Read Aramaic Peshita Joshua 23 Bible Online

Joshua 23 - Aramaic Peshita bible

Joshua 23

¹ܘܡ̣ܢ ܒܵܬܲܪ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ: ܐܲܢܝܼܚ ܡܵܪܝܵܐ ܠܝܼܣܪܵܝܹܠ ܡ̣ܢ ܟܠܗܘܿܢ ܒܥܸܠܕ̇ܒ̣ܵܒܲܝ̈ܗܘܿܢ ܕܲܟ݂ܪܝܼܟ݂ܝܼܢ ܠܗܘܿܢ. ܘܝܼܫܘܿܥ ܩܲܫ ܘܥܲܠ ܒܲܫܢܲـ̈ـܝܵܐ.

²ܘܲܩ̣ܪܵܐ ܝܼܫܘܿܥ ܠܟ݂ܠܹܗ ܝܼܣܪܵܝܹܠ: ܠܩܲܫܝܼܫܵܘ̈ܗܝ ܘܲܠܪܹ̈ܫܵܘ̈ܗܝ ܘܲܠܕܲܝܵܢܵܘ̈ܗܝ: ܘܲܠܣܵܦܪ̈ܵܘܗܝ: ܘܐܸܡܲܪ ܠܗܘܿܢ: ܐܸܢܵܐ ܣܸܐܒܹ̇ܬ̣ ܘܥܸܠܹ̇ܬ̣ ܒܲܫܢܲܝܵܐ.

³ܘܐܲܢ̄ܬ̇ܘܿܢ ܚܙܲܝܬ̇ܘܿܢ ܟܠ ܕܲܥ̣ܒܲܕ݂ ܡܵܪܝܵܐ ܐܲܠܵܗܟ݂ܘܿܢ ܠܟ݂ܠܗܘܿܢ ܥܲܡܡܹ̈ܐ ܗܵܠܹܝܢ: ܘܐܵܘܒܸ̇ܕ݂ ܐܸܢܘܿܢ ܡ̣ܢ ܩܕ݂ܵܡܲܝܟ̇ܘܿܢ: ܘܡܵܪܝܵܐ ܐܲܠܵܗܟ݂ܘܿܢ ܗ̤ܘܝܘܼ ܥܵܒܹ̇ܕ݂ ܩܪܵܒ̣ܟ݂ܘܿܢ.

⁴ܚܙܵܘ ܕܹܝܢ ܕܠܵܐ ܦܲܠܓܹ̇ܬ̣ ܠܟ݂ܘܿܢ ܥܲܡܡܹ̈ܐ ܗܵܠܹܝܢ ܕܐܸܫܬ̇ܚܲܪܘ ܒܝܵܪܬ̇ܘܼܬ̣ܵܐ ܕܫܲܒ̣̈ܛܲܝܟ̇ܘܿܢ: ܡ̣ܢ ܝܘܿܪܕ̇ܢܵܢ ܘܟ݂ܠܗܘܿܢ ܥܲܡܡܹ̈ܐ ܕܚܸܪܒܹ̇ܬ̣: ܘܝܲܡܵܐ ܪܲܒܵܐ ܒܡܲܥܪ̈ܵܒܲܝ ܫܸܡܫܵܐ ܦܲܠܓܹ̇ܬ̣ ܠܟ݂ܘܿܢ.

⁵ܡܵܪܝܵܐ ܐܲܠܵܗܟ݂ܘܿܢ ܗ̤ܘ ܢܸܬ̣ܒܲܪ ܐܸܢܘܿܢ: ܘܢܸܚܪܘܿܒ̣ ܐܸܢܘܿܢ ܡ̣ܢ ܩܕ݂ܵܡܲܝܟ̇ܘܿܢ: ܘܬܹܐܪܬ̇ܘܿܢ ܐܲܪܥ̱ܗܘܿܢ: ܐܲܝܟ݂ ܕܐܸܡܲܪ ܠܟ݂ܘܿܢ ܡܵܪܝܵܐ ܐܲܠܵܗܟ݂ܘܿܢ.

⁶ܒܲܠܚܘܿܕ݂ ܐܸܬ̣ܚܲܝܲܠܘ ܛܵܒ̣: ܘܛܲܪܘ ܘܲܥܒܸܕ݂ ܟܠ ܕܲܟ݂ܬ̣ܝܼܒ̣ ܒܣܸܦܪܵܐ ܕܢܵܡܘܿܣܵܐ ܕܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ: ܘܠܵܐ ܬܸܣܛܘܿܢ ܡܸܢܹܗ ܠܵܐ ܠܝܲܡܝܼܢܵܐ ܘܠܵܐ ܠܣܸܡܵܠܵܐ.

