Read Aramaic Peshita Joshua 7 Bible Online

Joshua 7 - Aramaic Peshita bible

Joshua 7

¹ܘܐܲܥܠܝܼܘ ܒ̈ܢܲܝ ܝܼܣܪܵܝܹܠ ܥܵܘܼܠܵܐ ܒܚܸܪܡܵܐ: ܘܲܢܣܲܒ̣ ܥܵܟ݂ܵܪ ܒܲܪ ܟܲܪܡܝ: ܒܲܪ ܙܲܒ̣ܕ̇ܝܼ: ܒܲܪ ܙܲܪܚ: ܡ̣ܢ ܫܲܒ̣ܛܵܐ ܕܲܝܗܘܼܕ݂ܵܐ: ܡ̣ܢ ܚܲܪܡܵܐ ܘܛܲܫܝܼ ܘܐܸܬ̣ܚܲܡܲܬ̣ ܪܘܼܓ̣ܙܹܗ ܕܡܵܪܝܵܐ ܥܲܠ ܒ̈ܢܲܝ ܝܼܣܪܵܝܹܠ:

²ܘܫܲܕܲܪ ܝܼܫܘܿܥ ܓܲܒ̣ܪܹ̈ܐ ܡ̣ܢ ܐܝܼܪܝܼܚܘܿ ܠܥܵܝ: ܕܥܲܠ ܓܹܢ̄ܒ̣ ܒܹܝܬ̣ ܐܵܘܵܢ: ܡ̣ܢ ܡܲܕ݂ܢ̱ܚܵܐ ܕܒܹܝܬ̣ ܐܹܝܠ: ܘܐܸܡܲܪ ܠܗܘܿܢ ܣܲܩܘ ܓܘܿܫܘ ܐܲܪܥܵܐ. ܘܲܣܠܸܩ̣ܘ ܓܲܒ̣ܪܹ̈ܐ ܘܓܲܫܘܼܗ̇ ܠܥܵܝ.

³ܘܲܗܦܲܟ݂ܘ ܠܘܵܬ̣ ܝܼܫܘܿܥ: ܘܐܵܡ̇ܪܝܼܢ ܠܹܗ: ܠܵܐ ܢܸܣܲܩ ܟܠܹܗ ܥܲܡܵܐ: ܐܸܠܵܐ ܐܲܝܟ݂ ܬܪܹܝܢ ܬܠܵܬ̣ܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܢܸܣܩܘܼܢ ܢܸܚܪ̱ܒ̣ܘܼܢܵܗ̇ ܠܥܵܝ. ܠܵܐ ܬܫܲܕܲܪ ܠܟ݂ܠܹܗ ܥܲܡܵܐ: ܡܸܛܠ ܕܲܙܥܘܿܪܝܼܢ ܐܸܢܘܿܢ.

⁴ܘܲܣܠܸܩ̣ܘ ܡ̣ܢ ܥܲܡܵܐ ܠܬܲܡܵܢ: ܐܲܝܟ݂ ܬܠܵܬ̣ܵܐ ܐܲܠܦ̈ܝܼܢ ܓܲܒ̣ܪ̈ܝܼܢ: ܘܲܥܪܲܩ̣ܘ ܠܗܘܿܢ ܡ̣ܢ ܩܕ݂ܵܡ ܐ̄ܢܵܫܹܝ̈ܗ̇ ܕܥܵܝ.

⁵ܘܲܚܪܲܒ̣ܘ ܐ̄ܢܵܫܹܝ̈ܗ̇ ܕܥܵܝ ܡ̣ܢ ܝܼܣܪܵܝܹܠ: ܬܠܵܬ̣ܝܼܢ ܘܸܫܬܵܐ ܓܲܒ̣ܪ̈ܝܼܢ: ܘܲܪܕܲܦ̣ܘ ܐܸܢܘܿܢ ܩܕ݂ܵܡ ܬܲܪܥܵܐ ܥܕܲܡܵܐ ܕܐܸܬ̇ܬ̇ܒܲܪܘ: ܘܲܡܚܵܘ ܒܗܘܿܢ ܡܚܘܿܬ̣ܵܐ. ܘܙܵܥ̣ ܠܸܒܹ̇ܗ ܕܥܲܡܵܐ: ܘܲܗܘ̣ܵܐ ܐܲܝܟ݂ ܡܲـ̈ـܝܵܐ.

