Read Aramaic Peshita Joshua 24 Bible Online

Joshua 24 - Aramaic Peshita bible

Joshua 24

¹ܘܟܲܢܸܫ ܝܼܫܘܿܥ ܠܟ݂ܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ ܠܲܫܟܹܝܡ: ܘܲܩܪܵܐ ܠܩܲܫ̈ܝܼܫܹܐ ܕܝܼܣܪܵܝܹܠ: ܘܲܠܪܹ̈ܫܵܢܲܝܗܘܿܢ ܘܲܠܕܲܝܵܢܲܝ̈ܗܘܿܢ: ܘܲܠܣܵܦܪ̈ܲܝܗܘܿܢ: ܘܩܵܡ̣ܘ ܩܕ݂ܵܡ ܡܲܫܟܲܢ ܙܲܒ̣ܢܵܐ ܩܕ݂ܵܡ ܐܲܠܵܗܵܐ.

²ܘܐܸܡܲܪ ܝܼܫܘܿܥ ܠܟ݂ܠܹܗ ܥܲܡܵܐ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܒܥܸܒ̣ܪܵܐ ܕܢܲܗܪܵܐ ܝܸܬ̣ܒ̣ܘ ܗ̄ܘ̣ܵܘ ܐܲܒ̣ܵܗܲܝ̈ܟ̇ܘܿܢ ܡ̣ܢ ܥܵܠܲܡ: ܬܲܪܚ ܐܲܒ̣ܘܼܗܝ ܕܐܲܒ̣ܪܵܗܵܡ: ܘܐܲܒ̣ܘܼܗܝ ܕܢܵܚܘܿܪ: ܘܦܵܠܚܝܼܢ ܗ̄ܘ̣ܵܘ ܬܲܡܵܢ ܠܐܲܠܵܗܹ̈ܐ ܐ̄ܚܪ̈ܵܢܹܐ.

³ܘܕܸܒ̣ܪܹܬ̣ ܠܐܲܒ̣ܪܵܗܵܡ ܐܲܒ̣ܘܼܟ݂ܘܿܢ ܡ̣ܢ ܥܸܒ̣ܪܵܐ ܕܢܲܗܪܵܐ: ܘܗܲܠܸܟ݂ܬܹ̇ܗ ܒܟ݂ܠܵܗ̇ ܐܲܪܥܵܐ ܕܲܟ݂ܢܲܥܢ: ܘܐܲܣܓܝܼܬ̣ ܙܲܪܥܹܗ: ܘܝܸܗ̄ܒܹ̇ܬ̣ ܠܹܗ ܠܐܝܼܣܚܵܩ.

⁴ܘܝܸܗ̄ܒܹ̇ܬ̣ ܠܐܝܼܣܚܵܩ ܠܝܲܥܩܘܿܒ̣ ܘܲܠܥܹܣܘܿ: ܘܝܸܗ̄ܒܹ̇ܬ̣ ܠܥܹܣܘܿ ܝܘܼܪܬܵܢܵܐ ܛܘܼܪܵܐ ܕܣܵܥܝܼܪ. ܘܝܲܥܩܘܿܒ̣ ܘܲܒ̣ܢܵܘ̈ܗܝ ܢܚܸܬ̣ܘ ܠܡܸܨܪܹܝܢ.

⁵ܘܫܲܕ̇ܪܹܬ̣ ܠܡܘܼܫܹܐ ܘܠܲܐܗܪܘܿܢ: ܘܲܡܚܹ̇ܝܬ̣ ܠܡܸܨܪ̈ܵܝܹܐ: ܘܬܸܕ݂ܡ̱ܪ̈ܵܬ̣ܵܐ ܥܸܒ̣ܕܹ̇ܬ̣ ܒܲܝܢܵܬ̣ܗܘܿܢ: ܘܡ̣ܢ ܒܵܬܲܪ ܗܵܝܕܹ̇ܝܢ ܐܲܦܲܩܬ̇ܟ݂ܘܿܢ.

⁶ܘܐܲܦܩܹ̇ܬ̣ ܠܐܲܒ̣ܵܗܲܝ̈ܟ̇ܘܿܢ ܡ̣ܢ ܡܸܨܪܹܝܢ: ܘܐܲܝܬܝܼܬ̣ ܐܸܢܘܿܢ ܠܝܲܡܵܐ: ܘܲܪܕܲܦ̣ܘ ܡܸܨܪ̈ܵܝܹܐ ܒܵܬܲܪ ܐܲܒ̣ܵܗܲܝ̈ܟ̇ܘܿܢ: ܒܩܵܪ̈ܘܿܟܹܐ ܘܲܒ̣ܦܲܪ̈ܵܫܹܐ ܠܝܲܡܵܐ ܕܣܘܿܦ.

