Read Aramaic Peshita Joshua 11 Bible Online

Joshua 11 - Aramaic Peshita bible

Joshua 11

¹ܘܟܲܕ݂ ܫ̣ܡܲܥ ܡܲܠܟܵܐ ܕܚܵܨܘܿܪ: ܫܲܕܲܪ ܥܲܠ ܝܘܿܒܵܒ̣ ܡܲܠܟܵܐ ܕܡܵܕܘܿܢ: ܘܥܲܠ ܡܲܠܟܵܐ ܕܫܵܡܪܹܝܢ ܘܥܲܠ ܡܲܠܟܵܐ ܕܐܲܟ݂ܫܵܦ.

²ܘܥܲܠ ܡܲܠܟܹ̈ܐ ܕܲܠܓܲܪܒ̇ܝܵܐ ܡܸܢܹܗ: ܕܲܒ̣ܛܘܼܪܵܐ: ܘܲܒ̣ܬܲܝ̱ܡܢܵܐ: ܘܒܲܦܩܲܥܬ̣ܵܐ ܕܟܸܢܪܲܬ̣: ܘܲܒ̣ܦܲܩ̈ܥܵܬ̣ܵܗ̇ ܘܒܲܢܦܸܬ̇ܕ̇ܘܿܪ ܕܡ̣ܢ ܡܲܥܪ̱ܒ̣ܵܐ.

³ܘܠܲܟ݂ܢܲܥ̈ܢܵܝܹܐ ܕܡ̣ܢ ܡܲܕ݂ܢ̱ܚܵܐ ܘܡ̣ܢ ܡܲܥ̱ܪܒ̣ܵܐ: ܘܐܵܡܘܿܪ̈ܵܝܹܐ: ܘܚܹـ̈ـܬܵܝܹܐ: ܘܦܲܪ̈ܙܵܝܹܐ: ܘܝܵܒ̣ܘܿܣܵܝܹ̈ܐ: ܕܲܒ̣ܛܘܼܪܵܐ: ܘܲܠܚܵܘܵܝܹ̈ܐ ܕܲܬ̣ܚܹܬ̣ ܛܘܼܪܵܐ ܕܚܸܪܡܘܿܢ: ܕܒܲܐܪܥܵܐ ܕܕ݂ܵܘܩܹ̈ܐ.

⁴ܘܲܢܦܲܩܘ ܗܸܢܘܿܢ ܘܟ݂ܠܗܹܝܢ ܡܲܫ̱ܪ̈ܝܵܬ̣ܗܘܿܢ ܥܲܡܗܘܿܢ ܣܲܓ̇ܝܼܐܝܼܢ ܐܲܝܟ݂ ܚܵܠܵܐ ܕܥܲܠ ܣܸܦܬܹܗ ܕܝܲܡܵܐ: ܘܪ̈ܲܟ݂ܫܵܐ ܘܩܵܪ̈ܘܿܟܹܐ ܣܘܿܓ̣ܵܐܐ ܕܛܵܒ̣.

⁵ܘܐܸܬ̣ܘܲܥܲܕ݂ܘ ܟܠܗܘܿܢ ܡܲܠܟܹ̈ܐ ܗܵܠܹܝܢ: ܘܲܫܪܵܘ ܐܲܟ݂ܚ̄ܕ݂ܵܐ ܥܲܠ ܡܲـ̈ـܝܵܐ ܕܡܸܪܘܿܢ: ܘܐܸܬ̇ܛܲܝܲܒ̣ܘ ܠܡܸܥܒܲܕ݂ ܩܪܵܒ̣ܵܐ ܥܲܡ ܝܼܣܪܵܝܹܠ.

⁶ܘܐܸܡܲܪ ܡܵܪܝܵܐ ܠܝܼܫܘܿܥ: ܠܵܐ ܬܸܕ݂ܚܲܠ ܡܸܢܗܘܿܢ: ܡܸܛܠ ܕܲܡܚܵܪ ܠܗܵܢܵܐ ܥܸܕܵܢܵܐ: ܥܵܒܹ̇ܕ݂ ܐ̄ܢܵܐ ܠܗܘܿܢ ܠܟ݂ܠܗܘܿܢ ܟܲܕ݂ ܚܪܝܼܒ̣ܝܼܢ ܩܕ݂ܵܡ ܒ̈ܢܲܝ ܝܼܣܪܵܝܹܠ. ܘܪ̈ܲܟ݂ܫܗܘܿܢ ܐܹܓܲܡܲܪ: ܘܩܵܪ̈ܘܿܟܲܝܗܘܿܢ ܐܵܘܩܸܕ݂ ܒܢܘܼܪܵܐ.

