Read Aramaic Peshita Joshua 10 Bible Online

Joshua 10 - Aramaic Peshita bible

Joshua 10

¹ܘܟܲܕ݂ ܫ̣ܡܲܥ ܐܲܕ݂ܘܿܢܝܼܨܕܸܩ ܡܲܠܟܵܐ ܕܐܘܿܪܸܫܠܸܡ: ܕܟܲܒ̣ܫܵܗ̇ ܝܼܫܘܿܥ ܠܥܵܝ ܘܚܲܪܒܵܗ̇: ܐܲܝܟܲܢܵܐ ܕܲܥ̣ܒܲܕ݂ ܠܐܝܼܪܝܼܚܘܿ ܘܲܠܡܲܠܟܵܗ̇: ܗܵܟܲܢܵܐ ܥ̣ܒܲܕ݂ ܠܥܵܝ ܘܲܠܡܲܠܟܵܗ̇: ܘܕܲܫܠܸܡܘ ܥܵܡܘܿܪܹ̈ܝܗ̇ ܕܓܸܒ̣ܥܘܿܢ ܥܲܡ ܝܼܣܪܵܝܹܠ ܘܲܗܘ̤ܵܘ ܒܲܝܢܵܬ̣ܗܘܿܢ.

²ܕܚܸܠ ܛܵܒ̣: ܡܸܛܠ ܕܲܡܕ݂ܝܼܢ̄ܬܵܐ ܗ̄ܝ̣ ܪܲܒ̇ܬ̣ܵܐ ܓܸܒ̣ܥܘܿܢ: ܐܲܝܟ݂ ܚܕ݂ܵܐ ܡ̣ܢ ܡܕ݂ܝܼ̈ܢܵܬ̣ܵܐ ܕܡܲܠܟ̇ܘܼܬ̣ܵܐ. ܘܪܲܒܵܐ ܗ̄ܘ̣ܵܬ̣ ܡ̣ܢ ܥܵܝ: ܘܟ݂ܠܗܘܿܢ ܓܲܒ̣ܪܹ̈ܝܗ̇ ܓܲܢ̄ܒܵܪ̈ܝܼܢ ܗ̄ܘ̣ܵܘ.

³ܘܫܲܕܲܪ ܐܲܕ݂ܘܿܢܝܼܨܕܸܩ ܡܲܠܟܵܐ ܕܐܘܿܪܸܫܠܸܡ ܠܘܵܬ̣ ܗܘܿܗܵܡ ܡܲܠܟܵܐ ܕܚܸܒ̣ܪܘܿܢ: ܘܲܠܘܵܬ̣ ܒܲܪܐܵܢ ܡܲܠܟܵܐ ܕܝܲܪܡܘܼܬ̣: ܘܲܠܘܵܬ̣ ܢܵܦܝܼܥ ܡܲܠܟܵܐ ܕܲܠܟ݂ܝܼܫ: ܘܲܠܘܵܬ̣ ܕܵܒ̣ܝܼܪ ܡܲܠܟܵܐ ܕܥܸܓ̣ܠܘܿܢ.

⁴ܘܲܫܠܲܚ ܠܗܘܿܢ: ܕܣܲܩܘ ܠܘܵܬ̣ܝ ܘܲܗܘ̤ܵܘ ܠܝܼ ܥܸܕ݂ܪܵܐ: ܘܢܸܬ̣ܟܲܬܲܫ ܥܲܡ ܓܸܒ̣ܥܘܿܢ: ܡܸܛܠ ܕܐܲܫܠ̱ܡܲܬ̤ ܠܵܗ̇ ܥܲܡ ܝܼܫܘܿܥ: ܘܥܲܡ ܝܼܣܪܵܝܹܠ.