⁷ܘܲܓ̣ܥܵܘ ܐܲܒ̣ܵܗܲܝ̈ܟ̇ܘܿܢ ܠܘܵܬ̣ ܡܵܪܝܵܐ: ܘܲܥ̣ܒܲܕ݂ ܚܸܫܘܿܟ݂ܵܐ ܒܲܝܢܵܬ̣ܗܘܿܢ ܠܡܸܨܪ̈ܵܝܹܐ. ܘܦܲܠܲܓ̣ ܡܵܪܝܵܐ ܝܲܡܵܐ ܕܣܘܿܦ: ܘܐܲܥܒܲܪ ܠܐܲܒ̣ܵܗܲܝ̈ܟ̇ܘܿܢ ܒܓ̣ܵܘܹܗ: ܘܐܲܝܬ̇ܝܹܗ ܠܝܲܡܵܐ ܥܲܠ ܡܸܨܪܹ̈ܝܢ ܘܟܲܣܝܼ ܐܸܢܘܿܢ. ܘܲܚܙܲܝ̈ ܥܲܝܢܲܝ̈ܟ̇ܘܿܢ ܡܸܕܸ̇ܡ ܕܥܸܒ̣ܕܹܬ̣ ܠܡܸܨܪ̈ܵܝܹܐ. ܘܐܲܝܬ̇ܝܼܬ̇ܟ݂ܘܿܢ ܠܡܲܕ݂ܒ̇ܪܵܐ: ܘܝܸܬ̣ܒ̣ܬ̇ܘܿܢ ܒܡܲܕ݂ܒ̇ܪܵܐ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ.

⁸ܘܐܲܝܬ̇ܝܼܬ̇ܟ݂ܘܿܢ ܠܐܲܪܥܵܐ ܕܐܵܡܘܿܪ̈ܵܝܹܐ ܕܝܵܬ̣ܒ̇ܝܼܢ ܒܥܸܒ̣ܪܵܐ ܕܝܘܿܪܕ̇ܢܵܢ: ܘܐܸܬ̣ܟܲܬܲܫ̣ܘ ܥܲܡܟ݂ܘܿܢ: ܘܐܲܫ̱ܠܡܹ̇ܬ̣ ܐܸܢܘܿܢ ܒܐܝܼܕܲܝ̈ܟ̇ܘܿܢ: ܘܐܵܘܒ̇ܕܹܬ̣ ܐܸܢܘܿܢ ܡ̣ܢ ܩܕ݂ܵܡܲܝܟ̇ܘܿܢ: ܘܝܼܪܸܬ̇ܬ̇ܘܿܢ ܐܲܪܥ̱ܗܘܿܢ.

⁹ܘܩܵܡ ܒܵܠܵܩ ܒܲܪ ܨܸܦܘܿܪ ܡܲܠܟܵܐ: ܕܡܘܼܐܵܒ̣ܵܝܹ̈ܐ: ܘܐܸܬ̣ܟܲܬܲܫ̣ ܥܲܡ ܝܼܣܪܵܝܹܠ: ܘܫܲܕܲܪ ܩܪܵܐ ܠܒܸܠܥܵܡ ܒܲܪ ܒܥܘܿܪ ܠܲܡܠܵܛܘܼܬ̣ܟ݂ܘܿܢ.

¹⁰ܘܠܵܐ ܨܒܹܝܬ̣ ܠܡܸܫ̱ܡܥܹܗ ܠܒܸܥܠܵܡ: ܘܲܡܒܲܪܵܟ݂ܘܼ ܒܲܪܸܟ݂ܬ̇ܟ݂ܘܿܢ ܘܦܲܨܵܝܬ̇ܟ݂ܘܿܢ ܡ̣ܢ ܐܝܼܕ݂ܵܘ̈ܗܝ.

