Read Aramaic Peshita 2 Thessalonians 1 Bible Online

2 Thessalonians 1 - Aramaic Peshita bible

2 Thessalonians 1

¹ܦܵܘܠܘܿܣ ܘܣܸܠܘܵܢܘܿܣ ܘܛܝܼܡܵܬܹܐܘܿܣ. ܠܥܹܕܬܵܐ ܕܬܸܣܵܠܘܿܢܝܼܩܵܝܹ̈ܐ ܕܒܲܐܠܵܗܵܐ ܐܲܒ݂ܘܼܢ ܘܡܵܪܲܢ ܝܼܫܘܿܥ ܡܫܝܼܚܵܐ.

²ܛܲܝܒܘܼܬ݂ܵܐ ܥܲܡܟ݂ܘܿܢ ܘܲܫܠܵܡܵܐ. ܡܸܢ ܐܲܠܵܗܵܐ ܐܲܒ݂ܘܼܢ ܘܡܸܢ ܡܵܪܲܢ ܝܼܫܘܿܥ ܡܫܝܼܚܵܐ.

³ܠܡܵܘܕܵܝܘܼ ܠܐܲܠܵܗܵܐ ܒܟ݂ܠܙܒܲܢ ܚܲܝܵܒ݂ܝܼܢ ܚ̄ܢܲܢ ܥܠܲܝܟܿܘܿܢ ܐܲܚܲܝ̈. ܐܲܝܟ݂ ܡܵܐ ܕܘܵܠܹܐ. ܕܝܲܬܝܼܪܵܐܝܼܬ݂ ܪܵܒ݂ܝܵܐ ܗܲܝܡܵܢܘܼܬ݂ܟ݂ܘܿܢ. ܘܣܵܓܹ̇ܐ ܚܘܼܒܵܐ ܕܟ݂ܠܟ݂ܘܿܢ. ܕܟ݂ܠܢܵܫ ܠܘܵܬ݂ ܚܲܒ݂ܪܹܗ.

⁴ܐܲܝܟ݂ ܕܐܵܦ ܚܢܲܢ ܒܟ݂ܘܿܢ ܢܸܗܘܹܐ ܡܸܫܬܲܒ݂ܗܪܝܼܢ ܚ̱ܢܲܢ ܒܥܹܕܬܵܐ ܕܐܲܠܵܗܵܐ. ܥܲܠ ܗܲܝܡܵܢܘܼܬ݂ܟ݂ܘܿܢ ܘܥܲܠ ܡܣܲܝܒܪܵܢܘܼܬ݂ܟ݂ܘܿܢ. ܕܲܒܟ݂ܠܵܗܿ ܪܕ݂ܝܼܦܘܼܬ݂ܟ݂ܘܿܢ ܘܐܘܼܠܨܵܢܲܝ̈ܟܿܘܿܢ ܕܲܡܣܲܝܒܪܝܼܢ ܐܢ̄ܬܘܿܢ.

⁵ܠܬܲܚܘܝܼܬ݂ܵܐ ܕܕ݂ܝܼܢܵܐ ܟܹܐܢܵܐ ܕܐܲܠܵܗܵܐ. ܕܬܸܫܘܘܿܢ ܠܡܲܠܟܿܘܼܬܹܗ ܗܵܝ ܕܥܲܠ ܐܲܦܹܝ̈ܗ݁ ܚܵܫܝܼܢ ܐ̄ܢܬܿܘܿܢ.

⁶ܘܐܸܢ ܟܹܐܢܵܐ ܩܕ݂ܵܡ ܐܲܠܵܗܵܐ. ܕܢܸܦܪܘܿܥ ܐܘܼܠܨܵܢܵܐ ܠܐܵܠܘܿܨܲܝ̈ܟ݁ܘܿܢ:

⁷ܘܲܠܟ݂ܘܿܢ ܕܡܸܬ݂ܐܠܨܝܼܢ ܐ̄ܢܬܿܘܢ ܢܲܚܹܐ ܥܲܡܲܢ. ܒܓܸܠܝܵܢܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܕܡܸܢ ܫܡܲܝܵܐ ܥܲܡ ܚܲܝܠܵܐ ܕܡܲܠܲܐܟ݂ܵܘ̈ܗܝ:

⁸ܡܵܐ ܕܥܵܒܹܿܕ݂ ܬܿܒܲܥܬ݂ܵܐ ܒܓ݂ܵܘܙܵܠܵܐ ܕܢܘܼܪܵܐ ܡܸܢ ܗܵܢܘܿܢ ܕܠܵܐ ܝܼܕ݂ܲܥܘ ܠܐܲܠܵܗܵܐ. ܘܡܸܢ ܗܵܢܘܿܢ ܕܠܵܐ ܐܸܫܬܵܘܕܲܥܘ ܠܲܣܒܲܪܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ.

⁹ܕܗܸܢܘܿܢ ܒܕ݂ܝܼܢܵܐ ܢܸܬ݂ܦܲܪܥܘܿܢ ܐܲܒ݂ܕ݂ܵܢܵܐ ܕܲܠܥܵܠܲܡ ܡܸܢ ܦܲܪܨܘܿܦܹܗ ܕܡܵܪܲܢ. ܘܡܸܢ ܫܘܼܒ݂ܚܵܐ ܕܚܲܝܠܹܗ.

¹⁰ܡܵܐ ܕܐܵܬܹܐ ܕܢܸܫܬܲܒܲܚ ܒܩܲܕ݁ܝܼܫܵܘ̈ܗܝ: ܘܲܢܚܵܘܹܐ ܬܸܕ݂ܡܪ̈ܵܬܹܗ ܒܲܡܗܲܝ̈ܡܢܵܘܗܝ: ܕܬܸܬ݂ܗܲܝܡܲܢ ܣܵܗܕܘܼܬܲܢ ܕܲܥܠܲܝܟܿܘܿܢ ܒܗܵܘ ܝܵܘܡܵܐ.

¹¹ܡܛܠ ܗܵܢܵܐ ܒܟ݂ܠܙܒܲܢ ܡܨܲܠܹܝܢ ܚ̄ܢܲܢ ܥܠܲܝܟܿܘܿܢ. ܕܢܲܫܘܹܝܟ݂ܘܿܢ ܐܲܠܵܗܵܐ ܠܩܸܪܝܵܢܟ݂ܘܿܢ. ܘܢܸܡܠܹܝܟ݂ܘܿܢ ܟܠܹܗ ܨܸܒ݂ܝܵܢܵܐ ܕܛܵܒ݂ܵܬ݂ܵܐ. ܘܲܥܒ݂ܵܕܹ̈ܐ ܕܗܲܝܡܵܢܘܼܬ݂ܵܐ ܒܚܲܝܠܵܐ.

¹²ܕܢܸܫܬܲܒܲܚ ܒܟ݂ܘܿܢ ܫܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܐܵܦ ܐܲܢ̄ܬܿܘܿܢ ܒܹܗ. ܐܲܝܟ݂ ܛܲܝܒܘܼܬܹܗ ܕܐܲܠܵܗܲܢ ܘܡܵܪܲܢ ܝܼܫܘܿܥ ܡܫܝܼܚܵܐ.