Read Aramaic Peshita 2 Timothy 4 Bible Online

2 Timothy 4 - Aramaic Peshita bible

2 Timothy 4

¹ܡܣܲܗܸܕ݂ ܐ̄ܢܵܐ ܠܵܟ݂ ܩܕ݂ܵܡ ܐܲܠܵܗܵܐ ܘܡܵܪܲܢ ܝܼܫܘܿܥ ܡܫܝܼܚܵܐ ܗܵܘ ܕܲܥܬ݂ܝܼܕ݂ ܠܲܡܕ݂ܵܢ ܚܲܝܹ̈ܐ ܘܡܝܼܬܹ̈ܐ ܒܓܸܠܝܵܢܵܐ ܕܡܲܠܟܘܼܬܹܗ.

²ܐܲܟ݂ܪܸܙ ܡܸܠܬ݂ܵܐ ܘܩܘܼܡ ܒܲܚܦܝܼܛܘܼܬ݂ܵܐ ܒܙܲܒ݂ܢܵܐ ܘܲܕ݂ܠܵܐ ܙܲܒ݂ܢܵܐ. ܐܲܟܸܣ ܘܟ݂ܵܘܸܢ ܒܟ݂ܠܵܗܿ ܡܲܓ݁ܪܲܬ݂ ܪܘܼܚܵܐ ܘܝܘܼܠܦܵܢܵܐ.

³ܢܸܗܘܹܐ ܓܹܝܪ ܙܲܒ݂ܢܵܐ. ܕܲܠܝܘܼܠܦܵܢܵܐ ܚܠܝܼܡܵܐ ܠܵܐ ܢܸܫܬܲܡܥܘܼܢ. ܐܸܠܵܐ ܐܲܝܟ݂ ܪ̈ܓ݂ܝܼܓ݂ܵܬ݂ܗܘܿܢ ܢܲܣܓ݁ܘܿܢ ܠܢܲܦ̮ܫܗܘܿܢ ܡܲܠܦܵܢܹ̈ܐ ܒܚܘܼܬ݂ܚܵܬ݂ܵܐ ܕܡܲܫܡܲܥܬ݂ܗܘܿܢ.

⁴ܘܡܸܢ ܫܪܵܪܵܐ ܢܲܗܦܟ݂ܘܿܢ ܐܸܕ݂ܢܗܘܿܢ. ܠܫܘܿܥ̈ܝܵܬ݂ܵܐ ܕܹܝܢ ܢܸܣܛܘܿܢ.

⁵ܐܲܢ̄ܬܿ ܕܹܝܢ ܗܘܲܝܬܿ ܥܝܼܪ ܒܟ݂ܠܡܸܕ݂ܡ. ܘܣܲܝܒܲܪ ܒ̈ܝܼܫܵܬ݂ܵܐ. ܘܲܥܒ݂ܵܕ݂ܵܐ ܥܒܸܕ݂ ܕܲܡܣܲܒܪܵܢܵܐ. ܘܬܸܫܡܸܫܬܵܟ݂ ܫܲܠܸܡ.

⁶ܐܸܢܵܐ ܓܹܝܪ ܡܸܟܹܝܠ ܡܸܬ݂ܢܲܩܹܐ ܐ̄ܢܵܐ. ܘܙܲܒ݂ܢܵܐ ܕܐܸܫܬ݁ܪܹܐ. ܡܛܵܐ.

⁷ܐܵܓ݂ܘܿܢܵܐ ܫܲܦܝܼܪܵܐ ܐܸܬ݂ܟܲܬܿܫܹܬ݂. ܘܪܲܗܛܝ ܫܲܠܡܹܬ݂. ܘܗܲܝܡܵܢܘܼܬ݂ܝ ܢܸܛܪܹܬ݂.

⁸ܘܡܸܢ ܗܵܫܵܐ ܢܛܝܼܪ ܠܝܼ ܟܠܝܼܠܵܐ ܕܟܹܐܢܘܼܬ݂ܵܐ. ܕܢܸܦܪܥܝܼܘܗܝ ܠܝܼ ܡܵܪܝ ܒܝܵܘܡܵܐ ܗܵܘ ܕܗܘܸܝܘܼ ܕܲܝܵܢܵܐ ܟܹܐܢܵܐ. ܠܵܐ ܕܹܝܢ ܒܲܠܚܘܿܕ݂ ܠܝܼ. ܐܸܠܵܐ ܐܵܦ ܠܐܲܝܠܹܝܢ ܕܐܲܚܸܒ݂ܘ ܠܓܸܠܝܵܢܹܗ.

⁹ܢܸܬ݂ܒܛܸܠ ܠܵܟ݂ ܕܬܹܐܬܹܐ ܠܘܵܬ݂ܝ ܒܲܥܓܲܠ.

¹⁰ܕܹܐܡܵܐ ܓܹܝܪ ܫܲܒ݂ܩܲܢܝ. ܘܐܲܚܸܒ݂ ܥܵܠܡܵܐ ܗܵܢܵܐ. ܘܐܸܙܲܠ ܠܹܗ ܠܬܸܣܵܠܘܿܢܝܼܩܹܐ. ܩܪܝܼܣܦܘܿܣ ܠܓ݂ܵܠܵܛܝܼܵܐ. ܛܸܛܘܿܣ ܠܕ݂ܲܠܡܵܛܝܼܵܐ.

