Read Aramaic Peshita Joshua 22 Bible Online

Joshua 22 - Aramaic Peshita bible

Joshua 22

¹ܗܵܝܕܹ̇ܝܢ ܩ̣ܪܵܐ ܝܼܫܘܿܥ ܠܲܒ̣̈ܢܲܝ ܪܘܼܒܹܝܠ: ܘܠܲܒ̣̈ܢܲܝ ܓܵܕ݂: ܘܲܠܦܸܠܓܹܗ ܕܫܲܒ̣ܛܵܐ ܕܲܡܢܲܫܹܐ.

²ܘܐܸܡܲܪ ܠܗܘܿܢ: ܐܲܢ̄ܬ̇ܘܿܢ ܢܛܲܪܬ̇ܘܿܢ ܟܠܡܸܕܸ̇ܡ ܕܐܸܡܲܪ ܠܟ݂ܘܿܢ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ ܘܲܫܡܲܥܬ̇ܘܿܢ ܒܩܵܠܝ ܠܟ݂ܠ ܡܸܕܸ̇ܡ ܕܦܲܩܸܕ̇ܬ̇ܟ݂ܘܿܢ.

³ܘܠܵܐ ܫܒܲܩܬ̇ܘܿܢ ܠܐܲܚܲܝ̈ܟ̇ܘܿܢ: ܗܵܐ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ ܥܕܲܡܵܐ ܠܝܵܘܡܵܢܵܐ: ܘܲܢܛܲܪܬ̇ܘܿܢ ܦܘܼܩ̈ܕܵܢܵܘܗܝ ܕܡܵܪܝܵܐ ܐܲܠܵܗܟ݂ܘܿܢ.

⁴ܘܗܵܫܵܐ ܗܵܐ ܐܲܢܝܼܚ ܡܵܪܝܵܐ ܐܲܠܵܗܟ݂ܘܿܢ ܠܐܲܚܲܝ̈ܟ̇ܘܿܢ ܐܲܝܟܲܢܵܐ ܕܐܸܡܲܪ ܠܗܘܿܢ ܡܸܟܸ̇ܝܠ ܐܸܬ̣ܦܢܵܘ ܘܙܸܠܘ ܠܩܘܼܪ̈ܝܼܟ݂ܘܼܢ: ܘܠܲܐܪܥܵܐ ܕܝܵܪܬ̇ܘܼܬ̣ܟ݂ܘܿܢ: ܕܝܲܗ̄ܒ̣ ܠܟ݂ܘܿܢ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ: ܒܥܸܒ̣ܪܵܐ ܕܝܘܿܪܕ̇ܢܵܢ ܡ̣ܢ ܡܲܕ݂ܢ̱ܚܵܐ.

⁵ܒܲܠܚܘܿܕ݂ ܕܹܝܢ ܐܸܙܕܲܗ̄ܪܘ ܛܵܒ̣: ܘܲܥܒܸܕ݂ܘ ܦܘܼܩܕܵܢܹ̈ܐ ܘܢܵܡܘܿܣܹ̈ܐ ܕܦܲܩܸܕ݂ܟܘܿܢ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ: ܠܡܸܪܚܲܡ ܠܡܵܪܝܵܐ ܐܲܠܵܗܟ݂ܘܿܢ: ܘܲܠܡܸܛܲܪ ܦܘܼܩ̈ܕܵܢܵܘܗܝ: ܘܲܠܡܸܬ̣ܢܲܩܵܦܘܼ ܠܹܗ: ܘܲܠܡܸܦܠ̱ܚܹܗ: ܒܟ݂ܠܹܗ ܠܸܒ̇ܟ݂ܘܿܢ: ܘܲܒ̣ܟ݂ܠܵܗ̇ ܢܲܦ̮ܫܟ݂ܘܿܢ.

⁶ܘܒܲܪܸܟ݂ ܐܸܢܘܿܢ ܝܼܫܘܿܥ: ܘܫܲܕܲܪ ܐܸܢܘܿܢ ܘܐܸܙܲܠ̣ܘ ܠܩܘܼܪ̈ܝܼܗܘܿܢ.