⁷ܘܐܸܬ̣ܵܐ ܝܼܫܘܿܥ ܠܡܲـ̈ـܝܵܐ ܕܡܸܪܘܿܢ ܡ̣ܢ ܫܸܠܝܵܐ: ܗ̤ܘ ܘܟ݂ܠܹܗ ܥܲܡܵܐ ܥܵܒ̣ܕܲܝ̈ ܩܪܵܒ̣ܵܐ ܕܐܝܼܬ̣ ܗ̄ܘ̣ܵܐ ܥܲܡܹܗ: ܘܲܢܦܲܠܘ ܒܗܘܿܢ.

⁸ܘܐܲܫܠܸܡ ܐܸܢܘܿܢ ܡܵܪܝܵܐ ܒܐܝܼܕ݂ܵܐ ܕܝܼܣܪܵܝܹܠ: ܘܲܚܪܲܒ̣ܘ ܐܸܢܘܿܢ: ܘܲܪܕܲܦ̣ܘ ܐܸܢܘܿܢ ܥܕܲܡܵܐ ܠܨܲܝܕ̇ܘܿܢ ܪܲܒܵܐ: ܘܲܥܕܲܡܵܐ ܠܒܹܝܬ̣ ܟܸܢܫܵܐ ܕܡܲـ̈ـܝܵܐ: ܘܲܥܕܲܡܵܐ ܠܲܦܩܲܥܬ̣ܵܐ ܕܡܲܨܦܝܵܐ ܕܲܒ̣ܡܲܕ݂ܢ̱ܚܵܐ. ܘܲܚܪܲܒ̣ܘ ܐܸܢܘܿܢ: ܘܠܵܐ ܫܒܲܩ̣ܘ ܡܸܢܗܘܿܢ ܣܪܝܼܕ݂ܵܐ.

⁹ܘܲܥܒܲܕ݂ ܠܗܘܿܢ ܝܼܫܘܿܥ ܐܲܝܟ݂ ܕܐܸܡܲܪ ܠܹܗ ܡܵܪܝܵܐ: ܪ̈ܲܟ݂ܫܗܘܿܢ ܓܲܡܲܪ: ܘܩܵܪ̈ܘܿܟܲܝܗܘܿܢ ܐܵܘܩܸܕ݂ ܒܢܘܼܪܵܐ.

¹⁰ܘܲܗ̣ܦܲܟ݂ ܝܼܫܘܿܥ ܒܙܲܒ̣ܢܵܐ ܗܵܘ̇: ܘܲܟ݂ܒܲܫ ܠܚܵܨܘܿܪ: ܘܲܠܡܲܠܟܵܗ̇ ܩܛܲܠ ܒܚܲܪܒܵܐ: ܡܸܛܠ ܕܡ̣ܢ ܩܕ݂ܝܼܡ ܚܵܨܘܿܪ ܗ̄ܘ̣ܵܬ̣ ܪܹܫܗܹܝܢ ܕܡܲܠܟ̇ـ̈ـܘܵܬ̣ܵܐ ܗܵܠܹܝܢ.

¹¹ܘܲܚܪܲܒ ܠܟ݂ܠ ܢܲܦ̮̈ܫܵܬ̣ܵܐ ܕܒ̣ܵܗ̇ ܒܦܘܼܡܵܐ ܕܚܲܪܒܵܐ: ܘܠܵܐ ܫܒܲܩ ܡܸܢܗܹܝܢ ܢܫܲܡܬ̣ܵܐ: ܘܲܠܚܵܨܘܿܪ ܐܵܘܩܸܕ݂ ܒܢܘܼܪܵܐ.

¹²ܘܲܠܟ݂ܠܗܹܝܢ ܡܕ݂ܝܼ̈ܢܵܬ̣ܵܐ ܕܡܲܠ̈ܟܹ̇ܐ ܗܵܠܹܝܢ: ܘܲܠܡܲܠܟܲܝ̈ܗܹܝܢ ܟܒܲܫ ܝܼܫܘܿܥ: ܘܲܚܪܲܒ̣ ܐܸܢܘܿܢ ܒܦܘܼܡܵܐ ܕܚܲܪܒܵܐ: ܐܲܝܟܲܢܵܐ ܕܦܲܩܕܹܗ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ.

