Read Aramaic Peshita Joshua 18 Bible Online

Joshua 18 - Aramaic Peshita bible

Joshua 18

¹ܘܐܸܬ̣ܟܲܢܲܫܘ ܟܠܵܗ̇ ܟܢܘܼܫܬܵܐ ܕܲܒ̣̈ܢܲܝ ܝܼܣܪܵܝܹܠ ܠܫܝܼܠܘܿ: ܘܐܲܫܪܝܼܘ ܬܲܡܵܢ ܡܲܫܟܲܢ ܙܲܒ̣ܢܵܐ. ܘܐܲܪܥܵܐ ܐܸܬ̣ܟܲܒ̣ܫܲܬ̤ ܩܕ݂ܵܡܲܝܗܘܿܢ.

²ܘܐܸܫܬ̇ܚܲܪܘ ܡ̣ܢ ܒ̈ܢܲܝ ܝܼܣܪܵܝܹܠ ܕܠܐ ܦܲܠܓܘ ܝܵܪܬ̇ܘܼܬ̣ܵܐ ܫܲܒ̣ܛܹ̈ܐ ܫܲܒ̣ܥܵܐ.

³ܘܐܸܡܲܪ ܝܼܫܘܿܥ ܠܲܒ̣̈ܢܲܝ ܝܼܣܪܵܝܹܠ: ܥܕܲܡܵܐ ܠܐܸܡܲܬ̣ܝ ܡܲܬ̣ܪܲܦܹܝܢ ܐ̄ܢܬ̇ܘܿܢ ܠܡܸܥܲܠ ܠܡܹܐܪܲܬ̣ ܐܲܪܥܵܐ: ܕܝܲܗ̄ܒ̣ ܠܟ݂ܘܿܢ ܡܵܪܝܵܐ ܐܲܠܵܗܵܐ ܕܐܲܒ̣ܵܗܲܝ̈ܟ̇ܘܿܢ.

⁴ܓܒ̣ܵܘ ܠܟ݂ܘܿܢ ܬܠܵܬ̣ܵܐ ܬܠܵܬ̣ܵܐ ܓܲܒ̣ܪ̈ܝܼܢ ܡ̣ܢ ܫܲܒ̣ܛܵܐ: ܘܐܹܫܲܕܲܪ ܐܸܢܘܿܢ: ܘܲܢܩܘܼܡܘܼܢ ܘܲܢܗܲܠܟ݂ܘܼܢ ܒܐܲܪܥܵܐ: ܘܢܸܟ݂ܬ̇ܒ̣ܘܼܢܵܗ̇ ܠܦܘܼܬ̣ ܝܵܪܬ̇ܘܼܬ̣ܗܘܿܢ: ܘܢܹܐܬ̣ܘܼܢ ܠܘܵܬ̣ܝ.

⁵ܘܲܢܦܲܠܓܘܼܢܵܗ̇ ܠܐܲܪܥܵܐ ܠܲܫܒܲܥ ܦܵܠ̈ܓܘܵܢ. ܘܲܝܗܘܼܕ݂ܵܐ ܢܩܘܼܡ ܥܲܠ ܬܚܘܼܡܹܗ ܡ̣ܢ ܬܲܝ̱ܡܢܵܐ: ܘܲܕ݂ܒܹܝܬ̣ ܝܵܘܣܸܦ ܢܩܘܼܡܘܼܢ ܥܲܠ ܬܚܘܼܡܗܘܿܢ ܡ̣ܢ ܓܲܪܒ̇ܝܵܐ.

⁶ܘܐܲܢ̄ܬ̇ܘܿܢ ܟܘܼܬ̣ܒ̇ܘܼܗ̇ ܠܐܲܪܥܵܐ ܠܲܫܒܲܥ ܦܵܠ̈ܓܘܵܢ: ܘܐܲܝܬܵܐܘܼܗ̇ ܠܘܵܬ̣ ܠܗܵܪܟܵܐ: ܘܐܹܚܵܘܹܝܟ݂ܘܿܢ ܡܢܵܬ̣ܵܐ ܕܓܲܒ̣ܝܵܐ ܩܕ݂ܵܡ ܡܵܪܝܵܐ ܐܲܠܵܗܲܢ.

