Read Aramaic Peshita Joshua 4 Bible Online

Joshua 4 - Aramaic Peshita bible

Joshua 4

¹ܘܟܲܕ݂ ܫܠܸܡ̣ܘ ܟܠܹܗ ܥܲܡܵܐ ܠܡܸܥܒܲܪ ܝܘܿܪܕ̇ܢܵܢ: ܐܸܡܲܪ ܡܵܪܝܵܐ ܠܝܼܫܘܿܥ.

²ܕܒܲܪ ܠܟ݂ܘܿܢ ܡ̣ܢ ܥܲܡܵܐ ܬܪܲܥܣܲܪ ܓܲܒ̣ܪ̈ܝܼܢ: ܚܲܕ݂ ܚܲܕ݂ ܓܲܒ̣ܪܵܐ ܡ̣ܢ ܫܲܒ̣ܛܵܐ.

³ܘܦܲܩܸܕ݂ ܐܸܢܘܿܢ: ܘܐܸܡܲܪ ܠܗܘܿܢ: ܣܲܒ̣ܘ ܠܟ݂ܘܿܢ ܡܸܟܵܐ ܡ̣ܢ ܓܵܘ ܝܘܿܪܕ̇ܢܵܢ ܡ̣ܢ ܬܚܹܝܬ̣ ܪܸ̈ܓ̣ܠܲܝܗܘܿܢ ܕܟ݂ܵܗܢܹ̈ܐ: ܛܲܝܸܒ̣ܘ ܬܲܪܬܲܥܸܣܪܹ̈ܐ ܟܹܐܦ̈ܝܼܢ: ܘܐܲܥܒܲܪܘ ܐܸܢܹܝܢ ܥܲܡܟ݂ܘܿܢ: ܘܣܝܼܡܘ ܐܸܢܹܝܢ ܒܹܝܬ̣ ܒܵܘܬܵܐ ܕܒ̣ܵܝܬ̇ܝܼܢ ܐ̄ܢܬ̇ܘܿܢ ܒܹܗ ܒܠܸܠܝܵܐ.

⁴ܘܲܩܪܵܐ ܝܼܫܘܿܥ ܠܲܬ̣ܪܲܥܣܲܪ ܓܲܒ̣ܪ̈ܝܼܢ ܗܵܢܘܿܢ ܕܛܲܝܸܒ̣ܘ ܡ̣ܢ ܒ̈ܢܲܝ ܝܼܣܪܵܝܹܠ: ܚܲܕ݂ ܚܲܕ݂ ܓܲܒ̣ܪܵܐ ܡ̣ܢ ܫܲܒ̣ܛܵܐ.

⁵ܘܐܸܡܲܪ ܠܗܘܿܢ ܝܼܫܘܿܥ: ܥܒܲܪܘ ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ ܐܲܠܵܗܟ݂ܘܿܢ ܒܓ̣ܵܘ ܝܘܿܪܕ̇ܢܵܢ: ܘܣܝܼܡܘ ܓܒܲܪ ܟܹܐܦܹܗ ܥܲܠ ܟܲܬ̣ܦܹܗ: ܒܡܸܢܝܵܢܵܐ ܕܫܲܒ̣̈ܛܹܐ ܕܲܒ̣̈ܢܲܝ ܝܼܣܪܵܝܹܠ.

⁶ܡܸܛܠ ܕܬܸܗܘܹܐ ܐܵܬ̤ܵܐ ܗܵܕܹܐ ܒܲܝܢܵܬ̣ܟ݂ܘܿܢ: ܕܟܲܕ݂ ܢܫܲܐܠܘܼܢܵܟ݂ܘܿܢ ܒܢܲܝ̈ܟ̇ܘܿܢ ܡ̣ܢ ܡܚܵܪ: ܘܢܹܐܡܪܘܼܢ ܠܟ݂ܘܿܢ: ܡܵܢܵܐ ܐܸܢܹܝܢ ܟܹܐܦܹܐ ܗܵܠܹܝܢ.

