Read Aramaic Peshita Hebrews 10 Bible Online

Hebrews 10 - Aramaic Peshita bible

Hebrews 10

¹ܢܵܡܘܿܣܵܐ ܓܹܝܪ ܛܸܠܵܢܝܼܬ݂ܵܐ ܐܝܼܬ݂ ܗ̄ܘܵܐ ܒܹܗ ܕܛܵܒ݂ܵܬ݂ܵܐ ܕܲܥܬ݂ܝܼ̈ܕ݂ܵܢ. ܠܵܐ ܗ̄ܘܵܐ ܩܢܘܿܡܵܐ ܕܝܼܠܗܹܝܢ ܕܨܸܒ݂̈ܘܵܬ݂ܵܐ. ܡܛܠ ܗܵܢܵܐ ܟܲܕ݂ ܒܟ݂ܠ ܫܢܵܐ ܗܸܢܘܿܢ ܟܲܕ݂ ܗܸܢܘܿܢ ܕܸܒ݂ܚܹ̈ܐ ܡܸܬ݂ܩܲܪܒ݂ܝܼܢ ܗ̄ܘܼܵܘ. ܠܵܐ ܡܸܡܬ݂ܘܿܡ ܐܸܫܟܲܚܘ ܕܢܸܓ݂ܡܪܘܼܢ ܠܐܲܝܠܹܝܢ ܕܲܡܩܲܪܒ݂ܝܼܢ ܠܗܘܿܢ.

²ܐܸܠܘܼ ܓܹܝܪ ܓܵܡܪܝܼܢ ܗ̄ܘܼܵܘ. ܟܒܲܪ ܕܹܝܢ ܐܸܬ݁ܬ݁ܢܝܼܚܘ ܡܸܢ ܩܘܼܪ̈ܒܵܢܲܝܗܘܿܢ. ܡܛܠ ܕܠܵܐ ܡܸܟܹܝܠ ܛܵܪܝܵܐ ܗ̄ܘܵܬ݂ ܠܗܘܿܢ ܬܹܐܪܬܿܗܘܿܢ ܒܲܚܛܵܗܹ̈ܐ: ܠܐܲܝܠܹܝܢ ܕܲܚܕ݂ܵܐ ܙܒܲܢ ܐܸܬܿܕܲܟܝܼܘ ܠܗܘܿܢ.

³ܐܸܠܵܐ ܒܗܘܿܢ ܒܕ݂ܸܒ݂ܚܹ̈ܐ ܡܲܕ݂ܟ݂ܪܝܼܢ ܚܛܵܗܲܝ̈ܗܘܿܢ ܒܟ݂ܠ ܫܢܵܐ.

⁴ܠܵܐ ܓܹܝܪ ܡܸܫܟܲܚ ܕܡܵܐ ܕܬ݂ܵܘܪܹ̈ܐ ܘܲܕ݂ܨܸܦܪ̈ܵܝܹܐ ܠܲܡܕ݂ܲܟܵܝܘܼ ܚܛܵܗܹ̈ܐ.

⁵ܡܛܠ ܗܵܢܵܐ ܟܲܕ݂ ܥܵܐܹܠ ܠܥܵܠܡܵܐ ܐܸܡܲܪ. ܒܕ݂ܸܒ݂ܚܹ̈ܐ ܘܩܘܼܪ̈ܒܵܢܹܐ ܠܵܐ ܨܒܲܝܬܿ. ܦܲܓ݂ܪܵܐ ܕܹܝܢ ܐܲܠܒܸܫܬܵܢܝ.

⁶ܘܝܲܩܕܹ̈ܐ ܫܲܠܡܹ̈ܐ ܕܲܚܠܵܦ ܚܛܵܗܹ̈ܐ ܠܵܐ ܫܐܸܠܬܿ.

⁷ܗܵܝܕܹܝܢ ܐܸܡܪܹܬ݂. ܕܗܵܐ ܐܸܢܵܐ ܐܵܬܹܐ ܐ̄ܢܵܐ ܕܲܒ݂ܪܹܫ ܟܬ݂ܵܒܹ̈ܐ ܟܬ݂ܝܼܒ݂ ܥܠܲܝ. ܕܐܸܥܒܸܕ݂ ܨܸܒ݂ܝܵܢܵܟ݂ ܐܲܠܵܗܵܐ.

