Read Aramaic Peshita Titus 3 Bible Online

Titus 3 - Aramaic Peshita bible

Titus 3

¹ܘܲܗܘܲܝܬܿ ܡܥܲܗܸܕ݂ ܠܗܘܿܢ. ܕܲܠܪܹ̈ܫܹܐ ܘܲܠܫܲܠܝܼܛܵܢܹ̈ܐ ܢܸܫܬܲܡܥܘܼܢ ܘܢܸܫܬܲܥܒܕ݂ܘܼܢ. ܘܲܕ݂ܢܸܗܘܘܿܢ ܥܬ݂ܝܼܕ݂ܝܼܢ ܠܟ݂ܠ ܥܒ݂ܵܕ݂ ܛܵܒ݂.

²ܘܥܲܠ ܐ̄ܢܵܫ ܠܵܐ ܢܓܲܕܦܘܼܢ. ܘܠܵܐ ܢܸܗܘܘܿܢ ܡܸܬ݂ܟܲܬܿܫܝܼܢ. ܐܸܠܵܐ ܢܸܗܘܘܿܢ ܡܲܟܝܟ݂ܝܼܢ. ܘܲܒ݂ܟ݂ܠܡܸܕܸܡ ܢܚܵܘܘܿܢ ܒܲܣܝܼܡܘܬ݂ܗܘܿܢ ܠܘܵܬ݂ ܟܠܗܘܿܢ ܒܢܲܝ̈ܢܵܫܵܐ.

³ܐܵܦ ܚܢܲܢ ܓܹܝܪ ܡܸܢ ܩܕ݂ܝܼܡ ܕܠܵܐ ܪܸܥܝܵܢܵܐ ܗ̄ܘܲܝܢ ܘܲܕ݂ܠܵܐ ܦܝܵܣܵܐ. ܘܛܵܥܹܝܢ ܗ̄ܘܲܝܢ. ܘܲܡܫܲܥܒܕ݂ܝܼܢ ܗ̄ܘܲܝܢ ܠܲܪ̈ܓ݂ܝܼܓ݂ܵܬ݂ܵܐ ܡܫܲܚ̈ܠܦܵܬ݂ܵܐ. ܘܲܒ݂ܒ݂ܝܼܫܘܼܬ݂ܵܐ ܘܒܲܚܣܵܡܵܐ ܡܸܬ݂ܗܲܦܟ݂ܝܼܢ ܗ̄ܘܲܝܢ. ܘܲܣܢܝܼܐܝܼܢ ܗ̄ܘܲܝܢ. ܐܵܦ ܚܲܕ݂ ܠܚܲܕ݂ ܣܵܢܹܝܢ ܗ̄ܘܲܝܢ.

⁴ܟܲܕ݂ ܕܹܝܢ ܐܸܬ݂ܓܲܠܝܲܬ݂ ܒܲܣܝܼܡܘܼܬܹܗ ܘܲܡܪܲܚܡܵܢܘܼܬܹܗ ܕܐܲܠܵܗܵܐ ܡܲܚܝܵܢܲܢ.

⁵ܠܵܐ ܒܲܥܒ݂ܵܕܹ̈ܐ ܕܙܲܕܝܼܩܘܼܬ݂ܵܐ ܕܲܥܒܲܕ݂ܢ. ܐܸܠܵܐ ܒܪ̈ܲܚܡܵܘܗܝ ܕܝܼܠܹܗ. ܐܲܚܝܲܢ ܒܲܣܚܵܬ݂ܵܐ ܕܡܵܘܠܵܕ݂ܵܐ ܕܡܸܢ ܕܪܹܫ ܘܲܒ݂ܚܘܼܕܵܬ݂ܵܐ ܕܪܘܼܚܵܐ ܕܩܘܼܕ݂ܫܵܐ.

⁶ܗܵܝ ܕܐܸܫܲܕ݂ ܥܠܲܝܢ ܥܲܬܿܝܼܪܵܐܝܼܬ݂ ܒܝܲܕ݂ ܝܼܫܘܿܥ ܡܫܝܼܚܵܐ ܡܲܚܝܵܢܲܢ.

⁷ܕܲܒ݂ܛܲܝܒܘܼܬܹܗ ܢܸܙܕܲܕܲܩ. ܘܢܸܗܘܹܐ ܝܵܪ̈ܬܹܐ ܒܣܲܒ݂ܪܵܐ ܒܚܲܝܹ̈ܐ ܕܲܠܥܵܠܲܡ.