⁶ܘܨܲܪܝܼ ܝܼܫܘܿܥ ܠܒ̣ܘܼܫܵܘ̈ܗܝ: ܘܲܢܦܲܠ̣ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ: ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ ܥܕܲܡܵܐ ܠܪܲܡܫܵܐ: ܗ̤ܘ ܘܩܲܫ̈ܝܼܫܹܐ ܕܝܼܣܪܵܝܹܠ: ܘܐܲܪܡܝܼܘ ܥܲܦܪܵܐ ܥܲܠ ܪܹ̈ܫܲܝܗܘܿܢ.

⁷ܘܐܸܡܲܪ ܝܼܫܘܿܥ: ܐܘܿܢ ܡܵܪܝܵܐ ܐܲܠܵܗܵܐ: ܠܡܵܢܵܐ ܐܲܥ̣ܒܲܪܬܵܝܗܝ ܠܥܲܡܵܐ ܗܵܢܵܐ ܝܘܿܪܕ̇ܢܵܢ: ܕܬܲܫܠ̱ܡܲܢ ܒܐܝܼܕ݂ܵܐ ܕܐܵܡܘܿܪ̈ܵܝܹܐ. ܐܸܠܘܼ ܝܼܬܸܒ̣̄ܢ ܗ̄ܘܲܝܢ ܠܲܢ ܟܲܝ ܒܥܸܒ̣ܪܵܐ ܕܝܘܿܪܕ̇ܢܵܐ.

⁸ܡܵܢܵܐ ܡܸܟܹ̇ܝܠ ܐܹܡܲܪ: ܕܐܲܦܢܝܼ ܝܼܣܪܵܝܹܠ ܩܕ݂ܵܠܹܗ ܩܕ݂ܵܡ ܒܥܸܠܕ̇ܒ̣ܵܒ̣ܵܘ̈ܗܝ.

⁹ܘܢܸܫܡ̱ܥܘܿܢ ܟܢܲܥ̈ܢܵܝܹܐ ܘܟ݂ܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ: ܘܢܸܬ̣ܟܲܢܫܘܼܢ ܥܠܲܝܢ: ܘܢܵܘܒ̇ܕ݂ܘܼܢ ܫܡܲܢ ܡ̣ܢ ܐܲܦܲܝ̈ ܐܲܪܥܵܐ. ܘܡܵܢܵܐ ܕܹܝܢ ܥܵܒܹܕ݂ ܐܲܢ̄ܬ̇ ܠܲܫܡܵܟ݂ ܪܲܒܵܐ.

¹⁰ܘܐܸܡܲܪ ܡܵܪܝܵܐ ܠܝܼܫܘܿܥ: ܩܘܼܡ ܠܵܟ݂: ܠܡܵܢܵܐ ܪܡܸܐ ܐܲܢ̄ܬ̇ ܥܲܠ ܐܲܦܲܝ̈ܟ ܥܲܠ ܐܲܪܥܵܐ.

¹¹ܚ̣ܛܵܐ ܝܼܣܪܵܝܹܠ: ܘܲܥܒܲܪܘ ܥܲܠ ܦܘܼܩܕܵܢܵܐ ܕܦܲܩܕܹܬ̣ ܐܸܢܘܿܢ: ܘܲܢܣܲܒ̣ܘ ܡ̣ܢ ܚܸܪܡܵܐ: ܐܵܦ ܓܢܲܒ̣ܘ: ܐܵܦ ܟܲܕܸ̇ܒ̣ܘ: ܘܛܲܫܝܼܘ ܒܡܵܐܢܲܝ̈ܗܘܿܢ.

