Read Aramaic Peshita 1 Thessalonians 5 Bible Online

1 Thessalonians 5 - Aramaic Peshita bible

1 Thessalonians 5

¹ܥܲܠ ܙܲܒ݂ܢܹ̈ܐ ܕܹܝܢ ܘܥܸܕܵܢܹ̈ܐ. ܐܲܚܲܝ̈. ܠܵܐ ܣܢܝܼܩܝܼܢ ܐ̄ܢܬܿܘܿܢ ܠܡܸܟ݂ܬܲܒ݂ ܠܟ݂ܘܿܢ.

²ܐܲܢ̄ܬܿܘܿܢ ܓܹܝܪ ܫܲܪܝܼܪܵܐܝܼܬ݂ ܝܵܕ݂ܥܝܼܢ ܐܢ̄ܬܘܿܢ. ܕܝܵܘܡܹܗ ܕܡܵܪܲܢ ܐܲܝܟ݂ ܓܲܢܵܒ݂ܵܐ ܒܠܸܠܝܵܐ. ܗܵܟܲܢܵܐ ܐܵܬܹܐ.

³ܟܲܕ݂ ܢܹܐܡܪܘܼܢ ܕܲܫܠܵܡܵܐ ܗ̄ܘܼ ܘܫܲܝܢܵܐ. ܘܗܵܝܕܹܝܢ ܡܸܢ ܫܸܠܝܵܐ ܢܩܘܼܡ ܥܠܲܝܗܘܿܢ ܐܲܒ݂ܕܵܢܵܐ. ܐܲܝܟ݂ ܚܸܒ݂̈ܠܹܐ ܥܲܠ ܒܲܛܢܬ݂ܵܐ. ܘܠܵܐ ܢܲܡܕ݂ܘܼܢ.

⁴ܐܲܢ̄ܬܿܘܿܢ ܕܹܝܢ ܐܲܚܲܝ̈. ܠܵܐ ܗܘܲܝܬܿܘܿܢ ܒܚܸܫܘܿܟ݂ܵܐ. ܕܗܵܘ ܝܵܘܡܵܐ ܐܲܝܟ݂ ܓܲܢܵܒ݂ܵܐ ܢܲܕ݂ܪܸܟ݂ܟ݂ܘܿܢ.

⁵ܟܠܟ݂ܘܿܢ ܓܹܝܪ ܒܢܲܝ̈ ܢܘܼܗܪܵܐ ܐܲܢ̄ܬܿܘܿܢ ܘܲܒ݂ܢܲܝ̈ ܐܝܼܡܵܡܵܐ. ܘܠܵܐ ܗܘܲܝܬܿܘܿܢ ܒܢܲܝ̈ ܠܸܠܝܵܐ ܘܠܵܐ ܒܢܲܝ̈ ܚܸܫܘܿܟ݂ܵܐ.

⁶ܠܵܐ ܢܸܕ݂ܡܲܟ݂ ܗܵܟܹܝܠ ܐܲܝܟ݂ ܫܲܪܟܵܐ. ܐܸܠܵܐ ܗܘܲܝܢ ܥܝܼܪܝܼܢ ܘܲܡܗܵܘܢܝܼܢ.

⁷ܐܲܝܠܹܝܢ ܓܹܝܪ ܕܕ݂ܵܡܟ݁ܝܼܢ. ܒܠܸܠܝܵܐ ܗ̄ܘܼ ܕܵܡܟ݁ܝܼܢ. ܘܐܲܝܠܹܝܢ ܕܪܵܘܹܝܢ. ܒܠܸܠܝܵܐ ܗ̄ܘܼ ܪܵܘܹܝܢ.

⁸ܚܢܲܢ ܕܹܝܢ ܕܲܒ݂ܢܲܝ̈ ܐܝܼܡܵܡܵܐ ܚܢܲܢ. ܗܘܲܝܢ ܥܝܼܪܝܼܢ ܒܪܸܥܝܵܢܲܢ. ܘܲܠܒ݂ܝܼܫܝܼܢ ܫܸܪܝܵܢܵܐ ܕܗܲܝܡܵܢܘܼܬ݂ܵܐ ܘܲܕܚܘܼܒܵܐ. ܘܲܢܣܝܼܡ ܣܲܢܘܲܪܬܵܐ ܕܣܲܒ݂ܪܵܐ ܕܚܲܝܹ̈ܐ.

⁹ܡܛܠ ܕܠܵܐ ܣܵܡܲܢ ܐܲܠܵܗܵܐ ܠܪܘܼܓ݂ܙܵܐ. ܐܸܠܵܐ ܠܩܸܢܝܵܢܵܐ ܕܚܲܝܹ̈ܐ ܒܡܵܪܲܢ ܝܼܫܘܿܥ ܡܫܝܼܚܵܐ.

¹⁰ܗܵܘ ܕܡܝܼܬ݂ ܥܲܠ ܐܲܦܲܝ̈ܢ: ܕܐܸܢ ܥܝܼܪܝܼܢ ܚ̄ܢܲܢ ܘܐܸܢ ܕܵܡܟܝܼܢ ܚ̄ܢܲܢ. ܐܲܟ݂ܚܕ݂ܵܐ ܥܲܡܹܗ ܢܸܚܹܐ.

¹¹ܡܛܠ ܗܵܢܵܐ ܒܲܝܲܐܘ ܚܲܕ݂ ܠܚܲܕ݂. ܘܒܲܢܵܘ ܚܲܕ݂ ܠܚܲܕ݂. ܐܲܝܟܲܢܵܐ ܕܐܵܦ ܥܵܒ݂ܕܝܼܢ ܐ̄ܢܬܿܘܿܢ.