¹¹ܘܲܥܒܲܪܬ̇ܘܿܢ ܝܘܿܪܕ̇ܢܵܢ: ܘܐܸܬܲܝܬ̇ܘܿܢ ܠܐܝܼܪܝܼܚܘܿ. ܘܐܸܬ̣ܟܲܬܲܫܘ ܥܲܡܟ݂ܘܿܢ ܓܲܒ̣ܪܹ̈ܐ ܕܐܝܼܪܝܼܚܘܿ: ܘܐܵܡܘܿܪ̈ܵܝܹܐ: ܘܲܟ݂ܢܲܥܢܵܝܹ̈ܐ: ܘܦܲܪ̈ܙܵܝܹܐ: ܘܚܹـ̈ـܬ̣ܵܝܹܐ: ܘܓܲܪ̈ܓ̇ܘܿܣܵܝܹܐ: ܘܚܵܘܵܝܹ̈ܐ: ܘܝܵܒ̣ܘܿܣܵܝܹ̈ܐ ܘܐܲܫ̱ܠܡܹ̇ܬ̣ ܐܸܢܘܿܢ ܒܐܝܼܕܲܝ̈ܟ̇ܘܿܢ.

¹²ܘܫܲܕܪܹܬ̣ ܩܕ݂ܵܡܲܝܟ̇ܘܿܢ ܕܸܒ̇ܘܿܪ̈ܝܵܬ̣ܵܐ: ܘܐܵܘܒ̇ܕܹܬ̣ ܡ̣ܢ ܩܕ݂ܵܡܲܝܟ̇ܘܿܢ ܬܪܹܝܢ ܡܲܠܟܲܝ̈ܗܘܿܢ. ܕܐܵܡܘܿܪ̈ܵܝܹܐ: ܠܵܐ ܒܣܲܝܦܲܝ̈ܟ̇ܘܿܢ: ܐܵܦܠܵܐ ܒܩܸܫ̈ܬܵܬ̣ܟ݂ܘܿܢ.

¹³ܘܝܸܗ̄ܒܹ̇ܬ̣ ܠܟ݂ܘܿܢ ܐܲܪܥܵܐ ܕܠܵܐ ܠܐܝܼܬ̇ܘܿܢ ܒܵܗ̇: ܘܩܘܼܪ̈ܝܵܐ ܕܠܵܐ ܒܢܲܝܬ̇ܘܿܢ: ܘܝܸܬ̣ܒ̣ܬ̇ܘܿܢ ܒܗܹܝܢ. ܘܟܲܪ̈ܡܹܐ ܘܙܲܝ̈ܬܹ̇ܐ ܕܠܵܐ ܢܨܲܒ̣ܬ̇ܘܿܢ: ܗܵܐ ܐܵܟ݂ܠܝܼܢ ܐ̄ܢܬ̇ܘܿܢ.

¹⁴ܡܸܟܹ̇ܝܠ ܕܚܲܠܘ ܡ̣ܢ ܡܵܪܝܵܐ: ܘܦܘܼܠܚܘܼܗܝ. ܒܬܲܡܝܼܡܘܼܬ̣ܵܐ ܘܲܒ̣ܩܘܼܫܬܵܐ. ܘܐܲܥܒܲܪܘ ܡ̣ܢ ܠܸܒ̇ܟ݂ܘܿܢ ܐܲܠܵܗܹ̈ܐ ܢܘܼܟ݂ܪ̈ܵܝܹܐ: ܕܲܦܠܲܚ̣ܘ ܐܲܒ̣ܵܗܲܝ̈ܟ̇ܘܿܢ ܒܥܸܒ̣ܪܵܐ ܕܢܲܗܪܵܐ ܘܲܒ̣ܡܸܨܪܹܝܢ: ܘܐܲܢ̄ܬ̇ܘܿܢ ܦܠܘܿܚܘ ܠܡܵܪܝܵܐ.

¹⁵ܘܐܸܢ ܒܝܼܫ ܗ̄ܘ̣ ܒܥܲܝܢܲܝ̈ܟ̇ܘܿܢ ܠܡܸܦܠܲܚ ܠܡܵܪܝܵܐ: ܓܒ̣ܵܘ ܠܟ݂ܘܿܢ ܝܵܘܡܵܢܵܐ ܠܡ̇ܢ ܦܵܠܚܝܼܢ ܐ̄ܢܬ̇ܘܿܢ: ܐܸܢ ܐܲܠܵܗܹ̈ܐ ܕܲܦܠܲܚܘ ܐܲܒ̣ܵܗܲܝ̈ܟ̇ܘܿܢ ܒܥܸܒ̣ܪܵܐ ܕܢܲܗܪܵܐ: ܘܐܸܢ ܠܐܲܠܵܗܹ̈ܐ ܕܐܵܡܘܿܪ̈ܵܝܹܐ ܕܥܵܡ̇ܪܝܼܢ ܐ̄ܢܬ̇ܘܿܢ ܒܐܲܪ̱ܥܗܘܿܢ. ܐܸܢܵܐ ܕܹܝܢ ܘܲܒ̣̈ܢܲܝ ܒܲܝܬ̇ܝ: ܠܡܵܪܝܵܐ ܗ̄ܘ̣ ܐܲܠܵܗܵܐ ܦܵܠܚܝܼܢ ܚ̄ܢܲܢ.

