Read Aramaic Peshita 2 Timothy 3 Bible Online

2 Timothy 3 - Aramaic Peshita bible

2 Timothy 3

¹ܗܵܕܹܐ ܕܹܝܢ ܗܘܲܝܬܿ ܝܵܕ݂ܲܥ. ܕܲܒ݂ܝܵܘ̈ܡܵܬ݂ܵܐ ܐ̄ܚܪ̈ܵܝܹܐ ܢܹܐܬ݂ܘܿܢ ܙܲܒ݂ܢܹ̈ܐ ܩ̈ܫܲܝܵܐ:

²ܘܢܸܗܘܘܿܢ ܒܢܲܝ̈ܢܵܫܵܐ ܪ̈ܵܚܡܲܝ ܢܲܦ̮ܫܗܘܿܢ. ܘܪ̈ܵܚܡܲܝ ܟܸܣܦܵܐ. ܫܲܒ݂ܗܪ̈ܵܢܹܐ. ܪ̈ܵܡܹܐ. ܡܓܲܕܦܵܢܹ̈ܐ. ܕܲܠܐ̄ܢܵܫܲܝ̈ܗܘܿܢ ܠܵܐ ܡܸܬܿܛܦܝܼܣܝܼܢ. ܟܵܦܪ̈ܲܝ ܒܛܲܝܒܘܼܬ݂ܵܐ. ܪ̈ܲܫܝܼܥܹܐ.

³ܐܵܟ݂ܠܲܝ̈ ܩܲܪ̈ܨܹܐ. ܡܫܲܥܒܕ݂ܲܝ̈ ܠܪܸܓ݁ܬ݂ܵܐ. ܒܲܥܪܝܼܪ̈ܵܝܹܐ. ܣܵܢܝܲܝ̈ ܛܵܒ݂ܵܬ݂ܵܐ.

⁴ܡܲܫܠܡܵܢܹ̈ܐ. ܡܣܲܪ̈ܗܒܹܐ. ܚܬ݂ܝܼܪܹ̈ܐ. ܪ̈ܵܚܡܲܝ ܪ̈ܓ݂ܝܼܓ݂ܵܬ݂ܵܐ ܛܵܒ݂ ܡܸܢ ܚܘܼܒܹܗ ܕܐܲܠܵܗܵܐ.

⁵ܕܐܝܼܬ݂ ܠܗܘܿܢ ܐܸܣܟܹܡܵܐ ܕܕ݂ܸܚܠܲܬ݂ ܐܲܠܵܗܵܐ ܘܡܸܢ ܚܲܝܠܹܗ ܪܲܚܝܼܩܝܼܢ. ܐܲܝܠܹܝܢ ܕܗܵܟܲܢܵܐ ܐܸܢܘܿܢ. ܕܚܘܿܩ ܐܸܢܘܿܢ ܡܸܢܵܟ݂.

⁶ܡܸܢܗܘܿܢ ܐܸܢܘܿܢ ܓܹܝܪ. ܗܵܠܹܝܢ ܕܲܡܚܲܠܕ݂ܝܼܢ ܒܹܝܬ݂ ܒܵܬܹ̈ܐ: ܘܫܵܒܹܝܢ ܢܸܫܹ̈ܐ ܕܲܛܡܝܼܪ̈ܵܢ ܒܲܚܛܵܗܹ̈ܐ ܘܡܸܬܿܕܲܒ݂ܪ̈ܵܢ ܠܲܪ̈ܓ݂ܝܼܓ݂ܵܬ݂ܵܐ ܡܫܲܚ̈ܠܦܵܬ݂ܵܐ:

⁷ܕܲܒ݂ܟ݂ܠܙܒܲܢ ܝܵܠ̈ܦܵܢ ܘܡܸܡܬ݂ܘܿܡ ܠܝܼܕ݂ܲܥܬ݂ܵܐ ܕܲܫܪܵܪܵܐ ܠܡܹܐܬ݂ܵܐ ܠܵܐ ܡܸܫ̈ܟ݁ܚܵܢ.

⁸ܐܲܝܟܲܢܵܐ ܕܹܝܢ ܕܝܵܢܹܣ ܘܝܲܡܒܪܹܣ ܩܵܡܘ ܠܘܼܩܒܲܠ ܡܘܼܫܹܐ. ܗܵܟܲܢܵܐ ܐܵܦ ܗܸܢܘܿܢ ܩܵܝܡܝܼܢ ܠܘܼܩܒܲܠ ܫܪܵܪܵܐ. ܐ̄ܢܵܫܵܐ ܕܲܡܚܲܒܲܠ ܪܸܥܝܵܢܗܘܿܢ ܘܲܣܠܹܝܢ ܡܸܢ ܗܲܝܡܵܢܘܼܬ݂ܵܐ.

