Read Aramaic Peshita Joshua 2 Bible Online

Joshua 2 - Aramaic Peshita bible

Joshua 2

¹ܘܫܲܕܲܪ ܝܼܫܘܿܥ ܒܲܪܢܘܿܢ ܡ̣ܢ ܣܵܛܝܼܡ ܬܪܹܝܢ ܓܲܒ̣ܪ̈ܝܼܢ ܕܝܵܕ݂ܥܝܼܢ ܒܐܲܪܥܵܐ: ܘܐܸܡܲܪ ܠܗܘܿܢ: ܙܸܠܘ ܚܙܵܘ ܠܐܲܪܥܵܐ ܕܐܝܼܪܝܼܚܘܿ ܘܐܸܙܲܠܘ ܘܥܲܠܘ ܠܘܵܬ̣ ܐܲܢ̄ܬ̇ܬ̣ܵܐ ܙܵܢܝܼܬ̣ܵܐ ܕܲܫܡܵܗ̇ ܪܵܚܵܒ̣: ܘܒ̣ܵܬ̣ܘ ܬܲܡܵܢ.

²ܘܐܸܬ̣ܐ̱ܡܲܪ ܠܡܲܠܟܵܐ ܕܐܝܼܪܝܼܚܘܿ: ܕܗܵܐ ܓܲܒ̣ܪܹ̈ܐ ܐܸܬ̣ܵܘ ܠܗܵܪܟܵܐ ܒܠܸܠܝܵܐ ܡ̣ܢ ܒ̈ܢܲܝ ܝܼܣܪܵܝܹܠ ܠܡܸܓܲܫ ܐܲܪܥܵܐ.

³ܘܫܲܕܲܪ ܡܲܠܟܵܐ ܕܐܝܼܪܝܼܚܘܿ ܠܘܵܬ̣ ܪܵܚܵܒ̣: ܘܐܸܡܲܪ ܠܵܗ̇: ܐܲܦܸܩ ܠܓܲܒ̣ܪܹ̈ܐ ܕܥܲܠ̣ܘ ܠܘܵܬܹܟ݂ܝ ܒܠܸܠܝܵܐ: ܡܸܛܠ ܕܲܠܡܸܓܲܫ ܐܲܪܥܲܢ ܐܸܬ̣ܵܘ.

⁴ܘܕܸܒ̣ܪܲܬ̤ ܐܲܢ̄ܬ̇ܬ̣ܵܐ ܠܲܬ̣ܪ̈ܲܝܗܘܿܢ ܓܲܒ̣ܪܹ̈ܐ ܘܛܲܫܝܲܬ̤ ܐܸܢܘܿܢ: ܘܐܸܡܪܲܬ̤ ܫܲܪܝܼܪܵܐܝܼܬ̣ ܐܸܬ̣ܵܘ ܠܘܵܬ̣ܝ ܓܲܒ̣ܪܹ̈ܐ: ܘܠܵܐ ܝܼܕ݂ܥܹ̇ܬ̣ ܡ̣ܢ ܐܲܝܡܸܟܵܐ ܐܸܢܘܿܢ.

⁵ܘܟܲܕ݂ ܗܘ̤ܵܐ ܙܲܒ̣ܢܵܐ ܕܡܸܬ̇ܬ̇ܚܸܕ݂ ܬܲܪܥܵܐ ܒܪܲܡܫܵܐ ܢܦܲܩ̣ܘ ܠܗܘܿܢ: ܘܠܵܐ ܝܸܕ݂ܥܹܬ̣ ܠܐܲܝܟܵܐ ܐܸܙܲܠ̣ܘ. ܦܘܿܩܘ ܥܓܲܠ ܒܵܬܲܪܗܘܿܢ: ܡܸܛܠ ܕܡܲܕ݂ܪ̱ܟ݂ܝܼܢ ܐ̄ܢܬ̇ܘܿܢ ܠܗܘܿܢ.

⁶ܘܗ̤ܝ ܐܲܣܩܲܬ̤ ܐܸܢܘܿܢ ܠܐܸܓܵܪܵܐ: ܘܛܲܫܝܲܬ̤ ܐܸܢܘܿܢ ܒܹܝܬ̣ ܟܲܪ̈ܣܒ̣ܵܢܹܐ ܕܟܸܬܵܢܵܐ ܕܣܝܼܡܝܼܢ ܗ̄ܘ̣ܵܘ ܠܵܗ̇ ܥܲܠ ܐܸܓܵܪܵܐ.