⁵ܘܐܸܬ̣ܟܲܢܲܫܘ ܘܲܣܠܸܩܘ ܚܲܡܫܵܐ ܡܲܠܟܲܝ̈ܗܘܿܢ ܕܐܵܡܘܿܪ̈ܵܝܹܐ: ܡܲܠܟܵܐ ܕܐܘܿܪܸܫܠܸܡ: ܘܡܲܠܟܵܐ ܕܚܸܒ̣ܪܘܿܢ: ܘܡܲܠܟܵܐ ܕܝܲܪܡܘܼܬ̣: ܘܡܲܠܟܵܐ ܕܲܠܟ݂ܝܼܫ: ܘܡܲܠܟܵܐ ܕܥܸܓ̣ܠܘܿܢ: ܗܸܢܘܿܢ ܘܟ݂ܠܗܹܝܢ ܡܲܫ̱ܪ̈ܝܵܬ̣ܗܘܿܢ. ܘܲܫܪܵܘ ܥܲܠ ܓܸܒ̣ܥܘܿܢ: ܘܲܥܒܲܕ݂ܘ ܥܲܡܵܗ̇ ܩܪܵܒ̣ܵܐ.

⁶ܘܫܲܕܲܪܘ ܐ̄ܢܵܫܵܐ ܕܓܸܒ̣ܥܘܿܢ ܠܘܵܬ̣ ܝܼܫܘܿܥ ܠܡܲܫܪܝܼܬ̣ܵܐ ܠܓܲܠܓܵܠܵܐ ܘܐܸܡܲܪܘ ܠܹܗ: ܠܵܐ ܬܲܪܫܸܠ ܐܝܼܕܲܝ̈ܟ ܡ̣ܢ ܥܲܒ̣ܕܲܝ̈ܟ: ܡܸܛܠ ܕܐܸܬ̣ܟܲܢܲܫܘ ܥܠܲܝܢ ܟܠܗܘܿܢ ܡܲܠܟܲܝ̈ܗܘܿܢ ܕܐܵܡܘܿܪ̈ܵܝܹܐ ܕܥܵܡ̇ܪܝܼܢ ܒܛܘܼܪܵܐ.

⁷ܘܲܣܠܸܩ ܝܼܫܘܿܥ ܡ̣ܢ ܓܲܠܓܵܠܵܐ: ܗ̤ܘ ܘܟ݂ܠܹܗ ܥܲܡܵܐ ܩܪܲܒ̣ܬ̣ܵܢܵܐ ܕܥܲܡܹܗ: ܘܟ݂ܠܗܘܿܢ ܓܲܢ̄ܒܵܪ̈ܲܝ ܚܲܝܠܵܐ.

⁸ܘܐܸܡܲܪ ܡܵܪܝܵܐ ܠܝܼܫܘܿܥ: ܠܵܐ ܬܸܕ݂ܚܲܠ ܡܸܢܗܘܿܢ: ܡܸܛܠ ܕܒ̣ܐܝܼܕܲܝ̈ܟ ܐܲܫ̱ܠܡܹ̇ܬ̣ ܐܸܢܘܿܢ: ܘܚܲܕ݂ ܡܸܢܗܘܿܢ ܡܸܫܟܲܚ ܠܲܡܩܵܡ ܩܕ݂ܵܡܲܝܟ.

⁹ܘܐܸܬ̣ܵܐ ܠܘܵܬ̣ܗܘܿܢ ܝܼܫܘܿܥ ܡ̣ܢ ܫܸܠܝܵܐ: ܟܠܹܗ ܠܸܠܝܵܐ ܣܠܸܩ̣ ܗ̄ܘ̣ܵܐ ܡ̣ܢ ܓܲܠܓܵܠܵܐ.

¹⁰ܘܕܲܠܲܚ ܐܸܢܘܿܢ ܡܵܪܝܵܐ ܩܕ݂ܵܡ ܝܼܣܪܵܝܹܠ: ܘܲܡ̣ܚܵܘ ܐܸܢܘܿܢ ܡܚܘܿܬ̣ܵܐ ܪܲܒ̇ܬ̣ܵܐ ܒܓܸܒ̣ܥܘܿܢ ܕܒܹܝܬ̣ ܚܵܘܪܵܢ: ܘܲܪܕܲܦܘ ܐܸܢܘܿܢ ܒܐܘܼܪܚܵܐ ܕܡܲܣܩܵܢܵܐ ܕܒܹܝܬ̣ ܚܵܘܪܵܢ: ܘܲܚܪܲܒ̣ܘ ܐܸܢܘܿܢ ܥܕܲܡܵܐ ܠܥܵܩܵܪ: ܘܲܥܕܲܡܵܐ ܠܡܵܩܵܪ.