⁸ܡܸܢ ܠܥܸܠ ܐܸܡܲܪ. ܕܕ݂ܸܒ݂ܚܹ̈ܐ ܘܩܘܼܪ̈ܒܵܢܹܐ ܘܝܲܩܕܹ̈ܐ ܫܲܠܡܹ̈ܐ ܕܲܚܠܵܦ ܚܛܵܗܹ̈ܐ ܠܵܐ ܨܒܲܝܬܿ. ܗܵܢܘܿܢ ܕܡܸܬ݂ܩܲܪܒ݂ܝܼܢ ܗ̄ܘܼܵܘ ܒܢܵܡܘܿܣܵܐ.

⁹ܘܒ݂ܵܬ݂ܪܹܗ ܐܸܡܲܪ. ܕܗܵܐ ܐܵܬܹܐ ܐ̄ܢܵܐ. ܕܐܸܥܒܸܕ݂ ܨܸܒ݂ܝܵܢܵܟ݂ ܐܲܠܵܗܵܐ. ܒܗܵܕܹܐ ܒܲܛܸܠ ܠܩܲܕ݂ܡܵܝܬܵܐ. ܕܲܢܩܝܼܡ ܠܲܕܬܲܪܬܹܿܝܢ.

¹⁰ܒܗܵܢܵܐ ܓܹܝܪ ܨܸܒ݂ܝܵܢܹܗ ܐܸܬ݂ܩܲܕܲܫܢ ܒܩܘܼܪܒܵܢܵܐ ܕܦܲܓ݂ܪܹܗ ܕܝܼܫܘܿܥ ܡܫܝܼܚܵܐ ܕܲܚܕ݂ܵܐ ܙܒܲܢ.

¹¹ܟܠ ܪܲܒ ܟܘܼܡܪܹ̈ܐ ܓܹܝܪ ܕܩܵܐܹܡ ܗ̄ܘܵܐ ܘܲܡܫܲܡܸܫ ܟܠܝܘܿܡ. ܗܸܢܘܿܢ ܒܗܸܢܘܿܢ ܕܸܒ݂ܚܹ̈ܐ ܡܩܲܪܸܒ݂ ܗ̄ܘܵܐ. ܐܲܝܠܹܝܢ ܕܡܸܢ ܡܬ݂ܘܿܡ ܠܵܐ ܡܸܫܟܿܚܝܼܢ ܗ̄ܘܼܵܘ ܠܲܡܕ݂ܲܟܵܝܘܼ ܚܛܵܗܹ̈ܐ.

¹²ܗܵܢܵܐ ܕܹܝܢ ܚܲܕ݂ ܕܸܒ݂ܚܵܐ ܩܲܪܸܒ݂ ܚܠܵܦ ܚܛܵܗܹ̈ܐ. ܘܝܼܬܸܒ݂ ܥܲܠ ܝܲܡܝܼܢܵܐ ܕܐܲܠܵܗܵܐ ܠܥܵܠܲܡ.

¹³ܘܲܡܩܵܘܹܐ ܡܸܟܹܝܠ. ܥܕ݂ܲܡܵܐ ܕܢܸܬ݁ܬ݁ܣܝܼܡܘܼܢ ܒܥܸܠܕܒ݂ܵܒ݂ܵܘ̈ܗܝ ܟܘܼܒ݂ܫܵܐ ܬܚܹܝܬ݂ ܪܸ̈ܓ݂ܠܵܘܗܝ.

¹⁴ܒܚܲܕ݂ ܓܹܝܪ ܩܘܼܪܒܵܢܵܐ ܓܡܲܪ ܠܐܲܝܠܹܝܢ ܕܡܸܬ݂ܩܲܕܫܝܼܢ ܒܹܗ ܠܥܵܠܲܡ.

¹⁵ܣܵܗ̇ܕܵܐ ܠܲܢ ܕܹܝܢ ܐܵܦ ܪܘܼܚܵܐ ܕܩܘܼܕ݂ܫܵܐ ܕܐܸܡܪܲܬ̤.