⁷ܘܓܲܒ̣ܪܹ̈ܐ ܢܦܲܩ̣ܘ ܒܵܬܲܪܗܘܿܢ ܒܐܘܼܪܚܵܐ ܕܝܘܿܪܕ̇ܢܵܢ ܕܥܲܠ ܡܲܥܒܲܪܬܵܐ: ܘܬܲܪܥܵܐ ܐܸܚܲܕ݂ܘ ܒܵܬܲܪ ܕܲܢܦܲܩ̣ܘ ܪܵܕܘܿܦܹܐ ܒܵܬܲܪ ܓܵܫܘܿܫܹ̈ܐ.

⁸ܘܗܸܢܘܿܢ ܥܕܲܡܵܐ ܠܗܵܫܵܐ ܠܵܐ ܫܟܸܒ̣ܘ ܗ̄ܘ̣ܵܘ: ܘܗ̤ܝ ܣܸܠܩܲܬ̤ ܠܘܵܬ̣ܗܘܿܢ ܠܐܸܓܵܪܵܐ.

⁹ܘܐܸܡܪܲܬ̤ ܠܓܲܒ̣ܪܹ̈ܐ: ܕܐܲܫ̱ܠܡܵܗ̇ ܠܟ݂ܘܿܢ ܡܵܪܝܵܐ ܠܐܲܪܥܵܐ: ܘܢܸܦܠܲܬ̤ ܕܸܚܠܲܬ̣ܟ݂ܘܿܢ ܥܠܲܝܢ: ܐܵܦ ܕܚܸܠ̣ܘ ܟܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ ܡ̣ܢ ܩܕ݂ܵܡܲܝܟ̇ܘܿܢ.

¹⁰ܡܸܛܠ ܕܫ̣ܡܲܥ̄ܢ ܕܐܵܘܒܸ̇ܫ ܡܵܪܝܵܐ ܡܲـ̈ـܝܵܐ ܕܝܲܡܵܐ ܕܣܘܿܦ ܡ̣ܢ ܩܕ݂ܵܡܲܝܟ̇ܘܿܢ: ܟܲܕ݂ ܢܦܲܩܬ̇ܘܿܢ ܡ̣ܢ ܡܸܨܪܹܝܢ ܘܡܸܕܸ̇ܡ ܕܲܥܒܲܕ̇ܬ̇ܘܿܢ ܠܲܬ̣ܪܹܝܢ ܡܲܠܟܹ̈ܐ ܕܐܵܡܘܿܪ̈ܵܝܹܐ: ܠܣܝܼܚܘܿܢ ܘܲܠܥܘܿܓ̣ ܕܲܚܪܲܒ̣ܬ̇ܘܿܢ ܐܸܢܘܿܢ.

¹¹ܘܟܲܕ݂ ܫܡܲܥ̄ܢ ܙܵܥ̣ ܠܸܒܲܢ: ܘܠܵܐ ܐܸܫܬܲܚܪܲܬ̤ ܪܘܼܚܵܐ ܒܐ̄ܢܵܫ ܡܸܢܲܢ ܡ̣ܢ ܩܕ݂ܵܡܲܝܟ̇ܘܿܢ. ܡܸܛܠ ܕܡܵܪܝܵܐ ܐܲܠܵܗܟ݂ܘܿܢ: ܗܘ̤ܝܼܘ ܐܲܠܵܗܵܐ ܒܲܫܡܲܝܵܐ ܡ̣ܢ ܠܥܸܠ: ܘܒܲܐܪܥܵܐ ܡ̣ܢ ܠܬܲܚܬ̇.

¹²ܡܸܟܹ̇ܝܠ ܝܼܡܵܘ ܠܝܼ ܒܡܵܪܝܵܐ: ܡܸܛܠ ܕܥܸܒ̣ܕܹ̇ܬ̣ ܒܟ݂ܘܿܢ ܛܲܝܒ̇ܘܼܬ̣ܵܐ. ܘܲܥܒܸܕ݂ܘ ܘܐܵܦ ܐܲܢ̄ܬ̇ܘܿܢ ܒܝܼ: ܘܲܒ̣ܒܹܝܬ̣ ܐܵܒ̣ܝ ܛܲܝܒ̇ܘܼܬ̣ܵܐ: ܘܗܲܒ̣ܘ ܠܝܼ ܐܵܬ̤ܵܐ ܕܩܘܼܫܬܵܐ.

