Read Aramaic Peshita Hebrews 1 Bible Online

Hebrews 1 - Aramaic Peshita bible

Hebrews 1

¹ܒܟ݂ܠ ܡ̈ܢܵܘܵܢ ܘܲܒܟ݂ܠ ܕܸܡ̈ܘܵܢ ܡܲܠܸܠ ܐܲܠܵܗܵܐ ܥܲܡ ܐܲܒ݂ܵܗܲܝ̈ܢ ܒܲܢܒ݂ܝܹ̈ܐ ܡܸܢ ܩܕ݂ܝܼܡ.

²ܘܲܒ݂ܗܵܠܹܝܢ ܝܵܘ̈ܡܵܬ݂ܵܐ ܐ̄ܚܪ̈ܵܝܹܐ ܡܲܠܸܠ ܥܲܡܲܢ ܒܲܒ݂ܪܹܗ. ܕܠܹܗ ܣܵܡ ܝܵܪܬܵܐ ܕܟ݂ܠܡܸܕܸܡ. ܘܒܹܗ ܥܒܲܕ݂ ܠܥܵܠܡܹ̈ܐ.

³ܕܗܘܸܝܘܼ ܨܸܡܚܵܐ ܕܫܘܼܒ݂ܚܹܗ ܘܨܲܠܡܵܐ ܕܐܝܼܬ݂ܘܬܹܗ ܘܐܲܚܝܼܕ݂ ܟܠ ܒܚܲܝܠܵܐ ܕܡܸܠܬܹܗ. ܘܗܘܼ ܒܲܩܢܘܿܡܹܗ ܥܒܲܕ݂ ܕܘܼܟܵܝܵܐ ܕܲܚܛܵܗܲܝ̈ܢ ܘܝܼܬܸܒ݂ ܥܲܠ ܝܲܡܝܼܢܵܐ ܕܪܲܒܘܼܬ݂ܵܐ ܒܲܡܪ̈ܵܘܡܹܐ.

⁴ܘܗܵܢܵܐ ܟܠܹܗ ܝܼܪܸܒ݂ ܡܸܢ ܡܲܠܲܐܟܹ̈ܐ. ܐܲܝܟ݂ ܡܵܐ ܕܲܡܝܲܬܲܪ ܫܡܵܐ ܕܝܼܪܸܬ݂ ܡܸܢ ܕܝܼܠܗܘܿܢ.

⁵ܠܐܲܝܢܵܐ ܓܹܝܪ ܡܸܢ ܡܲܠܲܐܟܹ̈ܐ ܡܸܢ ܡܬ݂ܘܿܡ ܐܸܡܲܪ ܐܲܠܵܗܵܐ. ܕܒܹܪܝ ܐܲܢ̄ܬܿ. ܐܸܢܵܐ ܝܵܘܡܵܢܵܐ ܝܼܠܸܕܬܵܟ݂. ܘܬ݂ܘܼܒ݂ ܕܐܸܢܵܐ ܐܸܗܘܹܐ ܠܹܗ ܠܐܲܒ݂ܵܐ. ܘܗܘܼ ܢܸܗܘܹܐ ܠܝܼ ܠܲܒ݂ܪܵܐ.

⁶ܬܘܼܒ݂ ܕܹܝܢ ܐܸܡܲܬ݂ܝ ܕܡܲܥܸܠ ܒܘܼܟ݂ܪܵܐ ܠܥܵܠܡܵܐ. ܐܸܡܲܪ. ܕܠܹܗ ܢܸܣܓ݁ܕ݂ܘܼܢ ܟܠܗܘܿܢ ܡܲܠܲܐܟܹ̈ܐ ܕܐܲܠܵܗܵܐ.

⁷ܥܲܠ ܡܲܠܲܐܟܹ̈ܐ ܕܹܝܢ ܗܵܟܲܢܵܐ ܐܸܡܲܪ. ܕܲܥܒܲܕ݂ ܡܲܠܲܐܟ݂ܵܘ̈ܗܝ ܪܘܼܚ. ܘܲܡܫܲܡܫܵܢܵܘ̈ܗܝ ܢܘܼܪ ܝܵܩܕܵܐ.

