Read Aramaic Peshita Joshua 16 Bible Online

Joshua 16 - Aramaic Peshita bible

Joshua 16

¹ܘܢܸܦܩܲܬ̣ ܡܢܵܬ̣ܵܐ ܕܲܒ̣̈ܢܲܝ ܝܵܘܣܸܦ: ܡ̣ܢ ܝܘܿܪܕ̇ܢܵܢ ܕܐܝܼܪܝܼܚܘܿ: ܠܡܲـ̈ـܝܵܐ ܕܐܝܼܪܝܼܚܘܿ: ܡ̣ܢ ܡܲܕ݂ܢܵܚܲܝ̈ ܡܲܕ݂ܒ̇ܪܵܐ ܕܣܵܠܹܩ ܡ̣ܢ ܐܝܼܪܝܼܚܘܿ: ܘܲܥܕܲܡܵܐ ܠܛܘܼܪܵܐ ܕܣܵܠܹܩ ܠܒܹܝܬ̣ ܐܹܝܠ.

²ܘܢܵܦܹܩ ܡ̣ܢ ܒܹܝܬ̣ ܐܹܝܠ ܠܠܘܿܙ: ܘܥܵܒܲܪ ܠܲܬ̣ܚܘܼܡܵܐ ܕܥܸܒ̣ܪܵܐ: ܘܲܕ݂ܥܸܛܪܘܼܬ̣.

³ܘܢܵܚܹ̇ܬ̣ ܠܡܲܥ̱ܪܒ̣ܵܐ ܠܲܬ̣ܚܘܼܡܵܐ ܕܦܲܠܛܵܐ: ܥܕܲܡܵܐ ܠܲܬ̣ܚܘܼܡܵܐ ܕܒܹܝܬ̣ ܚܵܘܪܵܢ ܬܲܚܬܵܝܬܵܐ: ܘܲܥܕܲܡܵܐ ܠܓ̣ܵܕ݂ܵܪ: ܘܲܗܘ̤ܵܘ ܡܲܦܩܵܢܵܘ̈ܗܝ ܠܡܲܥ̱ܪܒ̣ܵܐ.

⁴ܘܝܸܪܬ̣ܘܼ ܒ̈ܢܲܝ ܝܵܘܣܸܦ: ܡܢܲܫܹܐ: ܘܐܲܦܪܹܝܡ.

⁵ܘܲܗܘ̤ܵܐ ܬܚܘܼܡܵܐ ܕܲܒ̣̈ܢܲܝ ܐܲܦܪܹܝܡ ܠܫܲܪ̈ܒ̣ܵܬܲܗܘܿܢ: ܬܚܘܼܡܵܐ ܕܝܵܪܬ̇ܘܼܬ̣ܗܘܿܢ ܥܸܛܪܘܼܬ̣: ܘܐܸܕܲܪ: ܥܕܲܡܵܐ ܠܒܹܝܬ̣ ܚܵܘܪܵܢ ܥܸܠܵܝܬܵܐ.

⁶ܘܢܵܦܹ̇ܩ ܬܚܘܼܡܵܐ ܠܡܲܥܪ̱ܒ̣ܵܐ ܠܡܸܟܡܲܬ̣ ܡ̣ܢ ܓܲܪܒ̇ܝܵܐ. ܘܚܵܕܲܪ ܬܚܘܼܡܵܐ ܡ̣ܢ ܡܲܕ݂ܢ̱ܚܵܐ ܕܲܬ̣ܚܹܝܬ̣ ܫܝܼܠܘܿ: ܘܥܵܒܲܪ ܡ̣ܢ ܡܲܕ݂ܢ̱ܚܵܐ ܕܝܲܠܘܿܚ.

⁷ܘܢܵܚܹܬ̣ ܡ̣ܢ ܝܲܠܘܿܚ ܠܥܸܛܪܘܼܬ̣: ܘܲܠܝܲܓ̣ܪܲܬ̣: ܘܲܠܦܵܓ̣ܵܪ: ܘܠܐܝܼܪܝܼܚܘ ܘܢܵܦܹܩ ܡ̣ܢ ܬܲܦܘܿܚ ܠܝܘܿܪܕ̇ܢܵܢ.

⁸ܘܐܵܙܹ̇ܠ ܠܲܬ̣ܚܘܼܡܵܐ ܡܲܥܪ̱ܒ̣ܵܝܵܐ ܕܢܲܚܠܵܐ ܕܩܵܒ̣ܵܐ: ܘܗܵܘܹ̇ܝܢ ܡܲܦܩܵܢܵܘ̈ܗܝ ܠܡܲܥ̱ܪܒ̣ܵܐ. ܗܵܕܲܐ ܗ̄ܝ̣ ܝܵܪܬ̇ܘܼܬ̣ܵܐ ܕܫܲܒ̣ܛܵܐ ܕܲܒ̣̈ܢܲܝ ܐܲܦܪܹܝܡ: ܠܫܲܪ̈ܒ̣ܵܬ̣ܗܘܿܢ.

⁹ܩܘܼܪ̈ܝܵܐ ܕܲܦܪ̈ܝܼܫܵܢ ܗ̄ܘܲܝ̈ ܠܲܒ̣̈ܢܲܝ ܐܲܦܪܹܝܡ: ܒܓ̣ܵܘ ܝܵܪܬ̇ܘܼܬ̣ܵܐ ܕܲܒ̣̈ܢܲܝ ܡܢܲܫܹܐ: ܟܠܗܹܝܢ ܩܘܼܪ̈ܝܵܐ ܘܐܲܓ̣ܘܼܪ̈ܣܲܝܗܹܝܢ.

¹⁰ܘܠܵܐ ܚܪܲܒ̣ܘ ܠܲܟ݂ܢܲܥܢܵܝܹ̈ܐ ܕܝܵܬ̣ܒ̇ܝܼܢ ܒܓ̣ܵܕ݂ܵܪ. ܘܝܼܬܸܒ̣ܘ ܟܢܲܥܢܵܝܹ̈ܐ ܒܓ̣ܵܘ ܒܹܝܬ̣ ܐܲܦܪܹܝܡ ܥܕܲܡܵܐ ܠܝܵܘܡܵܢܵܐ. ܘܐܸܬ̣ܟ̇ܒܸܫܘ ܒܡܲܕܲܐܬ̣ܵܐ.