ܟܿܘܿܢ: ܘܢܸܓ݂ܡܘܿܪ ܡܵܐ ܕܚܲܣܝܼܪܵܐ ܗܲܝܡܵܢܘܼܬ݂ܟ݂ܘܿܢ.

¹¹ܗܘܼ ܕܹܝܢ ܐܲܠܵܗܵܐ ܐܲܒ݂ܘܼܢ ܘܡܵܪܲܢ ܝܼܫܘܿܥ ܡܫܝܼܚܵܐ. ܢܸܬ݂ܪܘܿܨ ܐܘܼܪܚܲܢ ܠܘܵܬ݂ܟ݂ܘܿܢ.

¹²ܘܢܲܣܓܹ݁ܐ ܘܲܢܝܲܬܲܪ ܚܘܼܒܟ݂ܘܿܢ ܕܚܲܕ݂ ܠܘܵܬ݂ ܚܲܕ݂ ܘܕ݂ܲܠܘܵܬ݂ ܟܠܢܵܫ. ܐܲܝܟܲܢܵܐ ܕܲܚܢܲܢ ܡܲܚܒ݂ܝܼܢ ܚ̄ܢܲܢ ܠܟ݂ܘܿܢ.

¹³ܘܲܢܩܲܝܸܡ ܠܸܒܵܘܵܬ݂ܟ݂̈ܘܿܢ ܕܠܵܐ ܪܸܫܝܵܢ ܒܩܲܕ݁ܝܼܫܘܼܬ݂ܵܐ ܩܕ݂ܵܡ ܐܲܠܵܗܵܐ ܐܲܒ݂ܘܼܢ. ܒܡܹܐܬ݂ܝܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܕܥܲܡ ܟܠܗܘܿܢ ܩܲܕ݁ܝܼܫܵܘ̈ܗܝ.