¹¹ܘܟܲܕ݂ ܥܪܲܩ̣ܘ ܡ̣ܢ ܩܕ݂ܵܡ ܝܼܣܪܵܝܹܠ: ܘܢܵܚܬ̇ܝܼܢ ܗ̄ܘ̣ܵܘ ܒܡܲܚܲܬ̇ܬ̣ܵܐ ܕܒܹܝܬ̣ ܚܵܘܪܵܢ: ܘܡܵܪܝܵܐ ܫܕ݂ܵܐ ܥܲܠܝܗܘܿܢ ܟܹܐܦܹ̈ܐ ܪܵܘ̱ܪ̈ܒ̣ܵܬ̣ܵܐ ܡ̣ܢ ܫܡܲܝܵܐ: ܥܕܲܡܵܐ ܠܥܵܩܵܪ ܘܡܝܼܬ̣ܘ. ܘܣܲܓ̇ܝܼܐܝܼܢ ܗ̄ܘ̣ܵܘ ܕܡܝܼܬ̣ܘ ܒܟܹܐܦܹ̈ܐ ܕܒܲܪܕ݂ܵܐ: ܡ̣ܢ ܗܵܢܘܿܢ ܕܲܚܪܲܒ̣ܘ ܒ̈ܢܲܝ ܝܼܣܪܵܝܹܠ ܒܚܲܪܒܵܐ.

¹²ܗܵܝܕܹ̇ܝܢ ܡܲܠܸܠ̣ ܝܼܫܘܿܥ ܩܕ݂ܵܡ ܡܵܪܝܵܐ: ܒܝܵܘܡܵܐ ܕܐܲܫܠܸܡ ܡܵܪܝܵܐ ܠܐܵܡܘܿܪ̈ܵܝܹܐ ܩܕ݂ܵܡ ܝܼܣܪܵܝܹܠ. ܘܐܸܡܲܪ ܝܼܫܘܿܥ ܩܕ݂ܵܡ ܒ̈ܢܲܝ ܝܼܣܪܵܝܹܠ: ܫܸܡܫܵܐ ܒܓܸܒ̣ܥܘܿܢ ܟܲܬܲܪ: ܘܐܲܢ̄ܬ̇ ܣܲܗܪܵܐ ܒܲܦܩܲܥܬ̣ܵܐ ܕܐܲܝܠܘܿܢ.

¹³ܘܟܲܬܲܪ ܫܸܡܫܵܐ: ܘܣܲܗܪܵܐ ܩܵܡ: ܥܕܲܡܵܐ ܕܐܸܬ̣ܦܪܲܥ ܥܲܡܵܐ ܡ̣ܢ ܒܥܸܠܕ̇ܒ̣ܵܒ̣ܵܘ̈ܗܝ: ܘܗܵܐ ܟܬ̣ܝܼܒ̣ ܒܣܸܦܪܵܐ ܕܬܸܫ̈ܒ̇ܚܵܬ̣ܵܐ: ܘܩܵܡ̣ ܫܸܡܫܵܐ ܒܦܸܠܓ̇ܘܼܬ̣ ܫܡܲܝܵܐ: ܘܠܵܐ ܣܲܪܗܸܒ̣ ܠܡܸܥܪܲܒ̣: ܘܲܗܘ̤ܵܐ ܐܲܝܟ݂ ܝܵܘܡܵܐ ܫܲܠܡܵܐ.

¹⁴ܘܠܵܐ ܗܘ̤ܵܐ ܐܲܝܟ݂ ܝܵܘܡܵܐ ܗܵܘ̇ ܩܕ݂ܵܡܵܘܗܝ ܐܵܘ ܒܵܬ̣ܪܹܗ: ܐܲܝܟܲܢܵܐ ܕܲܫ̣ܡܲܥ ܡܵܪܝܵܐ ܒܩܵܠܹܗ ܕܐ̄ܢܵܫ: ܡܸܛܠ ܕܡܵܪܝܵܐ ܥܵܒܹܕ݂ ܗ̄ܘ̣ܵܐ ܩܪܵܒ̣ܵܐ ܠܝܼܣܪܵܝܹܠ.