⁷ܡܸܛܠ ܕܠܲܝܬ̇ ܦܵܠܓܘܼܬ̣ܵܐ ܠܠܹܘܵܝܹ̈ܐ ܒܲܝܢܵܬ̣ܟ݂ܘܿܢ: ܡܸܛܠ ܕܟ݂ܵܗܢܘܼܬܹܗ ܗ̄ܝ̣ ܕܡܵܪܝܵܐ ܝܵܪܬ̇ܘܼܬ̣ܗܘܿܢ. ܘܓ̣ܵܕ݂. ܘܪܘܼܒܹܝܠ: ܘܦܲܠܓܘܼܬ̣ ܫܲܒ̣ܛܵܐ ܕܲܡܢܲܫܹܐ ܩܲܒܸ̇ܠܘ ܝܵܪܬ̇ܘܼܬ̣ܗܘܿܢ ܒܥܸܒ̣ܪܵܐ ܕܝܘܿܪܕ̇ܢܵܢ ܡ̣ܢ ܡܲܕ݂ܢܚܵܐ: ܕܝܲܗ̄ܒ̣ ܠܗܘܿܢ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ.

⁸ܘܩܵܡ̣ܘ ܓܲܒ̣ܪܹ̈ܐ ܘܐܸܙܲܠܘ. ܘܦܲܩܸܕ݂ ܝܼܫܘܿܥ ܠܗܵܢܘܿܢ ܕܐܸܙܲܠ̣ܘ ܠܡܸܟ݂ܬ̇ܒ̣ܵܗ̇ ܠܐܲܪܥܵܐ: ܘܐܸܡܲܪ ܠܗܘܿܢ: ܙܸܠܘ ܗܲܠܸܟ݂ܘ ܒܐܲܪܥܵܐ ܘܟ݂ܘܼܬ̣ܒ̇ܘܼܗ̇: ܘܬ̣ܵܘ ܠܘܵܬ̣ܝ ܠܗܵܪܟܵܐ: ܘܐܲܪܡܸܐ ܠܟ݂ܘܿܢ ܡ̈ܢܵܘܵܬ̣ܵܐ ܩܕ݂ܵܡ ܡܵܪܝܵܐ ܒܫܝܼܠܘܿ.

⁹ܘܐܸܙܲܠܘ ܓܲܒ̣ܪܹ̈ܐ ܘܲܥܒܲܪܘ ܒܐܲܪܥܵܐ: ܘܲܟ݂ܬܲܒ̣ܘ ܐܸܢܹܝܢ ܠܩܘܼܪ̈ܝܵܐ ܫܒܲܥ ܦܵܠ̈ܓܘܵܢ ܥܲܠ ܡܓܲܠܬ̣ܵܐ: ܘܐܸܬ̣ܵܘ ܠܘܵܬ̣ ܝܼܫܘܿܥ ܠܫܝܼܠܘܿ ܡܕ݂ܝܼܢ̄ܬܵܐ.

¹⁰ܘܐܲܪܡܝܼ ܠܗܘܿܢ ܦܲܨܹ̈ܐ ܒܫܝܼܠܘܿ ܩܕ݂ܵܡ ܡܵܪܝܵܐ: ܘܦܲܠܓܵܗ̇ ܬܲܡܵܢ ܝܼܫܘܿܥ ܠܐܲܪܥܵܐ ܠܲܒ̣̈ܢܲܝ ܝܼܣܪܵܝܹܠ ܒܦܵܠ̈ܓܘܵܬ̣ܵܐ.

¹¹ܘܣܸܠܩܲܬ̤ ܦܸܨܬ̣ܵܐ ܕܫܲܒ̣ܛܵܐ ܕܲܒ̣̈ܢܲܝ ܒܸܢܝܵܡܹܝܢ ܠܫܲܪ̈ܒ̣ܵܬ̣ܗܘܿܢ: ܘܲܢܦܲܩ ܬܚܘܼܡܵܐ ܕܝܵܪܬ̇ܘܼܬ̣ܗܘܿܢ: ܠܒܹܝܬ̣ ܒ̈ܢܲܝ ܝܼܗܘܼܕ݂ܵܐ: ܘܲܠܒܹܝܬ̣ ܒ̈ܢܲܝ ܝܵܘܣܸܦ.

¹²ܘܲܗܘ̤ܵܐ ܬܚܘܼܡܗܘܿܢ ܠܣܸܛܪܵܐ ܕܓܲܪܒ̇ܝܵܐ ܡ̣ܢ ܝܘܿܪܕ̇ܢܵܢ: ܘܣܵܠܹܩ ܬܚܘܼܡܵܐ ܠܣܸܛܪܵܐ ܕܐܝܼܪܝܼܚܘܿ ܡ̣ܢ ܓܲܪܒ̇ܝܵܐ: ܘܣܵܠܹܩ ܒܛܘܼܪܵܐ ܠܡܲܥܪ̱ܒ̣ܵܐ ܘܗܵܘܹ̇ܝܢ ܡܲܦܩܵܢܵܘ̈ܗܝ ܠܡܲܕ݂ܒ̇ܪܵܐ ܕܒܹܝܬ̣ ܐܵܘܵܢ.