⁷ܘܠܵܐ ܬܸܬ̣ܚܲܠܛܘܼܢ ܒܥܲܡܡܹ̈ܐ ܗܵܠܹܝܢ ܕܐܸܫܬ̇ܚܲܪܘ ܒܲܝܢܵܬ̣ܟ݂ܘܿܢ: ܘܲܫܡܵܐ ܕܐܲܠܵܗܲܝ̈ܗܘܿܢ ܠܵܐ ܬܸܬ̇ܕܲܟ݂ܪܘܿܢ: ܘܠܵܐ ܬܹܐܡܪܘܿܢ ܒܗܘܿܢ: ܘܠܵܐ ܬܸܦܠ̱ܚܘܼܢ ܐܸܢܘܿܢ: ܘܠܵܐ ܬܸܣܓ̇ܕ݂ܘܼܢ ܠܗܘܿܢ.

⁸ܐܸܠܵܐ ܠܡܵܪܝܵܐ ܐܲܠܵܗܟ݂ܘܿܢ ܐܸܬ̣ܢܲܩܲܦܘ: ܐܲܝܟܲܢܵܐ ܕܲܥ̣ܒܲܕ̇ܬ̇ܘܿܢ ܥܕܲܡܵܐ ܠܝܵܘܡܵܢܵܐ.

⁹ܘܲܚܪܲܒ̣ ܡܵܪܝܵܐ ܡ̣ܢ ܩܕ݂ܵܡܲܝܟ̇ܘܿܢ ܥܲܡܡܹ̈ܐ ܪܵܘ̱ܪ̈ܒܹܐ ܘܥܲܫܝܼܢܹ̈ܐ: ܘܐ̄ܢܵܫ ܠܵܐ ܩܵܡ̣ ܠܘܼܩܒܲܠܟ݂ܘܿܢ ܥܕܲܡܵܐ ܠܝܵܘܡܵܢܵܐ.

¹⁰ܓܲܒ̣ܪܵܐ ܚܲܕ݂ ܡܸܢܟ݂ܘܿܢ: ܢܸܪܕ̇ܘܿܦ ܠܐܲܠܦܵܐ ܡܸܛܠ ܕܡܵܪܝܵܐ ܐܲܠܵܗܟ݂ܘܿܢ ܥܲܡܟ݂ܘܿܢ: ܘܗ̤ܘ ܥܵܒܹܕ݂ ܩܪܵܒ̣ܟ݂ܘܿܢ ܐܲܝܟܲܢܵܐ ܕܐܸܡܲܪ ܠܟ݂ܘܿܢ.

¹¹ܐܸܙܕܲܗ̄ܪܘ ܛܵܒ̣ ܒܢܲܦ̮ܫܟ݂ܘܿܢ ܠܡܸܕ݂ܚܲܠ ܠܡܵܪܝܵܐ ܐܲܠܵܗܟ݂ܘܿܢ.

¹²ܐܸܢ ܕܹܝܢ ܬܸܗܦܟ݂ܘܿܢ ܘܬܸܬ̣ܢܲܩܦܘܼܢ ܒܫܲܪܟܵܐ ܕܗܵܠܹܝܢ ܥܲܡܡܹ̈ܐ ܕܐܸܫܬ̇ܚܲܪܘ ܒܲܝܢܵܬ̣ܟ݂ܘܿܢ: ܘܬܸܗܘܘܿܢ ܠܗܘܿܢ ܚܲܬ̣ܢܹ̈ܐ: ܘܬܸܬ̣ܚܲܠܛܘܼܢ ܒܗܘܿܢ ܘܗܸܢܘܿܢ ܒܟ݂ܘܿܢ.

¹³ܗ̤ܘܲܝܬ̇ܘܿܢ ܝܵܕ݂ܥܝܼܢ: ܕܬ̣ܘܼܒ̣ ܠܵܐ ܡܵܘܣܸܦ ܡܵܪܝܵܐ ܐܲܠܵܗܟ݂ܘܿܢ ܠܡܸܚܪܲܒ̣ ܠܗܵܠܹܝܢ ܥܲܡܡܹ̈ܐ ܡ̣ܢ ܩܕ݂ܵܡܲܝܟ̇ܘܿܢ: ܘܢܸܗܘܘܿܢ ܠܟ݂ܘܿܢ ܠܦܲܚܹ̈ܐ ܘܲܠܬ̣ܘܼܩ̈ܠܵܬ̣ܵܐ: ܘܠܘܼܠ̈ܝܵܬ̣ܵܐ ܒܨܸܕ݂ܥܲܝ̈ܟ̇ܘܿܢ: ܘܨܸܢܵܪ̈ܝܵܬ̣ܵܐ ܒܥܲܝ̈ܢܲܝܟ̇ܘܿܢ: ܥܕܲܡܵܐ ܕܬܹܐܒ̣ܕ̇ܘܿܢ ܡ̣ܢ ܐܲܪܥܵܐ ܛܵܒ̣ܬ̣ܵܐ ܕܝܲܗ̄ܒ̣ ܠܟ݂ܘܿܢ ܡܵܪܝܵܐ ܐܲܠܵܗܟ݂ܘܿܢ.

