Read Aramaic Peshita 1 Thessalonians 4 Bible Online

1 Thessalonians 4 - Aramaic Peshita bible

1 Thessalonians 4

¹ܡܸܟܹܝܠ ܐܲܚܲܝ̈ ܒܵܥܹܝܢ ܚ̄ܢܲܢ ܡܸܢܟ݂ܘܿܢ. ܘܡܸܬ݂ܟܲܫܦܝܼܢ ܚ̄ܢܲܢ ܠܟ݂ܘܿܢ ܒܡܵܪܲܢ ܝܼܫܘܿܥ. ܕܐܲܝܟ݂ ܕܩܲܒܸܠܬܿܘܿܢ ܡܸܢܲܢ. ܐܲܝܟܲܢ ܘܵܠܹܐ ܠܟ݂ܘܿܢ ܕܲܬ݂ܗܲܠܟ݂ܘܿܢ ܘܬܸܫܦܪܘܼܢ ܠܐܲܠܵܗܵܐ. ܕܝܲܬܝܼܪܵܐܝܼܬ݂ ܬܵܘܣܦܘܼܢ.

²ܝܵܕ݂ܥܝܼܢ ܐ̄ܢܬܘܿܢ ܓܹܝܪ. ܐܲܝܠܹܝܢ ܦܘܼܩܕܵܢܹ̈ܐ ܝܲܗ̄ܒ݂ܢ ܠܟ݂ܘܿܢ. ܒܡܵܪܲܢ ܝܼܫܘܿܥ.

³ܗܵܢܵܘ ܓܹܝܪ ܨܸܒ݂ܝܵܢܹܗ ܕܐܲܠܵܗܵܐ. ܩܲܕ݁ܝܼܫܘܼܬ݂ܟ݂ܘܿܢ. ܘܲܕܬܸܗܘܘܿܢ ܦܲܪܝܼܩܝܼܢ ܡܸܢ ܟܠ ܙܵܢܝܘܼܬ݂ܵܐ.

⁴ܘܢܸܗܘܹܐ ܝܵܕ݂ܲܥ ܐ̄ܢܵܫ ܐ̄ܢܵܫ ܡܸܢܟ݂ܘܿܢ ܠܡܸܩܢܵܐ ܡܵܐܢܹܗ ܒܩܲܕ݁ܝܼܫܘܼܬ݂ܵܐ ܘܒ݂ܐܝܼܩܵܪܵܐ.

⁵ܘܠܵܐ ܒܚܲܫܹ̈ܐ ܕܪܸܓ݁ܬ݂ܵܐ. ܐܲܝܟ݂ ܫܲܪܟܵܐ ܕܥܲܡ̈ܡܹܐ ܗܵܢܘܿܢ ܕܠܵܐ ܝܵܕ݂ܥܝܼܢ ܠܐܲܠܵܗܵܐ.

⁶ܘܠܵܐ ܬܸܗܘܘܿܢ ܡܫܝܼܚܝܼܢ ܠܡܸܥܒܲܪ ܘܲܠܡܸܥܠܲܒ݂ ܐ̄ܢܵܫ ܠܐܲܚܘܼܗܝ ܒܗܵܕܹܐ ܨܒ݂ܘܼܬ݂ܵܐ. ܡܛܠ ܕܡܵܪܲܢ ܗܘܼ ܬܵܒ݂ܘܿܥܵܐ ܥܲܠ ܗܵܠܹܝܢ ܟܠܗܹܝܢ. ܐܲܝܟܲܢܵܐ ܕܐܵܦ ܡܸܢ ܩܕ݂ܵܡ ܙܲܒ݂ܢܵܐ ܐܸܡܲܪܢ ܠܟ݂ܘܿܢ. ܘܣܲܗܸܕ݂ܢ.

⁷ܠܵܐ ܓܹܝܪ ܩܪܵܟ݂ܘܿܢ ܐܲܠܵܗܵܐ ܠܛܲܢܦܘܼܬ݂ܵܐ. ܐܸܠܵܐ ܠܩܲܕ݁ܝܼܫܘܼܬ݂ܵܐ.

⁸ܡܸܟܹܝܠ ܡܲܢ ܕܛܵܠܹܡ. ܠܵܐ ܗ̄ܘܵܐ ܠܒܲܪܢܵܫܵܐ ܛܵܠܹܡ ܐܸܠܵܐ ܠܐܲܠܵܗܵܐ. ܗܵܘ ܕܝܲܗ̄ܒ݂ ܒܟ݂ܘܿܢ ܪܘܼܚܹܗ ܩܲܕ݁ܝܼܫܬܵܐ.

⁹ܥܲܠ ܚܘܼܒܵܐ ܕܹܝܢ ܕܐܲܚܹ̈ܐ. ܠܵܐ ܣܢܝܼܩܝܼܢ ܐ̄ܢܬܿܘܿܢ ܠܡܸܟ݂ܬܲܒ݂ ܠܟ݂ܘܿܢ. ܐܲܢ̄ܬܿܘܿܢ ܓܹܝܪ ܩܢܘܿܡܟ݂ܘܿܢ ܡܲܠܦܹ̈ܐ ܐܲܢܬܘܿܢ ܕܐܲܠܵܗܵܐ. ܕܬܲܚܒ݂ܘܼܢ ܚܲܕ݂ ܠܚܲܕ݂.

