Read Aramaic Peshita Joshua 6 Bible Online

Joshua 6 - Aramaic Peshita bible

Joshua 6

¹ܘܐܝܼܪܝܼܚܘܿ ܐܲܚܝܼܕ݂ܵܐ ܗ̄ܘ̣ܵܬ̣ ܡ̣ܢ ܩܕ݂ܵܡ ܒ̈ܢܲܝ ܝܼܣܪܵܝܹܠ: ܘܠܲܝܬ̇ ܗ̄ܘ̣ܵܐ ܕܢܵܦܹ̇ܩ ܘܠܵܐ ܕܥܵܐܹ̇ܠ.

²ܘܐܸܡܲܪ ܡܵܪܝܵܐ ܠܝܼܫܘܿܥ: ܚܙܝܼ ܕܐܲܫܠ̱ܡܹ̇ܬ̣ ܒܐܝܼܕܲܝ̈ܟ ܠܐܝܼܪܝܼܚܘܿ: ܘܲܠܡܲܠܟܵܗ̇: ܘܲܠܟ݂ܠܵܗ̇ ܚܲܝܠܵܗ̇. ܚܘܼܕ݂ܪܘܼܗ̇ ܠܲܡܕ݂ܝܼܢ̄ܬܵܐ ܟܠܟ݂ܘܿܢ ܓܲܒ̣ܪܹ̈ܐ ܥܵܒ̣ܕܲܝ̈ ܩܪܵܒ̣ܵܐ.

³ܘܐܸܬ̣ܟ̇ܘܼܪܟ̇ܘܼܗ̇ ܠܲܡܕ݂ܝܼܢ̄ܬܵܐ ܙܒܲܢ̄ܬܵܐ ܚܕ݂ܵܐ ܒܝܵܘܡܵܐ ܚܲܕ݂: ܗܵܟܲܢܵܐ ܥܒܸܕ݂ܘ ܫܬܵܐ ܝܵܘ̈ܡܝܼܢ.

⁴ܘܫܲܒ̣ܥܵܐ ܟܵܗܢܹ̈ܐ ܢܸܫܩܠܘܼܢ ܩܲܪ̈ܢܵܬ̣ܵܐ: ܘܲܢܝܲܒ̇ܒ̣ܘܼܢ ܩܕ݂ܵܡ ܩܹܒ̣ܘܿܬ̣ܵܐ. ܘܲܠܝܵܘܡܵܐ ܕܫܲܒ̣ܥܵܐ: ܐܸܬ̣ܟ̇ܘܼܪܟ̇ܘܼܗ̇ ܠܲܡܕ݂ܝܼܢ̄ܬܵܐ ܫܒܲܥ ܙܲܒ̣ܢ̈ܝܼܢ ܘܟ݂ܵܗܢܹ̈ܐ ܢܸܩܪܘܿܢ ܒܩܲܪ̈ܢܵܬ̣ܵܐ.

⁵ܘܡܵܐ ܕܝܲܒܸ̇ܒ̣ܘ ܒܩܲܪ̈ܢܵܬ̣ܵܐ ܘܲܫ̣ܡܲܥܬ̇ܘܿܢ ܩܵܠܵܐ ܕܩܲܪܢܵܐ: ܢܸܩܥܘܿܢ ܟܠܹܗ ܥܲܡܵܐ ܩܥܵܬ̣ܵܐ ܪܲܒ̇ܬ̣ܵܐ: ܘܢܸܦܸܠ ܫܘܼܪܵܐ ܕܲܡܕ݂ܝܼܢ̄ܬܵܐ ܥܲܠ ܕܘܼܟ̇ܬܹܗ: ܘܢܸܣܩܘܼܢ ܥܲܡܵܐ ܐ̄ܢܵܫ ܠܩܘܼܒ̣ܠܹܗ.

⁶ܘܲܩ̣ܪܵܐ ܝܼܫܘܿܥ ܒܲܪܢܘܿܢ ܠܟ݂ܵܗ̈ܢܹܐ ܘܐܸܡܲܪ ܠܗܘܿܢ: ܫܩܘܿܠܘ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ. ܘܫܲܒ̣ܥܵܐ ܟܵܗܢ̈ܝܼܢ ܢܸܫܩܠܘܼܢ ܫܒܲܥ ܩܲܪ̈ܢܵܢ: ܘܲܢܝܲܒ̇ܒ̣ܘܼܢ ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ.