¹³ܘܥܵܒܲܪ ܡ̣ܢ ܬܲܡܵܢ ܬܚܘܼܡܵܐ ܠܠܘܿܙ: ܥܲܠ ܣܸܛܪܵܐ ܕܠܘܙ ܡ̣ܢ ܬܲܝ̱ܡܢܵܐ: ܗ̤ܝ ܗ̄ܝ̣ ܒܹܝܬ̣ ܐܹܝܠ. ܘܢܵܚܹ̇ܬ̣ ܬܚܘܼܡܵܐ ܠܥܸܛܪܘܼܬ̣ ܐܸܕܲܪ: ܥܲܠ ܛܘܼܪܵܐ ܕܡ̣ܢ ܬܲܝ̱ܡܢܵܐ ܕܒܹܝܬ̣ ܚܵܘܪܵܢ ܬܲܚܬܵܝܬܵܐ.

¹⁴ܘܚܵܐܲܪ ܬܚܘܼܡܵܐ ܠܣܸܛܪܵܐ ܕܝܲܡܵܐ ܡ̣ܢ ܬܲܝ̱ܡܢܵܐ: ܡ̣ܢ ܛܘܼܪܵܐ ܕܠܲܐܦܲܝ̈ ܒܹܝܬ̣ ܚܵܘܪܲܢ ܕܲܒ̣ܬܲܝ̱ܡܢܵܐ: ܘܗܵܘܹ̇ܝܢ ܡܲܦܩܵܢܵܘ̈ܗܝ ܥܲܠ ܩܘܼܪܝܲܬ̣ ܒܥܸܠ: ܕܗ̤ܝ ܗ̄ܝ̣ ܩܘܼܪܝܲܬ̣ ܢܲܥܪܝܼܢ ܡܕ݂ܝܼܢ̄ܬܵܐ ܕܲܒ̣̈ܢܲܝ ܝܼܗܘܼܕ݂ܵܐ. ܗܵܢܵܐ ܗ̄ܘ̣ ܣܸܛܪܵܐ ܕܝܲܡܵܐ.

¹⁵ܘܣܸܛܪܵܐ ܕܬܲܝ̱ܡܢܵܐ ܡ̣ܢ ܣܵܘܦܵܐ ܕܩܘܼܪܝܲܬ̣ ܢܲܥܪܝܼܢ. ܘܢܵܦܹܩ ܬܚܘܼܡܵܐ ܠܝܲܡܵܐ: ܘܢܵܦܹ̇ܩ ܠܡܲܒ̇ܘܼܥܵܐ ܕܡܲـ̈ـܝܵܐ ܕܢܲܦ̮ܬܵܠܝܼ.

¹⁶ܘܢܵܚܹ̇ܬ̣ ܬܚܘܼܡܵܐ ܥܲܠ ܣܵܘܦܹܗ ܕܛܘܼܪܵܐ ܠܐܲܦܲܝ̈ ܢܲܚܠܵܐ ܕܒܲܪ ܗܵܢܘܿܡ: ܕܐܝܼܬ̣ ܒܥܘܼܡܩܵܐ ܕܓܲܒܵܢ̄ܪܹ̈ܐ ܕܡ̣ܢ ܓܲܪܒ̇ܝܵܐ. ܘܢܵܚܹܬ̣ ܬܚܘܼܡܵܐ ܕܒܲܪ ܗܵܢܘܿܡ: ܥܲܠ ܣܸܛܪܵܐ ܕܝܵܒ̣̈ܘܿܣܵܝܹܐ ܡ̣ܢ ܬܲܝ̱ܡܢܵܐ: ܘܢܵܚܹ̇ܬ̣ ܠܥܹܝܢ ܕܘܼܓܹܠ.

¹⁷ܘܚܵܐܲܪ ܡ̣ܢ ܓܲܪܒ̇ܝܵܐ: ܘܢܵܦܹܩ ܠܡܲܒ̇ܘܼܥܵܐ ܕܲܫܡܸܫ: ܘܢܵܦܹ̇ܩ ܥܲܠ ܓܠܝܼܠܵܐ ܕܠܘܼܩܒܲܠ ܡܲܣܩܵܢܵܐ ܕܪܲܡܝܼܢ: ܘܢܵܚܹ̇ܬ̣ ܠܠܵܒ̣ܵܢ: ܘܲܠܒ̣ܵܗܵܢ ܕܲܒ̣ܪܹܗ ܕܪܘܼܒܹܝܠ.

¹⁸ܘܥܵܒܲܪ ܥܲܠ ܣܸܛܪܵܐ ܕܠܘܼܩܒܲܠ ܦܩܲܥܬ̣ܵܐ ܡ̣ܢ ܓܲܪܒ̇ܝܵܐ: ܘܢܵܚܹ̇ܬ̣ ܠܲܦܩܲܥܬ̣ܵܐ.