¹⁶ܗܵܕܹܐ ܗ݇ܝܼ ܕܝܵܬܹܩܹܐ ܕܐܸܬܸܿܠ ܠܗܘܿܢ ܡܸܢ ܒܵܬܲܪ ܝܵܘ̈ܡܵܬ݂ܵܐ ܗܵܢܘܿܢ ܐܵܡܲܪ ܡܵܪܝܵܐ. ܐܸܬܿܠܝܼܘܗܝ ܠܢܵܡܘܿܣܝ ܒܡܲܕܥܲܝ̈ܗܘܿܢ. ܘܥܲܠ ܠܸܒܵܘܵܬ݂ܗ̈ܘܿܢ ܐܸܟ݂ܬܿܒ݂ܝܼܘܗܝ.

¹⁷ܘܥܵܘܠܗܘܿܢ ܘܲܚܛܵܗܲܝ̈ܗܘܿܢ ܠܵܐ ܐܸܬܿܕܟܲܪ ܠܗܘܿܢ.

¹⁸ܐܲܝܟܵܐ ܕܹܝܢ ܕܐܝܼܬ݂ ܫܘܼܒ݂ܩܵܢܵܐ ܕܲܚܛܵܗܹ̈ܐ. ܠܵܐ ܡܸܬ݂ܒܥܹܐ ܩܘܼܪܒܵܢܵܐ ܕܲܚܠܵܦ ܚܛܵܗܹ̈ܐ.

¹⁹ܐܝܼܬ݂ ܠܲܢ ܗܵܟܹܝܠ ܐܲܚܲܝ̈ ܓܲܠܝܘܼܬ݂ ܐܲܦܹ̈ܐ ܒܡܲܥܠܵܢܵܐ ܕܒܹܝܬ݂ ܩܘܼܕ݂ܫܵܐ ܒܲܕ݂ܡܹܗ ܕܝܼܫܘܿܥ.

²⁰ܘܐܘܼܪܚܵܐ ܕܚܲܝܹ̈ܐ ܕܚܲܕܸܬ݂ ܠܲܢ ܗܵܫܵܐ. ܒܐܲܦܲܝ̈ ܬܲܪܥܵܐ. ܕܐܝܼܬ݂ܵܘܗܝ ܒܸܣܪܹܗ.

²¹ܘܐܝܼܬ݂ ܠܲܢ ܟܘܼܡܪܵܐ ܪܲܒܵܐ ܥܲܠ ܒܲܝܬܹ݁ܗ ܕܐܲܠܵܗܵܐ.

²²ܢܸܩܪܘܿܒ݂ ܗܵܟܹܝܠ ܒܠܸܒܵܐ ܫܲܪܝܼܪܵܐ ܘܲܒ݂ܬ݂ܘܟ݂ܠܵܢܵܐ ܕܗܲܝܡܵܢܘܼܬ݂ܵܐ. ܟܲܕ݂ ܪܣܝܼܣܝܼܢ ܠܸܒ̈ܵܘܵܬܲܢ ܘܲܕ݂ܟܹܝܢ ܡܸܢ ܬܹܐܪܬܵܐ ܒܝܼܫܬܵܐ. ܘܡܲܣܚܲܝ ܦܲܓ݂ܪܲܢ ܒܡܲܝ̈ܵܐ ܕܟܲܝ̈ܵܐ.

²³ܘܲܢܚܲܡܣܸܢ ܒܬ݂ܵܘܕܝܼܬ݂ܵܐ ܕܣܲܒ݂ܪܲܢ ܘܠܵܐ ܢܸܨܛܠܹܐ. ܡܗܲܝܡܲܢ ܗܘܼ ܓܹܝܪ ܡܲܢ ܕܲܡܠܲܟ݂ ܠܲܢ.

²⁴ܘܲܢܚܘܼܪ ܚܲܕ݂ ܒܚܲܕ݂. ܒܓ݂ܘܼܪܵܓ݂ܵܐ ܕܚܘܼܒܵܐ ܘܕ݂ܲܥܒ݂ܵܕܹ̈ܐ ܛܵܒܹ̈ܐ.