¹³ܘܲܠܟ݂ܠܗܹܝܢ ܩܘܼܪ̈ܝܵܐ ܕܩܵܝ̈ܡܵܢ ܥܲܠ ܬܸܠܹ̈ܐ ܐܵܘܩܸܕ݂ ܐܸܢܹܝܢ ܝܼܣܪܵܝܹܠ: ܘܲܠܚܵܨܘܿܪ ܐܵܘܩܸܕ݂ ܝܼܫܘܿܥ.

¹⁴ܘܲܠܟ݂ܠܵܗ̇ ܒܸܙܬ̣ܵܐ ܕܲܡܕ݂ܝܼ̈ܢܵܬ̣ܵܐ ܗܵܠܹܝܢ: ܘܲܒ̣ܥܝܼܪܵܐ ܒܲܙܘ ܠܗܘܿܢ ܒ̈ܢܲܝ ܝܼܣܪܵܝܹܠ. ܘܲܠܟ݂ܠܗܘܿܢ ܒܢܲܝ̈ܢܵܫܵܐ ܚܪܲܒ̣ܘ ܒܦܘܼܡܵܐ ܕܣܲܝܦܵܐ ܥܕܲܡܵܐ ܕܓܲܡܲܪܘ ܐܸܢܘܿܢ: ܘܠܵܐ ܫ̣ܒܲܩܘ ܡܸܢܗܘܿܢ ܢܫܲܡܬ̣ܵܐ.

¹⁵ܐܲܝܟܲܢܵܐ ܕܦܲܩܸܕ݂ ܡܵܪܝܵܐ ܠܡܘܼܫܹܐ ܥܲܒ̣ܕܹ̇ܗ: ܗܵܟܲܢܵܐ ܦܲܩܕܹܗ ܡܘܼܫܹܐ ܠܝܼܫܘܿܥ: ܘܗܵܟܲܢܵܐ ܥܒܲܕ݂ ܝܼܫܘܿܥ: ܘܠܵܐ ܒܲܛܸܠ ܡܸܠܬ̣ܵܐ ܡ̣ܢ ܟܠܡܸܕܸ̇ܡ ܕܦܲܩܸܕ݂ ܡܵܪܝܵܐ ܠܡܘܼܫܹܐ.

¹⁶ܘܢܲܣܒܵܗ̇ ܝܼܫܘܿܥ ܠܟ݂ܠܵܗ̇ ܐܲܪܥܵܐ ܗܵܕܹܐ ܕܛܘܼܪܵܐ: ܘܲܠܟ݂ܠܵܗ̇ ܬܲܝ̱ܡܢܵܐ: ܘܲܠܟ݂ܠܵܗ̇ ܐܲܪܥܵܐ ܕܲܦܩܲܥܬ̣ܵܐ: ܘܲܠܛܘܼܪܹ̈ܐ ܟܠܗܘܿܢ: ܘܲܠܦܲܩ̈ܥܵܬ̣ܗܘܿܢ.

¹⁷ܡ̣ܢ ܛܘܼܪܵܐ ܕܦܵܠܹܓ ܘܣܵܠܹܩ ܠܣܵܥܝܼܪ: ܘܲܥܕܲܡܵܐ ܠܓܲܕ݂ܓܵܕ݂ ܕܒܲܦܩܲܥܬ̣ܵܐ ܕܠܸܒ̣ܢܵܢ ܕܲܬ̣ܚܹܝܬ̣ ܛܘܼܪܵܐ ܕܚܸܪܡܘܿܢ: ܘܲܠܟ݂ܠܗܘܿܢ ܡܲܠܟܲܝ̈ܗܘܿܢ ܟܒܲܫ: ܘܩܲܛܸܠ ܐܸܢܘܿܢ ܝܼܫܘܿܥ.

¹⁸ܘܝܵܘ̈ܡܵܬ̣ܸܐ ܣܲܓ̇ܝܼ̈ܐܹܐ ܥܒܲܕ݂ ܝܼܫܘܿܥ ܩܪܵܒ̣ܵܐ: ܥܲܡ ܟܠܗܘܿܢ ܗܵܠܹܝܢ.