¹²ܘܠܵܐ ܢܸܫܟ̇ܚܘܼܢ ܬܘܼܒ̣ ܒ̈ܢܲܝ ܝܼܣܪܵܝܹܠ ܠܲܡܩܵܡ ܩܕ݂ܵܡ ܒܥܸܠܕ̇ܒ̣ܵܒܲܝ̈ܗܘܿܢ: ܐܸܠܵܐ ܩܕ݂ܵܠܗܘܿܢ ܢܲܦܢܘܿܢ ܩܕ݂ܵܡ ܒܥܸܠܕ̇ܒ̣ܵܒܲܝ̈ܗܘܿܢ: ܡܸܛܠ ܕܲܗܘ̤ܵܘ ܠܚܸܪܡܵܐ. ܘܬ̣ܘܼܒ̣ ܠܵܐ ܐܸܗܘܹܐ ܥܲܡܟ݂ܘܿܢ: ܐܸܠܵܐ ܐܸܢ ܐܲܦܪܸܩܬ̇ܘܿܢ ܚܸܪܡܵܐ ܡܟܢ ܒܲܝܢܵܬ̣ܟ݂ܘܿܢ.

¹³ܩܘܼܡ ܙܲܡܸܢܲܝܗܝ ܠܥܲܡܵܐ ܗܵܢܵܐ: ܘܐܸܡܲܪ: ܐܸܙܕܲܡܲܢܘ ܡܚܵܪ: ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܚܸܪܡܵܐ ܒܓ̣ܵܘܵܟ݂ ܝܼܣܪܵܝܹܠ: ܬܘܼܒ̣ ܠܵܐ ܡܸܫܟܲܚ ܐܲܢ̄ܬ̇ ܠܲܡܩܵܡ ܩܕ݂ܵܡ ܒܥܸܠܕ̇ܒ̣ܵܒܲܝ̈ܟ: ܥܕܲܡܵܐ ܕܬܲܦ̱ܪܩܘܼܢ ܚܹܪܡܵܐ ܡ̣ܢ ܒܲܝܢܵܬ̣ܟ݂ܘܿܢ.

¹⁴ܘܲܒ̣ܨܲܦܪܵܐ ܩܲܪܸܒ̣ܘ ܫܲܒ̣ܛܲܝ̈ܟ̇ܘܿܢ ܘܫܲܒ̣ܛܵܐ ܕܢܹܐܚܕ̇ܝܼܘܗܝ ܡܵܪܝܵܐ: ܢܸܬ̣ܩܲܪܲܒ̣ ܠܫܲܪ̈ܒ̣ܵܬ̣ܵܐ. ܘܫܲܪܒ̇ܬ̣ܵܐ ܕܢܹܐܚܕ̇ܝܼܗ̇ ܡܵܪܝܵܐ: ܬܸܬ̣ܩܲܪܲܒ̣ ܠܒ̣ܵـ̈ـܬ̇ܝܼܢ. ܘܒܲܝܬܵܐ ܕܢܹܐܚܕ̇ܝܼܘܗܝ ܡܵܪܝܵܐ: ܢܸܬ̣ܩܲܪܲܒ̣ ܠܓܲܒ̣ܪ̈ܝܼܢ.

¹⁵ܘܡ̇ܢ ܕܡܸܬ̇ܬ̇ܚܸܕ݂ ܒܹܗ ܒܚܸܪܡܵܐ: ܢܹܐܩܲܕ݂ ܒܢܘܼܪܵܐ ܗ̤ܘ ܘܟ݂ܠ ܡܸܕܸ̇ܡ ܕܐܝܼܬ̣ ܠܹܗ: ܥܲܠ ܕܲܥܒܲܪ ܥܲܠ ܦܘܼܩܕܵܢܹܗ ܕܡܵܪܝܵܐ: ܘܥܲܠ ܕܲܥܒܲܪ ܥܵܘܼܠܵܐ ܒܝܼܣܪܵܝܹܠ.