⁷ܐܸܡܲܪܘ ܠܗܘܿܢ: ܕܐܸܬ̣ܦܠܸܓ̣ܘ ܡܲـ̈ـܝܵܐ ܕܝܘܿܪܕ̇ܢܵܢ ܡ̣ܢ ܩܕ݂ܵܡ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ: ܟܲܕ݂ ܥܒܲܪ̄ܢ ܒܝܘܿܪܕ̇ܢܵܢ: ܐܸܬ̣ܦܠܸܓ̣ܘ ܡܲـ̈ـܝܵܐ ܕܝܘܿܪܕ̇ܢܵܢ. ܘܲܗ̤ܘܲܝ̈ ܗܵܠܹܝܢ ܟܹܐܦܹ̈ܐ ܕܘܼܟ݂ܪܵܢܵܐ ܠܲܒ̣̈ܢܲܝ ܝܼܣܪܵܝܹܠ ܠܥܵܠܲܡ.

⁸ܘܲܥ̣ܒܲܕ݂ܘ ܗܵܟܲܢܵܐ ܒ̈ܢܲܝ ܝܼܣܪܵܝܹܠ ܐܲܝܟ݂ ܕܦܲܩܸܕ݂ ܐܸܢܘܿܢ ܝܼܫܘܿܥ: ܘܲܫ̣ܩܲܠܘ ܬܲܪܬܲܥܸܣܪܹ̈ܐ ܟܹܐܦ̈ܝܼܢ ܡ̣ܢ ܓܵܘ ܝܘܿܪܕ̇ܢܵܢ: ܐܲܝܟ݂ ܕܐܸܡܲܪ ܡܵܪܝܵܐ ܠܝܼܫܘܿܥ: ܒܡܲܢܝܵܢܵܐ ܕܫܲܒ̣̈ܛܹܐ ܕܲܒ̣̈ܢܲܝ ܝܼܣܪܵܝܹܠ: ܘܐܲܥܒܲܪܘ ܐܸܢܹܝܢ ܥܲܡܗܘܿܢ ܠܒܹܝܬ̣ ܒܵܘܬܵܐ: ܘܲܫܒܲܩܘ ܐܸܢܹܝܢ ܬܲܡܵܢ.

⁹ܘܬܲܪܬܲܥܸܣܪܹ̈ܐ ܟܹܐܦ̈ܝܼܢ ܐܲܩܝܼܡܘ: ܕܲܢܣܲܒ̣ܘ ܡ̣ܢ ܓܵܘ ܝܘܿܪܕ̇ܢܵܢ: ܡ̣ܢ ܬܚܹܝܬ̣ ܪܸ̈ܓ̣ܠܲܝܗܘܿܢ ܕܟ݂ܵܗܢܹ̈ܐ ܕܲܫܩܝܼܾܠܝܼܢ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ ܘܲܗ̤ܘܲܝ ܬܲܡܵܢ ܥܕܲܡܵܐ ܠܝܵܘܡܵܢܵܐ.

¹⁰ܘܟ݂ܵܗܢܹ̈ܐ ܕܲܫܩܝܼܠܝܼܢ ܗ̄ܘ̣ܵܘ ܩܹܒ̣ܘܿܬ̣ܵܐ ܩܵܝܡܝܼܢ ܗ̄ܘ̣ܵܘ ܒܓ̣ܵܘ ܝܘܿܪܕ̇ܢܵܢ: ܥܕܲܡܵܐ ܕܲܫܠܸܡ̣ܘ ܟܠܗܘܿܢ ܦܸܬ̣ܓ̣ܵܡܹ̈ܐ ܕܦܲܩܸܕ݂ ܡܵܪܝܵܐ ܠܝܼܫܘܿܥ: ܠܡܹܐܡܲܪ ܦܸܬ̣ܓ̣ܵܡܹ̈ܐ ܕܦܲܩܸܕ݂ ܡܵܪܝܵܐ ܠܝܼܫܘܿܥ: ܠܡܹܐܡܲܪ ܠܥܲܡܵܐ: ܐܲܝܟܲܢܵܐ ܕܦܲܩܕܹܗ ܡܘܼܫܹܐ ܠܝܼܫܘܿܥ. ܘܐܸܣܬܲܪܗܲܒ̣ܘ ܥܲܡܵܐ ܘܥ̣ܒܲܪܘ.