¹⁵ܘܲܗ̣ܦܲܟ݂ ܝܼܫܘܿܥ ܘܟ݂ܠܹܗ ܝܼܣܪܵܝܹܠ ܥܲܡܹܗ ܠܡܲܫܪܝܼܬ̣ܵܐ ܠܓܲܠܓܵܠܵܐ.

¹⁶ܘܲܥܪܲܩ̣ܘ ܚܲܡܫܵܐ ܡܲܠܟ̇ܝܼ̈ܢ ܗܵܠܹܝܢ: ܘܐܸܬ̇ܛܲܫܝܼܘ ܒܲܡܥܲܪܬ̣ܵܐ ܕܡܵܩܵܪ.

¹⁷ܘܐܸܫܬ̇ܡܲܥ ܠܝܼܫܘܿܥ ܘܐܸܡܲܪܘ ܠܹܗ: ܕܐܸܫܬ̇ܟܲܚܘ ܚܲܡܫܵܐ ܡܲܠܟ̇ܝܼ̈ܢ ܗܵܠܹܝܢ: ܟܲܕ݂ ܛܫܹܝܢ ܒܲܡܥܲܪܬ̣ܵܐ ܕܡܵܩܵܪ.

¹⁸ܘܐܸܡܲܪ ܝܼܫܘܿܥ: ܥܲܓܸ̇ܠܘ ܟܹܐܦܹ̈ܐ ܪܵܘ̱ܪ̈ܒ̣ܵܬ̣ܵܐ: ܘܐܲܪܡܵܘ ܥܲܠ ܬܲܪܥܵܗ̇ ܕܲܡܥܲܪܬ̣ܵܐ: ܘܲܫܒ̣ܘܿܩܘ ܬܲܡܵܢ ܓܲܒ̣ܪܹ̈ܐ ܕܢܸܛܪܘܿܢ ܐܸܢܘܿܢ.

¹⁹ܐܲܢ̄ܬ̇ܘܿܢ ܕܹܝܢ ܠܵܐ ܬܩܘܼܡܘܼܢ: ܐܸܠܵܐ ܪܕ݂ܘܿܦܘ ܒܵܬܲܪ ܒܥܸܠܕ̇ܒ̣ܵܒܲܝ̈ܟ̇ܘܿܢ ܘܐܲܕ݂ܪܸܟ݂ܘ ܐܸܢܘܿܢ ܘܠܵܐ ܬܸܫܒ̇ܩܘܼܢ ܐܸܢܘܿܢ ܕܢܸܥܠܘܿܢ ܠܲܡܕ݂ܝܼܢ̄ܬܵܐ: ܡܸܛܠ ܕܐܲܫܠܸܡ ܐܸܢܘܿܢ ܡܵܪܝܵܐ ܐܲܠܵܗܟ݂ܘܿܢ ܒܐܝܼܕܲܝ̈ܟ̇ܘܿܢ.

²⁰ܘܟܲܕ݂ ܓܲܡܲܪ ܝܼܫܘܿܥ ܘܲܒ̣̈ܢܲܝ ܝܼܣܪܵܝܹܠ ܠܡܸܚܪܲܒ̣ ܐܸܢܘܿܢ ܚܲܪܒܵܐ ܪܲܒ̇ܬ̣ܵܐ: ܥܕܲܡܵܐ ܕܲܓ̣ܡܲܪܘ: ܘܲܣܪܝܼܕ݂ܵܐ ܠܵܐ ܐܸܫܬ̇ܚܲܪ ܡܸܢܗܘܿܢ: ܘܐܲܥܸܠܘ ܠܗܵܢܘܿܢ ܡܲܘ̈ܝܼܕܹܐ ܕܓܸܒ̣ܥܘܿܢ ܠܟܲܪܟ݂ܗܘܿܢ.

²¹ܗܵܝܕܹ̇ܝܢ ܗܦܲܟ݂ ܟܠܹܗ ܥܲܡܵܐ ܠܡܲܫܪܝܼܬ̣ܵܐ ܠܘܵܬ̣ ܝܼܫܘܿܥ ܠܡܵܩܵܪ ܒܲܫܠܵܡܵܐ: ܘܠܵܐ ܐܲܗܲܪܘ ܡ̣ܢ ܕܒܹܝܬ̣ ܝܼܣܪܵܝܹܠ ܓܒܲܪ ܒܠܸܫܵܢܹܗ.

