Read Aramaic Peshita Hebrews 13 Bible Online

Hebrews 13 - Aramaic Peshita bible

Hebrews 13

¹ܚܘܼܒܵܐ ܕܐܲܚܹ̈ܐ ܢܟܲܬܲܪ ܒܟ݂ܘܿܢ.

²ܘܪܸܚܡܬ݂ܵܐ ܕܐܲܟ݂ܣܢܵܝܹ̈ܐ ܠܵܐ ܬܸܛܥܘܿܢ. ܒܗܵܕܹܐ ܓܹܝܪ ܫܘܵܘ ܐ̄ܢܵܫܵܐ. ܕܟܲܕ݂ ܠܵܐ ܪܓ݂ܝܼܫܝܼܢ ܢܩܲܒܠܘܼܢ ܡܲܠܲܐܟܹ̈ܐ.

³ܥܗܲܕ݂ܘ ܠܐܲܝܠܹܝܢ ܕܐܲܣܝܼܪܝܼܢ ܐܲܝܟ݂ ܗܵܘ ܕܥܲܡܗܘܿܢ ܐܲܣܝܼܪܝܼܢ ܐܢ̄ܬܘܿܢ. ܐܸܬܿܕܲܟ݂ܪܘ ܠܐܲܝܠܹܝܢ ܕܐܲܠܝܼܨܝܼܢ ܐܲܝܟ݂ ܐ̄ܢܵܫܵܐ ܕܒܸܣܪܵܐ ܠܒ݂ܝܼܫܝܼܢ ܐܢ̄ܬܘܿܢ.

⁴ܡܝܲܩܲܪ ܗܘܼ ܙܘܼܘܵܓ݂ܵܐ ܒܟ݂ܠ. ܘܥܲܪܣܗܘܿܢ ܕܲܟ݂ܝܵܐ ܗܝܼ. ܠܙܲܢܵܝܹ̈ܐ ܕܹܝܢ ܘܲܠܓܲܝܵܪܹ̈ܐ ܕܵܐܹܢ ܐܲܠܵܗܵܐ.

⁵ܠܵܐ ܗܘܵܐ ܪܵܚܹܡ ܟܸܣܦܵܐ ܪܸܥܝܵܢܟ݂ܘܿܢ. ܐܸܠܵܐ ܢܸܣܦܲܩ ܠܟ݂ܘܿܢ ܡܸܕܸܡ ܕܐܝܼܬ݂ ܠܟ݂ܘܿܢ. ܗܘܼ ܓܹܝܪ ܡܵܪܝܵܐ ܐܸܡܲܪ. ܕܠܵܐ ܐܸܫܒܩܵܟ݂ ܘܠܵܐ ܐܲܪܦܹܐ ܒܵܟ݂ ܐܝܼ̈ܕ݂ܲܝܵܐ.

⁶ܘܐܝܼܬ݂ ܠܲܢ ܕܢܹܐܡܲܪ ܬܟ݂ܝܼܠܵܐܝܼܬ݂. ܡܵܪܝ ܡܥܲܕܪܵܢܝ ܠܵܐ ܐܸܕ݂ܚܲܠ. ܡܵܢܵܐ ܥܵܒܹܿܕ݂ ܠܝܼ ܒܲܪܢܵܫܵܐ.

⁷ܗܘܲܝܬܿܘܿܢ ܥܵܗܕܝܼܢ ܠܲܡܕ݂ܲܒܪ̈ܵܢܲܝܟܿܘܿܢ. ܐܲܝܠܹܝܢ ܕܡܲܠܸܠܘ ܥܲܡܟ݂ܘܿܢ ܡܸܠܬ݂ܵܐ ܕܐܲܠܵܗܵܐ. ܐܸܬ݂ܒܲܩܵܘ ܒܫܘܼܠܵܡܵܐ ܕܕ݂ܘܼܒܵܪ̈ܲܝܗܘܿܢ. ܘܡܲܪܵܘ ܒܗܲܝܡܵܢܘܼܬ݂ܗܘܿܢ.

⁸ܝܼܫܘܿܥ ܡܫܝܼܚܵܐ ܐܸܬ݂ܡܵܠܝ ܘܝܵܘܡܵܢܵܐ ܗܘܸܝܘܼ ܘܲܠܥܵܠܲܡ.

⁹ܠܝܘܼܠܦܵܢܹ̈ܐ ܢܘܼܟ݂ܪ̈ܵܝܹܐ ܘܲܡܫܲܚܠܦܹ̈ܐ ܠܵܐ ܬܸܬܿܕܲܒ݂ܪܘܼܢ. ܫܲܦܝܼܪ ܗܘܼ ܓܹܝܪ ܕܲܒ݂ܛܲܝܒܘܼܬ݂ܵܐ ܢܫܲܪܲܪ ܠܸܒ̈ܵܘܵܬܲܢ ܘܠܵܐ ܒܡܹܐܟ݂̈ܠܵܬ݂ܵܐ: ܡܛܠ ܕܠܵܐ ܐܸܬ݂ܥܲܕܲܪܘ ܐܲܝܠܹܝܢ ܕܗܲܠܸܟ݂ܘ ܒܗܹܝܢ.