¹⁶ܘܩܲܕܸ̇ܡ ܝܼܫܘܿܥ ܒܨܸܦܪܵܐ: ܘܩܲܪܒܹܗ ܠܝܼܣܪܵܝܹܠ ܠܫܲܒ̣̈ܛܝܼܢ: ܘܐܸܬ̇ܬ̇ܚܸܕ݂ ܫܲܒ̣ܛܵܐ ܕܲܝܗܘܼܕ݂ܵܐ.

¹⁷ܘܩܲܪܸܒ̣ ܫܲܒ̣ܛܵܐ ܕܲܝܗܘܼܕ݂ܵܐ ܠܫܲܪ̈ܒ̣ܵܬ̣ܵܐ: ܘܐܸܬ̇ܬܲܚܕܲܬ̤ ܫܲܪܒ̇ܬ̣ܵܐ ܕܙܲܪܚ. ܘܩܲܪܸܒ̣ ܫܲܪܒ̇ܬ̣ܵܐ ܕܙܲܪܚ ܠܒ̣ܵܬ̇ܝܼ̈ܢ. ܘܐܸܬ̇ܬ̇ܚܸܕ݂ ܙܲܒ̣ܕ̇ܝܼ.

¹⁸ܘܩܲܪܸܒ̣ ܒܲܝܬܹ̇ܗ ܠܓܲܒ̣ܪ̈ܝܼܢ: ܘܐܸܬ̇ܬ̇ܚܸܕ݂ ܥܵܟ݂ܵܪ: ܒܲܪ ܟܲܪܡܝܼ: ܒܲܪ ܙܲܒ̣ܕ̇ܝܼ: ܒܲܪ ܙܲܪܚ: ܡ̣ܢ ܫܲܒ̣ܛܵܐ ܕܲܝܗܘܼܕ݂ܵܐ.

¹⁹ܘܐܸܡܲܪ ܝܼܫܘܿܥ ܠܥܵܟ݂ܵܪ: ܗܲܒ̣ ܪܲܒ̇ܘܼܬ̣ܵܐ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܘܗܲܒ̣ ܠܹܗ ܬܵܘܕ̇ܝܼܬ̣ܵܐ: ܘܚܵܘܵܐ ܡܸܕܸ̇ܡ ܕܲܥܒܲܕ̇ܬ̇ ܘܠܵܐ ܬܛܲܫܸܐ ܡܹܢܝ.

²⁰ܥܢ̣ܵܐ ܥܵܟ݂ܵܪ ܘܐܸܡܲܪ ܠܝܼܫܘܿܥ: ܫܲܪܝܼܪܵܐܝܼܬ̣ ܐܸܢܵܐ ܚܛܹܝܬ̣ ܠܡܪܝܵܐ ܐܲܠܵܗܵܐ ܕܝܼܣܪܵܝܹܠ: ܘܗܵܟܲܢܵܐ ܥܸܒ̣ܕܹܬ̣.

²¹ܚܙܹܝܬ̣ ܒܒܸܙܬ̣ܵܐ: ܐܲܡ̣ܠܵܐ ܚܕ݂ܵܐ ܒܵܒ̣ܠܵܝܬܵܐ: ܘܫܲܦܝܼܪܵܐ ܗ̄ܘ̣ܵܬ̣: ܘܡܲܐܬܹ̇ܝܢ ܡܲܬ̣ܩܵܠ̈ܝܼܢ ܕܣܹܐܡܵܐ: ܘܠܸܫܵܢܵܐ ܚܲܕ݂ ܕܕܲܗܒ̣ܵܐ: ܕܬ̣ܵܩܹܠ ܚܲܡܫܝܼܢ ܡܲܬ̣ܩܵܠ̈ܝܼܢ ܘܪܸܓܲܬ̣ ܐܸܢܘܿܢ: ܘܢܸܣܒܹ̇ܬ̣ ܐܸܢܘܿܢ: ܘܗܵܐ ܛܡܝܼܪܝܼܢ ܠܝܼ ܒܐܲܪܥܵܐ ܒܡܲܫܟܲܢܝ: ܘܣܹܐܡܵܐ ܡ̣ܢ ܠܬܲܚܬ̇.