⁷ܘܐܸܡܲܪ ܠܥܲܡܵܐ: ܥܒܲܪܘ ܘܐܸܬ̣ܟܲܪܟ̇ܘ ܠܲܡܕ݂ܝܼܢ̄ܬܵܐ. ܘܐܲܝܠܹܝܢ ܕܲܡܙܲܝܢܝܼܢ ܢܸܥܒ̇ܪܘܼܢ ܩܕ݂ܵܡ ܩܹܒ̣ܘܿܬ̣ܵܐ ܕܡܵܪܝܵܐ.

⁸ܘܐܲܝܟ݂ ܕܐܸܡܲܪ ܝܼܫܘܿܥ ܠܥܲܡܵܐ: ܫܲܒ̣ܥܵܐ ܟܲܗ̈ܢܹܐ ܫܩܝܼܠܝܼܢ ܗ̄ܘ̣ܵܘ ܫܒܲܥ ܩܲܪ̈ܢܵܢ: ܘܲܡܝܲܒ̇ܒ̣ܝܼܢ ܗ̄ܘ̣ܵܘ ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ: ܘܩܵܪܹܝܢ ܗ̄ܘ̣ܵܘ ܒܩܲܪ̈ܢܵܬ̣ܵܐ: ܘܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ ܐܲܬ̣ܝܵܐ ܗ̄ܘ̣ܵܬ̣ ܒܵܬܲܪܗܘܿܢ.

⁹ܘܕܲܡܙܲܝܢܝܼܢ ܗ̄ܘ̣ܵܘ ܐܵܙ̇ܠ̄ܝܼܢ ܗ̄ܘ̣ܵܘ ܩܕ݂ܵܡ ܟܵܗ̈ܢܹܐ ܕܩܵܪܹܝܢ ܗ̄ܘ̣ܵܘ ܒܩܲܪ̈ܢܵܬ̣ܵܐ: ܘܕܲܡܟܲܢܫܝܼܢ ܐܵܙܠ̄ܝܼܢ ܗ̄ܘ̣ܵܘ ܒܵܬܲܪ ܩܹܒ̣ܘܿܬ̣ܵܐ: ܘܲܡܗܲܠܟ݂ܝܼܢ ܗ̄ܘ̣ܵܘ ܘܩܵܪܹܝܢ ܒܩܲܪ̈ܢܵܬ̣ܵܐ.

¹⁰ܘܲܠܥܲܡܵܐ ܦܲܩܸܕ݂ ܝܼܫܘܿܥ: ܘܐܸܡܲܪ: ܠܵܐ ܬܸܩܥܘܿܢ ܘܠܵܐ ܬܲܫܡ̱ܥܘܼܢ ܩܵܠܟ݂ܘܿܢ: ܘܡܸܠܵܐ ܠܵܐ ܬܸܦܘܿܩ ܡ̣ܢ ܦܘܼܡܟ݂ܘܿܢ: ܥܕܲܡܵܐ ܠܝܵܘܡܵܐ ܕܐܹܡܲܪ ܠܟ݂ܘܿܢ ܕܲܩܥܵܘ: ܘܗܵܝܕܹ̇ܝܢ ܬܸܩܥܘܿܢ.

¹¹ܘܐܸܬ̣ܟܲܪܟܲܬ̤ ܩܹܒ̣ܘܿܬܹܗ ܕܡܵܪܝܵܐ ܠܲܡܕ݂ܝܼܢ̄ܬܵܐ ܙܒܲܢ̄ܬܵܐ ܚܕ݂ܵܐ: ܘܐܸܬ̣ܵܘ ܠܡܲܫܪܝܼܬ̣ܵܐ: ܘܒ̣ܵܬ̣ܘ ܒܡܲܫܪܝܼܬ̣ܵܐ.

¹²ܘܩܲܕܸ̇ܡ ܝܼܫܘܿܥ ܒܨܲܦܪܵܐ: ܘܲܫ̣ܩܲܠܘ ܟܵܗ̈ܢܹܐ ܩܹܒ̣ܘܿܬܹܗ ܕܡܵܪܝܵܐ.