⁷ܘܲܠܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ: ܝܲܗ̄ܒ̣ ܡܘܼܫܹܐ ܒܡܲܬ̣ܢܝܼܢ. ܘܲܠܦܲܠܓܹ̇ܗ ܝܲܗ̄ܒ̣ ܝܼܫܘܿܥ ܥܲܡ ܐܲܚܲܝ̈ܗܘܿܢ: ܒܥܸܒ̣ܪܵܐ ܕܝܘܿܪܕ̇ܢܵܢ: ܡ̣ܢ ܡܲܥܪ̱ܒ̣ܵܐ. ܘܫܲܕܲܪ ܐܸܢܘܿܢ ܝܼܫܘܿܥ ܘܐܸܙܲܠ̣ܘ ܠܩܘܼܪ̈ܝܼܗܘܿܢ: ܘܒܲܪܸܟ݂ ܐܸܢܘܿܢ.

⁸ܘܐܸܡܲܪ ܠܗܘܿܢ: ܒܢܸܟ݂ܣܹ̈ܐ ܣܲܓ̇ܝܼ̈ܐܹܐ ܗܦܘܿܟ݂ܘ ܠܩܘܼܪ̈ܝܼܟ݂ܘܿܢ: ܘܠܲܐܪܥܵܐ ܕܝܵܪܬ̇ܘܼܬ̣ܟ݂ܘܿܢ: ܘܲܒ̣ܩܸܢܝܵܢܵܐ ܕܛܵܒ̣ ܣܲܓ̇ܝܼ: ܒܣܹܐܡܵܐ: ܘܲܒ̣ܕܲܗܒ̣ܵܐ: ܘܒܲܢܚܵܫܵܐ: ܘܲܒ̣ܦܲܪܙܠܵܐ: ܘܲܒ̣ܢܲܚ̈ܬܹ̇ܐ ܕܣܲܓ̇ܝܼܐܝܼܢ ܛܵܒ̣. ܘܦܲܠܸܓ̣ܘ ܒܸܙܬ̣ܵܐ ܕܲܒ̣ܥܸܠܕ̇ܒ̣ܵܒܲܝ̈ܟ̇ܘܿܢ: ܥܲܡ ܐܲܚܲܝ̈ܟ̇ܘܿܢ.

⁹ܘܲܗ̣ܦܲܟ݂ܘ ܘܐܸܙܲܠܘ ܒ̈ܢܲܝ ܪܘܼܒܹܝܠ: ܘܲܒ̣̈ܢܲܝ ܓܵܕ݂: ܘܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ: ܡ̣ܢ ܠܘܵܬ̣ ܒ̈ܢܲܝ ܝܼܣܪܵܝܹܠ: ܡ̣ܢ ܫܝܼܠܘܿ ܕܒܲܐܪܥܵܐ ܕܲܟ݂ܢܲܥܢ: ܠܡܹܐܙܲܠ ܠܐܲܪܥܵܐ ܕܓܸܠܥܵܕ݂: ܠܐܲܪܥܵܐ ܕܝܵܪܬ̇ܘܼܬ̣ܗܘܿܢ ܕܝܼܪܸܬ̣ܘ ܒܵܗ̇: ܥܲܠ ܡܸܠܲܬ̣ ܦܘܼܡܹܗ ܕܡܵܪܝܵܐ ܒܐܝܼܕ݂ܵܐ ܕܡܘܼܫܹܐ.

¹⁰ܘܐܸܬ̣ܵܘ ܠܓܲܠܓܵܠܵܐ ܕܥܲܠ ܓܹܢ̄ܒ̣ ܝܘܿܪܕ̇ܢܵܢ ܕܒܲܐܪܥܵܐ ܕܲܟ݂ܢܲܥܢ. ܘܲܒ̣ܢܵܘ ܬܲܡܵܢ ܒ̈ܢܲܝ ܪܘܼܒܹܝܠ ܘܲܒ̣̈ܢܲܝ ܓܵܕ݂ ܘܦܲܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ: ܡܲܕ݂ܒ̇ܚܵܐ ܥܲܠ ܓܸܢ̄ܒ̣ ܝܘܿܪܕ̇ܢܵܢ: ܡܲܕ݂ܒ̇ܚܵܐ ܪܲܒܵܐ ܕܚܸܙܘܵܐ.

