Read Aramaic Peshita 2 Thessalonians 2 Bible Online

2 Thessalonians 2 - Aramaic Peshita bible

2 Thessalonians 2

¹ܒܵܥܹܝܢ ܚ̄ܢܲܢ ܕܹܝܢ ܡܸܢܟ݂ܘܿܢ ܐܲܚܲܝ̈. ܥܲܠ ܡܹܐܬ݂ܝܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܘܥܲܠ ܟܢܘܼܫܝܵܐ ܕܝܼܠܲܢ ܕܲܠܘܵܬܹܗ.

²ܕܠܵܐ ܥܓܲܠ ܬܸܬܿܙܝܼܥܘܼܢ ܒܪܸ̈ܥܝܵܢܲܝܟܿܘܿܢ. ܘܠܵܐ ܬܸܬܵܘܗܘܼܢ ܠܵܐ ܡܸܢ ܡܸܠܬ݂ܵܐ. ܘܠܵܐ ܡܸܢ ܪܘܼܚܵܐ. ܘܠܵܐ ܡܸܢ ܐܸܓܲܪܬܵܐ ܕܐܲܝܟ݂ ܕܡܸܢ ܠܘܵܬܲܢ ܗ݇ܝܼ. ܕܗܵܐ ܠܲܡ ܡܲܛܝܼ ܝܵܘܡܹܗ ܕܡܵܪܲܢ.

³ܠܡܵܐ ܐ̄ܢܵܫ ܢܲܛܥܹܝܟ݂ܘܿܢ ܒܚܲܕ݂ ܡܸܢ ܐܸܣܟܹܡ̈ܝܼܢ. ܡܛܠ ܕܐܸܢ ܠܵܐ ܬܹܐܬܹܐ ܠܘܼܩܕ݂ܲܡ ܡܵܪܘܿܕ݂ܘܼܬ݂ܵܐ. ܘܢܸܬ݂ܓ݁ܠܹܐ ܒܲܪܢܵܫܵܐ ܕܲܚܛܝܼܬ݂ܵܐ ܒܪܹܗ ܕܐܲܒ݂ܕ݂ܵܢܵܐ.

⁴ܗܵܘ ܕܕܲܠܩܘܼܒ݂ܠܵܐ ܗ̄ܘܼ. ܘܡܸܫܬܲܥܠܹܐ ܥܲܠ ܟܠܡܲܢ ܕܡܸܬ݂ܩܪܹܐ ܐܲܠܵܗܿ ܘܕܸܚܠܵܐ. ܐܲܝܟܲܢܵܐ ܕܐܵܦ ܒܗܲܝܟܠܵܐ ܕܐܲܠܵܗܵܐ ܐܲܝܟ݂ ܐܲܠܵܗܵܐ ܢܸܬܸܒ݂. ܘܲܢܚܵܘܹܐ ܥܲܠ ܢܲܦ̮ܫܹܗ ܐܲܝܟ݂ ܕܐܲܠܵܗܵܐ ܗܘܼ.

⁵ܠܵܐ ܥܵܗܕܝܼܢ ܐ̄ܢܬܿܘܿܢ. ܕܟܲܕ݂ ܠܘܵܬ݂ܟ݂ܘܿܢ ܗ̄ܘܹܝܬ݂. ܗܵܠܹܝܢ ܐܸܡܪܹܬ݂ ܗ̄ܘܹܝܬ݂ ܠܟ݂ܘܿܢ.

⁶ܘܗܵܫܵܐ ܝܵܕ݂ܥܝܼܢ ܐܢ̄ܬܘܿܢ. ܡܵܐ ܕܐܲܚܝܼܕ݂ ܕܢܸܬ݂ܓ݁ܠܹܐ ܗܘܼ ܒܙܲܒ݂ܢܹܗ.

⁷ܐ̄ܪܵܙܵܐ ܓܹܝܪ ܕܥܵܘܠܵܐ ܡܸܢ ܟܲܕܘܼ ܫܲܪܝܼ ܠܡܸܬ݂ܚܲܦܵܛܘܼ. ܒܲܠܚܘܿܕ݂ ܐܸܢ ܗܵܘ ܡܵܐ ܕܗܵܫܵܐ ܐܲܚܝܼܕ݂ ܢܸܫܬܿܩܸܠ ܡܸܢ ܡܨܲܥܬ݂ܵܐ.

⁸ܘܗܵܝܕܹܝܢ ܢܸܬ݂ܓ݁ܠܹܐ ܥܵܘܠܵܐ. ܗܵܘ ܕܡܵܪܲܢ ܝܼܫܘܿܥ ܢܣܝܼܦܝܼܘܗܝ ܒܪܘܼܚ ܦܘܼܡܹܗ. ܘܲܢܒܲܛܠܝܼܘܗܝ ܒܓܸܠܝܵܢܵܐ ܕܡܹܐܬ݂ܝܼܬܹܗ.