⁹ܐܸܠܵܐ ܠܵܐ ܢܹܐܬ݂ܘܿܢ ܠܲܩܕ݂ܵܡܲܝܗܘܿܢ. ܫܵܛܝܘܼܬ݂ܗܘܿܢ ܓܹܝܪ ܡܸܬ݂ܝܲܕ݂ܥܵܐ ܗ݇ܝܼ ܠܟ݂ܠܢܵܫ. ܐܲܝܟܲܢܵܐ ܕܐܵܦ ܕܗܵܢܘܿܢ ܐܸܬ݂ܝܲܕ݂ܥܲܬ݂.

¹⁰ܐܲܢ̄ܬܿ ܕܹܝܢ ܐܸܬܲܝܬܿ ܒܵܬܲܪ ܝܘܼܠܦܵܢܝ. ܘܒܵܬܲܪ ܕܘܒܵܪ̈ܲܝ. ܘܒܵܬܲܪ ܨܸܒ݂ܝܵܢܝ. ܘܒܵܬܲܪ ܗܲܝܡܵܢܘܼܬ݂ܝ. ܘܒܵܬܲܪ ܢܲܓ݁ܝܼܪܘܼܬ݂ ܪܘܼܚܝ. ܘܒܵܬܲܪ ܚܘܼܒܝ. ܘܒܵܬܲܪ ܡܣܲܝܒܪܵܢܘܼܬ݂ܝ.

¹¹ܘܒܵܬܲܪ ܪܕ݂ܝܼܦܘܼܬ݂ܝ ܘܒܵܬܲܪ ܚܲܫܲܝ̈. ܘܝܵܕ݂ܲܥ ܐܲܢ̄ܬܿ. ܐܲܝܠܹܝܢ ܣܲܝܒܪܹܬ݂ ܒܐܲܢܛܝܵܟ݂ܝܼܵܐ. ܘܒ݂ܐܝܼܩܵܢܘܿܢ. ܘܲܒ݂ܠܘܼܣܛܪܵܐ. ܐܲܝܕ݂ܵܐ ܪܕ݂ܝܼܦܘܼܬ݂ܵܐ ܣܲܝܒܪܹܬ݂. ܘܡܸܢ ܟܠܗܹܝܢ ܦܲܨܝܲܢܝ ܡܵܪܝ.

¹²ܘܟ݂ܠܗܘܿܢ ܕܹܝܢ ܐܲܝܠܹܝܢ ܕܨܵܒܹܝܢ ܒܕ݂ܸܚܠܲܬ݂ ܐܲܠܵܗܵܐ ܕܢܸܚܘܿܢ ܒܝܼܫܘܿܥ ܡܫܝܼܚܵܐ. ܡܸܬ݂ܪܲܕ݂ܦܝܼܢ.

¹³ܒܢܲܝ̈ܢܵܫܵܐ ܕܹܝܢ ܒܝܼܫܹ̈ܐ ܘܡܲܛܥܝܵܢܹ̈ܐ ܢܵܘܣܦܘܼܢ ܥܲܠ ܒܝܼܫܘܼܬ݂ܗܘܿܢ ܟܲܕ݂ ܛܵܥܹܝܢ ܘܡܲܛܥܹܝܢ.

¹⁴ܐܲܢ̄ܬܿ ܕܹܝܢ ܩܵܘܵܐ ܒܐܲܝܠܹܝܢ ܕܝܼܠܸܦܬܿ ܘܐܸܫܬܲܪܲܪܬܿ. ܝܵܕ݂ܲܥ ܐܲܢ̄ܬܿ ܓܹܝܪ ܡܸܢ ܡܲܢܘܼ ܝܼܠܸܦܬܿ.

¹⁵ܘܲܕ݂ܡܸܢ ܛܲܠܝܘܼܬ݂ܵܟ݂ ܣܸܦܪܹ̈ܐ ܩܲܕ݁ܝܼܫܹ̈ܐ ܝܲܠܝܼܦ ܐܲܢ̄ܬܿ. ܕܡܸܫܟܿܚܝܼܢ ܕܲܢܚܲܟܡܘܼܢܵܟ݂ ܠܚܲܝܹ̈ܐ ܒܗܲܝܡܵܢܘܼܬ݂ܵܐ ܕܝܼܫܘܿܥ ܡܫܝܼܚܵܐ.

¹⁶ܟܠ ܟܬ݂ܵܒ݂ ܕܲܒ݂ܪܘܼܚܵܐ ܐܸܬ݂ܟܬܸܒ݂. ܡܵܘܬܿܪܵܢܵܐ ܗܘܼ ܠܝܘܼܠܦܵܢܵܐ. ܘܲܠܟ݂ܘܼܘܵܢܵܐ. ܘܲܠܬ݂ܘܼܪܵܨܵܐ. ܘܲܠܡܲܪܕܘܼܬ݂ܵܐ ܕܲܒ݂ܟܹܐܢܘܼܬ݂ܵܐ.

¹⁷ܕܢܸܗܘܹܐ ܓܡܝܼܪ ܒܲܪܢܵܫܵܐ ܕܐܲܠܵܗܵܐ ܘܲܠܟ݂ܠ ܥܒ݂ܵܕ݂ ܛܵܒ݂ ܘܲܡܫܲܠܡܵܢ.