¹¹ܘܲܫ̣ܡܲܥܘ ܒ̈ܢܲܝ ܝܼܣܪܵܝܹܠ ܕܲܒ̣̈ܢܲܝ ܪܘܼܒܹܝܠ: ܘܲܒ̣̈ܢܲܝ ܓܵܕ݂: ܘܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ: ܒܢ̣ܵܘ ܡܲܕ݂ܒ̇ܚܵܐ ܠܘܼܩܒܲܠ ܐܲܪܥܵܐ ܕܲܟ݂ܢܲܥܢ: ܒܓܲܠܓܵܠܵܐ ܕܥܲܠ ܓܹܢ̄ܒ̣ ܝܘܿܪܕ̇ܢܵܢ ܒܐܲܪܥܵܐ ܕܲܒ̣̈ܢܲܝ ܝܼܣܪܵܝܹܠ.

¹²ܘܐܸܬ̣ܟܲܢܲܫܘ ܟܠܵܗ̇ ܟܢܘܼܫܬܵܐ ܕܲܒ̣̈ܢܲܝ ܝܼܣܪܵܝܹܠ ܠܫܝܼܠܘܿ: ܠܡܸܣܲܩ ܥܠܲܝܗܘܿܢ ܠܲܩܪܵܒ̣ܵܐ.

¹³ܘܫܲܕܲܪܘ ܒ̈ܢܲܝ ܝܼܣܪܵܝܹܠ ܠܘܵܬ̣ ܒ̈ܢܲܝ ܪܘܼܒܹܝܠ: ܘܲܠܘܵܬ̣ ܒ̈ܢܲܝ ܓܵܕ݂: ܘܲܠܘܵܬ̣ ܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ ܠܐܲܪܥܵܐ ܕܓܸܠܥܵܕ݂: ܠܦܝܼܢܚܸܣ ܒܲܪ ܐܹܠܝܼܥܵܙܲܪ ܟܵܗܢܵܐ.

¹⁴ܘܥܸܣܪܵܐ ܪܵܘ̱ܪ̈ܒ̣ܵܢܝܼܢ ܥܲܡܹܗ: ܚܲܕ݂ ܚܲܕ݂ ܪܲܒܵܐ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ. ܘܗܸܢܘܿܢ ܓܲܒ̣ܪܹ̈ܐ ܗܵܠܹܝܢ: ܪܹ̈ܫܹܐ ܗ̄ܘ̣ܵܘ ܕܚܲܝ̈ܠܵܘܵܬ̣ܵܐ ܕܝܼܣܪܵܝܹܠ.

¹⁵ܘܐܸܬ̣ܵܘ ܠܘܵܬ̣ ܒ̈ܢܲܝ ܪܘܼܒܹܝܠ: ܘܲܠܘܵܬ̣ ܒ̈ܢܲܝ ܓܵܕ݂: ܘܲܠܘܵܬ̣ ܦܸܠܓܹܗ ܕܫܲܒ̣ܛܵܐ ܕܲܡܢܲܫܹܐ ܠܐܲܪܥܵܐ ܕܓܸܠܥܵܕ݂: ܘܡܲܠܸܠ̣ܘ ܥܲܡܗܘܿܢ: ܘܐܸܡܲܪܘ ܠܗܘܿܢ.

¹⁶ܗܵܟܲܢܵܐ ܐܵܡ̇ܪܝܼܢ ܟܠܵܗ̇ ܟܢܘܼܫܬܵܐ ܕܡܵܪܝܵܐ: ܡܵܢܲܐ ܗ̄ܝ ܟܲܕܵܒ̣ܘܼܬ̣ܵܐ ܗܵܕܹܐ ܕܟܲܕܸ̇ܒ̣ܬ̇ܘܿܢ ܒܐܲܠܵܗܵܐ ܕܝܼܣܪܵܝܹܠ: ܘܲܗܦܲܟ݂ܬ̇ܘܿܢ ܡ̣ܢ ܒܵܬ̣ܪܹܗ ܕܡܵܪܝܵܐ: ܘܲܒ̣ܢܲܝܬ̇ܘܿܢ ܠܟ݂ܘܿܢ ܡܲܕ݂ܒ̇ܚܵܐ ܕܬܸܦ̱ܪܩܘܼܢ ܡ̣ܢ ܕܸܚ̱ܠܬܹܗ ܕܡܵܪܝܵܐ.