²²ܘܐܸܡܲܪ ܝܼܫܘܿܥ: ܦܬܲܚܘ ܦܘܼܡܵܗ̇ ܕܲܡܥܲܪܬ̣ܵܐ: ܘܐܲܦܸܩܘ ܠܝܼ ܚܲܡ̈ܫܵܬܲܝܗܘܿܢ ܡܲܠ̈ܟܹ̇ܐ ܗܵܠܹܝܢ ܡ̣ܢ ܡܥܲܪܬ̣ܵܐ.

²³ܘܲܥܒܲܕ݂ܘ ܐܲܝܟ݂ ܕܐܸܡܲܪ ܠܗܘܿܢ ܝܼܫܘܿܥ: ܘܐܲܦܸܩܘ ܠܘܵܬܹܗ ܠܚܲܡ̈ܫܵܬܲܝܗܘܿܢ ܡܲܠ̈ܟܹ̇ܐ ܗܵܠܹܝܢ ܡ̣ܢ ܡܥܲܪܬ̣ܵܐ: ܠܡܲܠܟܵܐ ܕܐܘܿܪܸܫܠܸܡ: ܘܲܠܡܲܠܟܵܐ ܕܚܸܒ̣ܪܘܿܢ: ܘܲܠܡܲܠܟܵܐ ܕܝܲܪܡܘܼܬ̣: ܘܲܠܡܲܠܟܵܐ ܕܲܠܟ݂ܝܼܫ: ܘܲܠܡܲܠܟܵܐ ܕܥܸܓ̣ܠܘܿܢ.

²⁴ܘܟܲܕ݂ ܐܲܦܸܩ̣ܘ ܐܸܢܘܿܢ ܠܡܲܠ̇ܟܹ̈ܐ ܗܵܠܹܝܢ ܠܘܵܬ̣ ܝܼܫܘܿܥ: ܩܪܵܐ ܝܼܫܘܿܥ ܠܟ݂ܠܗܘܿܢ ܫܲܠܝܼܛܵܢܹ̈ܐ ܥܵܒ̣ܕܲܝ̈ ܩܪܵܒ̣ܵܐ ܕܲܡܗܲܠܟ݂ܝܼܢ ܥܲܡܹܗ: ܘܐܸܡܲܪ ܠܗܘܿܢ: ܩܪܘܿܒ̣ܘ ܘܣܝܼܡܘ ܪܸ̈ܓ̣ܠܲܝܟ̇ܘܿܢ ܥܲܠ ܨܵܘܪ̈ܲܝܗܘܿܢ ܕܡܲܠܟܹ̈ܐ ܗܵܠܹܝܢ. ܘܲܩܪܸܒ̣ܘ ܘܣܵܡ̣ܘ ܪܸ̈ܓ̣ܠܲܝܗܘܿܢ ܥܲܠ ܨܵܘܪ̈ܲܝܗܘܿܢ ܕܡܲܠܟܹ̈ܐ ܗܵܠܹܝܢ.

²⁵ܘܐܸܡܲܪ ܠܗܘܿܢ ܝܼܫܘܿܥ: ܠܵܐ ܬܸܕ݂ܚ̄ܠܘܼܢ ܘܠܵܐ ܬܙܘܼܥܘܼܢ: ܐܸܬ̣ܚܲܠܘ ܘܐܸܬ̣ܥܲܫܲܢܘ: ܡܸܛܠ ܕܗܵܟܲܢܵܐ ܥܵܒܹ̇ܕ݂ ܡܵܪܝܵܐ ܠܟ݂ܠܗܘܿܢ ܒܥܸܠܕ̇ܒ̣ܵܒ̣ܵܝ̈ܟ̇ܘܿܢ ܕܡܸܬ̣ܟܲܬ̇ܫܝܼܢ ܐ̄ܢܬ̇ܘܿܢ ܥܲܡܗܘܿܢ.

