Read Aramaic Peshita Joshua 9 Bible Online

Joshua 9 - Aramaic Peshita bible

Joshua 9

¹ܘܟܲܕ݂ ܫ̣ܡܲܥܘ ܟܠܗܘܿܢ ܡܲܠ̈ܟܹ̇ܐ ܕܐܝܼܬ̣ ܒܥܸܒ̣ܪܵܐ ܕܝܘܿܪܕ̇ܢܵܢ: ܒܛܘܼܪܹ̈ܐ ܘܲܒ̣ܦܲܩ̈ܥܵܬ̣ܵܐ: ܘܲܒ̣ܟ݂ܠܗܘܿܢ ܣܦܵܪ̈ܵܘܗܝ ܕܝܲܡܵܐ ܪܲܒܵܐ ܕܠܘܼܩܒܲܠ ܠܸܒ̣ܢܵܢ: ܚܹܝܬ̣ܵܝܹ̈ܐ: ܘܐܵܡܘܿܪ̈ܵܝܹܐ: ܘܲܟ݂ܢܲܥ̈ܢܵܝܹܐ: ܘܦܲܪ̈ܙܵܝܹܐ: ܘܚܵܘܵܝܹ̈ܐ: ܘܝܵܒ̣̈ܘܿܣܵܝܹܐ.

²ܐܸܬ̣ܟܲܢܲܫܘ ܐܲܟ݂ܚ̄ܕ݂ܵܐ ܠܡܸܥܒܲܕ݂ ܩܪܵܒ̣ܵܐ ܥܲܡ ܝܼܫܘܿܥ ܘܥܲܡ ܝܼܣܪܵܝܹܠ: ܡ̣ܢ ܚܲܕ݂ ܦܘܼܡ.

³ܘܥܵܡܘܿܪܹ̈ܐ ܕܓܒ̣ܥܘܿܢ ܫ̣ܡܲܥܘ ܡܸܕܸ̇ܡ ܕܲܥ̣ܒܲܕ݂ ܝܼܫܘܿܥ ܠܥܵܝ ܘܠܐܝܼܪܝܼܚܘܿ.

⁴ܘܲܥ̣ܒܲܕ݂ܘ ܐܵܦ ܗܸܢܘܿܢ ܒܲܥܪܝܼܡܘܼܬ̣ܵܐ: ܘܐܸܙܲܠ̣ܘ ܐܸܙܕܵܘܲܕ݂ܘ. ܘܐܲܪܡܝܼܘ ܣܲܩܹ̈ܐ ܒܠܵܝܹ̈ܐ ܥܲܠ ܚܸܡ̱ܪ̈ܗܘܿܢ: ܘܙܸܩܹ̈ܐ ܕܚܲܡܪܵܐ ܕܲܒ̣̈ܠܵܝܵܢ: ܘܲܡܒܲܙ̈ܥܵܢ ܘܲܡܨܲܪ̈ܪܵܢ.

⁵ܘܲܡܣܵܢܹ̈ܐ ܕܲܒ̣̈ܠܵܝܑܝܼܢ ܘܛܲܪ̈ܡܵܣܝܵܬ̣ܵܐ ܣܐܝܼܢܝܼܢ ܗ̄ܘ̣ܵܘ ܒܪܸ̈ܓ̣ܠܲܝܗܘܿܢ: ܘܢܲܚ̈ܬܹ̇ܐ ܒ̈ܠܵܝܹܐ ܠܒ̣ܝܼܫܝܼܢ ܗ̄ܘ̣ܵܘ. ܘܠܲܚܡܵܐ ܕܲܙܘܵܕܲܝ̈ܗܘܿܢ ܝܲܒܸ̇ܫܘ: ܘܲܗܘ̣ܵܐ ܠܹܗ ܦܲܓܘܼܪܵܐ.

⁶ܘܐܸܬ̣ܵܘ ܠܘܵܬ̣ ܝܼܫܘܿܥ ܠܡܲܫܪܝܼܬ̣ܵܐ ܠܓܲܠܓܵܠܵܐ: ܘܐܸܡܲܪܘ ܠܹܗ ܘܠܲܕ݂ܒܹܝܬ̣ ܝܼܣܪܵܝܹܠ: ܡ̣ܢ ܐܲܬ̣ܪܵܐ ܪܲܚܝܼܩܵܐ ܐܸܬܲܝܢ: ܗܵܫܵܐ ܗܲܒ̣ܘ ܠܲܢ ܝܲܡܝܼܢܵܐ.

⁷ܐܵܡ̇ܪܝܼܢ ܕܒܹܝܬ̣ ܝܼܣܪܵܝܹܠ ܠܚܵܘܵܝܹ̈ܐ. ܐܸܢ ܠܘܵܬ̣ܵܢ ܥܵܡܪܝܼܢ ܐ̄ܢܬܘܿܢ: ܠܡܵܢܵܐ ܗܵܘ̇ܝܵܐ ܠܟ݂ܘܿܢ ܝܲܡܝܼܢܵܐ.