¹⁴ܐܸܢܵܐ ܕܹܝܢ ܗܵܐ ܐܵܙܹ̇ܠ ܐ̄ܢܵܐ ܒܐܘܼܪܚܵܐ ܕܟ݂ܠܵܗ̇ ܐܲܪܥܵܐ. ܐܲܢ̄ܬ̇ܘܿܢ ܕܹܝܢ ܝܵܕ݂ܥܝܼܢ ܐ̄ܢܬ̇ܘܿܢ ܒܟ݂ܠܹܗ ܠܸܒ̇ܟ݂ܘܿܢ ܘܲܒ̣ܟ݂ܠܵܗ̇ ܢܲܦ̮ܫܟ݂ܘܿܢ: ܕܠܵܐ ܒܸܛܠܲܬ̤ ܡܸܠܬ̣ܵܐ ܚܕ݂ܵܐ ܡ̣ܢ ܟܠܗܹܝܢ ܡܸܠܹ̈ܐ ܛܵܒ̣ܵـ̈ـܬ̣ܵܐ ܕܐܸܡܲܪ ܡܵܪܝܵܐ ܐܲܠܵܗܟ݂ܘܿܢ ܥܠܲܝܟ̇ܘܿܢ. ܐܸܠܵܐ ܟܠܗܹܝܢ ܐܸܬܲܝ̈ ܥܠܲܝܟ̇ܘܿܢ: ܘܠܵܐ ܒܸܛܠܲܬ̤ ܡܸܠܬ̣ܵܐ ܚܕ݂ܵܐ.

¹⁵ܘܐܲܝܟܲܢܵܐ ܕܹܝܢ ܕܐܸܬܲܝ̈ ܥܠܲܝܟ̇ܘܿܢ ܟܠܗܹܝܢ ܡܸܠܹ̈ܐ ܛܵܒ̣ܵـ̈ـܬ̣ܵܐ ܕܐܸܡܲܪ ܠܟܘܿܢ ܡܵܪܝܵܐ ܐܲܠܵܗܟ݂ܘܿܢ: ܗܵܟܲܢܵܐ ܢܹܐܬ̣̈ܝܵܢ ܥܠܲܝܟ̇ܘܿܢ ܟܠܗܹܝܢ ܠܵܘ̈ܛܵܬ̣ܵܐ: ܥܕܲܡܵܐ ܕܢܵܘܒܸ̇ܕ݂ܟ݂ܘܿܢ ܡ̣ܢ ܐܲܪܥܵܐ ܗܵܕܹܐ ܛܵܒ̣ܬ̣ܵܐ ܕܝܲܗ̄ܒ̣ ܠܟ݂ܘܿܢ.

¹⁶ܐܸܢ ܬܸܥܒ̇ܪܘܼܢ ܥܲܠ ܕܝܵܬܹܩܹܐ ܕܡܵܪܝܵܐ ܐܲܠܵܗܟ݂ܘܿܢ: ܘܥܲܠ ܦܘܼܩ̈ܕܵܢܹܐ ܕܐܸܬ̣ܦܲܩܲܕ̇ܬ̇ܘܿܢ: ܘܬܹܐܙܠ̄ܘܼܢ ܘܬܸܦ̱ܠܚܘܼܢ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܘܬܸܣܓ̇ܕ݂ܘܼܢ ܠܗܘܿܢ: ܢܸܬ̣ܚܲܡܲܬ̣ ܪܘܼܓ̣ܙܹܗ ܕܡܵܪܝܵܐ ܐܲܠܵܗܟ݂ܘܿܢ ܥܠܲܝܟ̇ܘܿܢ: ܘܬܹܐܒ̣ܕ̇ܘܿܢ ܒܲܥܓܲܠ ܡ̣ܢ ܐܲܪܥܵܐ ܛܵܒ̣ܬ̣ܵܐ ܕܝܲܗ̄ܒ̣ ܠܟ݂ܘܿܢ.