¹¹ܠܘܼܩܵܐ ܗܘܼ ܒܲܠܚܘܿܕ݂ܘܗܝ ܥܲܡܝ. ܠܡܲܪܩܘܿܣ ܕܒܲܪ ܘܐܲܝܬܵܝܗܝ ܥܲܡܵܟ݂. ܥܵܗܹܢ ܠܝܼ ܓܹܝܪ ܠܬܸܫܡܸܫܬܵܐ.

¹²ܠܛܘܼܟ݂ܝܼܩܘܿܣ ܕܹܝܢ ܫܲܕܪܹܬ݂ ܠܐܲܦܸܣܘܿܣ.

¹³ܒܹܝܬ݂ ܟܬ݂ܵܒܹ̈ܐ ܕܹܝܢ ܕܫܸܒ݂ܩܹܬ݂ ܒܲܛܪܘܿܐܘܿܣ ܠܘܵܬ݂ ܩܲܪܦܘܿܣ. ܡܵܐ ܕܐܵܬܹܐ ܐܲܢ̄ܬܿ ܐܲܝܬܵܝܗܝ. ܘܲܟ݂ܬ݂ܵܒܹ̈ܐ ܝܲܬܝܼܪܵܐܝܼܬ݂ ܟܸܪ̈ܟܹܐ ܕܲܡܓܲܠܹ̈ܐ.

¹⁴ܐܲܠܹܟ݂ܣܵܢܕܪܘܿܣ ܩܲܝܢܵܝܵܐ ܒ̈ܝܼܫܵܬ݂ܵܐ ܣܲܓܝܼ̈ܐܵܬ݂ܵܐ ܚܵܘܝܲܢܝ. ܦܵܪܲܥ ܠܹܗ ܡܵܪܲܢ ܐܲܝܟ݂ ܥܒ݂ܵܕ݂ܵܘ̈ܗܝ.

¹⁵ܐܵܦ ܐܲܢ̄ܬܿ ܕܹܝܢ ܐܸܙܕܲܗ̄ܪ ܡܸܢܹܗ. ܛܵܒ݂ ܓܹܝܪ ܙܩܝܼܦ ܠܘܼܩܒܲܠ ܡܸܠܲܝ̈ܢ.

¹⁶ܒܡܲܦܲܩ ܒܪܘܼܚܝ ܩܲܕ݂ܡܵܝܵܐ ܠܵܐ ܐ̄ܢܵܫ ܗܘܵܐ ܥܲܡܝ. ܐܸܠܵܐ ܟܠܗܘܿܢ ܫܲܒ݂ܩܘܼܢܝ. ܠܵܐ ܬܸܬ݂ܚܫܸܒ݂ ܠܗܘܿܢ ܗܵܕܹܐ.

¹⁷ܡܵܪܝ ܕܹܝܢ ܩܵܡ ܠܝܼ ܘܚܲܝܠܲܢܝ. ܕܒ݂ܝܼ ܟܵܪܘܿܙܘܼܬ݂ܵܐ ܬܸܫܬܲܠܲܡ ܘܢܸܫܡܥܘܼܢ ܥܲܡ̈ܡܹܐ ܟܠܗܘܿܢ. ܕܐܸܬ݂ܦܲܨܝܼܬ݂ ܡܸܢ ܦܘܼܡܵܐ ܕܐܲܪܝܵܐ.

¹⁸ܘܲܢܦܲܨܹܝܢܝ ܡܵܪܝ ܡܸܢ ܟܠ ܥܒ݂ܵܕ݂ ܒܝܼܫ. ܘܢܲܚܹܝܢܝ ܒܡܲܠܟܘܼܬܹܗ ܕܒܲܫܡܲܝܵܐ. ܕܠܹܗ ܫܘܼܒ݂ܚܵܐ ܠܥܵܠܲܡ ܥܵܠܡܝܼܢ. ܐܵܡܹܝܢ.

¹⁹ܗܲܒ݂ ܫܠܵܡܵܐ ܠܲܦܪܸܣܩܸܠܵܐ. ܘܠܵܐܩܸܠܘܿܣ. ܘܲܠܒܲܝܬܵܐ ܕܐܵܢܹܣܝܼܦܵܪܘܿܣ.

²⁰ܐܵܪܹܣܛܘܿܣ ܦܵܫ ܠܹܗ ܒܩܘܿܪܲܢܬ݁ܘܿܣ. ܛܪܘܿܦܝܼܡܘܿܣ ܕܹܝܢ ܫܒܲܩܬܹ݁ܗ ܟܲܕ݂ ܟܪܝܼܗ ܒܡܝܼܠܹܛܘܿܣ ܡܕ݂ܝܼܢ̄ܬܵܐ.

²¹ܢܸܬ݂ܒܛܸܠ ܠܵܟ݂ ܕܲܩܕ݂ܵܡ ܣܲܬ݂ܘܵܐ ܬܹܐܬܹܐ. ܫܵܐܹܠ ܒܲܫܠܵܡܵܟ݂ ܐܹܘܒ݂ܘܿܠܘܿܣ ܘܦܘܿܕܹܣ ܘܠܝܼܢܘܿܣ. ܘܲܩܠܵܘܕ݁ܝܼܵܐ ܘܐܲܚܹ̈ܐ ܟܠܗܘܿܢ.

²²ܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܪܘܼܚܵܟ݂. ܛܲܝܒܘܼܬ݂ܵܐ ܥܲܡܵܟ݂ (ܥܲܡܲܢ) ܐܵܡܹܝܢ.