¹⁷ܠܵܐ ܟܲܕ̇ܘܼ ܠܲܢ ܚܛܝܼܬ̣ܵܐ ܕܲܦܥܘܿܪ: ܕܠܵܐ ܐܸܬ̇ܕܲܟ̇ܝܼܢ ܡܸܢܵܗ̇ ܥܕܲܡܵܐ ܠܝܵܘܡܵܢܵܐ: ܘܲܗܘ̤ܵܐ ܡܵܘܬܵܢܵܐ ܒܲܟ݂ܢܘܼܫܬܹ̇ܗ ܕܡܵܪܝܵܐ.

¹⁸ܘܐܲܢ̄ܬ̇ܘܿܢ ܡܵܐ ܕܲܗ̣ܦܲܟ݂ܬ̇ܘܿܢ ܝܵܘܡܵܢܵܐ ܡ̣ܢ ܕܸܚ̱ܠܬܹܗ ܕܡܵܪܝܵܐ: ܡ̣ܢ ܡܚܵܪ ܥܲܠ ܟܠܵܗ̇ ܗ̄ܘ̣ ܟܢܘܼܫܬܵܐ ܕܝܼܣܪܵܝܹܠ ܗܵܘܹ̇ܐ ܪܘܼܓ̣ܙܵܐ.

¹⁹ܒܪܲܡ ܕܹܝܢ ܐܸܢ ܡܛܵܘܫܵܐ ܗ̄ܝ̣ ܐܲܪܥܵܐ ܕܝܵܪܬ̇ܘܼܬ̣ܟ݂ܘܿܢ: ܥܒܲܪܘ ܠܟ݂ܘܿܢ ܠܐܲܪܥܵܐ ܕܝܵܪܬ̇ܘܼܬܹܗ ܕܡܵܪܝܵܐ: ܐܲܝܟܵܐ ܕܲܫܪܸܐ ܡܲܫܟ̇ܢܹܗ ܕܡܵܪܝܵܐ: ܘܝܼܪܲܬ̣ܘ ܥܲܡܲܢ: ܘܲܒ̣ܕܸܚ̱ܠܬܹܗ ܕܡܵܪܝܵܐ ܠܵܐ ܬܸܒ̣ܣܘܿܢ: ܘܲܥܠܲܝܢ ܠܵܐ ܬܸܡ̱ܪܕ݂ܘܼܢ: ܡܸܛܠ ܕܲܒ̣ܢܲܝܬ̇ܘܿܢ ܠܟ݂ܘܿܢ ܡܲܕ݂ܒ̇ܚܵܐ ܠܒܲܪ ܡ̣ܢ ܡܲܕ݂ܒ̇ܚܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

²⁰ܠܵܐ ܚ̣ܙܲܝܬ̇ܘܿܢ ܕܥܵܟ݂ܵܪ ܒܲܪ ܟܲܪܡܝܼ ܪܕܲܓ̣ ܗ̄ܘ̣ܵܐ ܘܲܢܣܲܒ̣ ܡ̣ܢ ܚܸܪܡܵܐ: ܘܥܲܠ ܟܠܵܗ̇ ܗ̄ܘ̣ ܟܢܘܼܫܬܵܐ ܕܝܼܣܪܵܝܹܠ ܗܘ̤ܵܐ ܪܘܼܓ̣ܙܵܐ: ܘܗ̤ܘ ܚܕ݂ ܗ̄ܘ̣ܵܐ ܓܒܲܪ: ܘܟ݂ܠܲܢ ܒܠܲܥ̄ܢ ܒܲܚܛܝܼܬܹܗ.

²¹ܘܲܥܢ̣ܵܘ ܒ̈ܢܲܝ ܪܘܼܒܹܝܠ: ܘܲܒ̣̈ܢܲܝ ܓܵܕ݂: ܘܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ: ܘܡܲܠܸܠ̣ܘ ܥܲܡ ܦܝܼܢܚܸܣ ܒܲܪ ܐܹܠܝܼܥܵܙܲܪ ܟܵܗܢܵܐ: ܘܥܲܡ ܪܹ̈ܫܹܐ ܕܚܲܝ̈ܠܵܘܵܬ̣ܵܐ ܕܝܼܣܪܵܝܹܠ: ܘܐܸܡܲܪܘ ܠܗܘܿܢ.