⁸ܡܗܲܝܡܢܵܐ ܗ݇ܝܼ ܡܸܠܬ݂ܵܐ. ܘܲܒ݂ܗܵܠܹܝܢ ܨܵܒܹܐ ܐ̄ܢܵܐ. ܕܐܵܦ ܐܲܢ̄ܬܿ ܗܘܲܝܬܿ ܡܫܲܪܲܪ ܠܗܘܿܢ. ܕܢܸܬ݂ܒܛܸܠ ܠܗܘܿܢ ܠܡܸܦܠܲܚ ܥܒ݂ܵܕܹ̈ܐ ܛܵܒܹ̈ܐ: ܐܲܝܠܹܝܢ ܕܗܲܝܡܸܢܘ ܒܐܲܠܵܗܵܐ. ܗܵܠܹܝܢ ܐܸܢܹܝܢ ܕܛܵܒ݂̈ܵܢ ܘܡܵܘܬܿܪ̈ܵܢ ܠܲܒܢܲܝ̈ܢܵܫܵܐ.

⁹ܡܸܢ ܒܥܵܬ݂ܵܐ ܕܹܝܢ ܣܟܲܠܬ݂ܵܐ. ܘܡܸܢ ܬܲܫܥ̈ܝܵܬ݂ܵܐ ܕܫܲܪ̈ܒܵܬ݂ܵܐ. ܘܡܸܢ ܚܸܪ̈ܝܵܢܹܐ. ܘܡܸܢ ܬܲܟ݂ܬܿܘܼܫܹ̈ܐ ܕܣܵܦܪܹ̈ܐ. ܐܸܫܬܲܐ̄ܠ. ܝܘܼܬ݂ܪܵܢ ܓܹܝܪ ܠܲܝܬܿ ܒܗܹܝܢ. ܘܲܣܪ̈ܝܼܩܵܢ ܐܸܢܹܝܢ.

¹⁰ܡܸܢ ܓܲܒ݂ܪܵܐ ܗܲܪܲܣܝܘܿܛܵܐ. ܡܸܢ ܒܵܬܲܪ ܚܕ݂ܵܐ ܙܒܲܢ ܘܬܲܪܬܹܝܢ ܕܡܲܪܬܹܐ ܐܲܢ̄ܬܿ ܠܹܗ. ܐܸܫܬܲܐ̄ܠ.

¹¹ܘܲܗܘܲܝܬܿ ܝܵܕ݂ܲܥ. ܕܡܲܢ ܕܗܵܟܲܢܵܐ ܗ̄ܘܼ ܡܥܲܩܲܡ ܗܘܼ ܘܚܵܛܹܐ. ܘܗܘܼ ܚܲܝܸܒ݂ ܢܲܦ̮ܫܹܗ.

¹²ܡܵܐ ܕܫܲܕܪܹܬ݂ ܠܘܵܬ݂ܵܟ݂ ܠܐܵܪܵܛܹܡܵܐ ܐܵܘ ܠܛܘܼܟ݂ܝܼܩܘܿܣ. ܢܸܬ݂ܒܛܸܠ ܠܵܟ݂. ܕܬܹܐܬܹܐ ܠܘܵܬ݂ܝ ܠܢܝܼܩܵܦܘܿܠܝܼܣ. ܬܲܡܵܢ ܓܹܝܪ ܣܵܡܹܬ݂ ܒܪܸܥܝܵܢܝ ܕܐܲܣܬܹܐ.

¹³ܥܲܠ ܙܹܐܢܵܐ ܕܹܝܢ ܣܵܦܪܵܐ ܘܥܲܠ ܐܵܦܲܠܘܿ ܢܸܬ݂ܒܛܸܠ ܠܵܟ݂. ܕܲܬ݂ܠܵܘܹܐ ܐܸܢܘܿܢ ܫܲܦܝܼܪ. ܕܡܸܕܸܡ ܠܵܐ ܢܸܚܣܲܪ ܠܗܘܿܢ.

¹⁴ܘܢܹܐܠܦܘܼܢ ܐܵܦ ܐܲܝܠܹܝܢ ܕܕ݂ܝܼܠܲܢ ܐܸܢܘܿܢ. ܕܢܸܗܘܘܿܢ ܦܵܠܚܝܼܢ ܥܒ݂ܵܕܹ̈ܐ ܛܵܒܹ̈ܐ ܒܨܸܒ݂̈ܘܵܬ݂ܵܐ ܕܐܵܠ̈ܨܵܢ: ܕܠܵܐ ܢܸܗܘܘܿܢ ܕܠܵܐ ܦܹܐܪܹ̈ܐ.

¹⁵ܫܵܐܠܝܼܢ ܒܲܫܠܵܡܵܟ݂ ܟܠܗܘܿܢ ܐܲܝܠܹܝܢ ܕܥܲܡܝ ܐܸܢܘܿܢ. ܫܲܐܠ ܒܲܫܠܵܡܵܐ ܕܟ݂ܠܗܘܿܢ ܐܲܝܠܹܝܢ ܕܪܵܚܡܝܼܢ ܠܲܢ ܒܗܲܝܡܵܢܘܼܬ݂ܵܐ. ܛܲܝܒܘܼܬ݂ܵܐ ܥܲܡ ܟܠܟ݂ܘܿܢ. ܐܵܡܹܝܢ.