⁹ܡܹܐܬ݂ܝܼܬܹܗ ܓܹܝܪ ܕܗܵܘ ܒܡܲܥܒܕ݂ܵܢܘܼܬ݂ܵܐ ܗ݇ܝܼ ܕܣܵܛܵܢܵܐ. ܒܟ݂ܠ ܚܹܝܠ. ܘܐܵܬ݂̈ܘܵܬ݂ܵܐ. ܘܬܸܕ݂ܡܪ̈ܵܬ݂ܵܐ ܕܲܓ̈ܵܠܵܬ݂ܵܐ.

¹⁰ܘܲܒܟ݂ܠܵܗܿ ܛܘܼܥܝܲܝ ܕܥܵܘܠܵܐ ܕܗܵܘܝܵܐ ܒܐܲܒ݁ܝܼܕܹ̈ܐ: ܥܲܠ ܕܠܵܐ ܩܲܒܸܠܘ ܚܘܼܒܵܐ ܕܩܘܼܫܬܵܐ ܕܒܹܗ ܢܸܚܘܿܢ.

¹¹ܡܛܠ ܗܵܢܵܐ ܢܫܲܕܲܪ ܠܗܘܿܢ ܐܲܠܵܗܵܐ ܡܲܥܒܕ݂ܵܢܘܼܬ݂ܵܐ ܕܛܘܼܥܝܲܝ. ܕܲܢܗܲܝܡܢܘܼܢ ܠܫܘܼܩܪܵܐ.

¹²ܘܢܸܬ݁ܬ݁ܕ݂ܝܼܢܘܼܢ ܟܠܗܘܿܢ ܐܲܝܠܹܝܢ ܕܠܵܐ ܗܲܝܡܸܢܘ ܒܩܘܼܫܬܵܐ. ܐܸܠܵܐ ܐܸܨܛܒ݂ܝܼܘ ܒܥܵܘܠܵܐ.

¹³ܚܢܲܢ ܕܹܝܢ ܚܲܝܵܒ݂ܝܼܢ ܚ̄ܢܲܢ ܠܡܵܘܕܵܝܘܼ ܠܐܲܠܵܗܵܐ ܒܟ݂ܠܙܒܲܢ: ܥܲܠ ܐܲܦܲܝ̈ܟܿܘܿܢ ܐܲܚܲܝ̈ܢ ܚܲܒܝܼܒ݂ܵܘ̈ܗܝ ܕܡܵܪܲܢ. ܕܲܓ݂ܒ݂ܵܟ݂ܘܿܢ ܐܲܠܵܗܵܐ ܡܸܢ ܪܹܫܝܼܬ݂ܵܐ ܠܚܲܝܹ̈ܐ: ܒܩܲܕ݁ܝܼܫܘܼܬ݂ܵܐ ܕܪܘܼܚܵܐ ܘܲܒ݂ܗܲܝܡܵܢܘܼܬ݂ܵܐ ܕܲܫܪܵܪܵܐ.

¹⁴ܠܗܵܠܹܝܢ ܗܘܼ ܓܹܝܪ ܩܪܵܟ݂ܘܿܢ ܒܲܡܣܲܒܪܵܢܘܼܬ݂ܵܐ ܕܝܼܠܲܢ. ܕܬܸܗܘܘܿܢ ܬܸܫܒܿܘܿܚܬܵܐ ܠܡܵܪܲܢ ܝܼܫܘܿܥ ܡܫܝܼܚܵܐ.

¹⁵ܡܸܟܹܝܠ ܐܲܚܲܝ̈ ܐܸܬ݂ܩܲܝܲܡܘ ܘܚܲܡܣܸܢܘ ܒܦܘܼܩܕܵܢܹ̈ܐ ܕܝܼܠܸܦܬܿܘܿܢ. ܐܸܢ ܒܡܸܠܬ݂ܵܐ ܘܐܸܢ ܒܐܸܓܲܪܬܵܐ ܕܝܼܠܲܢ.

¹⁶ܗܘܼ ܕܹܝܢ ܡܵܪܲܢ ܝܼܫܘܿܥ ܡܫܝܼܚܵܐ ܘܐܲܠܵܗܵܐ ܐܲܒ݂ܘܼܢ. ܗܵܘ ܕܐܲܚܒܲܢ ܘܝܲܗ̄ܒ݂ ܠܲܢ ܒܘܼܝܵܐܵܐ ܕܲܠܥܵܠܲܡ. ܘܣܲܒ݂ܪܵܐ ܛܵܒ݂ܵܐ ܒܛܲܝܒܘܼܬܹܗ.

¹⁷ܢܒܲܝܲܐ ܠܸܒܵܘܵܬ݂ܟ݂̈ܘܿܢ. ܘܲܢܩܲܝܸܡ ܒܟ݂ܠ ܡܸܠܹ̈ܐ. ܘܲܒܟ݂ܠ ܥܒ݂ܵܕ݂ ܛܵܒ݂.