⁸ܘܐܸܡܲܪܘ ܠܝܼܫܘܿܥ ܥܲܒ̣ܕܲܝ̈ܟ ܚܢܲܢ: ܐܵܡܲܪ ܠܗܘܿܢ ܝܼܫܘܿܥ ܐܲܝܡܸܟܵܐ ܐܲܢ̄ܬ̇ܘܿܢ: ܘܡ̣ܢ ܐܲܝܡܸܟܵܐ ܐܸܬܲܝܬ̇ܘܿܢ.

⁹ܘܐܸܡܲܪܘ ܠܹܗ: ܡ̣ܢ ܐܲܬ̣ܪܵܐ ܕܪܲܚܝܼܩ ܛܵܒ̣ ܐܸܬ̣ܵܘ ܥܲܒ̣ܕܲܝ̈ܟ: ܠܲܫܡܹܗ ܕܡܵܪܝܵܐ ܐܲܠܵܗܵܟ݂. ܡܸܛܠ ܕܲܫ̣ܡܲܥܢ ܫܡܹܗ ܘܟ݂ܠܡܸܕܸ̇ܡ ܕܲܥܒܲܕ݂ ܒܡܸܨܪܹܝܢ.

¹⁰ܘܟ݂ܠ ܕܲܥܒܲܕ݂ ܠܲܬ̣ܪ̈ܲܝܗܘܿܢ ܡܲܠ̈ܟܹ̇ܐ ܕܐܵܡܘܿܪ̈ܵܝܹܐ ܕܲܒ̣ܥܸܒ̣ܪܵܐ ܕܝܘܿܪܕ̇ܢܵܢ: ܠܣܝܼܚܘܿܢ ܡܲܠܟܵܐ ܕܚܸܫܒ̇ܘܿܢ: ܘܲܠܥܘܿܓ̣ ܡܲܠܟܵܐ ܕܡܲܬ̣ܢܝܢ: ܕܝܵܬܹܒ̣ ܗ̄ܘ̣ܵܐ ܒܥܸܣܬ̇ܪܘܼܬ̣.

¹¹ܘܐܸܡܲܪܘ ܠܲܢ ܩܲܫ̈ܝܼܫܲܢ: ܘܟ݂ܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܲܢ: ܣܲܒ̣ܘ ܥܲܡܟ݂ܘܿܢ ܙܘܵܕܹ̈ܐ ܠܐܘܼܪܚܵܐ ܘܙܸܠܘ ܠܐܘܼܪܥ̱ܗܘܿܢ: ܘܐܸܡܲܪܘ ܠܗܘܿܢ ܕܥܲܒ̣ܕܲܝ̈ܟ̇ܘܿܢ ܚܢܲܢ: ܡܸܟܹ̇ܝܠ ܗܲܒ̣ܘ ܠܲܢ ܝܲܡܝܼܢܵܐ.

¹²ܘܐܸܡܲܪܘ ܠܝܼܫܘܿܥ: ܗܵܢܵܐ ܠܲܚܡܲܢ ܟܲܕ݂ ܚܲܡܝܼܡ ܐܸܙܕܵܘܲܕ݂ܢܵܝܗܝ ܡ̣ܢ ܒܵـ̈ـܬܹ̇ܝܢ: ܒܝܵܘܡܵܐ ܕܲܢܦܲܩ̄ܢ ܠܡܹܐܬ̣ܵܐ ܠܘܵܬ̣ܟ݂ܘܿܢ: ܘܗܵܫܵܐ ܗܵܐ ܝܼܒܸܫ ܘܲܗܘ̤ܵܐ ܦܲܓܘܼܪܵܐ.

¹³ܘܗܵܠܹܝܢ ܙܸܩܹ̈ܐ ܕܚܲܡܪܵܐ: ܡܠܲܝܢ ܐܸܢܹܝܢ ܟܲܕ݂ ܚܲܕ݂ܬ̣ܵܢ: ܘܗܵܐ ܐܸܬ̣ܒ̇ܙܲܥ. ܘܗܵܠܹܝܢ ܢܲܚ̈ܬܲܝܢ ܘܲܡܣܵـ̈ـܢܲܝ̈ܢ: ܟܲܕ݂ ܚܲܕ݂ܬ̣̈ܝܼܢ ܢܣܲܒ̣̄ܢ ܐܸܢܘܿܢ ܠܲܢ: ܘܗܵܐ ܒܠܝܼܘ: ܡܸܛܠ ܕܛܵܒ̣ ܣܲܓܝܼܐܵܐ ܗ̄ܘ̣ܵܬ̣ ܐܘܼܪܚܵܐ.