²⁵ܘܠܵܐ ܢܸܗܘܹܐ ܫܵܒ݂ܩܝܼܢ ܟܢܘܼܫܝܲܢ. ܐܲܝܟ݂ ܕܐܝܼܬ݂ ܥܝܵܕ݂ܵܐ ܠܐ̄ܢܵܫ ܐ̄ܢܵܫ. ܐܸܠܵܐ ܒܥܵܘ ܚܲܕ݂ ܡܸܢ ܚܲܕ݂. ܝܲܬܝܼܪܵܐܝܼܬ݂ ܟܡܵܐ ܕܚܵܙܹܝܢ ܐ݇ܢܬܿܘܿܢ ܕܲܩܪܸܒ݂ ܝܵܘܡܵܐ ܗܵܘ.

²⁶ܐܸܢ ܓܹܝܪ ܒܨܸܒ݂ܝܵܢܹܗ ܢܸܚܛܹܐ ܐ̄ܢܵܫ ܡܸܢ ܒܵܬܲܪ ܕܩܲܒܸܠ ܝܼܕ݂ܲܥܬ݂ܵܐ ܕܲܫܪܵܪܵܐ. ܠܲܝܬܿ ܡܸܟܹܝܠ ܕܸܒ݂ܚܬ݂ܵܐ ܕܬܸܬ݂ܩܲܪܲܒ݂ ܚܠܵܦ ܚܛܵܗܹ̈ܐ.

²⁷ܐܸܠܵܐ ܥܬ݂ܝܼܕ݂ ܗܘܼ ܕܝܼܢܵܐ ܕܚܝܼܠܵܐ. ܘܲܛܢܵܢܵܐ ܕܢܘܼܪܵܐ ܕܐܵܟܹܠ ܠܲܒ݂ܥܸܠܕܒ݂ܵܒܹ̈ܐ.

²⁸ܐܸܢ ܓܹܝܪ ܐܲܝܢܵܐ ܕܲܥܒܲܪ ܥܲܠ ܢܵܡܘܿܣܵܐ ܕܡܘܼܫܹܐ ܥܲܠ ܦܘܼܡ ܬܪܹܝܢ ܘܲܬ݂ܠܵܬ݂ܵܐ ܣܵܗܕܝܼܢ ܕܠܵܐ ܪ̈ܲܚܡܝܼܢ ܡܵܐܹܬ݂.

²⁹ܟܡܵܐ ܣܵܒ݂ܪܝܼܢ ܐ̄ܢܬܘܿܢ ܝܲܬܝܼܪܵܐܝܼܬ݂ ܡܣܵܡ ܒܪܹܫܵܐ ܢܩܲܒܸܠ ܐܲܝܢܵܐ ܕܕ݂ܵܫܹܗ ܠܲܒ݂ܪܹܗ ܕܐܲܠܵܗܵܐ. ܘܲܚܫܲܒ݂ ܕܡܵܐ ܕܲܕ݂ܝܵܬܹܩܹܐ ܕܝܼܠܹܗ ܐܲܝܟ݂ ܕܟ݂ܠܢܵܫ ܕܒ݂ܵܗܿ ܐܸܬ݂ܩܲܕܲܫ. ܘܨܲܥܲܪ ܠܪܘܼܚܵܐ ܕܛܲܝܒܘܼܬ݂ܵܐ.

³⁰ܝܵܕ݂ܥܝܼܢ ܚ̄ܢܲܢ ܠܗܵܘ ܕܐܸܡܲܪ. ܕܕ݂ܝܼܠܝ ܗ̄ܝܼ ܬܿܒܲܥܬ݂ܵܐ ܘܐܸܢܵܐ ܐܸܦܪܘܿܥ. ܘܬ݂ܘܼܒ݂. ܕܲܢܕ݂ܘܼܢ ܡܵܪܝܵܐ ܠܥܲܡܹܗ.

³¹ܕܸܚܠܬ݂ܵܐ ܗ݇ܝܼ ܪܲܒܬ݂ܵܐ ܠܡܸܦܲܠ ܒܐܝܼܕ݂ܵܘ̈ܗܝ ܕܐܲܠܵܗܵܐ ܚܲܝܵܐ.