¹⁰ܐܝܼܬ݂ ܠܲܢ ܕܹܝܢ ܡܲܕ݂ܒܚܵܐ ܕܠܵܐ ܫܲܠܝܼܛ ܠܡܹܐܟܲܠ ܡܸܢܹܗ ܠܗܵܢܘܿܢ ܕܲܒ݂ܡܲܫܟ݁ܢܵܐ ܡܫܲܡܫܝܼܢ.

¹¹ܚܲܝ̈ܘܵܬ݂ܵܐ ܓܹܝܪ ܗܵܠܹܝܢ ܕܡܲܥܸܠ ܗ̄ܘܵܐ ܕܸܡܗܹܝܢ ܪܲܒܟܘܼܡܪܹ̈ܐ ܠܒܹܝܬ݂ ܡܲܩܕܫܵܐ ܚܠܵܦ ܚܛܵܗܹ̈ܐ. ܒܸܣܪܗܹܝܢ ܝܵܩܹܕ݂ ܗ̄ܘܵܐ ܠܒܲܪ ܡܸܢ ܡܲܫܪܝܼܬ݂ܵܐ.

¹²ܡܛܠ ܗܵܢܵܐ ܐܵܦ ܝܼܫܘܿܥ ܕܲܢܩܲܕܸܫ ܠܥܲܡܹܗ ܒܲܕ݂ܡܹܗ. ܠܒܲܪ ܡܸܢ ܡܕ݂ܝܼܢ̄ܬܵܐ ܚܲܫ.

¹³ܘܐܵܦ ܚܢܲܢ ܗܵܟܹܝܠ ܢܸܦܘܿܩ ܠܘܵܬܹܗ ܠܒܲܪ ܡܸܢ ܡܲܫܪܝܼܬ݂ܵܐ. ܟܲܕ݂ ܫܩܝܼܠܝܼܢ ܚ̄ܢܲܢ ܚܸܣܕܹܗ.

¹⁴ܠܲܝܬܿ ܠܲܢ ܓܹܝܪ ܡܕ݂ܝܼܢ̄ܬܵܐ ܕܲܡܩܵܘܝܵܐ ܗܵܪܟܵܐ. ܐܸܠܵܐ ܠܐܲܝܕ݂ܵܐ ܕܲܥܬ݂ܝܼܕ݂ܵܐ ܡܣܲܟܹ݁ܝܢ ܚ݇ܢܲܢ.

¹⁵ܘܒ݂ܐܝܼܕ݂ܹܗ ܢܲܣܸܩ ܕܸܒ݂ܚܹ̈ܐ ܕܬܸܫܒܿܘܿܚܬܵܐ ܒܟ݂ܠܙܒܲܢ ܠܐܲܠܵܗܵܐ. ܕܐܝܼܬܹܝܗܿ ܦܹܐܪܹ̈ܐ ܕܣܸܦ̈ܘܵܬ݂ܵܐ ܕܡܵܘ̈ܕܝܵܢ ܠܲܫܡܹܗ.

¹⁶ܘܠܵܐ ܬܸܛܥܘܿܢ ܡܪܲܚܡܵܢܘܼܬ݂ܵܐ ܘܫܵܘܬܵܦܘܼܬ݂ܵܐ ܕܡܸܣܟܹܢܹ̈ܐ. ܒܗܵܠܹܝܢ ܓܹܝܪ ܕܸܒ݂ܚܹ̈ܐ ܫܵܦܲܪ ܐ̄ܢܵܫ ܠܐܲܠܵܗܵܐ.

¹⁷ܐܸܬܿܛܦܝܼܣܘ ܠܲܡܕ݂ܲܒܪ̈ܵܢܲܝܟܿܘܿܢ. ܘܐܸܫܬܲܡ̱ܥܘ ܠܗܘܿܢ. ܗܸܢܘܿܢ ܓܹܝܪ ܫܵܗܪܝܼܢ ܚܠܵܦ ܢܲܦ̮ܫܵܬ݂ܟ݂̈ܘܿܢ ܐܲܝܟ݂ ܐ̄ܢܵܫܵܐ ܕܝܵܗܒ݁ܝܼܢ ܚܘܼܫܒܵܢܟ݂ܘܿܢ. ܕܲܒ݂ܚܲܕ݂ܘܼܬ݂ܵܐ ܢܸܗܘܘܿܢ ܥܵܒ݂ܕ݂ܝܼܢ ܗܵܕܹܐ ܘܠܵܐ ܒܬܸܢ̈ܚܵܬ݂ܵܐ: ܡܛܠ ܕܠܵܐ ܦܵܩܚܵܐ ܠܟ݂ܘܿܢ.