¹³ܘܫܲܒ̣ܥܵܐ ܟܵܗ̈ܢܹܐ ܫܩܝܼܠܝܼܢ ܗ̄ܘ̣ܵܘ ܫܒܲܥ ܩܲܪ̈ܢܵܢ: ܘܐܵܙ̇ܠ̄ܝܼܢ ܗ̄ܘ̣ܵܘ ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ: ܘܲܡܗܲܠܟ݂ܝܼܢ ܗ̄ܘ̣ܵܘ ܘܩܵܪܝܼܢ ܒܩܲܪ̈ܢܵܬ̣ܵܐ. ܘܐܲܝܠܹܝܢ ܕܲܡܙܲܝܢܝܼܢ ܗ̄ܘ̣ܵܘ ܐܵܙ̇ܠ̄ܝܼܢ ܩܕ݂ܵܡܲܝܗܘܿܢ. ܘܕܲܡܟܲܢܫܝܼܢ ܗ̄ܘ̣ܵܘ ܐܵܙ̇ܠ̄ܝܼܢ ܗ̄ܘ̣ܵܘ ܒܵܬܲܪ ܩܹܒ̣ܘܿܬܹܗ ܕܡܵܪܝܵܐ: ܘܩܵܪܹܝܢ ܗ̄ܘ̣ܵܘ ܒܩܲܪ̈ܢܵܬ̣ܵܐ.

¹⁴ܘܐܸܬ̣ܟܲܪܟ̇ܘܼܗ̇ ܠܲܡܕ݂ܝܼܢ̄ܬܵܐ ܗܵܝ̇ ܒܝܵܘܡܵܐ ܕܲܬ̣ܪܹܝܢ ܙܒܲܢ̄ܬܵܐ ܚܕ݂ܵܐ: ܘܲܗܦܲܟ݂ܘ ܠܗܘܿܢ ܠܡܲܫܪܝܼܬ̣ܵܐ: ܗܵܟܲܢܵܐ ܥܵܒ̣ܕ̇ܝܼܢ ܗ̄ܘ̣ܵܘ ܫܬܵܬܲܝ̈ܗܘܿܢ ܝܵܘ̈ܡܵܬ̣ܵܐ.

¹⁵ܘܲܒ̣ܝܵܘܡܵܐ ܕܫܲܒ̣ܥܵܐ: ܩܲܕܸ̇ܡܘ ܒܨܲܦܪܵܐ ܘܐܸܬ̣ܟܲܪܟ̇ܘܼܗ̇ ܠܲܡܕ݂ܝܼܢ̄ܬܵܐ ܐܲܝܟ݂ ܢܵܡܘܿܣܵܐ ܗܵܢܵܐ ܫܒܲܥ ܙܲܒ̣ܢ̈ܝܼܢ. ܒܲܠܚܘܿܕ݂ ܕܹܝܢ ܒܹܗ ܒܗܵܘ̇ ܝܵܘܡܵܐ ܐܸܬ̣ܟܲܪܟ̇ܘܼܗ̇ ܙܲܒ̣ܢ̈ܝܼܢ.

¹⁶ܘܒܲܙܒܲܢ̄ܬܵܐ ܗܵܝ̇ ܕܲܫܒܲܥ: ܩ̣ܪܵܘ ܟܵܗ̈ܢܹܐ ܒܩܲܪ̈ܢܵܬ̣ܵܐ. ܘܐܸܡܲܪ ܝܼܫܘܿܥ ܠܥܲܡܵܐ ܩܥܵܘ: ܡܸܛܠ ܕܐܲܫܠܡܵܗ̇ ܠܟ݂ܘܿܢ ܡܵܪܝܵܐ ܠܲܡܕ݂ܝܼܢ̄ܬܵܐ.

¹⁷ܘܬܸܗܘܹܐ ܡܕ݂ܝܼܢ̄ܬܵܐ ܗܵܕܹܐ ܘܟ݂ܠ ܕܐܝܼܬ̣ ܒܵܗ̇ ܚܸܪܡܵܐ ܠܡܵܪܝܵܐ. ܒܲܠܚܘܿܕ݂ ܠܪܵܚܵܒ̣ ܙܵܢܝܼܬ̣ܵܐ ܐܵܚܵܘ ܠܵܗ̇ ܘܲܠܟ݂ܠ ܕܐܝܼܬ̣ ܥܲܡܵܗ̇ ܒܒܲܝܬܵܐ. ܡܸܛܠ ܕܛܲܫܝܲܬ̤ ܠܗܵܢܘܿܢ ܓܵܫܘܿܫܹ̈ܐ ܕܫܲܕܲܪ̄ܢ.