¹⁶ܘܲܥܢ̣ܵܘ ܟܠܹܗ ܥܲܡܵܐ ܘܐܸܡܲܪ: ܚܵܣ ܠܲܢ ܕܢܸܫܒ̇ܘܿܩ ܠܡܵܪܝܵܐ: ܘܢܸܦܠܘܿܚ ܠܐܲܠܵܗܹ̈ܐ ܐ̄ܚܪ̈ܵܢܹܐ.

¹⁷ܡܸܛܠ ܕܡܵܪܝܵܐ ܗ̄ܘ̣ ܐܲܠܵܗܲܢ: ܗܵܘ̇ ܕܐܲܣܩܲܢ ܡ̣ܢ ܐܲܪܥܵܐ ܕܡܸܨܪܹܝܢ ܡ̣ܢ ܒܹܝܬ̣ ܥܲܒ̣ܕ̇ܘܼܬ̣ܵܐ: ܘܲܥܒܲܕ݂ ܩܕ݂ܵܡܲܝܢ ܗܵܠܹܝܢ ܐܲܬ̣̈ܘܵܬ̣ܵܐ ܪܵܘ̱ܪ̈ܒ̣ܵܬ̣ܵܐ. ܘܢܲܛܪܲܢ ܒܟ݂ܠܵܗ̇ ܐܘܼܪܚܵܐ ܕܗܲܠܸܟ݂ܢ ܒܵܗ̇: ܘܲܒ̣ܟ݂ܠܗܘܿܢ ܥܲܡܡܹ̈ܐ ܕܲܥܒܲܪ̄ܢ ܒܲܝܢܵܬ̣ܗܘܿܢ.

¹⁸ܘܐܵܘܒܸ̇ܕ݂ ܐܸܢܘܿܢ ܡܵܪܝܵܐ ܐܲܠܵܗܲܢ ܠܟ݂ܠܗܘܿܢ ܥܲܡܡܹ̈ܐ ܗܵܠܹܝܢ. ܘܠܵܐܡܘܿܪ̈ܵܝܹܐ ܕܥܵܡ̇ܪܝܼܢ ܚ̄ܢܲܢ ܒܐܲܪ̱ܥܗܘܿܢ: ܐܵܘܒܸ̇ܕ݂ ܐܸܢܘܿܢ ܡܵܪܝܵܐ ܡ̣ܢ ܩܕ݂ܵܡܲܝܢ: ܡܸܛܠ ܗܵܢܵܐ ܠܡܵܪܝܵܐ ܗ̄ܘ̣ ܦܵܠܚܝܼܢ ܚ̄ܢܲܢ: ܡܸܛܠ ܕܗ̤ܘܝܘܼ ܐܲܠܵܗܵܐ ܒܲܠܚܘܿܕ݂ܵܘܗܝ: ܘܗ̤ܘܝܘܼ ܐܲܠܵܗܲܢ.

¹⁹ܘܐܸܡܲܪ ܝܼܫܘܿܥ ܠܥܲܡܵܐ: ܚܙܵܘ ܕܹܝܢ ܕܲܠܡܵܐ ܠܵܐ ܡܸܫܟ̇ܚܝܼܢ ܐ̄ܢܬ̇ܘܿܢ ܠܡܸܦܠܲܚ ܠܡܵܪܝܵܐ. ܡܸܛܠ ܕܐܲܠܵܗܵܐ ܗ̄ܘ̣ ܩܲܕ݂ܝܼܫܵܐ: ܘܐܲܠܵܗܵܐ ܗ̄ܘ̣ ܛܲܢܵܢܵܐ: ܘܠܵܐ ܕܹܝܢ ܫܵܒܹ̇ܩ ܠܚܵܘܒܲܝ̈ܟ̇ܘܿܢ ܘܠܲܚܛܵܗܲܝ̈ܟ̇ܘܿܢ.