²²ܡܵܪܝܵܐ ܗ̄ܘ̣ ܐܲܠܵܗܵܐ ܕܐܲܠܵܗܹ̈ܐ: ܐܲܠܵܗ̇ ܐܲܠܵܗܹ̈ܝܢ ܡܵܪܝܵܐ ܗ̄ܘ̣: ܘܗ̤ܘܝܘܼ ܐܲܠܵܗܲܢ: ܘܠܝܼܣܪܵܝܹܠ ܗ̤ܘ ܝܵܕܲܥ: ܘܠܲܢ ܗ̤ܘ ܝܵܕܲܥ. ܐܸܢ ܕܢܸܦܪܘܿܩ ܡܸܢܹܗ ܘܐܸܢ ܕܢܲܥܠܹܐ ܗ̄ܘ̣ ܒܕܸܚ̱ܠܬܹܗ ܕܡܵܪܝܵܐ ܥܒܲܕ̄ܢ ܗܵܟܲܢܵܐ: ܠܵܐ ܢܸܦ̱ܪܩܲܢ ܝܵܘܡܵܢܵܐ.

²³ܐܸܢ ܒܢܲܝܢ ܠܲܢ ܡܲܕ݂ܒ̇ܚܵܐ ܕܢܸܗܦܘܿܟ݂ ܡ̣ܢ ܕܸܚ̱ܠܬܹܗ ܕܡܵܪܝܵܐ: ܐܵܘ ܕܲܢܩܲܪܸܒ̣ ܥܠܵܘܗܝ ܕܸܒ̣̈ܚܵܬ̣ܵܐ: ܐܵܘ ܦܘܼܠܚܵܢ ܐ̄ܚܪܹܝܢ: ܡܵܪܝܵܐ ܢܸܬ̣ܒܲܥ ܒܐܝܼܕܲܢ.

²⁴ܐܸܢ ܠܵܐ ܗ̄ܘ̣ܵܐ ܡ̣ܢ ܕܸܚ̱ܠܬܹܗ ܥܒܲܕ݂ܢܵܗ̇ ܗܵܕܹܐ: ܘܲܕ݂ܠܵܐ ܢܹܐܡܪܘܿܢ ܡ̣ܢ ܡܚܵܪ ܒܢܲܝ̈ܟ̇ܘܿܢ ܠܲܒ̣̈ܢܲܝܢ: ܡܵܢܵܐ ܐܝܼܬ̣ ܠܟ݂ܘܿܢ ܠܘܵܬ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܒ̈ܢܲܝ ܪܘܼܒܹܝܠ: ܘܲܒ̣̈ܢܲܝ ܓܵܕ݂.

²⁵ܕܗܵܐ ܬܚܘܼܡܵܐ ܝܲܗ̄ܒ̣ ܡܵܪܝܵܐ ܒܲܝܢܲܝܢ ܘܲܠܟ݂ܘܿܢ ܝܘܿܪܕ̇ܢܵܢ ܗܵܢܵܐ. ܡܸܟܸ̇ܝܠ ܠܲܝܬ̇ ܠܟ݂ܘܿܢ ܡܢܵܬ̣ܵܐ ܒܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܘܲܢܒܲܛܠܘܼܢ ܒܢܲܝ̈ܟ̇ܘܿܢ ܡ̣ܢ ܡܚܵܪ ܠܲܒ̣̈ܢܲܝܢ ܕܠܵܐ ܢܸܕ݂ܚ̄ܠܘܼܢ ܠܡܵܪܝܵܐ.

²⁶ܡܸܛܠ ܗܵܢܵܐ ܗ̄ܘ̣ ܐܸܡܲܪ̄ܢ ܕܢܸܥܒܸ̇ܕ݂ ܠܲܢ ܡܲܕ݂ܒ̇ܚܵܐ: ܠܵܐ ܠܕܸܒ̣ܚܬ̣ܵܐ: ܘܠܵܐ ܠܩܘܼܪܒܵܢܵܐ.