¹⁸ܐܲܢ̄ܬ̇ܘܿܢ ܕܹܝܢ ܗ̤ܘܲܝܬ̇ܘܿܢ ܙܗܝܼܪܝܼܢ ܡ̣ܢ ܚܸܪܡܵܐ: ܕܠܵܐ ܬܛܵܘܫܘܼܢ ܘܬܸܣܒ̣ܘܼܢ ܡ̣ܢ ܚܸܪܡܵܐ. ܘܬܸܥܒ̇ܕ݂ܘܼܢܵܗ̇ ܠܡܲܫܪܝܼܬ݂ܵܐ ܕܝܼܣܪܵܝܹܠ ܚܸܪܡܵܐ: ܘܲܬ̇ܕܲܠܚܘܼܢܵܗ̇.

¹⁹ܟܠ ܣܹܐܡܵܐ: ܘܕܲܗܒ̣ܵܐ: ܘܡܵܐܢܹ̈ܐ ܕܲܢܚܵܫܵܐ: ܘܲܕ݂ܦܲܪܙܠܵܐ: ܩܲܕ̇ܝܼܫܝܼܢ ܐܸܢܘܿܢ ܠܡܵܪܝܵܐ. ܠܒܹܝܬ̣ ܓܲܙܹܗ ܕܡܵܪܝܵܐ ܢܸܥܠܘܼܢ.

²⁰ܘܲܩܥܵܘ ܥܲܡܵܐ: ܘܲܩ̣ܪܵܘ ܒܩܲܪ̈ܢܵܬ̣ܵܐ. ܘܟܲܕ݂ ܫ̣ܡܲܥܘ ܥܲܡܵܐ ܩܵܠܵܐ ܕܩܲܪ̈ܢܵܬ̣ܵܐ: ܩܥ̣ܵܐ ܥܲܡܵܐ ܩܥܬ̣ܵܐ ܪܲܒ̇ܬ̣ܵܐ ܕܛܵܒ̣: ܘܲܢܦܲܠ̣ ܫܘܼܪܵܐ ܥܲܠ ܕܘܼܟ̇ܬܹܗ: ܘܲܣܠܸܩܘ ܥܲܡܵܐ ܠܲܡܕ݂ܝܼܢ̄ܬܵܐ ܐ̄ܢܵܫ ܠܩܘܼܒ̣ܠܹܗ: ܘܟܲܒ̣ܫܘܼܗ̇ ܠܲܡܕ݂ܝܼܢ̄ܬܵܐ.

²¹ܘܲܚܪܲܒ̣ܘ ܠܟ݂ܠ ܕܐܝܼܬ̣ ܒܵܗ̇: ܡ̣ܢ ܓܲܒ̣ܪܹ̈ܐ ܘܲܥܕܲܡܵܐ ܠܢܸܫܹ̈ܐ: ܘܡ̣ܢ ܛܠܵܝܹ̈ܐ ܘܲܥܕܲܡܵܐ ܠܩܲܫܝܼܫܹ̈ܐ: ܘܲܥܕܲܡܵܐ ܠܬ̣ܵܘܪܹ̈ܐ: ܘܲܥܕܲܡܵܐ ܠܥܵܢܵܐ ܘܲܠܚܸܡܪ̈ܵܐ: ܚܪܲܒ̣ܘ ܒܦܘܼܡܵܐ ܕܣܲܝܦܵܐ.

²²ܘܠܲܬ̣ܪܹܝܢ ܓܲܒ̣ܪ̈ܝܼܢ ܗܵܢܘܿܢ ܕܓܲܫܘܼܗ̇ ܠܐܲܪܥܵܐ ܐܸܡܲܪ ܝܼܫܘܿܥ: ܥܘܿܠܘ ܠܒܹܝܬ̣ ܐܲܢ̄ܬ̇ܬ̣ܵܐ ܗܵܝ̇ ܙܵܢܝܼܬ̣ܵܐ: ܘܐܲܦܩܘܼܗ̇ ܡ̣ܢ ܬܲܡܵܢ ܠܵܗ̇ ܠܐܲܢ̄ܬ̇ܬ̣ܵܐ ܘܲܠܟ݂ܠ ܕܐܝܼܬ̣ ܠܵܗ̇: ܐܲܝܟܲܢܵܐ ܕܝܼܡܲܝܬ̇ܘܿܢ ܠܵܗ̇.