¹³ܘܐܲܚܵܘ ܠܝܼ: ܘܠܵܐܒ̣ܝ: ܘܠܹܐܡܝ: ܘܠܲܐܚܲܝ̈: ܘܠܲܐܚ̈ܘܵܬ̣ܝ: ܘܲܠܟ݂ܠ ܕܐܝܼܬ̣ ܠܲܢ: ܘܦܲܨܵܘ ܢܲܦ̮̈ܫܵܬܲܢ ܡ̣ܢ ܡܵܘܬܵܐ.

¹⁴ܘܐܸܡܲܪܘ ܠܵܗ̇ ܓܲܒ̣ܪܹ̈ܐ: ܢܲܦ̮̈ܫܵܬܲܢ ܕܝܼܠܲܢ ܝܵܗ̄ܒ̇ܝܼܢ ܚ̄ܢܲܢ ܚܠܵܦܲܝܟ̇ܘܿܢ ܠܡܵܘܬܵܐ: ܐܸܢ ܠܵܐ ܕܹܝܢ ܡܚܵܘܹܝܢ ܐ̄ܢܬ̇ܘܿܢ ܡܸܠܬ̣ܵܐ ܗܵܕܹܐ. ܘܡܵܐ ܕܝܲܗ̄ܒܵܗ̇ ܠܲܢ ܡܵܪܝܵܐ ܠܐܲܪܥܵܐ ܗܵܕܹܐ: ܥܲܒ̣ܕ̇ܝܼܢ ܚ̄ܢܲܢ ܥܲܡܹܟ݂ܝ ܛܲܝܒ̇ܘܼܬ̣ܵܐ ܘܩܘܼܫܬܵܐ.

¹⁵ܘܐܲܚܬܲܬ̤ ܐܸܢܘܿܢ ܒܚܲܒ̣ܠܵܐ ܡ̣ܢ ܟܵܘܬ̣ܵܐ: ܡܸܛܠ ܕܒܲܝܬܵܗ̇ ܒܐܸܣܬ̣ܵܐ ܗ̄ܘ̣ܵܐ ܕܫܘܼܪܵܐ: ܘܥܲܠ ܫܘܼܪܵܐ ܝܵܬ̣ܒܵܐ ܗ̄ܘ̣ܵܬ̣.

¹⁶ܘܐܸܡܪܲܬ̤ ܠܗܘܿܢ: ܒܛܘܼܪܵܐ ܛܘܼܪܵܐ ܙܸܠܘ: ܕܲܠܡܵܐ ܢܦ̮ܓܘܼܢ ܒܟ݂ܘܿܢ ܗܵܢܘܿܢ ܕܲܢܦܲܩ̣ܘ ܒܵܬܲܪܟ݂ܘܿܢ: ܘܐܸܬ̇ܛܲܫܵܘ ܬܲܡܵܢ ܬܠܵܬ̣ܵܐ ܝܵܘ̈ܡܝܼܢ ܥܕܲܡܵܐ ܕܗܵܦܟ̇ܝܼܢ: ܘܗܵܝܕܹ̇ܝܢ ܬܹܐܙܠ̄ܘܿܢ ܒܐܘܼܪܚܟ݂ܘܿܢ.

¹⁷ܘܐܸܡܲܪܘ ܠܵܗ̇ ܓܲܒ̣ܪܹ̈ܐ. ܡܚܲܣܹܝܢ ܚ̄ܢܲܢ ܡ̣ܢ ܡܵܘܡܵܬ̣ܵܐ ܗܵܕܹܐ ܕܐܵܘܡܝܼܬ̇ܝܼܢ.

¹⁸ܗܵܐ ܚܢܲܢ ܥܵܐܠܝܼܢ ܚ̄ܢܲܢ ܠܐܲܪܥܵܐ: ܚܘܼܛܵܐ ܕܹܝܢ ܕܲܙܚܘܿܪܝܼܬ̣ܵܐ ܩܛܘܿܪܝ ܒܟ݂ܵܘܬ̣ܵܐ ܕܐܲܚܸܬ̇ܬ̇ܝܼܢ ܡܸܢܵܗ̇. ܘܠܲܐܒ̣ܘܼܟ݂ܝ: ܘܠܐܸܡܹܟ݂ܝ: ܘܠܲܐܚܲܝ̈ܟ̇ܝ: ܘܲܠܟ݂ܠܹܗ ܒܹܝܬ̣ ܐܲܒ̣ܘܼܟ݂ܝ: ܐܲܥܸܠܝ ܠܘܵܬܹܟ݂ܝ ܠܓ̣ܵܘ ܒܲܝܬܵܐ.