¹⁹ܘܠܵܐ ܐܸܫܬܲܚܪܲܬ̤ ܩܪܝܼܬ̣ܵܐ ܕܠܵܐ ܐܸܫܬܲܠܡܲܬ̤ ܠܲܒ̣̈ܢܲܝ ܝܼܣܪܵܝܹܠ ܘܚܲܪܒ̇ܘܼܗܝ ܐܸܠܵܐ ܐܸܢ ܚܵܘܵܝܹ̈ܐ ܕܝܵܬ̣ܒ̇ܝܼܢ ܒܓܒ̣ܥܘܿܢ: ܕܐܲܚܝܼ ܐܸܢܘܿܢ ܝܼܫܘܿܥ: ܘܲܫܒܲܩ ܐܸܢܘܿܢ ܝܼܫܘܿܥ ܕܢܸܦܠ̱ܚܘܼܢ ܠܝܼܣܪܵܝܹܠ. ܘܲܠܟ݂ܠܗܹܝܢ ܡܲܠ̈ܟ̇ܘܵܬ̣ܵܐ ܗܵܠܹܝܢ ܫܒ̣ܵܐ ܐܸܢܹܝܢ ܝܼܫܘܿܥ ܘܲܚܪܲܒ̣ ܐܸܢܹܝܢ.

²⁰ܡܸܛܠ ܕܡ̣ܢ ܩܕ݂ܵܡ ܡܵܪܝܵܐ ܗܘ̤ܵܬ̣ ܗܵܕܹܐ: ܕܢܸܬ̣ܚܲܝܲܠ ܠܸܒ̇ܗܘܿܢ ܕܢܸܦܩܘܿܢ ܠܲܩܪܵܒ̣ܵܐ ܥܲܠ ܝܼܣܪܵܝܹܠ: ܡܸܛܠ ܕܢܸܚ̱ܪܒ̣ܘܼܢ ܐܸܢܘܿܢ ܘܠܵܐ ܬܸܗܘܹܐ ܥܠܲܝܗܘܿܢ ܬܲܟ݂ܫܲܦ̮ܬܵܐ: ܡܸܛܠ ܕܐܵܘܒܸ̇ܕ݂ ܐܸܢܘܿܢ ܐܲܝܟܲܢܵܐ ܕܦܲܩܸܕ݂ ܡܵܪܝܵܐ ܠܡܘܼܫܹܐ.

²¹ܘܐܸܬ̣ܵܐ ܝܼܫܘܿܥ ܒܙܲܒ̣ܢܵܐ ܗܵܘ̇: ܘܲܚܪܲܒ̣ ܠܓܲܢ̄ܒܵܪܹ̈ܐ ܕܲܒ̣ܛܘܼܪܵܐ: ܡ̣ܢ ܚܸܒ̣ܪܘܿܢ: ܘܡ̣ܢ ܕܵܒ̣ܝܼܪ: ܘܡ̣ܢ ܓܒܸܠ: ܘܡ̣ܢ ܟܠܹܗ ܛܘܼܪܵܐ ܕܲܝܗܘܼܕ݂ܵܐ: ܘܡ̣ܢ ܟܠܹܗ ܛܘܼܪܵܐ ܕܝܼܣܪܵܝܹܠ. ܥܲܡ ܡܕ݂ܝܼ̈ܢܵܬ̣ܗܘܿܢ ܚܪܲܒ̣ ܐܸܢܘܿܢ ܝܼܫܘܿܥ.

²²ܘܠܵܐ ܐܸܫܬܲܚܲܪܘ ܓܲܢ̄ܒܵܪܹ̈ܐ ܒܐܲܪܥܵܐ ܕܲܒ̣̈ܢܲܝ ܝܼܣܪܵܝܹܠ: ܐܸܠܵܐ ܐܸܢ ܒܥܵܐܙܵܐ: ܘܲܒ̣ܓܵܬ̣̱: ܘܒܲܐܫܕ̇ܘܿܕ݂ ܐܸܫܬ̇ܚܲܪܘ.

²³ܘܢܲܣܒܵܗ̇ ܝܼܫܘܿܥ ܠܟ݂ܠܵܗ̇ ܐܲܪܥܵܐ: ܐܲܝܟ݂ ܕܐܸܡܲܪ ܡܵܪܝܵܐ ܠܡܘܼܫܹܐ: ܘܝܲܗ̄ܒܵܗ̇ ܝܼܫܘܿܥ ܝܘܼܪܬܵܢܵܐ ܠܝܼܣܪܵܝܹܠ ܒܦܵܠܓ̈ܘܵܬ̣ܵܐ ܠܫܲܒ̣ܛܲܝ̈ܗܘܿܢ. ܘܐܲܪܥܵܐ ܐܸܬ̇ܬ̇ܢܝܼܚܲܬ̤ ܡ̣ܢ ܩܪܵܒ̣ܵܐ.