¹¹ܘܟܲܕ݂ ܥ̣ܒܲܪܘ ܟܠܹܗ ܥܲܡܵܐ ܡܫܲܡܠ̱ܝܵܐܝܼܬ̣: ܘܥܸܒ̣ܪܲܬ̤ ܩܹܒ̣ܘܿܬ̣ܵܐ ܕܡܵܪܝܵܐ: ܘܟ݂ܵܗܢܹ̈ܐ ܩܕ݂ܵܡ ܥܲܡܵܐ.

¹²ܘܲܥ̣ܒܲܪܘ ܒ̈ܢܲܝ ܪܘܼܒܹܝܠ: ܘܲܒ̣̈ܢܲܝ ܓܵܕ݂: ܘܦܸܠܓܹܗ ܕܫܲܒ̣ܛܵܐ ܕܲܡܢܲܫܹܐ: ܟܲܕ݂ ܡܙܲܝܢܝܼܢ ܩܕ݂ܵܡ ܒ̈ܢܲܝ ܝܼܣܪܵܝܹܠ: ܐܲܝܟܲܢܵܐ ܕܐܸܡܲܪ ܠܗܘܿܢ ܡܘܼܫܹܐ.

¹³ܐܲܪܒ̇ܥܝܼܢ ܐܲܠܦ̈ܝܼܢ ܟܲܕ݂ ܡܙܲܝܢܝܼܢ ܒܚܲܝܠܵܐ: ܥ̣ܒܲܪܘ ܩܕ݂ܵܡ ܡܵܪܝܵܐ ܠܲܩܪܵܒ̣ܵܐ ܒܲܦܩܲܥܬ̣ܵܐ ܕܐܝܼܪܝܼܚܘܿ.

¹⁴ܒܹܗ ܒܝܵܘܡܵܐ ܗܵܘ̇: ܐܵܘܪܸܒ̣ ܡܵܪܝܵܐ ܠܝܼܫܘܿܥ ܒܥܲܝ̈ܢܲܝ ܟܠܹܗ ܝܼܣܪܵܝܹܠ: ܘܲܕ݂ܚܸܠܘ ܡܸܢܹܗ ܐܲܝܟܲܢܵܐ ܕܕ݂ܵܚܠܝܼܢ ܗ̄ܘ̣ܵܘ ܡ̣̤ ܡܘܼܫܹܐ: ܟܠܗܘܿܢ ܝܵܘ̈ܡܵܬ̣ܵܐ ܕܚܲܝܵܘ̈ܗܝ.

¹⁵ܘܐܸܡܲܪ ܡܵܪܝܵܐ ܠܝܼܫܘܿܥ.

¹⁶ܦܲܩܸܕ݂ ܠܟ݂ܵܗܢܹ̈ܐ ܕܲܫܩܝܼܠܝܼܢ ܩܹܒ̣ܘܿܬ̣ܵܐ ܕܣܵܗܕ̇ܘܼܬ̣ܵܐ: ܘܢܸܣܩܘܼܢ ܡ̣ܢ ܓܵܘ ܝܘܿܪܕ̇ܢܵܢ.

¹⁷ܘܦܲܩܸܕ݂ ܝܼܫܘܿܥ ܠܟ݂ܵܗܢܹ̈ܐ: ܘܐܸܡܲܪ ܠܗܘܿܢ: ܣܲܩܘ ܡ̣ܢ ܓܵܘ ܝܘܿܪܕ̇ܢܵܢ.

¹⁸ܘܟܲܕ݂ ܣܠܸܩ̣ܘ ܗ̄ܘ̣ܵܘ ܟܵܗܢܹ̈ܐ ܕܲܫܩܝܼܠܝܼܢ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ ܡ̣ܢ ܓܵܘ ܝܘܿܪܕ̇ܢܵܢ: ܣ̣ܡܲܟ݂ ܦܲܣܵـ̈ـܬ̣ܵܐ ܕܪܸ̈ܓ̣ܠܲܝܗܘܿܢ ܕܟ݂ܵܗܢܹ̈ܐ ܒܝܒ̣ܫܵܐ. ܘܲܗ̣ܦܲܟ݂ܘ ܡܲـ̈ـܝܵܐ ܕܝܘܿܪܕ̇ܢܵܢ ܠܕ݂ܘܼܟܲܬ̣ܗܘܿܢ: ܘܗܲܠܸܟ݂ܘ ܐܲܝܟ݂ ܕܡ̣ܢ ܩܕ݂ܝܼܡ ܥܲܠ ܟܠܗܘܿܢ ܣܦܵܪ̈ܵܘܗܝ ܕܝܘܿܪܕ̇ܢܵܢ.