⁸ܥܲܠ ܒܪܵܐ ܕܹܝܢ ܐܸܡܲܪ. ܕܟ݂ܘܼܪܣܝܵܟ݂ ܕܝܼܠܵܟ݂ ܐܲܠܵܗܵܐ ܠܥܵܠܲܡ ܥܵܠܡܝܼܢ. ܫܲܒ݂ܛܵܐ ܦܫܝܼܛܵܐ ܫܲܒ݂ܛܵܐ ܕܡܲܠܟܘܼܬ݂ܵܟ݂.

⁹ܪܚܸܡܬܿ ܟܹܐܢܘܼܬ݂ܵܐ ܘܲܣܢܲܝܬܿ ܥܵܘܠܵܐ. ܡܛܠ ܗܵܢܵܐ ܡܲܫܚܵܟ݂ ܐܲܠܵܗܵܐ ܐܲܠܵܗܵܟ݂. ܡܸܫܚܵܐ ܕܚܲܕ݂ܘܼܬ݂ܵܐ ܝܲܬܿܝܼܪ ܡܸܢ ܚܲܒ݂ܪ̈ܲܝܟ.

¹⁰ܘܬ݂ܘܼܒ݂ ܐܲܢ̄ܬܿ ܡܸܢ ܒܪܵܫܝܼܬ݂ ܣܵܡܬܿ ܫܲܬ݂ܐܣܹܝ̈ܗ݁ ܕܐܲܪܥܵܐ. ܘܲܫܡܲܝܵܐ ܥܒ݂ܵܕ݂ ܐܝܼܕ݂ܲܝ̈ܟ ܐܸܢܘܿܢ.

¹¹ܗܸܢܘܿܢ ܢܸܥܒܪܘܼܢ ܘܐܲܢ̄ܬܿ ܩܲܝܵܡ ܐܲܢ̄ܬܿ. ܘܟ݂ܠܗܘܿܢ ܐܲܝܟ݂ ܢܲܚܬܵܐ ܢܸܒ݂ܠܘܿܢ.

¹²ܘܐܲܝܟ݂ ܬܲܟ݂ܣܝܼܬ݂ܵܐ ܬܸܥܘܿܦ ܐܸܢܘܿܢ. ܗܸܢܘܿܢ ܢܸܬ݂ܚܲܠܦܘܼܢ. ܘܐܲܢ̄ܬܿ ܐܲܝܟ݂ ܕܐܝܼܬܲܝܟ ܐܲܢ̄ܬܿ. ܘܲܫܢܲܝ̈ܟ ܠܵܐ ܢܸܓ݂ܡܪ̈ܵܢ.

¹³ܠܡܲܢ ܕܹܝܢ ܡܸܢ ܡܲܠܲܐܟܹ̈ܐ ܡܸܢ ܡܬ݂ܘܿܡ ܐܸܡܲܪ. ܕܬܸܒ݂ ܡܸܢ ܝܲܡܝܼܢܝ. ܥܕ݂ܲܡܵܐ ܕܐܹܣܝܼܡ ܒܥܸܠܕܒ݂ܵܒܲܝ̈ܟ ܟܘܼܒ݂ܫܵܐ ܬܚܹܝܬ݂ ܪܸ̈ܓ݂ܠܲܝܟ.

¹⁴ܠܵܐ ܗܵܐ ܟܠܗܘܿܢ ܐܝܼܬܲܝܗܘܿܢ ܪܘܼܚܵܐ ܕܬܸܫܡܸܫܬܵܐ. ܕܡܸܫܬܲܕ݂ܪܝܼܢ ܒܬܸܫܡܸܫܬܵܐ ܡܛܠ ܐܲܝܠܹܝܢ ܕܲܥܬ݂ܝܼܕ݂ܝܼܢ ܠܡܹܐܪܲܬ݂ ܚܲܝܹ̈ܐ.