¹²ܒܵܥܹܝܢ ܚ̄ܢܲܢ ܕܹܝܢ ܡܸܢܟ݂ܘܿܢ ܐܲܚܲܝ̈. ܕܲܗܘܲܝܬܿܘܿܢ ܝܵܕ݂ܥܝܼܢ ܠܐܲܝܠܹܝܢ ܕܠܵܐܹܝܢ ܒܟ݂ܘܿܢ. ܘܩܵܝܡܝܼܢ ܒܐܲܦܲܝ̈ܟܿܘܿܢ ܒܡܵܪܲܢ. ܘܡܲܠܦܝܼܢ ܠܟ݂ܘܿܢ.

¹³ܕܲܗܘܵܘ ܚܫܝܼܒ݂ܝܼܢ ܠܟ݂ܘܿܢ ܒܚܘܼܒܵܐ ܝܲܬܝܼܪܵܐ. ܘܡܛܠ ܥܒ݂ܵܕ݂ܗܘܿܢ ܐܸܫܬܲܝܲܢܘ ܥܲܡܗܘܿܢ.

¹⁴ܒܵܥܹܝܢ ܚ̄ܢܲܢ ܕܹܝܢ ܡܸܢܟ݂ܘܿܢ ܐܲܚܲܝ̈. ܪܕ݂ܵܘ ܠܡܲܣܟܠܵܢܹ̈ܐ. ܘܠܲܒܸܒ݂ܘ ܠܲܙܥܘܿܪ̈ܲܝ ܢܲܦ̮ܫܵܐ. ܘܣܲܒ݂ܘ ܛܲܥܢܵܐ ܕܲܡܚܝܼܠܹ̈ܐ. ܘܐܲܓܲܪܘ ܪܘܼܚܟ݂ܘܿܢ ܠܘܵܬ݂ ܟܠܢܵܫ.

¹⁵ܘܐܸܙܕܲܗ̄ܪܘ ܕܲܠܡܵܐ ܐ̄ܢܵܫ ܡܸܢܟ݂ܘܿܢ ܒܝܼܫܬܵܐ ܚܠܵܦ ܒܝܼܫܬܵܐ ܢܸܦܪܘܿܥ. ܐܸܠܵܐ ܒܟ݂ܠܙܒܲܢ ܗܲܪ̱ܛܘ ܒܵܬܲܪ ܛܵܒ݂ܵܬ݂ܵܐ ܠܘܵܬ݂ ܚܕ݂ܵܕܹ̈ܐ. ܘܲܠܘܵܬ݂ ܟܠܢܵܫ.

¹⁶ܗܘܵܘ ܚܵܕܹܝܢ ܒܟ݂ܠܙܒܲܢ.

¹⁷ܘܲܡܨܲܠܹܝܢ ܕܠܵܐ ܫܲܠܘܵܐ.

¹⁸ܘܲܒܟ݂ܠ ܡܸܕܸܡ ܗܘܵܘ ܡܵܘܕܹܝܢ. ܗܵܢܵܘ ܓܹܝܪ ܨܸܒ݂ܝܵܢܹܗ ܕܐܲܠܵܗܵܐ ܒܝܼܫܘܿܥ ܡܫܝܼܚܵܐ ܒܟ݂ܘܿܢ.

¹⁹ܪܘܼܚܵܐ ܠܵܐ ܬܿܕ݂ܲܥܟ݂ܘܼܢ.

²⁰ܢܒ݂̈ܝܼܵܘܵܬ݂ܵܐ ܠܵܐ ܬܲܣܠܘܿܢ.

²¹ܟܠܡܸܕܸܡ ܒܩܵܘ. ܘܲܕ݂ܫܲܦܝܼܪ ܐܲܚܘܿܕ݂ܘ.

²²ܘܡܸܢ ܟܠ ܨܒ݂ܘܼ ܒܝܼܫܵܐ ܥܪܘܿܩܘ.

²³ܗܘ̤ ܕܹܝܢ ܐܲܠܵܗܵܐ ܕܲܫܠܵܡܵܐ. ܢܩܲܕܫܟ݂ܘܿܢ ܓܡܝܼܪܵܐܝܼܬ݂ ܠܟ݂ܠܟ݂ܘܿܢ. ܘܟ݂ܠܵܗܿ ܪܘܼܚܟ݂ܘܿܢ ܘܢܲܦ̮ܫܟ݂ܘܿܢ ܘܦܲܓ݂ܪܟ݂ܘܿܢ. ܢܢܲܛܲܪ ܕܠܵܐ ܪܸܫܝܵܢ. ܠܡܹܐܬ݂ܝܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ.

²⁴ܡܗܲܝܡܲܢ ܗܘܼ ܡܲܢ ܕܲܩܪܵܟ݂ܘܿܢ. ܕܗܘܼ ܢܸܥܒܸܕ݂.

²⁵ܐܲܚܲܝ̈ ܨܲܠܵܘ ܥܠܲܝܢ.

²⁶ܫܲܐܠܘ ܒܲܫܠܵܡܵܐ ܕܐܲܚܲܝ̈ܢ ܟܠܗܘܿܢ ܒܢܘܼܫܩܬܵܐ ܩܲܕ݁ܝܼܫܬܵܐ.

²⁷ܡܵܘܡܹܐ ܐ̄ܢܵܐ ܠܟ݂ܘܿܢ ܒܡܵܪܲܢ. ܕܬܸܬ݂ܩܪܹܐ ܐܸܓܲܪܬܵܐ ܗܵܕܹܐ ܠܟ݂ܠܗܘܿܢ ܐܲܚܹ̈ܐ ܩܲܕ݁ܝܼܫܹ̈ܐ.

²⁸ܛܲܝܒܘܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡܟ݂ܘܿܢ. ܐܵܡܹܝܢ.