²⁷ܐܸܠܵܐ ܠܣܵܗܕ̇ܘܼܬ̣ܵܐ ܒܲܝܢܲܝܢ ܘܲܠܟ݂ܘܿܢ: ܘܒܹܝܬ̣ ܕܪ̈ܲܝܢ ܡ̣ܢ ܒܵܬ̣ܪܲܢ. ܘܲܚܢܲܢ ܘܕܵܪ̈ܲܝܢ ܡ̣ܢ ܒܵܬ̣ܪܲܢ: ܦܘܼܠܚܵܢܹܗ ܗ̄ܘ̣ ܕܡܵܪܝܵܐ ܦܵܠܚܝܼܢܲܢ ܩܕ݂ܵܡܵܘܗܝ ܒܲܥ̈ܠܵܘܵܬܲܢ: ܘܲܒ̣ܕܸܒ̣ܚܲܝ̈ܢ: ܘܲܒ̣ܩܘܼܪ̈ܒܢܲܝܢ ܒܐܲܬ̣ܪܵܐ ܕܓ̣ܵܒܹܐ ܡܵܪܝܵܐ ܠܡܲܫܪܵܝܘܼ ܫܡܹܗ ܬܲܡܵܢ: ܘܲܕ݂ܠܵܐ ܢܹܐܡܪܘܿܢ ܒܢܲܝ̈ܟ̇ܘܿܢ ܡ̣ܢ ܡܚܵܪ ܠܲܒ̣̈ܢܲܝܢ: ܠܲܝܬ̇ ܠܟ݂ܘܿܢ ܡܢܵܬ̣ܵܐ ܒܡܵܪܝܵܐ.

²⁸ܘܐܸܡܲܪ̄ܢ: ܡܵܐ ܕܐܸܡܲܪܘ ܠܲܢ: ܘܲܠܕ݂ܵܪ̈ܲܝܢ ܡ̣ܢ ܡܚܵܪ: ܢܹܐܡܪܘܼܢ ܠܗܘܿܢ: ܚܙܵܘ ܕܡܘܼܬ̣ܵܐ ܕܡܲܕ݂ܒ̇ܚܹܗ ܕܡܵܪܝܵܐ ܕܲܥܒܲܕ݂ܘ ܐܲܒ̣ܵܗܲܝ̈ܢ: ܠܵܐ ܠܝܲܩܕܵܐ ܫܲܠܡܵܐ: ܘܠܵܐ ܠܕܸܒ̣ܚܬ̣ܵܐ: ܐܸܠܵܐ ܕܢܸܗܘܹܐ ܣܵܗܕܵܐ ܒܲܝܢܲܝܢ ܘܲܠܟ݂ܘܿܢ.

²⁹ܚܵܣ ܠܲܢ ܕܢܲܣܠܸܐ ܕܸܚ̱ܠܬܹܗ ܕܡܵܪܝܵܐ: ܘܢܸܗܦܘܿܟ݂ ܡ̣ܢ ܕܸܚ̱ܠܬܹܗ ܕܐܲܠܵܗܵܐ: ܘܢܸܒ̣ܢܸܐ ܠܲܢ ܡܲܕ݂ܒ̇ܚܵܐ ܠܝܲܩܕܵܐ ܫܲܠܡܵܐ: ܘܲܠܩܘܼܪܒܵܢܵܐ: ܘܲܠܕܸܒ̣ܚܬ̣ܵܐ: ܠܒܲܪ ܡ̣ܢ ܡܲܕ݂ܒ̇ܚܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܕܐܝܼܬ̣ ܩܕ݂ܵܡ ܡܲܫܟ̇ܢܹܗ.

³⁰ܘܲܫ̣ܡܲܥ ܦܝܼܢܚܸܣ ܒܲܪ ܐܸܠܝܼܥܵܙܲܪ ܟܵܗܢܵܐ: ܘܪܵܘ̱ܪ̈ܒ̣ܵܢܹܐ ܕܲܟ݂ܢܘܼܫܬܵܐ: ܪܹ̈ܫܹܐ ܕܚܲܝ̈ܠܵܘܵܬ̣ܵܐ ܕܝܼܣܪܵܝܹܠ ܕܥܲܡܹܗ: ܡܸܠܹ̈ܐ ܕܡܲܠܸܠ̣ܘ ܒ̈ܢܲܝ ܪܘܼܒܹܝܠ: ܕܲܒ̣ܢ̈ܝ ܓܵܕ݂: ܘܦܸܠܓܹ̇ܗ ܕܫܲܒ̣̈ܛܵܐ ܕܲܡܢܲܫܹܐ: ܘܲܫܦܲܪ ܒܥܲܝܢܲܝ̈ܗܘܿܢ.