¹⁹ܘܥܲܡܵܐ ܣܠܸܩ ܡ̣ܢ ܓܵܘ ܝܘܿܪܕ̇ܢܵܢ: ܒܲܥܣܲܪܬܵܐ ܒܝܲܪܚܵܐ ܩܲܕ݂ܡܵܝܵܐ: ܘܲܫ̣ܪܵܘ ܒܓܲܠܓܵܠܵܐ ܒܣܵܘ̈ܦܲܝ ܡܲܕ݂ܢ̱ܚܵܝܵܗ̇ ܕܐܝܼܪܝܼܚܘܿ.

²⁰ܘܬܲܪܬܲܥܸܣܪܹ̈ܐ ܟܹܐܦ̈ܝܼܢ ܗܵܠܹܝܢ ܕܲܢܣܲܒ̣ܘ ܡ̣ܢ ܓܵܘ ܝܘܿܪܕ̇ܢܵܢ: ܐܲܩܝܼܡ ܐܸܢܹܝܢ ܝܼܫܘܿܥ ܒܓܲܠܓܵܠܵܐ.

²¹ܘܐܸܡܲܪ ܝܼܫܘܿܥ ܠܲܒ̣̈ܢܲܝ ܝܼܣܪܵܝܹܠ: ܟܲܕ݂ ܢܫܲܐܠܘܼܢܵܟ݂ܘܿܢ ܒܢܲܝ̈ܟ̇ܘܿܢ ܡ̣ܢ ܡܚܵܪ: ܘܢܹܐܡܪܘܿܢ ܠܟ݂ܘܿܢ: ܡܵܢܵܐ ܟܹܐܦܹ̈ܐ ܗܵܠܹܝܢ.

²²ܚܵܘܵܘ ܐܸܢܹܝܢ ܠܲܒ̣ܢܝ̈ܟ̇ܘܿܢ: ܘܐܸܡܲܪܘ ܠܗܘܿܢ: ܕܲܒ̣ܝܲܒ̣ܫܵܐ ܥ̣ܒܲܪܘ ܒ̈ܢܲܝ ܝܼܣܪܵܝܹܠ ܝܘܿܪܕ̇ܢܵܢ ܗܵܢܵܐ.

²³ܘܐܵܘܒܸ̇ܫ ܡܵܪܝܵܐ ܐܲܠܵܗܟ݂ܘܿܢ ܡܲـ̈ـܝܵܐ ܕܝܘܿܪܕ̇ܢܵܢ ܡ̣ܢ ܩܕ݂ܵܡܲܝܗܘܿܢ ܥܕܲܡܵܐ ܕܲܥܒܲܪܘ: ܐܲܝܟ݂ ܕܲܥ̣ܒܲܕ݂ ܡܵܪܝܵܐ ܐܲܠܵܗܟ݂ܘܿܢ ܠܝܲܡܵܐ ܕܣܘܿܦ: ܘܐܵܘܒ̇ܫܹܗ ܡ̣ܢ ܩܕ݂ܵܡܲܝܢ ܥܕܲܡܵܐ ܕܲܥܒܲܪ̄ܢ.

²⁴ܕܢܸܕ̇ܥܘܼܢ ܟܠܗܘܿܢ ܥܲܡܡܹ̈ܐ ܕܐܲܪܥܵܐ: ܐܝܼܕܹܗ ܕܡܵܪܝܵܐ ܕܚܲܝܠܬ̣ܵܢܝܵܐ ܗ̄ܝ̣: ܘܬܸܕ݂ܚ̄ܠܘܼܢ ܠܡܵܪܝܵܐ ܐܲܠܵܗܟ݂ܘܿܢ ܟܠܗܘܿܢ ܝܵܘ̈ܡܵܬ̣ܵܐ.