²⁶ܘܒ̣̱ܵܬܲܪ ܗܵܝܕܹ̇ܝܢ ܩܲܛܸܠ ܐܸܢܘܿܢ ܝܼܫܘܿܥ: ܘܲܙܩܲܦ ܐܸܢܘܿܢ ܥܲܠ ܚܲܡܫܵܐ ܩܲܝ̈ܣܝܼܢ: ܘܲܗܘ̤ܵܘ ܙܩܝܼܦܝܼܢ ܥܲܠ ܩܲܝ̈ܣܹܐ ܠܪܲܡܫܵܐ.

²⁷ܘܲܒ̣ܙܲܒ̣ܢܵܐ ܕܡܲܥܪ̈ܵܒܲܪ ܫܸܡܫܵܐ: ܦܩܲܕ݂ ܝܼܫܘܿܥ ܘܐܲܚܬ̣ܘ ܐܸܢܘܿܢ ܡ̣ܢ ܩܲܝ̈ܣܹܐ ܠܲܙܩܝܼܦܹ̈ܐ: ܘܐܲܪܡܝܼܘ ܐܸܢܘܿܢ ܒܲܡܥܲܪܬ̣ܵܐ ܕܲܛܫܹܝܢ ܗ̄ܘ̣ܵܘ ܒܵܗ̇: ܘܣܵܡ̣ܘ ܟܹܐܦܹ̈ܐ ܪܵܘ̱ܪ̈ܒ̣ܵܬ̣ܵܐ ܥܲܠ ܦܘܼܡܵܗ̇ ܕܲܡܥܲܪܬܵܐ ܥܕܲܡܵܐ ܠܝܵܘܡܵܢܵܐ.

²⁸ܘܲܠܡܵܩܵܪ ܟܒܲܫ ܝܼܫܘܿܥ ܒܝܵܘܡܵܐ ܗܵܘ̇: ܘܚܲܪܒܵܗ̇ ܒܦܘܼܡܵܐ ܕܚܲܪܒܵܐ: ܘܲܠܡܲܠܟܵܗ̇ ܘܲܠܟ݂ܠ ܕܐܝܼܬ̣ܵ ܒܵܗ̇ ܩܲܛܸܠ: ܘܠܵܐ ܫܒܲܩ ܡܸܢܗܘܿܢ ܣܪܝܼܕ݂ܵܐ. ܘܲܥܒܲܕ݂ ܠܡܲܠܟܵܐ ܕܡܵܩܵܪ ܐܲܝܟܲܢܵܐ ܕܲܥܒܲܕ݂ ܠܡܲܠܟܵܐ ܕܐܝܼܪܝܼܚܘܿ.

²⁹ܘܲܥܒܲܪ ܝܼܫܘܿܥ ܘܟ݂ܠܹܗ ܝܼܣܪܵܝܹܠ ܥܲܡܹܗ ܡ̣ܢ ܡܵܩܵܪ ܠܠܸܒ̣ܢܵܐ: ܘܐܸܬ̣ܟܲܬܲܫ ܥܲܡ ܠܸܒ̣ܢܵܐ.

³⁰ܘܐܲܫܠ̱ܡܵܗ̇ ܡܵܪܝܵܐ ܐܵܦ ܠܵܗ̇ ܒܐܝܼܕ݂ܵܐ ܕܝܼܣܪܵܝܹܠ ܘܚܲܪܒ̇ܘܼܗ̇ ܘܲܠܡܲܠܟܵܗ̇ ܒܦܘܼܡܵܐ ܕܚܲܪܒܵܐ: ܘܲܠܟ݂ܠ ܢܲܦ̮̈ܫܵܬ̣ܵܐ ܕܐܝܼܬ̣ ܗ̄ܘܲܝ̈ ܒܵܗ̇: ܘܠܵܐ ܫܒܲܩ ܒܵܗ̇ ܣܪܝܼܕ݂ܵܐ. ܘܲܥܒܲܕ݂ ܝܼܫܘܿܥ ܠܡܲܠܟܵܗ̇ ܐܲܝܟ݂ ܕܲܥܒܲܕ݂ ܠܡܲܠܟܵܐ ܕܐܝܼܪܝܼܚܘܿ.

³¹ܘܲܥܒܲܪ ܝܼܫܘܿܥ ܘܟ݂ܠܹܗ ܝܼܣܪܵܝܹܠ ܥܲܡܹܗ ܡ̣ܢ ܠܸܒ̣ܢܵܐ ܠܲܠܟ݂ܝܼܫ: ܘܲܫܪܵܐ ܥܠܹܝܗ̇: ܘܲܥܒܲܕ݂ ܥܲܡܵܗ̇ ܩܪܵܒ̣ܵܐ.