²³ܘܐܸܙܲܠ̣ܘ ܓܵܫ̈ܘܿܫܹܐ ܘܐܲܦܩܘܼܗ̇ ܠܪܵܚܵܒ̣: ܘܠܲܐܒ̣ܘܼܗ̇: ܘܠܐܸܡܵܗ̇: ܘܠܲܐܚܹ̈ܝܗ̇: ܘܲܠܟ݂ܠ ܕܐܝܼܬ̣ ܠܵܗ̇: ܘܲܠܟ݂ܠܵܗ̇ ܫܲܪܒ̇ܬ̣ܵܗ̇ ܐܲܦܸܩ̣ܘ: ܘܐܲܫܪܝܼܘ ܐܸܢܘܿܢ ܠܒܲܪ ܡ̣ܢ ܡܲܫܪܝܼܬ̣ܵܐ ܕܝܼܣܪܵܝܹܠ.

²⁴ܘܠܲܡܕ݂ܝܼܢ̄ܬܵܐ ܐܵܘܩܕ݂ܘܼܗ̇ ܒܢܘܼܪܵܐ ܘܲܠܟ݂ܠ ܕܐܝܼܬ̣ ܒܵܗ̇: ܒܲܠܚܘܿܕ݂ ܠܕܲܗܒ̣ܵܐ: ܘܲܠܣܹܐܡܵܐ: ܘܲܠܡܵܐܢܹ̈ܐ ܕܲܢܚܵܫܵܐ: ܘܲܕܦܲܪܙܠܵܐ: ܐܲܝܬ̇ܝܼܘ ܐܸܢܘܿܢ ܠܒܹܝܬ̣ ܓܲܙܹܗ ܕܡܵܪܝܵܐ.

²⁵ܘܲܠܪܵܚܵܒ̣ ܙܵܢܝܼܬ̣ܵܐ: ܘܲܠܒܹܝܬ̣ ܐܲܒ̣ܘܼܗ̇ ܘܲܠܟ݂ܠ ܕܐܝܼܬ̣ ܠܵܗ̇ ܐܲܚܝܼ ܝܫܘܿܥ: ܘܝܸܬ̣ܒܲܬ̤ ܒܓ̣ܵܘ ܒ̈ܢܲܝ ܝܼܣܪܵܝܹܠ ܥܕܲܡܵܐ ܠܝܵܘܡܵܢܵܐ: ܡܸܛܠ ܕܛܲܫܝܲܬ̤ ܓܵܫ̈ܘܿܫܹܐ ܕܫܲܕܲܪ ܝܼܫܘܿܥ ܠܡܸܓܲܫ ܠܐܝܼܪܝܼܚܘܿ.

²⁶ܘܝܼܡܵܐ ܝܼܫܘܿܥ ܒܙܲܒ̣ܢܵܐ ܗܵܘ̇: ܘܐܸܡܲܪ: ܠܝܼܛ ܗ̄ܘ̣ ܓܲܒ̣ܪܵܐ ܩܕ݂ܵܡ ܡܵܪܝܵܐ: ܕܲܢܩܘܼܡ ܘܢܸܒ̣ܢܹܝܗ̇ ܠܲܡܕ݂ܝܼܢ̄ܬܵܐ ܗܵܕܹܐ ܐܝܼܪܝܼܚܘܿ ܒܒ̣ܘܼܟ݂ܪܹܗ ܢܸܒ̣ܢܹܝܗ̇: ܘܒܲܙܥܘܿܪܹܗ ܢܩܝܼܡ ܬܲܪ̈ܥܹܝܗ̇.

²⁷ܘܲܗܘ̤ܵܐ ܡܵܪܝܵܐ ܥܲܡ ܝܼܫܘܿܥ ܘܫܸܡܥܹܗ ܐܵܙܹ̇ܠ ܗ̄ܘ̣ܵܐ ܒܟ݂ܠܵܗ̇ ܐܲܪܥܵܐ.