³¹ܘܐܸܡܲܪ ܦܝܼܢܚܸܣ ܒܲܪ ܐܸܠܝܼܥܵܙܲܪ ܟܵܗܢܵܐ: ܠܲܒ̣̈ܢܲܝ ܪܘܼܒܹܝܠ: ܘܠܲܒ̣̈ܢܲܝ ܓܵܕ݂: ܘܠܲܒ̣̈ܢܲܝ ܡܢܲܫܹܐ: ܝܵܘܡܵܢܵܐ ܝܼܕܲܥ̄ܢ ܕܒܲܝܢܵܬܲܢ ܗ̄ܘ̣ ܡܵܪܝܵܐ: ܕܠܵܐ ܕܲܓܸܠܬ̇ܘܿܢ ܒܡܵܪܝܵܐ ܕܲܓܵܠܘܼܬ̣ܵܐ ܗܵܕܹܐ: ܡܸܟܹ̇ܝܠ ܐܲܢ̄ܬ̇ܘܿܢ ܦܲܨܝܼܬ̇ܘܿܢ ܠܲܒ̣̈ܢܲܝ ܝܼܣܪܵܝܹܠ: ܕܠܵܐ ܬܸܗܘܹܐ ܒܗܘܿܢ ܐܝܼܕܹܗ ܕܡܵܪܝܵܐ ܠܪܘܼܓ̣ܙܵܐ.

³²ܘܲܗ̣ܦܲܟ݂ ܦܝܼܢܚܸܣ ܒܲܪ ܐܹܠܝܼܥܵܙܲܪ ܟܵܗܢܵܐ ܘܪܵܘ̱ܪ̈ܒ̣ܵܢܹܐ ܕܥܲܡܹܗ: ܡ̣ܢ ܠܘܵܬ̣ ܒ̈ܢܲܝ ܪܘܼܒܹܝܠ: ܘܡ̣ܢ ܠܘܵܬ̣ ܒ̈ܢܲܝ ܓܵܕ݂: ܘܲܡܢܲܫܹܐ ܡ̣ܢ ܐܲܪܥܵܐ ܕܓܸܠܥܵܕ݂: ܠܐܲܪܥܵܐ ܕܲܟ݂ܢܲܥܢ: ܠܘܵܬ̣ ܒ̈ܢܲܝ ܝܼܣܪܵܝܹܠ: ܘܐܲܬ̣ܝܼܒ̣ܘ ܐܸܢܘܿܢ ܦܸܬ̣ܓ̣ܵܡܵܐ.

³³ܘܲܫܦܲܪ ܦܸܬ̣ܓ̣ܵܡܵܐ ܒܥܲܝ̈ܢܲܝ ܒ̈ܢܲܝ ܝܼܣܪܵܝܹܠ: ܘܒܲܪܸܟ݂ܘ ܒ̈ܢܲܝ ܝܼܣܪܵܝܹܠ ܠܐܲܠܵܗܵܐ: ܘܠܵܐ ܐܸܡܲܪܘ ܕܢܸܣܩܘܼܢ ܥܠܲܝܗܘܿܢ ܠܲܩܪܵܒ̣ܵܐ ܠܡܲܚܪܵܒ̣ܘܼܬ̣ܵܗ̇ ܠܐܲܪܥܵܐ ܕܲܒ̣̈ܢܲܝ ܪܘܼܒܹܝܠ: ܘܲܒ̣̈ܢܲܝ ܓܵܕ݂: ܘܲܒ̣̈ܢܲܝ ܡܢܲܫܹܐ ܝܵܬ̣ܒ̇ܝܼܢ ܒܵܗ̇.

³⁴ܘܲܩܪܵܘ ܒ̈ܢܲܝ ܪܘܼܒܹܝܠ: ܘܲܒ̣̈ܢܲܝ ܓܵܕ݂: ܘܲܒ̣̈ܢܲܝ ܡܢܲܫܹܐ ܠܡܲܕ݂ܒ̇ܚܵܐ ܕܲܥܒܲܕ݂ܘ: ܡܲܕ݂ܒ̇ܚܵܐ ܕܣܵܗܕ̇ܘܼܬ̣ܵܐ: ܡܸܛܠ ܕܣܵܗܕ̇ܘܼܬ̣ܵܐ ܗ̄ܘ̣ ܒܲܝܢܵܬ̣ܗܘܿܢ: ܘܡܵܪܝܵܐ ܗ̄ܘ̣ ܒܲܠܚܘܿܕ݂ ܐܲܠܵܗܵܐ.