²⁰ܕܲܠܡܵܐ ܬܸܫܒ̇ܩܘܼܢܹܗ ܠܡܵܪܝܵܐ: ܘܬܸܦ̱ܠܚܘܼܢ ܠܐܲܠܵܗܹ̈ܐ ܐ̄ܚܪܵܢܹܐ ܢܘܼܟ݂ܪ̈ܵܝܹܐ ܕܐܲܪܥܵܐ: ܘܢܸܗܦܘܿܟ݂ ܡܵܪܝܵܐ ܠܡܲܒ̣ܐܵܫܘܼ ܠܟ݂ܘܿܢ: ܘܲܢܓܲܡܪܟ݂ܘܿܢ ܡ̣ܢ ܒܵܬܲܪ ܕܐܲܛܐܸܒ̣ ܠܟ݂ܘܿܢ.

²¹ܘܐܸܡܲܪܘ ܥܲܡܵܐ ܠܝܼܫܘܿܥ: ܠܵܐ ܗܵܘܹ̇ܐ ܠܲܢ ܦܘܼܠܚܵܢ ܐ̄ܚܪܹܝܢ: ܐܸܠܵܐ ܠܡܵܪܝܵܐ ܗ̄ܘ̣ ܐܲܠܵܗܵܐ ܦܵܠܚܝܼܢܲܢ.

²²ܘܐܸܡܲܪ ܝܼܫܘܿܥ ܠܥܲܡܵܐ: ܣܵܗܕ̇ܝܼܢ ܐ̄ܢܬ̇ܘܿܢ ܒܢܲܦ̮ܫܟ݂ܘܿܢ: ܕܐܲܢ̄ܬ̇ܘܿܢ ܓܒܲܝܬ̇ܘܿܢ ܠܟ݂ܘܿܢ ܠܡܸܦܠܲܚ ܠܡܵܪܝܵܐ. ܘܐܵܡ̇ܪܝܼܢ ܠܹܗ ܣܵܗܕ̇ܝܼܢ ܚ̄ܢܲܢ.

²³ܐܵܡܲܪ ܠܗܘܿܢ ܝܼܫܘܿܥ: ܡܸܟܹ̇ܝܠ ܐܲܥܒܲܪܘ ܐܲܠܵܗܹ̈ܐ ܢܘܼܟ݂ܪ̈ܵܝܹܐ ܕܒܲܝܢܵܬ̣ܟ݂ܘܿܢ: ܘܐܲܬ̣ܩܸܢܘ ܠܸܒ̇ܟ݂ܘܿܢ ܠܘܵܬ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

²⁴ܘܐܸܡܲܪܘ ܥܲܡܵܐ ܠܝܼܫܘܿܥ: ܠܡܵܪܝܵܐ ܐܲܠܵܗܲܢ ܦܵܠܚܝܼܢ ܚ̄ܢܲܢ: ܘܲܒ̣ܩܵܠܹܗ ܫܵܡܥܝܼܢ ܚ̄ܢܲܢ.

²⁵ܘܐܲܩܝܼܡ ܝܼܫܘܿܥ ܕܝܵܬܹܩܹܐ ܠܥܲܡܵܐ ܒܹܐ ܒܝܵܘܡܵܐ ܗܵܘ̇: ܘܐܲܠܸܦ ܐܸܢܘܿܢ ܦܘܼܩ̈ܕܵܢܹܐ: ܘܕ݂ܝܼܢܹ̈ܐ: ܒܲܫܟܹܝܡ.

²⁶ܘܲܟܬܲܒ̣ ܝܼܫܘܿܥ ܡܸܠܹ̈ܐ ܗܵܠܹܝܢ ܒܣܸܦܪܵܐ ܕܢܵܡܘܿܣܹܗ ܕܡܘܼܫܹܐ. ܘܲܢܣܲܒ̣ ܟܹܐܦܵܐ ܪܲܒ̇ܬ̣ܵܐ: ܘܐܲܩܝܼܡܵܗ̇ ܬܚܹܝܬ̣ ܒܸܛܡ̱ܬ̣ܵܐ ܕܒܹܝܬ̣ ܡܲܩܕ̇ܫܹܗ ܕܡܵܪܝܵܐ.