¹⁹ܘܥܵܒܲܪ ܬܚܘܼܡܵܐ ܥܲܠ ܣܸܛܪܵܐ ܕܒܹܝܬ̣ ܚܲܓܠܵܐ ܡ̣ܢ ܓܲܪܒ̇ܝܵܐ. ܘܗܵܘܹ̇ܝܢ ܡܲܦܩܵܢܵܘ̈ܗܝ ܕܲܬ̣ܚܘܼܡܵܐ ܥܲܠ ܠܸܫܵܢܵܐ ܕܝܲܡܵܐ ܕܡܸܠܚܵܐ ܡ̣ܢ ܓܲܪܒ̇ܝܵܐ: ܘܥܲܠ ܣܦܵܪ̈ܵܘܗܝ ܕܝܘܿܪܕ̇ܢܵܢ ܡ̣ܢ ܬܲܝ̱ܡܢܵܐ. ܗܵܢܵܘ ܬܚܘܼܡܵܐ ܕܬܲܝ̱ܡܢܵܐ ܘܲܕ݂ܝܘܿܪܕ̇ܢܵܢ.

²⁰ܒܲܬ̣ܚܘܼܡܵܘ̈ܗܝ ܠܣܸܛܪܵܐ ܕܡܲܕ݂ܢ̱ܚܵܐ: ܗܵܕܲܐ ܗ̄ܝ̣ ܝܵܪܬ̇ܘܼܬ̣ܵܐ ܕܫܲܒ̣ܛܵܐ ܕܲܒ̣ܢܲܝ ܒܸܢܝܵܡܹܝܢ ܒܲܬ̣ܚܘܼܡܹ̈ܝܗ̇ ܟܲܕ݂ ܚܵܕ݂ܪܵܐ ܠܫܲܪ̈ܒ̣ܵܬ̣ܗܘܿܢ.

²¹ܘܲܗ̤ܘܲܝ̈ ܩܘܼܪ̈ܝܵܐ ܕܫܲܒ̣ܛܵܐ ܕܲܒ̣̈ܢܲܝ ܒܸܢܝܵܡܹܝܢ ܠܫܲܪ̈ܒ̣ܵܬ̣ܗܘܿܢ: ܘܐܝܼܪܝܼܚܘܿ: ܘܒܹܝܬ̣ ܚܲܓܠܵܐ: ܘܲܥܡܵܩ: ܘܲܩܨܵܨ.

²²ܘܒܹܝܬ̣ ܥܵܪܵܒ̣ܵܐ: ܘܲܨܡܵܪܝܼܡ: ܘܒܹܝܬ̣ ܐܹܝܠ.

²³ܘܥܵܘܝܼܢ: ܘܦܲܪܵܐ: ܘܥܘܼܦܪܵܐ.

²⁴ܘܲܟ݂ܦܲܪ ܥܘܼܡܩܵܐ: ܘܥܲܦܠܝܼ: ܘܲܓ̣ܒ̣ܵܥ: ܩܘܼܪ̈ܝܵܐ ܐܲܪܒܲܥܸܣܪܹ̈ܐ ܘܐܵܓ̣ܘܼܪ̈ܣܲܝܗܹܝܢ.

²⁵ܘܓܸܒ̣ܥܘܿܢ: ܘܪܵܡܬ̣ܵܐ: ܘܒܹܪܘܿܬ̣.

²⁶ܘܡܲܨܦܝܵܐ: ܘܲܟ݂ܦܝܼܪܵܐ: ܘܡܲܨܵܐ.

²⁷ܘܲܪܩܸܡ: ܘܲܪܦܵܐܹܝܠ: ܘܬܲܪܐܲܠܵܐ.

²⁸ܘܲܨܠܲܥ: ܘܲܓܒ̣ܝܼܪܵܐ: ܘܢܵܒ̣ܘܿܣ ܕܗ̤̱ܝ ܗ̄ܝ̣ ܐܘܿܪܸܫܠܸܡ: ܘܓܸܒ̣ܥܲܬ̣: ܘܩܘܼܪܝܲܬ̇ܝܼܡ ܩܘܼܪ̈ܝܵܐ ܐܲܪܒܲܥܸܣܪܹ̈ܐ: ܘܐܵܓ̣ܘܼܪ̈ܣܲܝܗܹܝܢ ܗܵܕܲܐ ܗ̄ܝ̣ ܝܲܪܬ̇ܘܼܬ̣ܵܐ ܕܫܲܒ̣ܛܵܐ ܕܲܒ̣̈ܢܲܝ ܒܸܢܝܵܡܹܝܢ ܠܫܲܪ̈ܒ̣ܵܬ̣ܗܘܿܢ.