³²ܐܸܬܿܕܲܟ݂ܪܘ ܗܵܟܹܝܠ ܠܝܵܘ̈ܡܵܬ݂ܵܐ ܩܲܕ݂ܡܵܝܹ̈ܐ ܗܵܢܘܿܢ ܕܲܒ݂ܗܘܿܢ ܩܲܒܸܠܬܿܘܿܢ ܡܲܥܡܘܿܕ݂ܝܼܬ݂ܵܐ. ܘܐܵܓ݂ܘܿܢܵܐ ܪܲܒܵܐ ܣܲܝܒܲܪܬܿܘܿܢ ܕܚܲܫܹ̈ܐ ܒܚܸܣܕܵܐ ܘܒ݂ܐܘܼܠܨܵܢܹ̈ܐ:

³³ܘܕ݂ܲܗܘܲܝܬܿܘܿܢ ܚܸܙܘܵܢܹ̈ܐ. ܘܐܵܦ ܐܸܫܬܵܘܬܲܦܬܿܘܿܢ ܠܐ̄ܢܵܫܵܐ ܕܗܵܠܹܝܢ ܣܲܝܒܲܪܘ.

³⁴ܘܲܟ݂ܐܸܒ݂ ܠܟ݂ܘܿܢ ܥܲܠ ܐܲܝܠܹܝܢ ܕܐܲܣܝܼܪܝܼܢ. ܘܲܚܛܘܼܦܝܵܐ ܕܢܸܟ݂ܣܲܝ̈ܟ݁ܘܿܢ ܒܚܲܕ݂ܘܼܬ݂ܵܐ ܣܲܝܒܲܪܬܿܘܿܢ. ܡܛܠ ܕܝܵܕ݂ܥܝܼܢ ܐ̄ܢܬܘܿܢ ܕܐܝܼܬ݂ ܠܟ݂ܘܿܢ ܩܸܢܝܵܢܵܐ ܒܲܫܡܲܝܵܐ. ܕܲܡܝܲܬܲܪ ܗܘܼ ܘܠܵܐ ܥܵܒܲܪ.

³⁵ܠܵܐ ܗܵܟܹܝܠ ܬܵܘܒܕ݂ܘܼܢ ܓܲܠܝܘܼܬ݂ ܐܲܦܹ̈ܐ ܕܐܝܼܬ݂ ܠܟ݂ܘܿܢ ܕܲܥܬ݂ܝܼܕ݂ ܠܵܗܿ ܐܲܓ݂ܪܵܐ ܣܲܓܿܝܼܐܵܐ.

³⁶ܡܣܲܝܒܪܵܢܘܼܬ݂ܵܐ ܗ̄ܘܼ ܓܹܝܪ ܡܸܬ݂ܒܲܥܝܵܐ ܠܟ݂ܘܿܢ. ܕܬܸܥܒܕ݂ܘܼܢ ܨܸܒ݂ܝܵܢܵܐ ܕܐܲܠܵܗܵܐ ܘܬܸܣܒ݂ܘܼܢ ܡܘܼܠܟܵܢܵܐ.

³⁷ܡܛܠ ܕܩܲܠܝܼܠ ܗܘܼ ܙܲܒ݂ܢܵܐ ܘܛܵܒ݂ ܙܥܘܿܪ. ܕܢܹܐܬܹܐ ܗܵܘ ܕܐܵܬܹܐ ܘܠܵܐ ܢܵܘܚܲܪ.

³⁸ܟܹܐܢܵܐ ܕܹܝܢ ܡܸܢ ܗܲܝܡܵܢܘܼܬ݂ܵܐ ܕܝܼܠܝ ܢܸܚܹܐ. ܘܐܸܢ ܡܸܬ݂ܩܲܛܥܵܐ ܠܹܗ. ܠܵܐ ܨܵܒ݂ܝܵܐ ܒܹܗ ܢܲܦ̮ܫܝ.

³⁹ܚܢܲܢ ܕܹܝܢ ܠܵܐ ܗ̤ܘܲܝܢ ܕܩܘܼܛܵܥܵܐ ܕܡܵܘܒܠܵܐ ܠܐܲܒ݂ܕ݂ܵܢܵܐ. ܐܸܠܵܐ ܕܗܲܝܡܵܢܘܼܬ݂ܵܐ ܕܡܲܩܢܝܵܐ ܠܲܢ ܢܲܦ̮ܫܲܢ.