¹⁴ܘܲܢܣܲܒ̣ܘ ܓܲܒ̣ܪܹ̈ܐ ܗܵܠܹܝܢ ܡ̣ܢ ܙܘܵܕܲܝ̈ܗܘܿܢ ܘܐܸܙܲܠ̣ܘ: ܘܡ̣ܢ ܦܘܼܡܹܗ ܕܡܵܪܝܵܐ ܠܵܐ ܫܐܸܠܘ.

¹⁵ܘܲܥܒܲܕ݂ ܠܗܘܿܢ ܝܼܫܘܿܥ ܫܠܵܡܵܐ: ܘܝܲܗ̄ܒ̣ ܠܗܘܢ ܝܲܡܝܼܢܵܐ ܠܚܲܝܲܝ̈ܗܘܿܢ: ܘܝܼܡܵܘ ܠܗܘܿܢ ܪܵܘ̱ܪ̈ܒ̣ܵܢܹܐ ܕܲܟ݂ܢܘܼܫܬܵܐ.

¹⁶ܘܡ̣ܢ ܒܵܬܲܪ ܬܠܵܬ̣ܵܐ ܝܵܘ̈ܡܝܼܢ: ܡ̣ܢ ܒܵܬܲܪ ܕܝܲܗ̄ܒ̣ܘ ܠܗܘܿܢ ܝܲܡܝܼܢܵܐ: ܫ̣ܡܲܥܘ ܕܩܲܪܝ̣ܒ̣ܝܼܢ ܐܸܢܘܿܢ ܠܗܘܿܢ: ܘܒܲܝܢܵܬ̣ܗܘܿܢ ܫܪܹܝܢ.

¹⁷ܘܲܫܩܲܠܘ ܒ̈ܢܲܝ ܝܼܣܪܵܝܹܠ: ܘܐܸܬ̣ܵܘ ܠܩܘܼܪ̈ܝܼܗܘܿܢ ܒܝܵܘܡܵܐ ܕܲܬ̣ܠܵܬ̣ܵܐ: ܘܲܫܡܵܗܹ̈ܐ ܕܩܘܼܪ̈ܝܼܗܘܿܢ: ܓܸܒ̣ܥܘܿܢ: ܘܲܟ݂ܦܝܼܪܵܐ: ܘܥܝܼܪܘܼܬ̣: ܘܩܘܼܪܝܲܬ̣ ܢܲܥܪܝܼܢ.

¹⁸ܘܠܵܐ ܩܲܛܸܠܘ ܐܸܢܘܿܢ ܒ̈ܢܲܝ ܝܼܣܪܵܝܹܠ: ܡܸܛܠ ܕܝܼܡܵܘ ܠܗܘܿܢ ܪܵܘ̱ܪ̈ܒ̣ܵܢܹܐ ܕܲܟ݂ܢܘܼܫܬܵܐ ܒܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܘܪܵܛܢܝܼܢ ܗ̄ܘ̣ܵܘ ܘܪܵܝܒ̇ܝܼܢ ܟܠܵܗ̇ ܟܢܘܼܫܬܵܐ ܥܲܠ ܪܵܘ̱ܪ̈ܒ̣ܵܢܹܐ.

¹⁹ܘܐܵܡ̇ܪܝܼܢ ܪܵܘ̱ܪ̈ܒ̣ܵܢܹܐ ܕܲܟ݂ܢܘܼܫܬܵܐ: ܚܢܲܢ ܝܼܡܲܝܢ ܠܗܘܿܢ ܒܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܡܸܟܹ̇ܝܠ ܠܵܐ ܡܸܫܟ̇ܚܝܼܢܲܢ ܠܡܲܗܵܪܘܼ ܐܸܢܘܿܢ.

²⁰ܗܵܟܲܢܵܐ ܕܹܝܢ ܥܵܒ̣ܕ̇ܝܼܢ ܚ̄ܢܲܢ ܘܡܲܚܹ̇ܝܢ ܚ̄ܢܲܢ ܠܗܘܿܢ: ܕܠܵܐ ܢܸܗܘܹܐ ܥܠܲܝܢ ܪܘܼܓ̣ܙܵܐ: ܡܸܛܠ ܡܵܘܡܵܬ̣ܵܐ ܕܝܼܡܲܢ ܠܗܘܿܢ.