³²ܘܐܲܫ̱ܠܡܵܗ̇ ܡܵܪܝܵܐ ܠܲܠܟ݂ܝܼܫ ܒܐܝܼܕ݂ܵܐ ܕܝܼܣܪܵܝܹܠ: ܘܟܲܒ̣ܫܵܗ̇ ܒܝܵܘܡܵܐ ܕܲܬ̣ܪܹܝܢ: ܘܚܲܪܒܵܗ̇ ܒܦܘܼܡܵܐ ܕܣܲܝܦܵܐ: ܘܲܠܟ݂ܠܗܹܝܢ ܢܲܦ̮̈ܫܵܬ̣ܵܐ ܕܐܝܼܬ̣ ܗ̄ܘܲܝ̈ ܒܵܗ̇: ܐܲܝܟܲܢܵܐ ܕܲܥܒܲܕ݂ ܠܠܸܒ̣ܢܵܐ.

³³ܗܵܝܕ̇ܝܢ ܣܠܸܩ ܗܲܪܡܘܿܢ ܡܲܠܟܵܐ ܕܓܵܙܵܪ ܠܲܡܥܲܕܵܪܘܼܬ̣ܵܗ̇ ܠܲܠܟ݂ܝܼܫ. ܘܚܲܪܒܹ̇ܗ ܝܼܫܘܿܥ ܐܵܦ ܠܹܗ ܘܲܠܥܲܡܹܗ ܒܦܘܼܡܵܐ ܕܚܲܪܒܵܐ: ܘܠܵܐ ܫܒܲܩ ܠܹܗ ܣܪܝܼܕ݂ܵܐ.

³⁴ܘܲܥ̣ܒܲܪ ܝܼܫܘܿܥ ܘܟ݂ܠܹܗ ܝܼܣܪܵܝܹܠ ܥܲܡܹܗ ܡ̣ܢ ܠܟ݂ܝܼܫ ܠܥܸܓ̣ܠܘܿܢ: ܘܲܫܪܵܐ ܥܠܹܝܗ̇ ܘܲܥܒܲܕ݂ ܥܲܡܵܗ̇ ܩܪܵܒ̣ܵܐ.

³⁵ܘܟܲܒ̣ܫܵܗ̇ ܒܝܵܘܡܵܐ ܗܵܘ̇: ܘܚܲܪܒ̣ܵܗ̇ ܒܦܘܼܡܵܐ ܕܣܲܝܦܵܐ: ܘܲܠܟ݂ܠ ܢܲܦ̮̈ܫܵܬ̣ܵܐ ܕܐܝܼܬ̣ ܗ̄ܘܲܝ̈ ܒܵܗ̇: ܐܲܝܟܲܢܵܐ ܕܲܥܒܲܕ݂ ܠܲܠܟ݂ܝܼܫ.

³⁶ܘܲܣܠܸܩ ܝܼܫܘܿܥ ܘܟ݂ܠܹܗ ܝܼܣܪܵܝܹܠ ܥܲܡܹܗ ܡ̣ܢ ܥܸܓ̣ܠܘܿܢ ܠܚܸܒ̣ܪܘܿܢ. ܘܲܥܒܲܕ݂ ܥܲܡܵܗ̇ ܩܪܵܒ̣ܵܐ.

³⁷ܘܟܲܒ̣ܫܵܗ̇ ܘܚܲܪܒܵܗ̇ ܒܦܘܼܡܵܐ ܕܣܲܝܦܵܐ: ܘܲܠܡܲܠܟܵܗ̇ ܘܲܠܟ݂ܠܗܹܝܢ ܩܘܼܪ̈ܝܵܐ ܕܝܼܠܵܗ̇: ܘܲܠܟ݂ܠܗܹܝܢ ܢܲܦ̮̈ܫܵܬ̣ܵܐ ܕܐܝܼܬ̣ ܗ̄ܘܲܝ̈ ܒܵܗ̇. ܘܠܵܐ ܫܒܲܩ̣ ܡܸܢܗܹܝܢ ܣܪܝܼܕ݂ܵܐ ܐܲܝܟ݂ ܕܲܥܒܲܕ݂ ܠܥܸܓ̣ܠܘܿܢ: ܘܲܠܟ݂ܠ ܢܲܦ̮̈ܫܵܬ̣ܵܐ ܕܐܝܼܬ̣ ܗ̄ܘܲܝ̈ ܒܵܗ̇. ܕܲܚܪܲܒ̣ ܐܸܢܹܝܢ.