¹⁸ܨܲܠܵܘ ܥܠܲܝܢ. ܬܟ݂ܝܼܠܝܼܢ ܚ̄ܢܲܢ ܓܹܝܪ ܕܬܹܐܪܬܵܐ ܛܵܒ݂ܬ݂ܵܐ ܐܝܼܬ݂ ܠܲܢ. ܕܲܒ݂ܟ݂ܠܡܸܕܸܡ ܨܵܒܹܝܢ ܚ̄ܢܲܢ ܕܫܲܦܝܼܪ ܢܸܬܿܕܲܒܲܪ.

¹⁹ܝܲܬܝܼܪܵܐܝܼܬ݂ ܒܵܥܹܐ ܐ̄ܢܵܐ ܡܸܢܟ݂ܘܿܢ. ܕܬܸܥܒܕ݂ܘܼܢ ܗܵܕܹܐ. ܕܒܲܥܓܲܠ ܐܸܬ݂ܦܲܢܹܐ ܠܟ݂ܘܿܢ.

²⁰ܐܲܠܵܗܵܐ ܕܹܝܢ ܕܲܫܠܵܡܵܐ ܗܵܘ ܕܐܲܣܸܩ ܡܸܢ ܒܹܝܬ݂ ܡܝܼܬܹ̈ܐ ܠܪܵܥܝܵܐ ܪܲܒܵܐ ܕܡܲܪܥܝܼܬ݂ܵܐ ܒܲܕ݂ܡܵܐ ܕܲܕ݂ܝܵܬܹܩܹܐ ܕܲܠܥܵܠܲܡ. ܕܐܝܼܬ݂ܵܘܗܝ ܝܼܫܘܿܥ ܡܫܝܼܚܵܐ ܡܵܪܲܢ.

²¹ܗܘܼ ܢܸܓ݂ܡܘܿܪܟ݂ܘܿܢ ܒܟ݂ܠ ܥܒ݂ܵܕ݂ ܛܵܒ݂. ܕܬܸܥܒܕ݂ܘܼܢ ܨܸܒ݂ܝܵܢܹܗ. ܘܗܘܼ ܢܸܣܥܘܿܪ ܒܲܢ ܡܸܕܸܡ ܕܫܲܦܝܼܪ ܩܕ݂ܵܡܵܘܗܝ ܒܝܲܕ݂ ܝܼܫܘܿܥ ܡܫܝܼܚܵܐ. ܕܠܹܗ ܫܘܼܒ݂ܚܵܐ ܠܥܵܠܲܡ ܥܵܠܡܝܼܢ. ܐܵܡܹܝܢ.

²²ܒܵܥܹܐ ܐ̄ܢܵܐ ܕܹܝܢ ܡܸܢܟ݂ܘܿܢ ܐܲܚܲܝ̈. ܕܬܲܓ݁ܪܘܼܢ ܪܘܼܚܟ݂ܘܿܢ ܒܡܸܠܬ݂ܵܐ ܕܒ݂ܘܝܵܐܵܐ. ܡܛܠ ܕܒܲܙܥܘܿܪ̈ܝܵܬ݂ܵܐ ܗ̄ܘܼ ܟܸܬ݂ܒܹܬ݂ ܠܟ݂ܘܿܢ.

²³ܕܲܥܘ ܕܹܝܢ ܠܐܲܚܘܼܢ ܛܝܼܡܵܬܹܐܘܿܣ ܕܐܸܫܬܿܪܝܼ. ܘܐܸܢ ܒܲܥܓܲܠ ܢܹܐܬܹܐ ܥܲܡܹܗ ܐܸܚܙܹܝܟ݂ܘܿܢ.

²⁴ܫܲܐܠܘ ܒܲܫܠܵܡܵܐ ܕܟ݂ܠܗܘܿܢ ܡܕ݂ܲܒܪ̈ܵܢܲܝܟܿܘܿܢ. ܘܲܕ݂ܟ݂ܠܗܘܿܢ ܩܲܕ݁ܝܼܫܹ̈ܐ. ܫܵܐܠܝܼܢ ܒܲܫܠܵܡܟ݂ܘܿܢ ܟܠܗܘܿܢ ܕܡܸܢ ܐܝܼܛܵܠܝܼܵܐ.

²⁵ܛܲܝܒܘܼܬ݂ܵܐ ܥܲܡ ܟܠܟ݂ܘܿܢ. ܐܵܡܹܝܢ.