²¹ܘܐܵܡ̇ܪܝܼܢ ܪܵܘ̱ܪ̈ܒ̣ܵܢܹܐ ܠܲܒ̣̈ܢܲܝ ܝܼܣܪܵܝܹܠ: ܢܸܚܘܿܢ: ܘܢܸܗܘܘܿܢ ܠܵܩܛܝܼܢ ܩܲܝܣܹ̈ܐ: ܘܡܵܠܹ̇ܝܢ ܡܲـ̈ـܝܵܐ ܠܟ݂ܠܵܗ̇ ܟܢܘܼܫܬܵܐ. ܘܲܗܘ̤ܵܘ ܠܵܩܛܲܝ̈ ܩܲܝܣܹ̈ܐ ܘܡܵܠܲܝ̈ ܡܲـ̈ـܝܵܐ ܠܲܟ݂ܢܘܼܫܬܹ̇ܗ ܕܡܵܪܝܵܐ ܥܕܲܡܵܐ ܠܝܵܘܡܵܢܵܐ: ܐܲܝܟܲܢܵܐ ܕܐܸܡܲܪܘ ܠܗܘܿܢ ܪܵܘ̱ܪ̈ܒ̣ܵܢܹܐ.

²²ܘܲܩ̣ܪܵܐ ܐܸܢܘܿܢ ܝܼܫܘܿܥ ܘܐܸܡܲܪ ܠܗܘܿܢ: ܠܡܵܢܵܐ ܢܟ݂ܠܬ̇ܘܿܢܵܢ ܘܐܸܡܲܪܬ̇ܘܿܢ ܠܲܢ ܕܛܵܒ̣ ܪܲܚܝܼܩܝܼܢ ܚ̄ܢܲܢ ܡܸܢܟ݂ܘܿܢ: ܘܗܵܐ ܠܘܵܬܲܢ ܥܵܡ̇ܪܝܼܢ ܐ̄ܢܬ̇ܘܿܢ.

²³ܡܸܟܹ̇ܝܠ ܬܸܗܘܘܿܢ ܠܝܼܛܝܼܢ: ܘܠܵܐ ܢܸܥܢܲܕ݂ ܡܸܢܟ݂ܘܿܢ ܓܲܒ̣ܪܵܐ ܠܵܩܹ̇ܛ ܩܲܝܣܹ̈ܐ ܘܡܵܠܹ̇ܐ ܡܲـ̈ـܝܵܐ ܠܒܲܝܬܹ̇ܗ ܕܐܲܠܵܗܵܐ.

²⁴ܘܲܥܢ̣ܵܘ ܘܐܸܡܲܪܘ ܠܝܼܫܘܿܥ: ܡܸܫܬ̇ܡܵܥܘܼ ܐܸܫܬ̇ܡܲܥ ܠܥܲܒ̣ܕܲܝ̈ܟ ܡܸܕܸ̇ܡ ܕܦܲܩܸܕ݂ ܡܵܪܝܵܐ ܐܲܠܵܗܵܟ݂ ܠܡܘܼܫܹܐ ܥܲܒ̣ܕܹ̇ܗ: ܠܡܸܬܲܠ ܠܟ݂ܘܿܢ ܟܠܵܗ̇ ܐܲܪܥܵܐ: ܘܲܠܡܵܘܒܵܕ݂ܘ ܠܟ݂ܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ ܡ̣ܢ ܩܕ݂ܵܡܲܝܟ̇ܘܿܢ. ܘܲܕ݂ܚܸܠ̄ܢ ܛܵܒ̣ ܡ̣ܢ ܢܲܦ̮ܫܲܢ ܘܲܥܒܲܕ̄ܢ ܗܵܟܲܢܵܐ.

²⁵ܗܵܫܵܐ ܗܵܐ ܒܐܝܼܕܲܝ̈ܟ ܚ̄ܢܲܢ. ܐܲܝܟܲܢܵܐ ܕܫܲܦܝܼܪ ܒܥܲܝܢܲܝ̈ܟ ܠܡܸܥܒܲܕ݂ ܠܲܢ: ܥܒܸܕ݂ ܠܲܢ.

²⁶ܘܲܥܒܲܕ݂ ܠܗܘܿܢ ܝܼܫܘܿܥ ܗܵܟܲܢܵܐ: ܘܦܲܨܝܼ ܐܸܢܘܿܢ ܡ̣ܢ ܐܝܼܕ݂ܵܐ ܕܝܼܣܪܵܝܹܠ: ܘܠܵܐ ܩܲܛܠܘ ܐܸܢܘܿܢ.

²⁷ܘܲܥܒܲܕ݂ ܐܸܢܘܿܢ ܝܼܫܘܿܥ ܒܹܗ ܒܝܵܘܡܵܐ ܗܵܘ̇: ܠܵܩܛܲܝ̈ ܩܲܝܣܹ̈ܐ: ܘܡܵܠܲܝ̈ ܡܲـ̈ـܝܵܐ ܠܲܟ݂ܢܘܼܫܬܵܐ ܘܲܠܡܲܕ݂ܒ̇ܚܹܗ ܕܡܵܪܝܵܐ ܥܕܲܡܵܐ ܠܝܵܘܡܵܢܵܐ: ܒܐܲܬ̣ܪܵܐ ܕܨܵܒܹ̇ܐ ܡܵܪܝܵܐ.