¹⁰ܐܵܦ ܥܵܒ݂ܕܝܼܢ ܐ̄ܢܬܘܿܢ ܗܵܟܲܢܵܐ ܠܟ݂ܠܗܘܿܢ ܐܲܚܹ̈ܐ ܕܲܒܟ݂ܠܵܗܿ ܡܵܩܹܕܘܿܢܝܼܵܐ. ܒܵܥܹܐ ܐ̄ܢܵܐ ܕܹܝܢ ܡܸܢܟ݂ܘܿܢ ܐܲܚܲܝ̈. ܕܬܸܬ݂ܝܲܬܿܪܘܼܢ

¹¹ܘܬܸܬ݂ܚܲܦܛܘܼܢ. ܕܬܸܗܘܘܿܢ ܫܠܹܝܢ ܘܲܥܢܹܝܢ ܒܣܘܥܪ̈ܵܢܲܝܟ݁ܘܿܢ: ܘܲܗܘܲܝܬܿܘܿܢ ܦܵܠܚܝܼܢ ܒܐܝܼܕ݂ܲܝ̈ܟ݁ܘܿܢ ܐܲܝܟܲܢܵܐ ܕܦܲܩܸܕ݂ܢܵܟ݂ܘܿܢ.

¹²ܕܬܸܗܘܘܿܢ ܡܗܲܠܟ݂ܝܼܢ ܒܐܸܣܟܹܡܵܐ ܠܘܵܬ݂ ܒܲܪ̈ܵܝܹܐ ܘܥܲܠ ܐ̄ܢܵܫ ܠܵܐ ܬܸܣܬܲܢܩܘܼܢ.

¹³ܨܵܒܹܐ ܐ̄ܢܵܐ ܕܹܝܢ ܕܬܸܕ݂ܥܘܼܢ ܐܲܚܲܝ̈. ܕܥܲܠ ܐܲܝܠܹܝܢ ܕܕ݂ܵܡܟ݁ܝܼܢ ܠܵܐ ܬܸܗܘܹܐ ܟܵܪܝܵܐ ܠܟ݂ܘܿܢ. ܐܲܝܟ݂ ܫܲܪܟܵܐ ܕܐ̄ܢܵܫܵܐ ܕܣܲܒ݂ܪܵܐ ܠܲܝܬܿ ܠܗܘܿܢ.

¹⁴ܐܸܢ ܓܹܝܪ ܡܗܲܝܡܢܝܼܢ ܚ̄ܢܲܢ ܕܝܼܫܘܿܥ ܡܝܼܬ݂ ܘܩܼܵܡ. ܗܵܟܲܢܵܐ ܐܵܦ ܐܲܠܵܗܵܐ ܠܐܲܝܠܹܝܢ ܕܲܕ݂ܡܸܟ݂ܘ ܒܝܼܫܘܿܥ ܡܲܝܬܹܐ ܥܲܡܹܗ.

¹⁵ܗܵܕܹܐ ܕܹܝܢ ܐܵܡܪܝܼܢ ܚ̄ܢܲܢ ܠܟ݂ܘܿܢ ܒܡܸܠܬܹܗ ܕܡܵܪܲܢ. ܕܲܚܢܲܢ ܐܲܝܠܹܝܢ ܕܡܸܫܬܲܚܪܝܼܢ ܚ̄ܢܲܢ ܒܡܹܐܬ݂ܝܼܬܹܗ ܕܡܵܪܲܢ ܕܚܲܝܝܼܢܲܢ. ܠܵܐ ܢܲܕ݂ܪܸܟ݂ ܠܐܲܝܠܹܝܢ ܕܲܕ݂ܡܸܟ݂ܘ.

¹⁶ܡܛܠ ܕܗܘܼ ܡܵܪܲܢ ܒܦܘܼܩܕܵܢܵܐ. ܘܲܒ݂ܩܵܠܵܐ ܕܪܹܫ ܡܲܠܲܐܟܹ̈ܐ. ܘܲܒ݂ܩܲܪܢܵܐ ܕܐܲܠܵܗܵܐ. ܢܚܸܬ݂ ܡܸܢ ܫܡܲܝܵܐ. ܘܡܝܼܬܹ̈ܐ ܕܒܲܡܫܝܼܚܵܐ ܢܩܘܼܡܘܼܢ ܠܘܼܩܕ݂ܲܡ.

¹⁷ܘܗܵܝܕܹܝܢ ܚܢܲܢ ܐܲܝܠܹܝܢ ܕܡܸܫܬܲܚܪܝܼܢ ܚ̄ܢܲܢ ܕܚܲܝܝܼܢܲܢ. ܢܸܬ݂ܚܛܸܦ ܥܲܡܗܘܿܢ ܐܲܟ݂ܚܕ݂ܵܐ ܒܲܥܢܵܢܹ̈ܐ ܠܐܘܼܪܥܹܗ ܕܡܵܪܲܢ ܒܵܐܐܲܪ. ܘܗܵܟܲܢܵܐ ܒܟ݂ܠܙܒܲܢ ܥܲܡ ܡܵܪܲܢ ܢܸܗܘܹܐ.

¹⁸ܗܘܵܘ ܗܵܟܹܝܠ ܡܒܲܝܐܝܼܢ ܚܲܕ݂ ܠܚܲܕ݂. ܒܡܸܠܹ̈ܐ ܗܵܠܹܝܢ.