¹⁹ܘܟ݂ܠܡ̇ܢ ܕܢܵܦܹ̇ܩ ܡ̣ܢ ܬܲܪܥܵܐ ܕܒܲܝܬܹ̇ܟ݂ܝ ܠܒܲܪ: ܕܡܹܗ ܒܪܹܫܹܗ: ܘܲܚܢܲܢ ܡܦܲܨܹܝܢ ܚ̄ܢܲܢ ܡ̣ܢ ܥܝܵܪܬܹ̇ܗ. ܘܟ݂ܠ ܡ̇ܢ ܕܢܸܗܘܹܐ ܥܲܡܹܟ݂ܝ ܒܓ̣ܵܘ ܒܲܝܬܵܐ: ܕܡܹܗ ܒܪܹܫܲܢ: ܘܲܚܢܲܢ ܚܲܝܵܒ̣ܝܼܢ ܚ̄ܢܲܢ ܥܝܵܪܬܹ̇ܗ: ܐܸܢ ܐ̄ܢܵܫ ܢܲܗܪܝܼܘܗܝ.

²⁰ܘܐܸܢ ܬܚܵܘܹܝܢ ܡܸܠܬ̣ܵܐ ܗܵܕܹܐ: ܗ̤ܘܲܝܢ ܡܚܲܣܹܝܢ ܡ̣ܢ ܡܵܘܡܵܬ̣ܵܐ ܗܵܕܹܐ ܕܐܵܘܡܝܼܬ̇ܝܼܢ.

²¹ܘܐܸܡܪܲܬ̤ ܠܗܘܿܢ: ܐܲܝܟ݂ ܡܸܠܲܬ̣ܟ݂ܘܿܢ ܗܵܟܲܢܵܐ ܢܸܗܘܹܐ. ܘܫܲܕ̇ܪܲܬ̤ ܐܸܢܘܿܢ ܘܐܸܙܲܠܘ: ܘܩܸܛܪܲܬ̤ ܚܘܼܛܵܐ ܕܲܙܚܘܿܪܝܼܬ̣ܵܐ ܒܟ݂ܵܘܬܵܐ.

²²ܘܐܸܙܲܠܘ ܠܛܘܼܪܵܐ: ܘܝܸܬ̣ܒ̣ܘ ܬܲܡܵܢ ܬܠܵܬ̣ܵܐ ܝܵܘ̈ܡܝܼܢ: ܥܕܲܡܵܐ ܕܲܗܦܲܟ݂ܘ ܗܵܢܘܿܢ ܕܐܸܙܲܠܘ ܒܵܬܲܪܗܘܿܢ ܠܡܹܐܬ̣ܵܐ. ܘܲܒ̣ܥܵܘ ܐܸܢܘܿܢ ܗܵܢܘܿܢ ܕܲܢܦܲܩܘ ܒܵܬܲܪܗܘܿܢ ܒܟ݂ܠܵܗ̇ ܐܘܼܪܚܵܐ: ܘܟܲܕ݂ ܠܵܐ ܐܸܫܟܲܚܘ ܐܸܢܘܿܢ ܗܦܲܟ݂ܘ ܠܗܘܿܢ.

²³ܘܗܵܢܘܿܢ ܬܪܹܝܢ ܓܵܫܘܿܫ̈ܝܼܢ ܢܚܸܬ̣ܘ ܡ̣ܢ ܛܘܼܪܵܐ: ܘܲܥܒܲܪܘ ܘܐܸܙܲܠܘ ܠܘܵܬ̣ ܝܼܫܘܿܥ ܒܲܪܢܘܿܢ: ܘܐܸܫܬܲܥܝܼܘ ܠܹܗ ܟܠ ܡܸܕܸ̇ܡ ܕܲܓ̣ܕܲܫ ܠܗܘܿܢ.

²⁴ܘܐܸܡܲܪܘ ܠܹܗ ܠܝܼܫܘܿܥ: ܐܲܫܠ̱ܡܵܗ̇ ܡܵܪܝܵܐ ܒܐܝܼܕܲܝ̈ܢ ܠܟ݂ܠܵܗ̇ ܐܲܪܥܵܐ: ܐܵܦ ܕܚܸܠ̣ܘ ܟܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ ܡ̣ܢ ܩܕ݂ܵܡܲܝܢ.