²²ܘܫܲܕܲܪ ܝܼܫܘܿܥ ܓܲܒ̣ܪܹ̈ܐ: ܘܲܪܗܸܛܘ ܠܡܲܫܟ̇ܢܹܗ: ܘܲܚܙܵܘ ܕܲܛܡܝܼܪܝܼܢ ܒܡܲܫܟ̇ܢܹܗ: ܘܣܹܐܡܵܐ ܡ̣ܢ ܠܬܲܚܬ̇.

²³ܘܲܢܣܲܒ̣ܘ ܐܸܢܘܿܢ ܡ̣ܢ ܡܲܫܟ̇ܢܹܗ ܘܐܲܝܬ̇ܝܼܘ ܐܸܢܘܿܢ ܠܘܵܬ̣ ܝܼܫܘܿܥ: ܘܲܠܘܵܬ̣ ܟܠܹܗ ܝܼܣܪܵܝܹܠ ܘܣܵܡ̣ ܐܸܢܘܿܢ ܩܕ݂ܵܡ ܡܵܪܝܵܐ.

²⁴ܘܕܲܒ̣ܪܹܗ ܝܼܫܘܿܥ ܠܥܵܟ݂ܵܪ ܒܲܪ ܙܲܪܚ. ܘܲܢܣܲܒ̣ ܠܣܹܐܡܵܐ: ܘܠܵܐܡ̣ܠܵܐ: ܘܲܠܸܠܫܵܢܵܐ ܕܕܲܗܒ̣ܵܐ ܘܲܕ݂ܒܲܪ ܠܲܒ̣ܢܵܘ̈ܗܝ: ܘܠܲܒ̣̈ܢܵܬܹܗ: ܘܲܠܬ̣ܵܘܪ̈ܵܘܗܝ: ܘܲܠܚܸܡܪܹ̈ܗ: ܘܲܠܥܵܢܹ̈ܗ: ܘܲܠܡܲܫܟ̇ܢܹܗ: ܘܲܠܟ݂ܠܡܸܕܸ̇ܡ ܕܐܝܼܬ̣ ܠܹܗ: ܘܲܠܟ݂ܠܹܗ ܝܼܣܪܵܝܹܠ ܥܲܡܹܗ: ܘܐܲܣܸܩ ܐܸܢܘܿܢ ܠܥܘܼܡܩܵܐ ܕܥܵܟ݂ܵܪ.

²⁵ܘܐܸܡܲܪ ܠܹܗ ܝܼܫܘܿܥ: ܠܡܵܢܵܐ ܕܲܠܲܚܬܵܢܝ: ܢܕܲܠܚܵܟ݂ ܡܵܪܝܵܐ ܒܝܵܘܡܵܐ ܗܵܢܵܐ. ܘܪܲܓ̣ܡܘܼܗܝ ܒܟܹܐܦܹ̈ܐ ܟܠܹܗ ܝܼܣܪܵܝܹܠ: ܠܹܗ ܘܲܠܟ݂ܠ ܕܐܝܼܬ̣ ܠܹܗ: ܘܐܵܘܩܸܕ݂ܘ ܐܸܢܘܿܢ ܒܢܘܼܪܵܐ.

²⁶ܘܐܲܩܝܼܡܘ ܥܠܵܘܗܝ ܝܲܓܪܵܐ ܕܟܹܐܦܹ̈ܐ ܪܵܘ̱ܪ̈ܒ̣ܵܬ̣ܵܐ ܥܕܲܡܵܐ ܠܝܵܘܡܵܢܵܐ. ܘܐܸܬ̇ܬ̇ܢܝܼܚ ܡܵܪܝܵܐ ܡ̣ܢ ܚܡܬ̣ܵܐ ܕܪܘܼܓ̣ܙܹܗ ܡܸܛܠ ܗܵܢܵܐ ܐܸܬ̣ܩܪܝܼ ܫܡܹܗ ܕܐܲܬ̣ܪܵܐ ܗܵܘ̇: ܥܘܼܡܩܵܐ ܕܥܵܟ݂ܵܪ ܥܕܲܡܵܐ ܠܝܵܘܡܵܢܵܐ.