²⁷ܘܐܸܡܲܪ ܝܼܫܘܿܥ ܠܟ݂ܠܹܗ ܥܲܡܵܐ: ܗܵܐ ܟܹܐܦܵܐ ܗܵܕܹܐ ܬܸܗܘܹܐ ܠܲܢ ܣܵܗܕ̇ܘܼܬ̣ܵܐ: ܡܸܛܠ ܕܗ̤ܝ ܫܸܡܥܲܬ̤ ܟܠܗܹܝܢ ܡܸܠܵܘ̈ܗܝ ܕܡܵܪܝܵܐ ܕܡܲܠܸܠ̣ ܥܲܡܲܢ: ܘܬܸܗܘܹܐ ܠܟ݂ܘܿܢ ܠܣܵܗܕ̇ܘܼܬ̣ܵܐ: ܕܠܵܐ ܬܟܲܕ̇ܒ̣ܘܼܢ ܒܡܵܪܝܵܐ ܐܲܠܵܗܟ݂ܘܿܢ.

²⁸ܘܡ̣ܢ ܒܵܬܲܪ ܕܦܲܩܸܕ݂ ܝܼܫܘܿܥ ܠܥܲܡܵܐ: ܫܲܕܲܪ ܐܸܢܘܿܢ ܐ̄ܢܵܫ ܠܝܵܪܬ̇ܘܼܬܹܗ.

²⁹ܘܡ̣ܢ ܒܵܬܲܪ ܡܸܠܹ̈ܐ ܗܵܠܹܝܢ: ܡܝܼܬ̣ ܝܼܫܘܿܥ ܒܲܪܢܘܿܢ ܥܲܒ̣ܕܹ̇ܗ ܕܡܵܪܝܵܐ: ܒܲܪܡܵܐܐ ܘܲܥܣܲܪ ܫܢ̈ܝܼܢ.

³⁰ܘܩܲܒ̣ܪܘܼܗܝ ܒܲܬ̣ܚܘܼܡܵܐ ܕܝܵܪܬ̇ܘܼܬܹܗ: ܒܬܲܝܡܢܲܬ̣ ܣܪܲܚ ܕܲܒ̣ܛܘܼܪܵܐ ܕܐܲܦܪܹܝܡ: ܡ̣ܢ ܓܪܒ̇ܝܵܐ ܠܛܘܼܪܵܐ ܕܓ݂ܵܥܵܫ.

³¹ܘܲܦܠܲܚ ܝܼܣܪܵܝܹܠ ܠܡܵܪܝܵܐ ܟܠܗܘܿܢ ܝܵܘ̈ܡܵܬܹܗ ܕܝܼܫܘܿܥ: ܘܟ݂ܠܗܘܿܢ ܝܵܘ̈ܡܵܬ̣ܵܐ ܕܩܲܫ̈ܝܼܫܹܐ: ܕܲܚܝܵܘ ܢܘܼܓ̣ܪܵܐ ܒܵܬܲܪ ܝܼܫܘܿܥ: ܥܒ̣ܵܕ݂ܵܘ̈ܗܝ ܕܡܵܪܝܵܐ ܕܲܥܒܲܕ݂ ܠܝܼܣܪܵܝܹܠ.

³²ܘܲܠܓܲܪ̈ܡܵܘܗܝ ܕܝܵܘܣܸܦ ܕܐܲܣܸܩ̣ܘ ܒ̈ܢܲܝ ܝܼܣܪܵܝܹܠ ܡ̣ܢ ܡܸܨܪܹܝܢ: ܩܒܲܪܘ ܒܲܫܟܹܝܡ: ܒܦܵܠܓܘܼܬ̣ܵܐ ܕܚܲܩܠܵܐ ܕܲܙܒܲܢ ܝܲܥܩܘܿܒ̣ ܡ̣ܢ ܚܡܘܿܪ ܐܲܒ̣ܘܼܗܝ ܕܲܫܟܹܝܡ ܒܡܵܐܐ ܢܩܵـ̈ـܘܵܢ: ܘܲܗܘ̤ܵܬ̣ ܝܵܪܬ̇ܘܼܬ̣ܵܐ ܠܲܒ̣̈ܢܲܝ ܝܵܘܣܸܦ.

³³ܘܐܹܠܝܼܥܵܙܲܪ ܟܵܗܢܵܐ ܒܲܪ ܐܲܗܪܘܿܢ ܟܵܗܢܵܐ ܡܝܼܬ̣: ܘܩܲܒ̣ܪܘܼܗܝ ܒܲܓܒܲܥܬ̣ܵܐ ܕܦܝܼܢܚܸܣ ܒܪܹܗ: ܕܐܸܬ̣ܝܲܗܒܲܬ̤ ܠܹܗ ܒܛܘܼܪܵܐ ܕܐܲܦܪܹܝܡ.