³⁸ܘܲܗ̣ܦܲܟ݂ ܝܼܫܘܿܥ ܘܟ݂ܠܹܗ ܝܼܣܪܵܝܹܠ ܥܲܡܹܗ ܠܕ݂ܵܒ̣ܝܼܪ: ܘܐܸܬ̣ܟܲܬܲܫ ܥܲܡܵܗ̇.

³⁹ܘܟܲܒ̣ܫܵܗ̇: ܘܲܠܡܲܠܟܵܗ̇: ܘܲܠܟ݂ܠܗܹܝܢ ܩܘܼܪ̈ܝܵܗ̇: ܘܲܚܪܲܒ̣ ܐܸܢܹܝܢ ܒܦܘܼܡܵܐ ܕܣܲܝܦܵܐ: ܘܲܚܪܲܒ̣ ܠܟ݂ܠ ܢܲܦ̮̈ܫܵܬ̣ܵܐ ܕܒ̣ܵܗ̇: ܘܠܵܐ ܫܒܲܩ ܡܸܢܗܹܝܢ ܣܪܝܼܕ݂ܵܐ. ܐܲܝܟ݂ ܕܲܥܒܲܕ݂ ܠܚܸܒ̣ܪܘܿܢ: ܗܵܟܲܢܵܐ ܥܒܲܕ݂ ܠܕ݂ܵܒ̣ܝܼܪ ܘܲܠܡܲܠܟܵܗ̇: ܘܐܲܝܟܲܢܵܐ ܕܲܥܒܲܕ݂ ܠܠܸܒ̣ܢܵܐ ܘܲܠܡܲܠܟܵܗ̇.

⁴⁰ܘܚܲܪܒ̣ܵܗ̇ ܝܼܫܘܿܥ ܠܟ݂ܠܵܗ̇ ܐܲܪܥܵܐ: ܠܛܘܼܪܵܐ: ܘܲܠܬܲܝ̱ܡܢܵܐ: ܘܠܲܦܩܲܥܬ̣ܵܐ: ܘܠܲܫܕ̇ܘܿܕ݂ ܘܲܠܟ݂ܠܗܘܿܢ ܡܲܠܟܲܝ̈ܗܘܿܢ. ܘܠܵܐ ܫܒܲܩ̣ ܡܸܢܗܘܿܢ ܣܪܝܼܕ݂ܵܐ: ܘܲܠܟ݂ܠܹܗ ܚܲܝ̱ܠܗܘܿܢ ܚܪܲܒ̣: ܐܲܝܟܲܢܵܐ ܕܦܲܩܕܹܗ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

⁴¹ܘܲܚܪܲܒ̣ ܐܸܢܘܿܢ ܝܼܫܘܿܥ: ܡ̣ܢ ܪܩܸܡ ܕܓܲܝܵܐ ܥܕܲܡܵܐ ܠܥܵܐܙܵܐ: ܘܲܠܟ݂ܠܵܗ̇ ܐܲܪܥܵܐ ܕܓ̣ܫܵܢ: ܘܲܥܕܲܡܵܐ ܠܓܸܒ̣ܥܘܿܢ.

⁴²ܘܲܠܟ݂ܠܗܘܿܢ ܡܲܠܟܹ̈ܐ ܗܵܠܹܝܢ ܘܠܲܐܬ̣ܪ̈ܵܘܵܬ̣ܗܘܿܢ ܟܒܲܫ ܝܼܫܘܿܥ ܒܙܲܒ̣ܢܵܐ ܚܲܕ݂: ܡܸܛܠ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܥܲܡܹܗ. ܘܗ̤ܘܝܼܘ ܥܵܒܹܕ݂ ܩܪܵܒ̣ܵܐ ܠܝܼܣܪܵܝܹܠ.